Jekjōn 104
Revelesōn leļo̧k n̄an Josep Smith Rikanaan eo, ilo ak epaakeļo̧k Kirtland, Ohio, Eprōļ 23, 1834, kōn Kumi in Bōrokuk eo (laļe kōm̧eļeļe ko ijōbbōran jekjōk 78 im 82). Tōre jab in āinwōt ekar iien kwelo̧k eo an ko̧o̧njeļ eo an ro uwaan Kumi in Bōrokuk eo, eo me ekar ekkōnono kōn mennin aikuj ko an Kabun̄ rejidimkij. Ilo kar juon kweļo̧k im̧aanļo̧k an kumi eo ilo Eprōļ 10 ekar ben bwe doulul eo eaikuj mejaļļo̧k. Revelesōn in ej jiron̄ bwe kumi eo ijjello̧kin mejaļļo̧k en bar ekkar; men ko m̧weien ren ajeje ilubwiljin ro uwan kumi eo āinwōt ijoko kwonaer. Iumin tōl an Josep Smith, naan eo “Kumi in Bōrokuk” tok ālik kar na jikin kōn naan eo “Koņ in Bōrokuk” ilo revelesōn eo.
1–10, Ro Rekwōjarjar rej bōd ņae koņ in bōrokuk eo renaaj lia; 11–16, Irooj ej kakke n̄an Ro Rekwōjarjar An ilo wāween eo An make; 17–18, Kien gospel ej tōl oņaake eo an ro rejeram̧ōl; 19–46, Eddo ko im kōjeraam̧m̧an ko an elōn̄ ian em̧m̧aan ro rej kōllaajraki; 47–53, Koņ in bōrokuk eo ilo Kirtland im koņ eo ilo Zaion ren jenolo̧k ilo aer m̧akūtkūt; 54–66, Alele ekwōjarjar in jāān eo an Irooj ej jutak n̄an kōm̧m̧ani ilo bok jeje ko rekwōjarjar; 67–77, Jikin jāān eo eļap an koņ in bōrokuk eo en jerbal ilo pedped in errā an aolep; 78–86, Ro ilo koņ in bōrokuk eo ren kōļļāik aolep m̧uri ko aer, im Irooj enaaj kōtļo̧k er jān ineen kōm̧akoko an jāān.
1 Em̧ool Ij ba n̄an kom̧, ro jera, Ij lewōj n̄an kom̧ kapilōk, im juon kien, kōn aolep men ko rej m̧weiien koņ eo me Iaar jiron̄ kom̧ n̄an karōke im kajutake, bwe en juon akoņ in bōrokuk, im juon koņ ejjeļo̧k jem̧ļo̧kin n̄an em̧m̧an eo an kabun̄ eo Aō, im n̄an lo̧mo̧o̧ren eo an armej raņ m̧ae Aō itok—
2 Ippān kallim̧ur ban joļo̧ke ak ukukōte, bwe toun wōt an ro Iaar jiron̄ er kar tiljek en kar kōjeraam̧m̧an er kōn juon wōrļo̧k in kōjeraam̧m̧an ko;
3 A toun wōt aer kar jab tiljek rekar epaakeļo̧k kalia.
4 Kōn menin, toun wōt an jet ian ro rikarejera kar jab kōjparok kien eo, ak rekar rupe bujen eo kōn aankoņak, im kōn naaj naan ko rewaan, Iaar kaliaik er kōn juon lia ekanooj eddo im kōmetak.
5 Bwe N̄a, Irooj, Iaar kean̄ ilo buruō, bwe toun wōt an jabdewōt armej eo ej pād ilo koņ eo naaj lo e juon rirupe kien, ak, ilo bar jet naan, naaj rupe bujen eo im kom̧ij lokjak kake, e enaaj lia ilo mour eo an, im naaj jujuri laļļo̧k jān eo I kōņaan;
6 Bwe N̄a, Irooj, I ban kōtļo̧k bwe ren akajjirere kake Eō ilo men kein—
7 Im aolep men in bwe ro ejjeļo̧k ruweer ilubwiljimi ren maron̄ jab liaakeļo̧k er ippān ro raankeke; im bwe ro ewōr ruweer ilubwiljimi ren maron̄ jab jo̧o̧r; kōnke N̄a, Irooj, Iaar kallim̧ur n̄an kom̧ akūrawūn in aiboojoj eo ianbwijmaron̄ in Peiū.
