1 Em̧ool, āindein Irooj ej ba n̄an eok, karejera Josep Smith, Im̧ōņōņō kōn joortak eo am im kile ko am, ko kwaar kōm̧m̧ani; bwe n̄an jem̧ļo̧k in Iaar lelōn̄tak eok, bwe In maron̄ kwaļo̧k ļo̧k Aō mālōtlōt kōn men ko ^arem̧ōjņo̧ an laļ.

2 Jar ko am rem̧m̧an Im̧aō; im ilo uwaaki Ij ba n̄an eok, bwe kwe kūri eok kiiō kiiō n̄an kōm̧m̧ane juon kean̄ ekwōjarjar kōn gospel eo Aō, im kōn ^astake in Iaar katōte bwe en dekā in jabōn em̧ an Zaion, eo naaj kōmtale kōn metaltōl eo ejjeļo̧k ir jān juon im̧ōn kiin̄.

3 Kean̄ in enaaj kōm̧m̧an n̄an aolep ^akiin̄ ro an laļ, n̄an jem̧ļo̧k ko emān, n̄an president eo kāālete eutiej, im n̄an kabna ro reutiej an laļ eo kwōj mour ie, im n̄an aolep laļ ko an laļ rejjeplōklōk ijoko rettoļo̧k.

4 En jeje ilo jitōbōn ^aettā im jān kajoor eo an Jetōb Kwōjarjar, eo enaaj pād ilo kwe ilo iien an jeje ejja men in wōt;

5 Bwe naaj lewōj e n̄an eok jān Jetōb Kwōjarjar n̄an jeļā ankilaō kōn kiin̄ raņ im ripepe raņ, em̧ool ta enaaj wōtlo̧k ioer ilo juon iien eo ej itok.

6 Bwe, lo, I nan̄in itōn kūr ioer n̄an eo̧ron̄ meram eo im aiboojoj eo an Zaion, bwe iien eo karōke emoottok n̄an jepiaan liin.

7 Kwōn kūr, kōn menin, ioer kōn kean̄ eļļaaj, im kōn naan in kam̧ool eo am, im jab mijake er, bwe rej āinwōt ^aujooj, im aolep aer aiboojoj āinwōt wūt eo me ej jab to ej wōtlo̧k, bwe er ren maron̄ pād ilo ejjeļo̧k jekpen—

8 Im bwe In maron̄ loļo̧k er ilo raan in loļo̧k eo, n̄e Inaaj jojān pinjān kalbubu eo Aō, n̄an jitōn̄e m̧ōttan eo an rikebiōp ilubwiljin ro retao, ijo ewōr ^an̄i ļaļļaļ, eļan̄n̄e rej jab bōk ro karejera im naan in kam̧ool eo Aō me Iaar kwaļo̧k n̄an er.

9 Im bar juon alen, Inaaj loļo̧k im kapidodoik burueer, elōn̄ iaer n̄an em̧m̧anļo̧k eo ami, bwe kom̧in maron̄ lo jouj ilo mejaer, bwe ren maron̄ itok n̄an ^ameram in m̧ool eo, im ro riAelōn̄ ko n̄an kotak ak lelōn̄ļo̧k eo an Zaion.

10 Bwe raan in loļo̧k eo Aō ej m̧ōkajtok, ilo juon ^aawa eo n̄e kom̧ij jab ļōmņak kake; im ijo enaaj oņaake eo an armej ro Aō, im jikin koone n̄an ro renaaj pād wōt jān er?

11 Kom̧in ruj, O kiin̄ ro an laļ! Kom̧in itok, O, kom̧in itok, ippān gold ko ami im silver ko ami, n̄an jipan̄ eo an armej ro Aō, n̄an m̧weo im̧ōn kōrā ro nejin Zaion.

12 Im bar juon alen, em̧ool Ij ba n̄an eok, rikarejera Robert B. Thompson en jipan̄ eok n̄an je kean̄ in, bwe N̄a ebun̄buruō kake e, im bwe en pād ippam̧;

13 Kōtļo̧k bwe e, kōn menin, en eo̧ron̄ kapilōk eo am, im Inaaj kōjeraam̧m̧an e kōn juon wōrļo̧k in kōjeraam̧m̧an ko; e en tiljek im m̧ool ilo aolep men otemjeļo̧k jān iien in m̧aanļo̧k, im enaaj kanooj ļap ilo Meja;

14 A e en keememej bwe ^aeddo eo an Inaaj aikuji jān pā ko pein.

15 Im bar juon alen, em̧ool Ij ba n̄an eok, em̧ōņōņō rikarejera ^aHyrum Smith; bwe N̄a, Irooj, Ij iakwe e kōnke ^bm̧ool eo an būruōn, im kōnke e ej iakwe men eo me ejim̧we Im̧aō, Irooj ej ba.

16 Bar juon alen, rikarejera Jon C. Bennett en jipan̄ eok ilo jerbal eo am ilo jilkinļo̧k naan eo Aō n̄an kiin̄ ro im armej ro in laļ, im jutak iturum̧, em̧ool kwe karejera Josep Smith, ilo awa in en̄taan; im wōņāān e ban wōtlo̧k eļan̄n̄e e ej bōk ^akapilōk.

17 Im kōn iakwe eo an enaaj ļap, bwe enaaj Aō eļan̄n̄e ej kōm̧m̧ane men in, Irooj ej ba. Em̧ōj Aō lo jerbal eo me eaar kōm̧m̧ane, eo Ij bōk e eļan̄n̄e ej wōnm̧aanļo̧k, im naaj kūrawūni e kōn kōjeraam̧m̧an ko im eļap aiboojoj.

18 Im bar juon alen, Ij ba n̄an eok bwe ej ankilaō bwe karejera Lyman Wight en wōnm̧aanļo̧k ilo kwaļo̧k naan n̄an Zaion, ilo jitōbōn ettā, im kwaļo̧k Eō im̧aan laļ in; im Inaaj kotak e lōn̄ļo̧k āinwōt ioon pā ko pein ^abao igōl; im enaaj keotak aiboojoj im utiej n̄an e make im n̄an Eta.

