“UDavide noGoliyati,” Amabali eTestamente eNdala (2022)
“UDavide noGoliyati,” Amabali eTestamente eNdala
1 Samuweli 17
UDavide noGoliyati
Ukujongana nomcelingeni omkhulu
AmaFilisti ayehlasela amaSirayeli. Ngentsasa nganye isigebenga somFilisti esigama linguGoliyati lalicela umngeni nakowuphi na umSirayeli ukuba alwe naye. UGoliyati wayemkhulu kwaye wayemde kunabo bonke abantu, kwaye wayesoyikeka. Wayenxiba isikrweqe esinzima kwaye aphathe ikrele, nomkhonto, kunye nekhaka elikhulu. Akukho namnye owayelinga ukulwa naye.
UDavide wayeyinkwenkwana encinane engumalusi owayenokholo eNkosini. Abantakwabo abadala babengamajoni emkhosini wakwaSirayeli. Ngenye imini, uDavide wayephethele abantakwabo ukutya. Xa wayefika kwinkampu yomkhosi, weva umcelingeni kaGoliyati.
UDavide wabuza amajoni ukuba kwakutheni na kwakungekho namnye owayekhusela uSirayeli. Abantakwabo babenomsindo kwaye bamxelela ukuba ahambe ayokukhathalela iigusha. Kodwa uDavide wayesazi ukuba iNkosi yayiya kukhusela uSirayeli.
Ukumkani uSawule wayelwazi ukholo lukaDavide, ngoko ke waye wacela ukubona uDavide. UDavide waxelela uSawule ukuba wayengoyiki ukulwa noGoliyati. UDavide wachaza ukuba ngesinye isihlandlo xa wayesalusa iigusha zakhe, wabulala ingonyama nebhere. INkosi yaye yamkhusela ngoko, kwaye uDavide wayesazi ukuba iNkosi yayiya kumkhusela nangoku.
USawule wanika uDavide isikrweqe sakhe. Kodwa asizange simlingane, ngoko ke uDavide wasikhulula. Wagqiba kwelokuba alwe ngaphandle kwesikrweqe.
UDavide waqokelela amatye amahlanu agudileyo wawafaka engxoweni. Wathatha isilingi sakhe kunye nentonga yakhe yokwalusa, waya kujongana noGoliyati.
Xa uGoliyati wayebona uDavide, waye wakhwaza wahlekisa ngaye. Wathi inkwenkwana yomalusi yayingenako ukumbetha. UDavide wakhwaza naye esithi uthembe iNkosi ukuba izomkhusela! UDavide wathi wayeya kumbetha uGoliyati ukubonisa ubukhulu beNkosi.
UDavide wabaleka waya kuGoliyati. Waphosa ilitye ngokukhawuleza ngesilingi sakhe. Ilitye labetha uGoliyati ebunzi, indoda enkulu yesigebenga yawela emhlabeni. INkosi yancedisa uDavide ukuba oyise uGoliyati ngaphandle kwekrele okanye kwesikrweqe.
Xa amaFilisti ayebona ukuba uGoliyati ufile, aye abaleka esoyika. AmaSirayeli aliphumelela idabi. UDavide wayethemba iNkosi, kwaye iNkosi yamkhusela uSirayeli.