8 Kōn menin, toun wōt lo kom̧ ro rej rupe, kom̧ jab maron̄ jo̧o̧r jān Aō libabne ilo mour ko ami.
9 Toun wōt ami am̧wijkōkļo̧k kōn rupe kien, kom̧ jab maron̄ bar jo̧o̧r jān bkaen̄tanaan ko an cSetan m̧ae raan in lo̧mo̧o̧r.
10 Im kiiō Ij lewōj n̄an kom̧ kajoor jān lukkuun awa in wōt, bwe eļan̄n̄e jabdewōt armej ilubwiljimi, jān koņ eo, loe bwe ej rirupe kein im jab ukeļo̧k jān nana eo, bwe kom̧ naaj leļo̧k e n̄an kaen̄tanaan ko an Setan; im enaaj ban wōr an kajoor n̄an abōktok nana ioomi.
11 Ej mālōtlōt ilo N̄a; kōn menin, juon kien Ij lewōj n̄an kom̧, bwe kom̧ naaj ko̧koņ kom̧ make im jitōn̄ aolep armej aeddo eo an;
12 Bwe aolep armej en maron̄ letok ennaan eo n̄an Eō kōn eddo eo an me kar jitōn̄e n̄an e.
13 Bwe e ej mennin aikuj bwe N̄a, Irooj, in kōm̧m̧an bwe aolep armej en abōk eddo, āinwōt juon bribōk eddo ioon kōjeraam̧m̧an ko an laļ, ko me Iaar kōm̧m̧ani im kōpooji n̄an mennin mour ko Aō.
14 N̄a, Irooj, Iaar erļo̧kiļo̧k lan̄ ko, im akalōke laļ in, lukkuun beļtan Peiū; im aolep men ko otemjeļo̧k ilowaer rej Aō.
15 Im ej Aō kōttōpar n̄an ņa an ro rekwōjarjar Aō, bwe aolep men ko otemjeļo̧k rej Aō.
16 A eaikuj in kōm̧m̧an ilo awāween eo Aō make; im lo en̄in ej wāween eo bwe N̄a, Irooj, Iaar kean̄ n̄an ņa an ro rekwōjarjar Aō, bwe ro brijeram̧ōl naaj kautiej er, ilo jekjek eo im ro rim̧weiie naaj kōttāik er.
17 Bwe alaļ ej obrak, im eļap bwe eo ie; aaet, Iaar kōpooj aolep men ko, im kar liļo̧k n̄an ro nejin armej bwe ren bripinej jenkwaer make.
18 Kōn menin, eļan̄n̄e jabdewōt armej enaaj bōk jān abun̄-pāļo̧k eo Iaar kōm̧m̧ane, im jab ajeje kōj eo an, ekkar n̄an bkien eo an gospel eo Aō, n̄an ro crijeram̧ōl im ro riaikuj, e enaaj, ippān ro renana, kotak mej ko mejān ilo dhell, im pād ilo en̄taan.
19 Im kiiō, em̧ool Ij ba n̄an kom̧, kōn men ko m̧weiien akoņ eo—
20 Karejera Sidney Rigdon en ijjitōn̄ n̄an e jikin eo me ej kiiō jokwe ie, im wāto in uno kilin mennin mour ko n̄an eddo eo an, n̄an rejetake eo an ilo iien in ej jerbal ilo jikin kallib eo Aō, em̧ool āinwōt I kōņaan, n̄e Inaaj jiron̄ e.
21 Im aolep men otemjeļo̧k ren kōm̧m̧an ekkar n̄an kapilōk eo an koņ eo, im juon wōt errā ak ainikien eo an koņ eo, eo ej pād lo bukwōn in Kirtland.