19 Bwe n̄e enaaj kadedeļo̧k an jerbal I maron̄ bōktok e n̄an Ippa, em̧ool āinwōt Iaar kōm̧m̧an n̄an karejera ^aDevid Patten, eo ej pād Ippa ilo iien in, im barāinwōt karejera ^bEdward Partridge, im barāinwōt karejera ebwijwoļā ^cJosep Smith, Sen., eo ej jijet ^dippān Ebream ilo anbwijmaron̄ in pein, im jeraam̧m̧an im kwōjarjar ej e, bwe e ej Aō.

20 Im bar juon alen, em̧ool Ij ba n̄an eok, karejera George Miller ejjeļo̧k ^am̧oņ ippān; e emaron̄ juon lōke kōnke m̧ool eo an būruōn; im kōn iakwe eo me ej an n̄an naan in kam̧ool eo kōn Eō N̄a, Irooj, Ij iakwe e.

21 N̄a kōn menin Ij ba n̄an eok, Ij sili ioon bōran opij eo an juon ^aopij eo an bisop, āinwōt n̄an karejera Edward Partridge, bwe en maron̄ bōki mennin wūjlepļo̧k ko an m̧weo Im̧ō, bwe en maron̄ kōm̧akūtkūti kōjeraam̧m̧an ko ioon bōran ro rejeram̧ōl in armej ro Aō, Irooj ej ba. En ejjeļo̧k armej ej dike karejera George, bwe enaaj kautieje Eō.

22 Kōtļo̧k karejera George, im karejera Lyman, im karejera Jon Snider, im ro jet, n̄an kalōke juon ^aem̧ n̄an Eta, ejja eo wōt im karejera Josep enaaj kwaļo̧k n̄an er, ioon jikin eo me enaaj kwaļo̧k n̄an er barāinwōt.

23 Im enaaj n̄an juon im̧ōn jikin kōppād, juon em̧ eo ro reruwamāejet remaron̄ itok jān ettoļo̧k n̄an pād ie; kōn menin en juon em̧ em̧m̧an, tōllo̧ke nebar an aolep, bwe ^ariito-itak ekijeļo̧k emaron̄ lo ājmour im oņaake ke ej koļmānļo̧kijeņ kōn naan eo an Irooj; im ^bdekā in jabōn em̧ eo Iaar jitōn̄e n̄an Zaion.

24 M̧wiin enaaj juon jikin pād eājmour eļan̄n̄e ej ekkal n̄an Eta, im eļan̄n̄e kabna eo naaj jitōn̄e n̄an e enaaj ban kōtļo̧k jabdewōt ettoon n̄an itok ioon. Enaaj ekwōjarjar, ak Irooj ami Anij ej jamin jokwe ie.

25 Im bar juon alen, em̧ool Ij ba n̄an eok, aolep ro rekwōjarjar Aō ren itok jān ettoļo̧k.

26 Im kom̧in jilkinļo̧k ribōkļo̧k naan ro reiurjet, aaet, ribōkļo̧k naan kāālete er, im ba n̄an er: Kom̧in itok, ippān aolep gold ko ami, im silver ko ami, im dekā aorōk ko ami, im ippān aolep mennin etto ko ami reaorōk; im ippān aolep ro ewōr aer jeļā kōn mennin etto ko reaorōk, im renaaj itok, remaron̄ itok, im bōktok wōjke bo̧o̧k, im wōjke fōr, im wōjke pine, kobaļo̧k ippān aolep wōjke ko reaorōk in laļ in;

27 Im ippān aen, ippān kōba, im ippān brass, im ippān zinc, im ippān aolep men ko mweiōmi reaorōk in laļ; im kalōk juon ^aem̧ n̄an Eta, n̄an eo Eutiej Tata n̄an ^bjokwe ie.

28 Bwe ejjeļo̧k juon jikin loe ioon laļ E maron̄ itok n̄an e im bar ^akōjepļaaktok men eo me ekar jako jān kom̧, ak men eo me Eaar bōkļo̧k e, em̧ool tarlep in priesthood eo.

29 Bwe juon ^ajikin peptaij ej jab pād ioon laļ, bwe er, ro rekwōjarjar Aō, ren maron̄ ^bpeptaij kōn ro remej—

30 Bwe kain̄i in ej an m̧weo Im̧ō, im ban bōke n̄an Eō, ilo wōt raan ko in ami jeram̧ōl, ilo iien eo kom̧ij jab maron̄ kalōke juon em̧ n̄an Eō.

31 A Ij jiron̄ kom̧, aolep kom̧ ro rekwōjarjar Aō, n̄an ^akalōke juon em̧ n̄an Eō; im Ij lewōj n̄an kom̧ juon iien ebwe n̄an kalōke juon em̧ n̄an Eō; im ilo iien in peptaij ko ami naaj bōki n̄an Eō.

32 A lo, ilo jem̧ļo̧kin iien in jitōn̄e peptaij ko ami kōn rimej ro ami naaj ban bōki n̄an Eō; im eļan̄n̄e kom̧ij jab kōm̧m̧ani men kein ilo jem̧ļo̧kin iien in jitōn̄e naaj ban bōk kom̧ āinwōt juon kabun̄, ippān rimej ro ami, Irooj Anij ej ba.

33 Bwe em̧ool Ij ba n̄an kom̧, bwe ālikin an kar wōr ami iien ebwe n̄an kalōke juon em̧ n̄an Eō, ijo kain̄i eo in peptaij kōn ro remej ej dien kōm̧m̧an, im kōn eo me ejja men in wōt kar kajutake jān m̧okta jān foundasōn eo an laļ, peptaij ko ami kōn ro remej eban em̧m̧an n̄an Eō;

34 Bwe ilowaan ijo epād ^aki ko an priesthood eo ekwōjarjar ej kapit, bwe kom̧in maron̄ bōk utiej im aiboojoj.

35 Im ālikin iien in, peptaij ko ami kōn ro remej, jān ro rej ejjeplōklōk ijoko rettoļo̧k, ban bōki n̄an Eō, Irooj ej ba.

