1 Ug nahitabo nga sa dihang nakapamulong na si Jesus niini nga mga pulong ngadto kang Nephi, ug ngadto niadtong gitawag, (karon ang gidaghanon kanila nga gitawag, ug nakadawat sa gahom ug pagtugot sa pagbunyag, kay napulog duha) ug tan-awa, iyang gituyhad ang iyang kamot ngadto sa pundok sa katawhan, ug misinggit ngadto kanila, nga nag-ingon: Bulahan kamo kon mopatalinghog kamo sa mga pulong niining napulog duha nga akong gipili taliwala kaninyo sa pagpangalagad kaninyo, ug aron mahimo ninyong mga sulugoon; ug kanila akong gihatag ang gahom nga sila makabunyag kaninyo sa tubig; ug human nga mabunyagan kamo sa tubig, tan-awa, bunyagan ko kamo pinaagi sa kalayo ug pinaagi sa Espiritu Santo; busa bulahan kamo kon motuo kamo kanako ug magpabunyag, human nga kamo nakakita kanako ug nasayod nga ako mao.

2 Ug usab, mas bulahan sila nga motuo sa inyong mga pulong tungod kay kamo mopamatuod nga kamo nakakita kanako, ug nga kamo nasayod nga ako mao. Oo, bulahan sila nga motuo sa inyong mga pulong, ug magpaubos ngadto sa kinahiladman sa pagkamapainubsanon ug magpabunyag, kay pagaduawon sila pinaagi sa kalayo ug pinaagi sa Espiritu Santo, ug makadawat og kapasayloan sa ilang mga sala.

3 Oo, bulahan ang mga kabos sa espiritu nga moduol kanako, kay ila ang gingharian sa langit.

4 Ug usab, bulahan silang tanan nga nagbangotan, kay sila pagahupayon.

5 Ug bulahan ang mga maaghop, kay sila makapanag-iya sa yuta.

6 Ug bulahan silang tanan nga gigutom ug giuhaw sa pagkamatarong, kay sila mapuno sa Espiritu Santo.

7 Ug bulahan ang mga maluluy-on, kay sila makabaton og kaluoy.

8 Ug bulahan ang tanan nga putli og kasingkasing, kay sila makakita sa Dios.

9 Ug bulahan ang tanan nga tigpasiugda sa kalinaw, kay sila pagatawgon nga mga anak sa Dios.

10 Ug bulahan silang tanan kinsa gigukod tungod sa akong ngalan, kay ila ang gingharian sa langit.

11 Ug bulahan kamo kon ang mga tawo mopasipala ug molutos kaninyo, ug mosulti sa tanang matang sa pagkadaotan batok kaninyo sa bakak nga paagi, tungod kanako;

12 Kay kamo makaangkon sa dakong kalipay ug magmaya sa hilabihan, kay dako ang inyong ganti sa langit; kay sa ingon niana gilutos nila ang mga propeta nga nag-una kaninyo.

13 Sa pagkatinuod, sa pagkatinuod sultihan ko kamo, ako mosugo nga kamo mahimo nga asin sa yuta; apan kon ang asin mawad-an sa iyang kaparat unsa pa man ang i-asin sa yuta? Ang asin wala nay kapuslanan, apan angay nga ilabay ug pagatunob-tunoban sa tiil sa mga tawo.

14 Sa pagkatinuod, sa pagkatinuod sultihan ko kamo, ako mosugo kaninyo nga mahimo nga kahayag niini nga katawhan. Ang usa ka siyudad nga nagtungtong sa usa ka bungtod dili matago.

15 Tan-awa, magdagkot ba ang mga tawo og usa ka kandila ug ibutang kini sa ilawom sa gantangan? Dili, apan diha sa kandilero, ug kini mohatag og kahayag ngadto sa tanan nga anaa sulod sa balay;

16 Busa himoa nga ang inyong kahayag modan-ag pag-ayo sa atubangan niini nga katawhan, aron makita nila ang inyong maayo nga mga buhat ug himayaon ang inyong Amahan nga anaa sa langit.

17 Ayaw hunahunaa nga mianhi ako aron sa pagguba sa balaod o sa mga propeta. Mianhi ako dili sa pagguba apan sa pagtuman;

18 Kay sa pagkatinuod sultihan ko kamo, walay bisan unsa ka gamay ni usa ka tulbok nga palabyon sa balaod, apan pinaagi kanako kining tanan matuman.

19 Ug tan-awa, gihatagan ko na kamo sa balaod ug sa mga sugo sa akong Amahan, aron motuo kamo kanako, ug aron maghinulsol kamo sa inyong mga sala, ug moduol kanako uban sa masulub-ong kasingkasing ug mahinulsolong espiritu. Tan-awa, anaa kaninyo ang mga sugo, ug ang balaod natuman na.

20 Busa duol ngari kanako aron kamo maluwas; kay sa pagkatinuod sultihan ko kamo, nga gawas kon sundon ninyo ang akong mga sugo, nga akong gisugo kaninyo niini nga higayon, dili gayod kamo makasulod sa gingharian sa langit.