22 Im eddo im kōjeraam̧m̧an in, N̄a, Irooj, Ij likūt ioon karejera Sidney Rigdon n̄an juon kōjeraam̧m̧an ioon, im ioon ineen ālikin e;
23 Im Inaaj koorļo̧k kōjeraam̧m̧an ko ioon, toun wōt an naaj ettā Im̧aō.
24 Im bar juon alen, karejera Martin Harris en jitōn̄ n̄an e, n̄an eddo eo an, wāto in bwidej eo me karejera Jon Johnson eaar bōk e ilo oktan jolōt eo an m̧oktaļo̧k, n̄an e im ineen ālikin e;
25 Im toun wōt an tiljek, Inaaj koorļo̧k kōjeraam̧m̧an ko ioon im ineen ālikin e.
26 Im karejera Martin Harris en ajiļo̧k m̧ani ko an n̄an kabun̄bun̄ļo̧k eo an naan ko Aō, ekkar n̄an an karejera Josep Smith, Jun., naaj kaalikkare.
27 Im bar juon alen, karejera Frederick G. Williams en bōk jikin eo me ioon e ej kiiō jokwe.
28 Im karejera Oliver Cowdery en bōk wāto eo me ej makeļo̧k ian iturin m̧weo, me ej itōn erom opij n̄an jikin kōm̧m̧ani bok ko, eo ej wāto nōm̧ba juon, im barāinwōt wāto eo me ioon jemān ej jokwe.
29 Im ro karejera Frederick G. Williams im Oliver Cowdery ren bōk opij in kōm̧m̧an bok eo im aolep men ko rej ekkejelļo̧k n̄an e.
30 Im en̄in naaj eddo eo aer me naaj jitōn̄e n̄an er.
31 Im toun wōt aer naaj tiljek, lo Inaaj kōjeraam̧m̧an er, im koorļo̧k kōjeraam̧m̧an ko ioer.
32 Im en̄in ej jinoin eddo eo me Iaar jitōn̄ n̄an erro, n̄an erro im ineer ālikin erro.
33 Im, toun wōt aer tiljek, Inaaj koorļo̧k kōjeraam̧m̧an ko ioer im ineer ālikin er, em̧ool juon wōrļo̧k in kōjeraam̧m̧an ko.
34 Im bar juon alen, karejera Jon Johnson en bōk m̧weo me ej jokwe ie, im jolōt eo, aolep ijello̧kun wōt bwidej eo me em̧ōj kar jabwiki n̄an aekkal eo an m̧ōko Im̧ō, eo ej ekkejelļo̧k n̄an jolōt eo, im wāto ko me kar ba kaki n̄an karejera Oliver Cowdery.
35 Im toun wōt an tiljek, Inaaj koorļo̧k kōjeraam̧m̧an ko ioon.
36 Im ej ankilaō bwe en wia kaki wāto ko em̧ōj kakōļļeiki n̄an kalōke jikin kwelo̧k eo an ro rekwōjarjar Aō, toun wōt an naaj alikkar n̄an e jān aainikien Jetōb, im ekkar n̄an kapilōk eo an koņ eo, im jān ainikien koņ eo.
37 Im en̄in ej jinoin eddo eo me Iaar jitōn̄e n̄an e, kōn juon kōjeraam̧m̧an n̄an e im ineen ālikin e.
38 Im toun wōt an tiljek, Inaaj koorļo̧k juon wōrļo̧k in kōjeraam̧m̧an ko ioon.
39 Im bar juon alen, karejera aNewel K. Whitney en jitōn̄e n̄an e m̧ōko im wāto eo ijo ej kiiō jokwe, im wāto eo im m̧weo me ioon im̧ōn wia eo ej jutak, im barāinwōt wāto eo me ioon kāboņ eo iturōk in im̧ōn wia eo, im barāinwōt wāto eo me ioon ashery eo ej jitm̧anm̧an.
40 Im aolep men in Iaar jitōn̄e n̄an karejera Newel K. Whitney n̄an an eddo, n̄an juon kōjeraam̧m̧an ioon im ineen ālikin e, n̄an em̧m̧anļo̧k eo an im̧ōn wia eo an koņ eo Aō me Iaar kajutake n̄an stakeeo Aō ilo bukwōn in Kirtland.
41 Aaet, em̧ool, en̄in ej eddo eo me Iaar jitōn̄ n̄an karejera N. K. Whitney, em̧ool aolepān im̧ōn wia eo, e im eo ariņa ainikien, im ineen ālikin e.