36 Bwe em̧ōj kōmālimi bwe ilo Zaion, im ilo stake ko an, im ilo Jerusalem, jikin ko me Iaar jitōn̄i n̄an jikin ^akoone, renaaj jikin ko n̄an peptaij ko ami kōn rimej ro ami.

37 Im bar juon alen, em̧ool Ij ba n̄an kom̧, ewi wāween an ^akwaļkoļ ko ami em̧m̧an n̄an Eō, ijello̧kun wōt n̄e kom̧in kōm̧m̧ani ilo juon em̧ me kom̧ ar kalōke n̄an Eta?

38 Bwe, bwe kōn un in Iaar jiron̄ Moses bwe en kalōke juon ^aem̧ nuknuk, bwe ren maron̄ ineeke ippāer ilo āne jem̧aden, im n̄an kalōke juon ^bem̧ ilo āneen kallim̧ur, bwe kain̄i kaņ ren maron̄ kwaļo̧ki ko rekar ņojak jān jinoin an kar laļ pād.

39 Kōn menin, em̧ool Ij ba n̄an kom̧, bwe ^aekkapit ko ami, im kwaļkoļ ko ami, im ^bpeptaij kōn rimej ko ami, im ^ckwelo̧k ekwōjarjar ko ami, im jar in ememļo̧kjeņ ko ami kōn ^dkatok ko ami kōm̧m̧ani jān ļōm̧aro nejin Livai, im kōn revelesōn ko ami ilo ^ejikin ko rekwōjarjar otem ekwōjarjar im kom̧ij bōk kōm̧m̧ao ko, im kakien ko im ekajet ko ami, kōn ijjino eo an revelesōn ko im foundasōn eo an Zaion, im kōn aiboojoj, utiej, im mennin letok ekwōjarjar eo an aolep rijokwe ro an, em̧ōj kapiti jān kain̄i eo an m̧weo Im̧ō ekwōjarjar, eo me armej ro Aō iien otemjej jiron̄ er n̄an kalōke n̄an Eta ekwōjarjar.

40 Im em̧ool Ij ba n̄an kom̧, m̧wiin en ekkal n̄an Eta, bwe In maron̄ kwaļo̧ki kain̄i ko Aō ijo n̄an armej ro Aō;

41 Bwe Ij watōke ekkar n̄an ^akwaļo̧k n̄an kabun̄ eo Aō men ko me kar ^bņooji jān m̧okta jān foundasōn eo an laļ, men ko rej ekkejeltok n̄an ^ctarlep in tōrean iien bōk eddo ko.

42 Im ^aInaaj kwaļo̧k n̄an karejera Josep aolep men ko rej ekkejeltok n̄an m̧wiin, im priesthood eo ie, im jikin eo me naaj kalōke ioon.

43 Im kom̧ naaj kalōke ioon jikin eo ijo kom̧ ar ļōmņake n̄an kalōke, bwe ijeņ ej lukkuun ijo me Iaar kāālete n̄an kom̧ n̄an ami kalōke.

44 Eļan̄n̄e kom̧ij jerbal kōn aolepān ami maron̄, Inaaj kōjenolo̧k ijo bwe en ^aekwōjarjar.

45 Im eļan̄n̄e armej ro Aō renaaj eo̧ron̄ Ainikiō, im ainikien ro ^akarejera ro im Iaar jitōn̄ er n̄an tōl armej ro Aō, lo, em̧ool Ij ba n̄an kom̧, er rej jamin em̧m̧akūt jān ijo jikier.

46 A eļan̄n̄e reban eo̧ron̄ Ainikiō, im jab ainikien ļōm̧arein ro im Iaar jitōn̄e er, reban jeraam̧m̧an, kōnke rej kattoone bwidej ko rekwōjarjar Aō, im kain̄i ekwōjarjar ko Aō, im jemān-āe ko, im naan ko rekwōjarjar Aō me Ij liļo̧k n̄an er.

47 Im enaaj waļo̧k bwe eļan̄n̄e kom̧ij kalōke juon em̧ n̄an Eta, im jab kōm̧m̧ani men ko Ij ba, Iban kōm̧m̧ane ^akanejnej eo me Ij kōm̧m̧ane n̄an kom̧, im jab kakūrm̧ool kallim̧ur ko me kom̧ij kōtmāni jān Peiū, Irooj ej ba.

48 Bwe ^aijello̧kun kōjeraam̧m̧an ko, kom̧, jān jerbal ko ami make, kom̧ij bōktok lia ko, illu, libabne, im ekajet ko ioon bōrami make, jān nouwe ko ami, im jān aolep mennin jōjō ko ami, ko me kom̧ij kōm̧m̧ani Im̧aō, Irooj ej ba.

49 Em̧ool, em̧ool, Ij ba n̄an kom̧, bwe n̄e Ij lewōj juon kien n̄an jabdewōt ian m̧aan ro nejin armej n̄an kōm̧m̧ane juon jerbal n̄an Eta, im m̧aan ro nejin armej raņ rej etal kōn aolepān aer maron̄ im kōn aolepān ewōr ippāer n̄an kōm̧m̧ane jerbal en, im jab bōjrak ilo aer ^alaļn̄ijn̄ij, im rikōjdat ro aer rej itok ioer im pinej er jān kōm̧m̧ane jerbal en, lo, ekkar n̄an Eō n̄an ^bjab aikuji jerbal eo ļo̧k wōt jān pein m̧aan ro nejin armej, ak n̄an bōke joortak ko aer.

50 Im nana im bōd ņae kakien ko im kien ko rekwōjarjar Aō Inaaj ^aloļo̧k ioon bōran ro rekar pineji jerbal eo Aō, n̄an ^bepepen eo kein kajilu im kein kāāmen, toun wōt aer jab ^cukeļo̧k, im dike Eō, Irooj Anij ej ba.

51 Kōn menin, kōn un in em̧ōj Aō bōke mennin joortak ko an ro Iaar jiron̄ er n̄an kalōk juon jikin kwelo̧k im juon ^aem̧ n̄an Eta, ilo ^bJackson Kounty, Missouri, im kar pinej er jān rikōjdat ro aer, Irooj ami Anij ej ba.

