Jekjōn 70
Revelesōn letok kōn Josep Smith Rikanaan eo, ilo Hiram, Ohio, Nobōm̧ba 12, 1831. Bwebwenato an Rikanaan eo ej kaalikkar bwe emān kwelo̧k ko rejenolo̧k rekar kōm̧m̧an jān 1 raan n̄an 12 raan in Nobōm̧ba, ilo kōtaan in. Ilo kwelo̧k eo āliktata in rkwelo̧k kein, aorōk eo eļap an revelesōn ko im tokālik naaj likūti ilo bok bwe en Book of Commandments (Bok in Kien Ko), innām ālkin Katak im Bujen Ko kar watōke. Revelesōn in kar leļo̧k ālkin an kar kwelo̧k eo kāālōt ke revelesōn ko rekar “aorōk n̄an Kabun̄ jān m̧weie ko an aolepān Laļ.” Bwebwenato eo an Josep Smith ej ba bwe revelesōn in ej “pedped eo an Kabun̄ in ilo raan kein āliktata, im juon jeraam̧m̧an n̄an laļ in, im ej kwaļo̧k bwe ki ko an mennin ittino ko an aelōn̄ eo an ad Rilo̧mo̧o̧r rej bar lōke armej kaki.”
1–5, Rijerbal ro kar jitōn̄ er n̄an likūt ilo bok revelesōn ko; 6–13, Ro rej jerbal ilo men ko an jetōb rej tōllo̧ke wōņāer; 14–18, Ro Rekwōjarjar ren jon̄aer wōt juon ilo men ko an kanniōk.
1 Lo, im eo̧ron̄, O kom̧ ro rej pād ilo Zaion, im aolep kom̧ armej in kabun̄ eo Aō rej pād ettoļo̧k, im ron̄ naan eo an Irooj eo me Ij lewōj n̄an rikarejera Josep Smith, Jun., im barāinwōt n̄an rikarejera Martin Harris, im barāinwōt n̄an rikarejera Oliver Cowdery, im barāinwōt n̄an rikarejera Jon Whitmer, im barāinwōt n̄an rikarejera Sidney Rigdon, im barāinwōt n̄an rikarejera William W. Phelps, jān iaļan kien n̄an er.
2 Bwe Ij leļo̧k n̄an er juon kien; kōn menin eo̧ron̄ im ron̄jake, bwe āindein Irooj ej ba n̄an er—
3 N̄a, Irooj, Iaar jitōn̄ er, im kapit er n̄an arijerbal ro ioon revelesōn ko im kien ko me Iaar liļo̧k n̄an er, im ko tokālik Inaaj liļo̧k n̄an er;
4 Im juon ennaan in jerbal in Inaaj aikuji jān er ilo raan in ekajet eo.
5 Kōn menin, Iaar jitōn̄e n̄an er, im en̄in ej jerbal eo aer ilo kabun̄ eo an Anij, n̄an kajeikiki er im n̄irbōktak ko kaki, aaet, jeraam̧m̧an ko jāni.
6 Kōn menin, juon kien Ij leļo̧k n̄an er, bwe ren jab naaj liļo̧k men kein n̄an kabun̄ in, im jab n̄an laļ in;
7 Mekarta, toun wōt aer bōk eļapļo̧k jān aikuji n̄an mennin aikuj ko im kōņaan ko aer, e naaj leļo̧k ilo aim̧ōn ko̧koņ eo Aō;
8 Im jeraam̧m̧an ko renaaj kōjenolo̧ki n̄an ro rej pād ilo Zaion, im n̄an epepen ko aer, toun wōt aer erom arijolōt ekkar n̄an kien ko an aelōn̄ eo.
9 Lo, en̄in ej ta Irooj eaikuji jān em̧m̧aan otemjej ilo aeddo eo an, em̧ool āinwōt N̄a, Irooj, Iaar jitōn̄ ak naaj tokālik jitōn̄ n̄an jabdewōt em̧m̧aan.
10 Im lo, ejjeļo̧k juon ej jo̧o̧r jān kien in im ej an kabun̄ eo an Anij eo emour;
11 Aaet, jab bisop eo, jab aeo ej lale im̧ōn ko̧koņ eo an Irooj, jab e eo jitōn̄ ilo eddo ko ioon men ko an kanniōk.
12 E eo jitōn̄ e n̄an kōm̧m̧ani men ko an jetōb, ejja in wōt ej atōllo̧ke wōņāān, em̧ool āinwōt ro jitōn̄ er n̄an kōm̧m̧ani men ko an kanniōk;
13 Aaet, em̧ool ekanooj ļapļo̧k, ļapļo̧k eo me ej wōrļo̧k n̄an er kōn waļo̧k ko an Jetōb.
14 Mekarta, ilo men ko mweiōmi ilo kanniōk kom̧ naaj ajon̄an wōt juon, im men in ej jab ilo ebbanban, eļan̄n̄e jab ļapļo̧k in waļo̧k ko an Jetōb naaj dāpiji.
15 Kiiō, akien in Ij leļo̧k n̄an ro rikarejera n̄an em̧m̧anļo̧k eo aer ke rej pād wōt, āinwōt juon waļo̧k in kōjeraam̧m̧an ko Aō ioon bōraer, im n̄an juon nebar kōn bniknik eo aer im n̄an oņaake eo aer;
16 N̄an m̧ōn̄ā im n̄an aballe; n̄an juon jolōt; n̄an m̧ōko im n̄an wāto ko, ilo jabdewōt jekjek ko N̄a, Irooj, Inaaj likūt er ie, im jabdewōt jikin eo N̄a, Irooj, Inaaj jilkinļo̧k er.
17 Bwe rekar tiljek ioon aelōn̄ men ko, im kar kōm̧m̧an em̧m̧an toun wōt aer kar jab jero̧wiwi.
18 Lo, N̄a, Irooj, Ij atūriam̧o im naaj kōjeraam̧m̧an er, im renaaj deļo̧n̄ļo̧k ilo lan̄lōn̄ eo an men kein. Em̧ool āindein. Amen.