42 Im toun wōt an tiljek ilo kōjparok kien ko Aō, ko Iaar liļo̧k n̄an e, Inaaj koorļo̧k kōjeraam̧m̧an ko ioon im ineen ālikin e, em̧ool juon wōrļo̧k in kōjeraam̧m̧an ko.
43 Im bar juon alen, karejera Josep Smith, Jun., en jitōn̄ n̄an e wāto eo me em̧ōj kakōļļeiki n̄an kalōke m̧weo Im̧ō, eo me ej en̄oul jokoņ ko aetokan im jon̄oulruo depakpak, im barāinwōt jolōt eo me ioon jemān ej kiiō jokwe;
44 Im en̄in ej jinoin eddo eo me em̧ōj Aō kar jitōn̄ n̄an e, n̄an juon kōjeraam̧m̧an ioon, im ioon jemān.
45 Bwe lo, Iaar jabwiki juon jolōt n̄an ajemān, n̄an rejetak eo an; kōn menin naaj watōke e ilo m̧weo im̧ōn karejera Josep Smith, Jun.
46 Im Inaaj koorļo̧k kōjeraam̧m̧an ko ioon m̧weo im̧ōn karejera Josep Smith, Jun., toun wōt an tiljek, em̧ool juon wōrļo̧k in kōjeraam̧m̧an ko.
47 Im kiiō, juon kien Ij lewōj n̄an kom̧ kōn Zaion, bwe kom̧ naaj jamin lokjak ļo̧k wōt āinwōt juon koņ in bōrokuk n̄an ro jeiūm̧i im jātimi jān Zaion, ilo wōt jekjek in—
48 Ālikin ami kar koņ, naaj kūr kom̧ Koņ In Bōrokuk eo an aStake eo an Zaion, Jikin Kwelo̧k in Kirtland. Im ro jeiūm̧i im jātimi, ālikin aer koņ, naaj kūr er Koņ in Bōrokuk eo an Jikin Kwelo̧k in Zaion.
49 Im renaaj ko̧koņ er ilo āt ko etaer make, im ilo āt eo etaer make; im renaaj kōm̧m̧ani jerbal ko aer ilo āt eo etaer make, im āt ko etaer make;
50 Im kom̧ naaj kōm̧m̧ani jerbal ko ami ilo āt eo etami make, im ilo āt ko etami make.
51 Im men in Iaar jiron̄ bwe en kōm̧m̧ane n̄an lo̧mo̧o̧ren eo ami, im barāinwōt n̄an lo̧mo̧o̧ren eo aer, ilo jarjar in aer kar akokakļo̧k er im men eo me ej itok.
52 Kōnke abujen ko rej rup kōn bōd, jān bankoņak im naan ko rewaan—
53 Kōn menin, kom̧ij jem̧ļo̧k āinwōt juon koņ in bōrokuk ippān ro jeiūm̧i im jātimi, bwe kom̧ij jab lokjak wōt n̄an awa in n̄an er, n̄an wōt jekjek in, āinwōt Iaar ba, jān kam̧uriri āinwōt naaj errā kake jān koņ eo an ko̧o̧njeļ in, āinwōt wāween pād ko ami renaaj kōmālimi im ainikien ko̧o̧njeļ eo enaaj kaalikkare.
54 Im bar juon alen, juon kien Ij lewōj n̄an kom̧ kōn eddo ko ami me em̧ōj Aō kar jitōn̄i n̄an kom̧.
55 Lo, aolep m̧weiukkein rej Aō, n̄e jaab tōmak eo ami ewaan, im ej lo kom̧ rietao, im bujen ko me kom̧ ar kōm̧m̧ani n̄an Eō rerup;
56 Im eļan̄n̄e m̧weiukkein rej Aō, innām kom̧ij aribōk eddo ro; eļan̄n̄e jaab kom̧ij jab ribōk eddo ro.
57 A, em̧ool Ij ba n̄an kom̧, Iaar jitōn̄ n̄an kom̧ bwe kom̧in ribōk eddo ro ioon m̧weo Im̧ō, em̧ool lukkuun ribōk eddo ro.