52 Im Inaaj uwaak kōn ^aekajet, illu, im libabne, lim̧ō, im liaajlo̧ļ, im n̄i ļaļļaļ ioon bōraer, n̄an epepen eo kein kajilu im kein kāāmen, toun wōt aer jab ukeļo̧k, im dike Eō, Irooj ami Anij ej ba.

53 Im men in Ij kōm̧m̧ane juon waanjon̄ok n̄an kom̧, n̄an ami kaenōm̧m̧an kōn aolep ro ekar m̧ōj jiron̄ er n̄an kōm̧m̧ane juon jerbal im kar pinej er jān pein rikōjdat ro aer, im jān kebiōp, Irooj ami Anij ej ba.

54 Bwe N̄aij Irooj ami Anij, im naaj lo̧mo̧o̧ren aolep ro ian ro jeiūm̧i im jātimi im rekar ^aerreo ilo burueer, im kar ^bm̧ane er ilo āneen Missouri, Irooj ej ba.

55 Im bar juon alen, em̧ool Ij ba n̄an kom̧, Ij jiron̄ kom̧ bar juon alen n̄an kalōk juon ^aem̧ n̄an Eta, em̧ool ilo jikin in, bwe kom̧in maron̄ ^bidajon̄jon̄e kom̧ make n̄an Eō bwe kom̧ij tiljek ilo aolep men otemjeļo̧k ko Iaar jiron̄ kom̧, bwe In maron̄ kōjeraam̧m̧an kom̧, im kūrawūni kom̧ kōn utiej, mour ejjeļo̧k jem̧ļo̧kin, im mour indeeo.

56 Im kiiō Ij ba n̄an kom̧, āinwōt an ekkejelļo̧k n̄an ^aim̧ōn jokwe eo me Iaar jiron̄ kom̧ n̄an kalōke n̄an ņa jikin ruwamāejet raņ, en ekkal n̄an Eta, im Eta en pād ioon, im karejera Josep im m̧weo im̧ōn en wōr jikier ie, jān epepen n̄an epepen.

57 Bwe ekkapit in em̧ōj Aō likūti ioon bōran, bwe kōjeraam̧m̧an eo an naaj barāinwōt likūti ioon bōran ro bwijjin ālikin e.

58 Im āinwōt Iaar ba n̄an ^aEbream kōn bwij ko in laļ in, em̧ool āindein Ij ba n̄an karejera Josep: Ilo kwe im ilo ^bineem bwij ko an laļ renaaj jeraam̧m̧an.

59 Kōn menin, karejera Josep im ineen ālikin e en wōr jikier ilo m̧ween, jān epepen n̄an epepen, n̄an indeeo im indeeo, Irooj ej ba.

60 Im etan m̧weo en ņa etan M̧weo Im̧ōn Nauvoo; im en juon jikin jokwe ekōm̧ōņōņō n̄an armej, im juon jikin kakkije n̄an riito-itak eo ekijeļo̧k, bwe en maron̄ koļmānļo̧kijeņ kōn aiboojoj an Zaion, im aiboojoj eo an in, dekā in jabōn em̧ eo an;

61 Bwe en maron̄ bōk barāinwōt kapilōk eo jān ro im Iaar likūt er āinwōt mennin ^aeddek ko rebun̄bun̄, im āinwōt ^brikakkōl ro ioon wōrwōr ko an.

62 Lo, em̧ool Ij ba n̄an kom̧, kōtļo̧k bwe karejera George Miller, im karejera Lyman Wight, im karejera Jon Snider, im karejera Piter Haws, ren ko̧koņ er make, im jitōn̄ juon iaer bwe en president eo ioon doulul eo aer n̄an unin ekkal eo an m̧ween.

63 Im renaaj ejaake juon jemān-āe, eo kake remaron̄ bōk stock n̄an ekkal eo an m̧ween.

64 Im ren jab naaj bōk edikļo̧k jān lemn̄oul taļa n̄an juon share in stock ilo m̧weo, im enaaj mālim n̄an aer bōk jon̄oulļalem to̧ujin taļa jān jabdewōt kajjojo armej n̄an an stock ilo m̧weo.

65 A en jab naaj mālim n̄an aer bōk eļapļo̧k jān jon̄oulļalem to̧ujin taļa stock jān jabdewōt kajjojo armej.

66 Im ren jab naaj mālim n̄an aer bōk ium̧win lemn̄oul taļa ko n̄an juon share in stock jān jabdewōt kajjojo armej ilo m̧ween.

67 Im ren jab naaj mālim n̄an aer bōk jabdewōt armej, āinwōt rijōbjōb stock ilo m̧wiin, ijello̧kun wōt n̄e ejja in wōt enaaj kōļļāik m̧ani eo an ilo peier ilo iien eo ej bōk stock;

68 Im ekkar wōt n̄an jon̄an m̧ani eo ej kōļļāiki ilo peier enaaj wōr an stock ilo m̧ween; a eļan̄n̄e ej kōļļā ļo̧k ejjeļo̧k ilo peier enaaj ban bōk jabdewōt stock ilo m̧ween.

69 Im eļan̄n̄e jabdewōt m̧ani kōļļāiki ilo peier e naaj n̄an stock ilo m̧ween, n̄an e make, im n̄an epepen eo an ālikin e, jān epepen n̄an epepen, toun wōt an im rijolōt ro an naaj dāpiji stock en, im jab wiakake ak bōkļo̧k stock eo jān peier jān anemkwōj in kāālet eo aer im aer jerbal make, eļan̄n̄e kom̧ naaj kōm̧anm̧an Ankilaō, Irooj ami Anij ej ba.

70 Im bar juon alen, em̧ool Ij ba n̄an kom̧, eļan̄n̄e karejera George Miller, im karejera Lyman Wight, im karejera Jon Snider, im karejera Piter Haws, rej bōk jabdewōt stock ilo peier, ilo m̧ani, ak ilo m̧weiuk n̄e rej bōk lukkuun aorōkin m̧ani, rej jamin naaj kōjjemo̧o̧je jabdewōt m̧ōttan stock enn̄an bar jabdewōt un, ijello̧kun wōt m̧ween.

