Hoofstuk 4
Die Bronsplate
Lehi het vir Nefi gesê dat die Here wou hê dat hy en sy broers moes teruggaan na Jerusalem. Hulle moes die bronsplate gaan haal by ʼn man genaamd Laban.
Die bronsplate was belangrike rekords. Hulle het vertel van Lehi se voorouers en het die woorde van God bevat wat deur die profete geopenbaar is.
Laman en Lemuel wou nie teruggaan om die bronsplate te kry nie. Hulle het gesê dat dit te moeilik sou wees. Hulle het nie geloof in die Here gehad nie.
Nefi wou die Here gehoorsaam. Hy het geweet dat die Here hom en sy broers sou help om die bronsplate by Laban te kry.
Laman, Lemuel, Sam en Nefi het teruggegaan na Jerusalem om die bronsplate te kry.
Laman het na Laban gegaan en hom gevra vir die plate.
Laban was kwaad en wou nie die bronsplate vir Laman gee nie. Laban wou vir Laman doodmaak, maar Laman het ontsnap.
Laman het sy broers vertel wat gebeur het. Hy was bang en wou tou opgooi en teruggaan na hulle vader in die wildernis.
Nefi het gesê dat hulle nie sonder die bronsplate kon teruggaan nie. Hy het vir sy broers gesê om meer geloof in die Here te hê en dat hulle die bronsplate sou kon kry.
Nefi en sy broers het na hulle ou huis in Jerusalem gegaan en hulle goud en silwer bymekaar gemaak om te ruil vir die plate.
Hulle het hulle rykdomme aan Laban gewys en aangebied om dit te ruil vir die plate. Toe Laban hulle goud en silwer sien, wou hy dit vir homself hê en het hulle uitgewerp.
Laban het vir sy manne gesê om Lehi se seuns dood te maak. Nefi en sy broers het gehardloop en in ʼn grot weggekruip. Laban het hulle goud en silwer gehou.
Laman en Lemuel was kwaad vir Nefi. Hulle het Nefi en Sam met ʼn stok geslaan.
ʼn Engel het verskyn en vir Laman en Lemuel gesê om op te hou. Hy het gesê dat die Here hulle sou help om die plate te kry. Hy het ook gesê dat Nefi ʼn leier oor sy broers sou word.
Nefi het vir sy broers gesê om geloof in die Here te hê en nie bang te wees vir Laban en sy manne nie. Nefi het sy broers aangemoedig om terug te gaan na Jerusalem.
Daardie nag het Nefi se broers buite die stad weggekruip terwyl Nefi na binne gesluip het. Hy het na Laban se huis geloop.
Toe Nefi naby Laban se huis gekom het, het hy ʼn dronk man op die grond sien lê. Dit was Laban.
Nefi het Laban se swaard gesien en dit opgetel. Die Heilige Gees het vir Nefi gesê om Laban dood te maak, maar Nefi wou hom nie doodmaak nie.
Die Heilige Gees het weer vir Nefi gesê om Laban dood te maak sodat Nefi die bronsplate kon kry. Lehi se familie het die plate nodig gehad sodat hulle die evangelie kon leer.
Nefi het die Heilige Gees gehoorsaam en Laban doodgemaak. Nefi het toe Laban se klere en wapenrusting aangetrek.
Nefi het in Laban se huis ingegaan saam met Zoram, Laban se dienskneg. Nefi het net soos Laban gelyk en geklink.
Hy het vir Zoram gesê om die bronsplate te gaan haal. Zoram het gedink dat Nefi Laban was, en die plate vir hom gegee. Nefi het vir Zoram gesê om hom te volg.
Laman, Lemuel en Sam het Nefi sien aankom en was bang; hulle het gedink hy was Laban. Hulle het begin weghardloop, maar het gestop toe Nefi hulle geroep het.
Zoram het toe besef dat Nefi nie Laban was nie, en het probeer weghardloop. Nefi het Zoram gegryp en belowe om hom nie leed aan te doen as hy die wildernis sou binnegaan saam met Nefi nie.
Zoram het ingestem. Nefi en sy broers het Zoram en die bronsplate geneem en teruggegaan na Lehi en Saria.
Hulle het die bronsplate vir Lehi gegee. Hy en Saria was bly dat hulle seuns veilig was. Hulle was almal verheug en het God gedank.
Lehi het die bronsplate gelees. Dit het vertel van Adam en Eva en die Skepping van die wêreld. Dit het die woorde van baie profete bevat.
Lehi en Nefi was bly omdat hulle die Here gehoorsaam het en die bronsplate kon kry.
Lehi se familie het die bronsplate ingepak om saam met hulle te neem op hulle reis sodat hulle hul kinders die gebooie wat op die plate geskryf was, kon leer.