58 Im kōn kōttōpar in Iaar jiron̄ kom̧ n̄an ko̧koņe kom̧ make, em̧ool n̄an likūt ilo bok anaan ko Aō, tarlep in jeje ko rekwōjarjar Aō, revelesōn ko me Iaar liwōj n̄an kom̧, im me Inaaj, tokālik, jān iien n̄an iien liwōj n̄an kom̧—
59 N̄an kōttōpar eo an kalōkļo̧k kabun̄ eo Aō im aelōn̄ in kiin̄ eo Aō ioon laļ, im n̄an kōpooj armej ro Aō n̄an aiien eo n̄e Inaaj bjokwe ippāer, eo me ej epaaktok.
60 Im kom̧ naaj kōpooj n̄an kom̧ make juon jikin alele in jāān, im kōjenolo̧k e n̄an Eta.
61 Im kom̧ naaj jitōn̄ juon ilubwiljimi n̄an kōjparoke alele in jāān eo, im e enaaj ekkapit n̄an kōjeraam̧m̧an in.
62 Im enaaj wōr juon sil ioon alele in jāān eo, im aolep men ko rekwōjarjar renaaj bōkiļo̧k ilo alele in jāān eo; im ejjeļo̧k armej ilubwiljimi enaaj ba ej an make, ak jabdewōt m̧ōttan, bwe enaaj an ami aolep kōn juon wōt bōro.
63 Im Ij lewōj n̄an kom̧ jān lukkuun awa in wōt; im kiiō kanooj lale, bwe kom̧in etal im kōm̧m̧an tōpran eddo eo me Iaar jitōn̄e n̄an kom̧, ejenolo̧k jān men ko rekwōjarjar, n̄an kōttōpar eo n̄an kōm̧m̧ani ilo bok men kein rekwōjarjar āinwōt Iaar ba.
64 Im aļapļo̧k ko an men ko rekwōjarjar renaaj pād wōt ilo alele in jāān eo, im juon sil enaaj pād ioon; im enaaj ban kōjerbale ak bōkļo̧k jān alele in jāān eo jān jabdewōt, barāinwōt sil eo ej jamin naaj ejjerwawa eo naaj likūti ioon, jān wōt ainikien koņ eo, ak jān kien.
65 Im āindein kom̧ naaj oņaaki ļapļo̧k ko an men ko rekwōjarjar ilo alele in jāān eo, n̄an kōttōpar ko rekwōjarjar im rewānōk.
66 Im men in naaj ņa etan alele in jāān ekwōjarjar eo an Irooj; im juon sil enaaj pād ioon bwe en maron̄ ekwōjarjar im jenolo̧k n̄an Irooj.
67 Im bar juon alen, enaaj bar wōr juon alele in jāān kōpooje, im juon rilale jāān jitōn̄e n̄an kōjparok alele in jāān eo, im juon sil naaj likūti ioon;
68 Im aolep m̧ani ko kom̧ij bōki ilo eddo ko ami, jān kōm̧anm̧anļo̧k m̧weiuk ko me Iaar jitōn̄i n̄an kom̧, ilo m̧ōko, ak ilo bwidej ko, ak ilo kattle, ak ilo aolep men ko otemjeļo̧k ijello̧kun wōt jeje ko rekwōjarjar im rewānōk, ko Iaar jabwiki n̄an Eō make n̄an kōttōpar ko rewānōk im rekwōjarjar, naaj juļo̧k ilo alele in jāān eo ilo wōt iien eo kom̧ij bōki m̧ani ko, jān bukwi ko, ak jān lemn̄oul ko, ak jān ron̄oul ko, ak jān jon̄oul ko, ak jān ļalem ko.
69 Ak ilo bar jet naan, eļan̄n̄e jabdewōt armej ilubwiljimi ej bōk ļalem taļa en juļo̧k ilo alele in jāān eo; ak eļan̄n̄e ej bōk jon̄oul, ak ron̄oul, ak lemn̄oul, ak juon bukwi, e en kōm̧m̧ane āinwōt;
70 Im en jab wōr ilubwiljimi en ba bwe ej an make; bwe e jamin ba an, im jab jabdewōt m̧ōttan.
71 Im ejamin wōr jabdewōt m̧ōttan kōjerbal e, ak kadiwōjļo̧k jān alele in jāān eo, jān wōt ainikien im errā ippān doon eo an koņ eo.