71 Im eļan̄n̄e rej kōjjemo̧o̧je jabdewōt m̧ōttan stock eo bar ijoko jet, ijello̧kun wōt m̧ween, ilo ejjeļo̧k kōmālim jān eo ewōr an stock, im jab bar kōļļāiktok emān alen m̧anieo me rej kōjjemo̧o̧je ijoko jet, ijello̧kun wōt m̧weo, renaaj lia, im naaj kam̧akūt er jān ijo jikier, Irooj Anij ej ba; bwe N̄a, Irooj, Ij Anij, im ban ^akajjirere kake Eō ilo jabdewōt ian men kein.

72 Em̧ool Ij ba n̄an kom̧, karejera Josep en kōļļāik stock ilo peier n̄an ekkal eo an m̧ween, āinwōt an em̧m̧an n̄an e; a karejera Josep eban kōļļā eļapļo̧k jān jon̄oulļalem to̧ujin taļa stock ilo m̧ween, im jab ium̧win lemn̄oul taļa; im bar juon armej eban, Irooj ej ba.

73 Im ewōr bar ro jet barāinwōt rekōņaan jeļā ankilaō kake er, bwe rekar kajjitōk kake jān Peiū.

74 Kōn menin, Ij ba n̄an kom̧ kōn karejera Vinson Knight, eļan̄n̄e enaaj kōm̧anm̧an ankilaō kōtļo̧k bwe en likūt stock ilo m̧ween n̄an e make, im n̄an epepen eo ālikin e, jān epepen n̄an epepen.

75 Im e en kotak ainikien aetok im eļļaaj, ilubwiljin armej raņ, n̄an ^aakweļap kōn ro rijeram̧ōl im riaikuj; im en jab wōtlo̧k, im jab kōtļo̧k bwe būruōn en m̧ōjņo̧; im Inaaj ^bbōki joortak ko an, bwe reban n̄an Eō āinwōt joortak ko an Kein, bwe e enaaj Aō, Irooj ej ba.

76 Baam̧le eo an en m̧ōņōņō im ukōtļo̧k burueer jān en̄taan; bwe Iaar kāālet e im kapit e, im naaj kautieje ilubwiljin m̧weo im̧ōn, bwe Inaaj jeoriļo̧k aolep jero̧wiwi ko an, Irooj ej ba. Amen.

77 Em̧ool Ij ba n̄an kom̧, karejera Hyrum en likūt stock ilo m̧ween āinwōt n̄e ej lo ke em̧m̧an n̄an e, n̄an e make im epepen eo an ālikin e, jān epepen n̄an epepen.

78 Karejera Aisak Galland en likūt stock ilo m̧ween; bwe N̄a, Irooj, Ij iakwe e kōn jerbal eo ekar kōm̧m̧ane, im naaj jeorļo̧k aolep jero̧wiwi ko an; kōn menin, ren keememej e bwe en wōr an ilo m̧ween jān epepen n̄an epepen.

79 Karejera Aisak Galland en ijjitōn̄ ilubwiljimi, im en ekkapit jān karejera William Marks, im en kōjeraam̧m̧an jān e, n̄an ilo̧k ippān karejera Hyrum n̄an kadedeļo̧k jerbal eo karejera Josep enaaj jitōn̄ļo̧k n̄an erro, im renaaj kanooj jeraam̧m̧an.

80 Karejera William Marks en kōļļā stock ļo̧k ilo m̧ween, āinwōt n̄e ej lo ke em̧m̧an n̄an e make im epepen eo an, jān epepen n̄an epepen.

81 Karejera Henry G. Sherwood en kōļļā ļo̧k stock ilo m̧weo, āinwōt n̄e ej lo ke em̧m̧an n̄an e make im ineen ālikin e, jān epepen n̄an epepen.

82 Karejera William Law en kōļļā ļo̧k stock ilo m̧weo, n̄an e make im ineen ālikin e, jān epepen n̄an epepen.

83 Eļan̄n̄e enaaj kōm̧anm̧an ankilaō kōtļo̧k bwe en jab bōk baam̧le eo an n̄an āne ko iturear, em̧ool n̄an Kirtland; mekarta, N̄a, Irooj, Inaaj kalōkļo̧k Kirtland, a N̄a, Irooj, ewōr Ippa juon kaen̄tanaan kōpooje n̄an ro rej pād ie.

84 Im kōn karejera Almon Babbitt, ewōr men ko me kaki Ij jab m̧ōņōņō; lo, ej kappukot n̄an katōt kapilōk eo an ijello̧kun kapilōk eo me Iaar kōmālimi, em̧ool eo an Presidency eo an Kabun̄ eo Aō; im ej kajutak juon ^akunen kau kom̧aan kōm̧m̧an jān gold n̄an kabun̄-jar an armej ro Aō.

85 En ejjeļo̧k armej ej ^aetal jān jikin in eo ekar itok ijin n̄an kappukot n̄an kōjparok kien ko Aō.

86 Eļan̄n̄e rej jokwe ijin ren jokwe n̄an Eō; im eļan̄n̄e rej mej ren mej n̄an Eō; bwe renaaj ^akakkije jān aolep jerbal ko aer ijin, im naaj wōnm̧aanļo̧k ilo jerbal ko aer.

87 Kōn menin, karejera William en likūt an lōke ilo N̄a, im bōjrak an mijak kōn baam̧le eo an, kōnke nan̄inmej eo an āneo. Eļan̄n̄e kom̧ij ^aiakwe Eō, kōjparoki kien ko Aō; im nan̄inmej eo an āneo enaaj ^boktak n̄an ami aiboojoj.

