“UYoshuwa uMprofeti,” Amabali eTestamente eNdala (2022)
“UYoshuwa uMprofeti,” Amabali eTestamente eNdala
Duteronomi 10; 31; 34; Yoshuwa 1; 3–6; 10–11; 21; 24
UYoshuwa uMprofeti
Uvavanyo lokugqibela ngaphambili kokungena kwilizwe ledinga
INkosi yabiza uYoshuwa ukuba abengumprofeti omtsha emva kokuba umprofeti uMoses wayethathelwe ezulwini. Ngexesha amaSirayeli ayehleli kufutshane noMlambo iYordan, iNkosi yathi kwakulixesha lokuba baye kwilizwe ledinga.
Duteronomy 34:1–9; Yoshwua 1:1–4; Alma 45:19
Ilizwe ledinga laliseKanan, kodwa kwakuhlala abantu abakhohlakeleyo kulo. INkosi yaxelela uYoshuwa ukuba omelele kwaye akhaliphe. Ngoncedo lweNkosi, amaSirayeli aweyenokoyisa umhlaba waseKanan.
UYoshuwa waye wahlanganisa umkhosi. INkosi yabaxelela ukuba baphathe amatye weMithetho eliShumi kunye nezinye izibhalo ezingcwele. Ababingeleli baye baziphatha ezi zinto zingcwele kwityesi eyayibizwa ngokuba yityeya yomnqophiso. Waze umkhosi walungiselela ukuwela uMlambo iYordan. Umlambo wawunzulu kwaye uhamba ngokukhawuleza.
Duteronomi 10:5; 31:25–26; Yoshuwa 1:10–11; 3:1–11
UYoshuwa wathembisa amaSirayeli ukuba iNkosi yayiya kuwanceda awele umlambo.
UYoshuwa wacela ababingeleli abali-12 ukuba bathathe ityeya yomnqophiso kwaye bahambe emanzini. Ngokukhawuleza nje ababingeleli benyathele emanzini, amanzi aye ohlukana.
AmaSirayeli aye awela umlambo kumhlaba owomileyo. UYoshuwa wacela amaSirayeli ukuba athathe amatye awali-12 elunxwemeni owomileyo lomlambo. Waye wawadibanisa amatye ukukhumbuza amaSirayeli ngommangaliso weNkosi ngaloo mini.
UYoshuwa wawukhokela umkhosi wamaSirayeli ukuya kumhlaba waseKanan. Baye bafika kwisixeko esasibizwa ngokuba yiYeriko. Esi sixeko sasomelele kakhulu kwaye sasineendonga ezinde. INkosi yaxelela uYoshuwa ukuba oyise iYeriko. Yathi amaSirayeli kwakumele ayijikeleze iYeriko yonke imihla kangangeentsuku ezisithandathu. UYoshuwa wayithobela iNkosi.
UYoshuwa waxelela ababingeleli ukuba bathwale ityeya yomnqophiso phambi kwamaSirayeli. Usuku ngalunye, umkhosi wawujikeleza iYeriko, kwaye ababingeleli abasixhenxe babekhalisa amaxilongo wabo. Onke amanye amaSiyareli ayethulile.
Ngosuku lwesixhenxe, umkhosi wajikeleza iYeriko amaxesha asixhenxe. Njengoko ababingeleli babekhalisa amaxilongo wabo, uYoshuwa waxelela amaSirayeli ukuba akhwaze. Ngesaquphe iindonga zeYeriko zawela phantsi emhlabeni, kwaye umkhosi kaYoshuwa wathatha isixeko.
INkosi yawanceda amaSirayeli njengoko Yona yayithembisile. Umkhosi kaYoshuwa waqhubeka usoyisa umhlaba waseKanan, kwaye amaSirayeli aye aqalisa ukuhlala apho khona. UYoshuwa wabakhumbuza ngemimangaliso kunye nangezithembiso zeNkosi. Waye wacela amaSirayeli ukuba akhonze iNkosi.