72 Im en̄in enaaj ainikien im errā ippān doon eo an koņ eo—bwe jabdewōt armej ilubwiljimi en ba n̄an rilale jāān eo: Ewōr aō aikuj in men in n̄an jipan̄ eō ilo eddo eo aō—
73 Eļan̄n̄e ej ļalem taļa, ak eļan̄n̄e ej jon̄oul taļa, ak ron̄oul, ak lemn̄oul, ak jibukwi, rilale jāān eo enaaj leļo̧k n̄an e oran eo ej aikuji n̄an jipan̄ e ilo eddo eo an—
74 M̧ae lo e bwe ej riruprup kien, im e alikkar im̧aan ko̧o̧njeļ eo an koņ eo ilo ejjeļo̧k ittinad bwe e ej ajab ribōk eddo eo etiljek im mālōtlōt.
75 A toun wōt an pād ilo tarlep in jemdoon eo, im ej tiljek im mālōtlōt ilo eddo eo an, en̄in enaaj kakōļļe eo an n̄an rilale jāān eo in bwe rilale jāān eo en jab naaj dāpiji.
76 A ilo jekjek in bōd, rilale jāān eo enaaj pād ium̧win ko̧o̧njeļ eo im ainikien eo an koņ eo.
77 Im ilo jekjek eo lo ke rilale jāān eo lo bwe ej juon ribōk eddo ej jab tiljek im jab mālōtlōt, enaaj pād ium̧win ko̧o̧njeļ im ainikien eo an koņ eo, im naaj em̧m̧akūt jān ijo jikin, im abar juon naaj jitōn̄e ilo ijo ikijjien.
78 Im bar juon alen, em̧ool Ij ba n̄an kom̧, kōn m̧uri ko ami—lo ej ankilaō bwe kom̧in akōļļāik aolep bm̧uri ko ami.
79 Im ej ankilaō bwe kom̧in naaj akōttāik kom̧ Im̧aō, im bōk kōjeraam̧m̧an in jān ami btiljek im ettā im jar in tōmak.
80 Im toun wōt ami tiljek im ettā, im kōjerbal ajar in tōmak, lo, Inaaj kameoeoik bōro ko būruōn ro kom̧ij m̧uri n̄an er, m̧ae Aō naaj jilkinwaj wāween ko n̄an kom̧ n̄an rōļo̧k eo ami.
81 Kōn menin jeje m̧ōkaj n̄an New York im jeje ekkar n̄an men eo me naaj ba jān aJetōb eo Aō; im Inaaj kameoeoik bōro ko būruōn ro kom̧ij m̧uri n̄an er, bwe en jako jān ļōmņak ko aer n̄an bōktok kaen̄tanaan ioomi.
82 Im toun wōt ami aettā im tiljek im kūr ioon Eta, lo, Inaaj lewōj n̄an kom̧ banjo̧ eo.
83 Ij lewōj n̄an kom̧ juon kallim̧ur, bwe kom̧ naaj rōļo̧k alen in wōt jān kōm̧akoko eo ami.
84 Toun wōt ami bōk juon lelkan n̄an bidikai m̧ani kōn bukwi ko, ak to̧ujin ko, em̧ool m̧ae ami naaj bidikai ebwe n̄an kōtļo̧k kom̧ make jān kōm̧akoko, ej ami utiej.
85 Im joortoklik kōn m̧weiuk ko me Iaar likūti ilo peimi, alen in wōt, jān leļo̧k etami kōn errā ippān doon ak bar juon wāween, āinwōt enaaj em̧m̧an n̄an kom̧.
86 Ij lewōj n̄an kom̧ utiej in, alen in wōt; im lo, eļan̄n̄e kom̧ij wōnm̧aanļo̧k n̄an kōm̧m̧ani men ko me Iaar likūti im̧aami, ekkar n̄an kien ko Aō, aolep men kein otemjeļo̧k rej Aō, im kom̧ij Aō ribōk eddo, im karo eo ejamin kōtļo̧k m̧weo im̧ōn bwe en jeepepļo̧k. Em̧ool āindein. Amen.