88 Karejera William en ilo̧k im kabun̄bun̄ļo̧k gospel eo Aō ejjeļo̧k jem̧ļo̧kin kōn juon ainikien eļļaaj, im kōn eļap lan̄lōn̄, āinwōt enaaj em̧m̧akūt ioon jān ^aJetōb eo Aō, n̄an ro rej pād ilo Warsaw, im barāinwōt n̄an ro rej pād ilo Carthage, im barāinwōt n̄an ro rej pād ilo Burlington, im barāinwōt n̄an ro rej pād ilo Madison, im kōttar ilo kōmmaanwa im laļn̄ijn̄ij kōn eļapļo̧k naan in tōl ilo kwelo̧k eo eļap Aō, Irooj ej ba.

89 Eļan̄n̄e enaaj kōm̧anm̧an ankilaō jān iien eo m̧aanļo̧k en eo̧ron̄ kapilōk an karejera Josep, im kōn ijo an rie ^ajibadbad eo an ro rejeram̧ōl, im kōm̧m̧ane ilo bok ^bukok eo ekāāl an naan eo ekwōjarjar Aō n̄an ro rej pād ilaļ.

90 Im eļan̄n̄e enaaj kōm̧m̧ane men in Inaaj ^akōjeraam̧m̧ane e kōn juon wōrļo̧k in kōjeraam̧m̧an ko, bwe ren jab eļļo̧k jān e, im ineen en jab lo aer ^bkōjmaaļ kijeer.

91 Im bar juon alen, em̧ool Ij ba n̄an kom̧, karejera William en jitōn̄e, kapiti, im kōjeraam̧m̧an e, āinwōt rikōkapilōklōk n̄an karejera Josep, ilo ijo jikin karejera Hyrum, bwe karejera Hyrum en maron̄ bōk opij eo an Priesthoodim ^aPetriak, eo kar jitōn̄e n̄an e jān jemān, jān kōjeraam̧m̧an im barāinwōt jān jim̧we;

92 Bwe jān iien eo m̧aanļo̧k enaaj kabwijer ki ko an ^akōjeraam̧m̧an ko an petriak ioon bōran aolep armej ro Aō,

93 Bwe jabdewōt ej kōjeraam̧m̧ane enaaj jeraam̧m̧an, im jabdewōt ej ^akaliaiki enaaj lia; bwe jabdewōt enaaj ^bliāpe ioon laļ naaj liāpe ilo lan̄; im jabdewōt enaaj kōtļo̧k ioon laļ naaj kōtļo̧ke ilo lan̄.

94 Im jān iien in m̧aanļo̧k Ij jitōn̄ n̄an e bwe en maron̄ juon rikanaan, im juon ^arilolo, im juon rikkwaļo̧k revelesōn n̄an kabun̄ eo Aō, im barāinwōt karejera Josep;

95 Bwe en maron̄ barāinwōt m̧akūtkūt ilo juon wōt ippān karejera Josep; im bwe enaaj bōk kapilōk jān karejera Josep, eo enaaj kwaļo̧k n̄an e ^aki ko im kaki emaron̄ kajjitōk im bōk, im kūrawūn kōn ejja wōt kōjeraam̧m̧an eo, im aiboojoj, im utiej, im priesthood, im mennin letok ko an priesthood eo, ko juon iien kar likūti ioon e eo ekar karejera ^bOliver Cowdery;

96 Bwe karejera Hyrum en maron̄ jeje kam̧ool kōn men ko me Inaaj kwaļo̧ki n̄an e, bwe etan en maron̄ pād ilo ememļo̧kjeņ ko reutiej jān epepen n̄an epepen, indeeo im indeeo.

97 Karejera William Law en barāinwōt bōk ki ko me kaki emaron̄ kajjitōk im bōk kōjeraam̧m̧an ko; e en ^aettā Im̧aō, im en ejjeļo̧k ^bm̧oņ ippān, im enaaj bōk jān Jetōb eo Aō, em̧ool eo ^cRikaenōm̧m̧an, eo enaaj kwaļo̧k n̄an e m̧ool eo kōn aolep men otemjeļo̧k, im naaj leļo̧k n̄an e, ilo ejja awa eo wōt, ta enaaj ba.

98 Im ^akakōļļe kein renaaj ļoore e—enaaj ^bkōmour ro rinan̄inmej, enaaj kadiwōjļo̧k devil ko, im naaj lo̧mo̧o̧ren e jān ro renaaj kar leļo̧k n̄an e baijin in m̧anm̧an;

99 Im naaj tōl e ilo iaļ ko ijo ^ajedpānit ko rōbaijin rejjab maron̄ kiji jim̧win neen, im enaaj jutakļo̧k ilo ^bļōmņak eo an koļmānļo̧kijeņ ko āier wōt ioon pā ko pein igōl.

100 Im ta eļan̄n̄e naaj Ankilaō bwe en kōjerkak ro remej, e en jab dāpij ainikien.

101 Kōn menin, karejera William en kūr eļļaaj im jab dāpiji, kōn lan̄lōn̄ im lo̧udin̄din̄, im kōn hosana ko n̄an E eo ej jijet ioon tūroon indeeo im indeeo, Irooj ami Anij ej ba.

102 Lo, Ij ba n̄an kom̧, ewōr juon mijen Ippa n̄an karejera William, im karejera Hyrum, im n̄an erro wōt; im karejeran Josep en pād im̧weo im̧ōn, bwe e reaikuji. Bwe eo Inaaj kwaļo̧k n̄an kom̧ tokālik. Em̧ool āindein. Amen.

103 Im bar juon alen, em̧ool Ij ba n̄an kom̧, eļan̄n̄e karejera ^aSidney enaaj jerbal n̄an Eō im juon rikōkapilōklōk n̄an karejera Josep, e en jerkak im itok im jutak ilo opij in kūr eo an, im kōttāik e Im̧aō.

104 Im eļan̄n̄e enaaj letok n̄an Eō juon joortak em̧m̧an, im kile ko, im pād wōt ippān armej ro Aō, lo, N̄a, Irooj ami Anij, Inaaj kōmour e bwe en mour; im enaaj kotak ainikien bar juon alen ioon toļ ko, im naaj juon ^arikōnono im̧aan Meja.