21 Nakadungog kamo nga sila misulti niini sa karaang panahon, ug nahisulat usab sa atubangan kaninyo, nga dili kamo mopatay, ug kinsa kadtong mopatay mameligro sa paghukom sa Dios;

22 Apan sultihan ko kamo, nga kadtong may kasuko sa iyang igsoon mameligro sa iyang paghukom. Ug kinsa kadtong moingon sa iyang igsoon, Buang, mameligro sa atubangan sa konseho; ug kinsa kadtong moingon, Ikaw buang, mameligro sa kalayo sa impyerno.

23 Busa, kon moduol kamo kanako, o magtinguha sa pagduol kanako, ug mahinumdom nga ang inyong igsoon adunay bisan unsa nga pagbati batok kaninyo—

24 Adtoa ang inyong igsoon, ug makig-uli og una sa inyong igsoon, ug unya duol kanako uban sa bug-os nga kasingkasing, ug ako modawat kaninyo.

25 Pakighusay dayon sa inyong kaaway samtang nagkuyog pa kamo, tingali og sa bisan unsang higayon siya mopadakop kaninyo, ug mabalhog kamo sa bilanggoan.

26 Sa pagkatinuod, sa pagkatinuod sultihan ko kamo, nga sa bisan unsang paagi kamo dili makagawas hangtod nga mabayaran ninyo ang kataposan nga sentimo. Ug samtang anaa kamo sa bilanggoan makabayad ba kamo bisan usa lamang ka sentimo? Sa pagkatinuod, sa pagkatinuod sultihan ko kamo, Dili.

27 Tan-awa, gisulat nila kini sa karaan nga panahon, nga dili kamo manapaw;

28 Apan sultihan ko kamo, nga kinsa kadtong motan-aw sa usa ka babaye, nga may kahigal kaniya, nakapanapaw na diha sa iyang kasingkasing.

29 Tan-awa, hatagan ko kamo og usa ka sugo, nga kamo dili motugot nga kini nga mga butang mosulod sa inyong kasingkasing;

30 Kay maayo pa nga hikawan ninyo ang inyong mga kaugalingon niini nga mga butang, diin kamo mopas-an sa inyong krus, kay sa itambog kamo ngadto sa impyerno.

31 Kini nahisulat na, nga kinsa kadtong mobulag sa iyang asawa, pahataga siya sa iyang asawa og kasulatan sa panagbulag.

32 Sa pagkatinuod, sa pagkatinuod, sultihan ko kamo, nga kinsa kadtong mobulag sa iyang asawa, gawas lamang sa hinungdan nga pakighilawas, maghatag og hinungdan sa asawa aron makapanapaw; ug kinsa kadtong makigminyo kaniya nga gibulagan nakasala og pagpanapaw.

33 Ug usab nahisulat, nga kamo dili manumpa sa inyong kaugalingon, apan tumanon ngadto sa Ginoo ang inyong mga panumpa;

34 Apan sa pagkatinuod, sa pagkatinuod sultihan ko kamo, ayaw gayod panumpa; bisan sa langit, kay kana trono sa Dios;

35 Bisan sa yuta, kay kana iyang tumbanan;

36 Ni kamo manumpa pinaagi sa ulo, kay kamo dili makapahimo sa usa ka buhok nga itom o puti;

37 Apan himoa ang inyong panagsultihanay nga Oo, oo; Dili, dili; kay bisan unsa nga molabaw pa niini daotan.

38 Ug tan-awa, nahisulat na nga, mata sa mata, ug ngipon sa ngipon;

39 Apan sultihan ko kamo nga kamo dili mobalos sa daotan, apan bisan kinsa nga mosagpa sa inyong tuo nga aping, ibali kaniya ang pikas usab;

40 Ug kon may tawo nga mokiha kaninyo sa hukmanan ug mokuha sa inyong sapot, ihatag usab kaniya ang inyong kupo;

41 Ug bisan kinsa nga mopugos kaninyo paglakaw og usa ka milya, ubani siya sa duha ka milya.

42 Mohatag ngadto kaniya nga nangayo kaninyo, ug kaniya nga manghulam kaninyo ayaw pagbalibad.

43 Ug tan-awa kini nahisulat usab, nga higugmaon ninyo ang inyong silingan ug dumtan ang inyong kaaway;

44 Apan tan-awa sultihan ko kamo, higugmaa ang inyong mga kaaway, panalangini sila nga nagtunglo kaninyo, pagbuhat og maayo ngadto kanila nga nasilag kaninyo, ug pag-ampo alang kanila nga nagpasipala kaninyo ug nanglutos kaninyo;

45 Nga kamo mahimo nga mga anak sa inyong Amahan nga anaa sa langit; tungod kay siya mihimo sa iyang adlaw nga mosilang sa mga daotan ug sa mga matarong.

46 Busa kadto nga mga butang sa karaan nga panahon, nga anaa ubos sa balaod, ngari kanako ang tanan natuman.

47 Ang karaan nga butang milabay na, ug ang tanan nga butang nahimo nga bag-o.

48 Busa manghinaot ako nga kamo mahimo nga hingpit gani sama nga ako, o ang inyong Amahan nga anaa sa langit hingpit.