Hoofstuk 8
Vaart oor die See
Die Here het vir Nefi gesê om sy familie op die skip te neem wat hulle gebou het. Hulle het dit gelaai met vrugte, vleis, en heuning en met saad om in die beloofde land te plant.
Sterk winde het die skip na die beloofde land gewaai.
Laman, Lemuel en ʼn paar van die ander mense het begin goddeloos word. Toe Nefi vir hulle sê om op te hou, het hulle kwaad geword en hom met toue vasgebind.
Vanweë hulle boosheid, het die Liahona opgehou om te werk. Hulle het nie geweet in watter rigting om die skip te stuur nie. ʼn Kwaai storm het die skip vir drie dae teruggedryf.
Lehi het vir Laman en Lemuel gesê om Nefi los te maak, maar hulle wou nie luister nie. Lehi en Saria was so ontsteld dat hulle siek geword het.
Nefi se vrou en kinders het gehuil. Hulle het Laman en Lemuel gesmeek om Nefi los te maak, maar hulle het geweier.
Op die vierde dag het die storm erger geword. Die skip was op die punt om te sink.
Laman en Lemuel het geweet dat God die storm gestuur het. Hulle was bang dat hulle sou verdrink.
Uiteindelik het Laman en Lemuel bekeer en Nefi losgemaak. Alhoewel sy gewrigte en enkels geswel en seer was van die toue, het Nefi nie gekla nie.
Nefi het toe die Liahona opgetel, en dit het weer gewerk. Nefi het gebid, en die wind het opgehou waai. Die see het kalm geword.
Nefi het die skip gestuur, en dit het weer geseil na die beloofde land.