105 E en itok im doore baam̧le eo an ilo jikin me karejera Josep ej jokwe ie.

106 Im ilo aolep ito-itak ko an en kotak ainikien āinwōt kōn ainikien juon jilel, im kakkōl ro rej pād ioon laļ n̄an ko jān illu eo ej itok.

107 E en jipan̄ karejera Josep, im barāinwōt karejera William Law en jipan̄ karejera Josep, ilo kōm̧m̧ane juon ^akean̄ ekwōjarjar n̄an kiin̄ ro an laļ, em̧ool āinwōt Iaar m̧oktaļo̧k ba n̄an kom̧.

108 Eļan̄n̄e karejera Sidney enaaj kōm̧anm̧an ankilaō, en jab kōm̧akūt baam̧le eo an n̄an ^abukwōn ko iturear, a en ukōte jikin jokwe eo aer, em̧ool āinwōt Iaar ba.

109 Lo, ej jab ankilaō bwe en kappukot oņaake im jikin koone jān jikin kwelo̧k eo me Iaar jitōn̄e n̄an kom̧, em̧ool jikin kwelo̧k in ^aNauvoo.

110 Em̧ool Ij ba n̄an kom̧, em̧ool kiiō, eļan̄n̄e enaaj eo̧ron̄ Ainikiō, enaaj em̧m̧an ippān. Em̧ool āindein. Amen.

111 Im bar juon alen, em̧ool Ij ba n̄an kom̧, karejera Amos Davies en kōļļā stock ilo pein ro im Iaar jitōn̄ er n̄an kalōke juon im̧ōn jokwe, em̧ool M̧weo Im̧ōn Nauvoo.

112 Men in en kōm̧m̧an eļan̄n̄e enaaj wōr an; im en eo̧ron̄ kapilōk eo an karejera Josep, im jerbal kōn pein make bwe en maron̄ bōk lōke eo an armej raņ.

113 Im n̄e enaaj kam̧ool an tiljek ilo aolep men otemjeļo̧k naaj lōke kaki ilo oņaake eo an, aaet, em̧ool jet men ko, enaaj ^airooj ioon elōn̄;

114 Kōn menin en ^akōttāik e make bwe en maron̄ utiej. Em̧ool āindein. Amen.

115 Im bar juon alen, em̧ool Ij ba n̄an kom̧, eļan̄n̄e karejera Robert D. Foster enaaj pokake Ainikiō, en kalōk juon em̧ n̄an karejera Josep, ekkar n̄an koņ eo me eaar kōm̧m̧ane ippān, āinwōt kōjām eo enaaj peļļo̧k n̄an e jān iien n̄an iien.

116 Im e en ukeļo̧k jān aolep an nouwe, im ņa ballin kōn ^aiakwe-em̧ool; im bōjrak jān kōm̧m̧an nana, im utūkļo̧k aolep ekkōnono ko an reddo;

117 Im kōļļā stock barāinwōt ilo pein doulul eo an M̧weo Im̧ōn Nauvoo, n̄an e make im n̄an epepen eo an ālikin e, jān epepen n̄an epepen;

118 Im eo̧ron̄ kapilōk eo an ro karejera Josep, im Hyrum, im William Law, im n̄an maron̄ ko me em̧ōj Aō kar kūr er n̄an kōbabuik foundasōn eo an Zaion; im enaaj em̧m̧an ippān indeeo im indeeo. Em̧ool āindein. Amen.

119 Im bar juon alen, em̧ool Ij ba n̄an kom̧, en ejjeļo̧k armej ej kōļļā stock n̄an doulul eo an M̧weo Im̧ōn Nauvoo eo ijello̧kun n̄e ej juon ritōmak ilo Bok in Mormon, im revelesōn ko Iaar liwōj n̄an kom̧, Irooj ami Anij ej ba;

120 Bwe men eo me ^aeļapļo̧k ak dikļo̧k jān in ej itok jān nana, im naaj abare kōn lia ko im jab kōjeraam̧m̧an ko, Irooj ami Anij ej ba. Em̧ool āindein. Amen.

121 Im bar juon alen, em̧ool Ij ba n̄an kom̧, doulul eo an M̧weo Im̧ōn Nauvoo eo en jejjet an kōļļāik wōņāān ko n̄an aolep jerbal ko aer me rej kōm̧m̧ani ilo kalōke M̧weo Im̧ōn Nauvoo eo; im wōņāān ko aer ren āinwōt ekkar n̄an errā eo ilubwiljier make, āinwōt an ekkejelļo̧k n̄an wōņāān eo.

122 Im aolep armej ro rej kōļļā stock ren ineek ijo kuņaan ilo wōņāān ko aer, eļan̄n̄e emennin aikuj, n̄an rejetake eo aer, Irooj ej ba; eļan̄n̄e jaab, jerbal ko aer naaj bōnbōn n̄an er kōn stock ilo m̧weo. Em̧ool āindein. Amen.

123 Em̧ool Ij ba n̄an kom̧, Ij kiiō lewōj n̄an kom̧ ^aopija ro an Priesthood eo Aō, bwe kom̧in maron̄ kabwijer ^bki ko an, em̧ool Priesthood eo me ej ilo̧kan laajrak eo an ^cMelkizedek, eo ej ilo̧kan laajrak eo an eo Nejū Emake Keotake.

124 M̧oktata, Ij lewōj n̄an kom̧ Hyrum Smith bwe en juon ^apetriak n̄an kom̧, n̄an kabwijer kōjeraam̧m̧an ko in ^bsil an kabun̄ eo Aō, em̧ool Jetōb Kwōjarjar in ^ckallim̧ur, eo kake kom̧ij ^dsil n̄an raan in lo̧mo̧o̧ren eo, bwe kom̧in maron̄ jab wōtlo̧k mekarta n̄e ^eawa in kapo emaron̄ itok ioomi.

125 Ij lewōj n̄an kom̧ karejera Josep bwe en elder eo ej tōl ioon aolepān kabun̄ in Aō, bwe en juon riukok, juon rikkwaļo̧k revelesōn, juon ^arilolo, im rikanaan.

126 Ij leļo̧k n̄an e n̄an rikōkapilōklōk ro karejera Sidney Rigdon im karejera William Law, bwe rein ren booje juon doulul im Presidency eo Kein Kajuon, n̄an bōki ^akanaan ko n̄an aolepān kabun̄ in.

127 Ij lewōj n̄an kom̧ karejera ^aBrigham Young bwe en juon president ioon Jon̄oulruo ko̧o̧njeļ in ito-itak eo;

128 ^aJon̄oulruo ro im rej kabwijer ki ko n̄an kōpeļļo̧k maron̄ eo an aelōn̄ in kiin̄ eo Aō ioon m̧ōttan ko emān in laļ in, im ālikin men in n̄an ^bjilkinļo̧k naan eo Aō n̄an armej otemjeļo̧k.

129 Er rein rej Heber C. Kimball, Parley P. Pratt, Orson Pratt, Orson Hyde, William Smith, Jon Taylor, Jon E. Page, Wilford Woodruff, Willard Richards, George A. Smith;

130 ^aDevid Patten em̧ōj Aō ^bbōke n̄an Eō make; lo, priesthood eo an ejjeļo̧k armej ej bōk jān e; a, em̧ool Ij ba n̄an kom̧, bar juon maron̄ jitōn̄e n̄an ejja kūr eo wōt.

131 Im bar juon alen, Ij ba n̄an kom̧, Ij lewōj n̄an kom̧ juon ^ako̧o̧njeļ eo eutiej, n̄an dekā in jabōn em̧ an Zaion—

132 Etaer, Samuel Bent, Henry G. Sherwood, George W. Harris, Charles C. Rich, Tomas Grover, Newel Knight, Devid Dort, Dunbar Wilson—Seymour Brunson em̧ōj Aō bōke n̄an Eō make; ejjeļo̧k armej ej bōk priesthood eo an, a bar juon maron̄ jitōn̄e n̄an ejja priesthood in wōt ilo jikin; im em̧ool Ij ba n̄an kom̧, karejera Aron Johnson en ekkapit n̄an kūr in ilo jikin—Devid Fullmer, Alpheus Cutler, William Huntington.

133 Im bar juon alen, Ij lewōj n̄an kom̧ Don C. Smith bwe en president ioon juon doulul eo an pris utiej ro;

134 Kain̄i eo me kar kajutake n̄an un in n̄an lale ro rekkar im renaaj jitōn̄e er n̄an president ro an jikin ko ak rijerbal ro ioon ^astake ko wōj rej ejjeplōklōk ijoko rettoļo̧k;

135 Im remaron̄ ito-itak barāinwōt eļan̄n̄e rej kāālete, a ijello̧kun in rej ekkapit n̄an president ro an jikin ko; en̄in ej opij in kūr eo aer, Irooj ami Anij ej ba.

136 Ij lewōj n̄an kom̧ Amasa Lyman im Noa Packard n̄an rikōkapilōklōk ro, bwe ren maron̄ tōl ioon doulul eo an pris utiej ro an kabun̄ eo Aō, Irooj ej ba.

137 Im bar juon alen, Ij ba n̄an kom̧, Ij lewōj n̄an kom̧ Jon A. Hicks, Samuel Williams, im Jesse Baker, priesthood eo me ej tōl ioon doulul eo an ^aelder ro, doulul eo kar kajutake n̄an minister ro an jikin ko; ijoke remaron̄ ito-itak, ak rej ekkapit n̄an minister ro an jikin ko n̄an kabun̄ eo Aō, Irooj ej ba.

138 Im bar juon alen, Ij lewōj n̄an kom̧ Josep Young, Josaia Butterfield, Daniel Miles, Henry Herriman, Zera Pulsipher, Livai Hancock, Jemes Foster, n̄an tōl ioon doulul eo an ^ajiljilimjuonn̄oul ro;

139 Doulul eo me kar kajutake n̄an elder in ito-itak ro n̄an kwaļo̧k kam̧ool kōn Eta ilo aolepān laļ, ijoko jabdewōt ko̧o̧njeļ eo eutiej rej ito-itak eo, rijjilōk ro Aō, renaaj jilkinļo̧k er n̄an kōpooje iaļ eo im̧aan Meja.

140 Oktak eo ikōtaan doulul in im doulul eo an elder ro ej juon en ito-itak wōt iien otemjej, im eo juon en tōl ioon aolep jarlepju in rijar ko jān iien n̄an iien; juon ej an eddo eo n̄an tōl jān iien n̄an iien, im eo juon ejjeļo̧k an eddo n̄an tōl, Irooj ami Anij ej ba.

141 Im bar juon alen, Ij ba n̄an kom̧, Ij lewōj n̄an kom̧ Vinson Knight, Samuel H. Smith, im Shadrak Roundy, eļan̄n̄e enaaj bōk e, n̄an tōl ioon ^abisoprik; juon jeļā eo kōn bisoprik in ba kake kar lewōj n̄an kom̧ ilo bok in ^bKatak im Bujen Ko.

142 Im bar juon alen, Ij ba n̄an kom̧, Samuel Rolfe im rikōkapilōklōk ro an n̄an pris ro, im president eo an rikaki ro im rikōkapilōklōk ro an, im barāinwōt president eo an tikōn ro im rikōkapilōklōk ro an, im barāinwōt president eo an stake eo im rikōkapilōklōk ro an.

143 Opija rein ijin ilōn̄ em̧ōj Aō liwōj n̄an kom̧, im ki ko ippāer, n̄an jipan̄ ko im tōl ko, n̄an jerbal eo an jerbal in im ^akōweeppānļo̧k ro rekwōjarjar Aō.

144 Im juon kien Ij lewōj n̄an kom̧, bwe kom̧in kanne kobban aolep opij kein im ^akōweeppān aolep āt ko Iaar ba kaki, n̄e jaab jab kōweeppāni ilo kwelo̧k eo eļap Aō;

145 Im bwe kom̧ij aikuj kōpooj jikin ko n̄an aolep opija rein ilo m̧weo Im̧ō n̄e kom̧ij kalōke n̄an Eta, Irooj ami Anij ej ba. Em̧ool āindein. Amen.