Zeniff Yaa Náʼíízohyę́ę—Bidineʼé baa haneʼ, éí Zarahemla kéyahdę́ę́ʼ dahdiináyę́ędą́ą́ʼ dóó ńléí Laman dineʼé dabidisnáh dóó yisdábiʼdootʼeezhjįʼ.
Wóltaʼii 9–22 biyiʼgi baa haneʼ.
Wóltaʼii 9
Zeniff éí diné łaʼ Zarahemladę́ę́ʼ dah yidiiʼeezh kéyah Lehi-Nephidi kéédahatʼį́į doo biniyé—Laman dineʼé aláahdi binaatʼáanii lą́ níigo kéyah yeidiníʼą́—Laman dineʼé dóó Zeniff bidineʼé ałchʼįʼ nidaabaah daazlį́į́ʼ. Jesus bidiʼdoochííłjįʼ 200–187 B.C. yihahgo ádahóótʼįįd.
1 Shí, Zeniff, Nephi dineʼé bizaad tʼáá átʼé bee nashidiʼneestą́ą́ʼ, dóó Nephi bikéyahgóó shił ééhózin, éí doodago danihizází kéyah áłtsé baa deetʼánée, dóó naalchiʼí nishłį́įgo Laman dineʼé bichʼįʼ ashiʼdoolʼaʼ áko bisiláo haadeisih biniyé, áko nihisiláo yiiyaa dahodidoołhis dóó nideidoołtsxił—ákondi yáʼátʼéehii bitah yiłtsą́ągo doo ádooldįįł da niizį́į́ʼ.
2 Éí bąą, diné doo kééhatʼínígi shikʼiské bił, nihinaatʼáanii yił ahadiʼdootʼááł nisingo baa nídasíitʼįįd, ákondi hastiin ayóó báháchįʼ dóó diné neiłtseed shidiyoołhéełgo nahaʼá; ląʼígo diné nidabiʼdistseedgo yisdááyá, háálá azhéʼé éí ałkʼijįʼ daʼahoogą́ą́ʼ, dóó ałkʼis ałkʼijįʼ daʼahoogą́ą́ʼ, ląʼígo diné doo kééhatʼínídi nihisiláo nidaaztseedgo índa, dóó nániikai, nihí chʼéékaígíí, kéyah Zarahemladi, niheʼasdzáán dóó niheʼáłchíní adahóótʼįįdígíí bee bił dahwiilneʼ.
3 Ákondi, nihizází kéyah baa deetʼánée tʼáá íiyisíí nisingo, ląʼí da diné kéyah nihí dooleeł danízinígíí ahiiʼeezh, dóó diné doo kééhatʼínígo bił dahnáádiishkai ńléí kéyahjigo, ákondi dichin dóó yéego achʼįʼ nahwiiʼná baa tiʼdahosiiʼniiʼ; háálá nihiBóhólníihii Diyin God doo hah béédeilniiʼ da ńtʼę́ę́ʼ.
4 Ákohgo, ląʼí da yiską́ diné doo kééhatʼínídi náánéikahgo áádóó nihikʼis nidabiʼdistseed yę́ędi nihiníbaal nidasiinil, éí nihizází bikéyah bitsį́įgi.
5 Áádóó baa hoolzhiizh dį́įʼgo sha hastóí kin dahshijaaʼgóó bił nánishkai, aláahdi naatʼáanii bichʼįʼ, aláahdi naatʼáanii haitʼáo nitsékeesígíí shił bééhodoozįįł biniyé, áádóó shił bééhodoozįįł shidineʼé bił yahʼádeeshkahgo kéyah bikááʼ hodéezyéélgo bikááʼ kéédahwiitʼį́į doo.
6 Áádóó aláahdi naatʼáanii bił yah ííyá, dóó bił ahaʼdinishtʼą́ kéyah Lehi-Nephi, dóó Shilomdi kééhashtʼį́į doogo.
7 Áádóó ałdóʼ bidineʼé kéyahdóó chʼídoohnééł yidííniid, dóó shí dóó shidineʼé kéyah nihí dooleełgo biiʼ yah iikai.
8 Áádóó kin deitłʼingo baa nídiikai, dóó kin bináʼáztłʼin hashtʼedeilneʼ, aooʼ, Lehi-Nephi dóó Shilom kin haalʼáadi.
9 Áádóó nidahwiildlaadgo baa nídiikai, aooʼ, álástsiiʼ ałʼąą ádaatʼéego, naadą́ą́ʼ bikʼǫ́ǫ́ʼ bił, dóó tłʼoh naadą́ą́, dóó tłʼoh naadą́ą́ bideeʼ dahólónígíí, dóó neas bił, dóó sheum bił, áádóó tsin bineestʼąʼ bílástsiiʼ ałʼąą ádaatʼéego, áádóó kéyah bikááʼ náás deekai dóó ałʼąą dínéetʼą́.
10 Aláahdi naatʼáanii Laman beʼayoochʼííd dóó anótʼááh, shidineʼé naalteʼ dadooleeł nízingo, kéyah nihí dooleełgo niháhoołʼąʼ.
11 Áko baa hoolzhiizh, kéyah biiʼ kéédahwiitʼį́įgo naakitsʼáadah nááhai aláahdi naatʼáanii Laman nihaaʼ ayahoolí silį́į́ʼ, shidineʼé kéyah biiʼ dabidziil dooleeł nízingo, dóó doo yikʼeh dadidooleeł da dóó doo naalteʼ ádeidoolííł da.
12 Éí dineʼé bił dahóyééʼ dóó ídaʼalyai deidósin; áko nihinaalteʼ ádadiilnííł danihóní, áko nihinaanish yee daʼatʼį́į doo, aooʼ, nihilį́į́ʼ nihinánaakaígíí da deilghał doo.
13 Áko baa hoolzhiizh aláahdi naatʼáanii Laman bidineʼé shidineʼé yił hadahoniłchaʼgo ałkʼinéijahgo yaa nídiikai; áko kéyah bikááʼgóó anaaʼ dóó ałkʼiníjiijahgo baa ńdiildeeʼ.
14 Áko, naatʼáanii nishłį́įgo kéyah Nephidi tááʼtsʼáadahgóó yihahgo ádahóótʼįįd. kéyah Shilomdi shádiʼáahjigo, shidineʼé bilį́į́ʼ tó yándaʼyikaah dóó chʼił yá nideiyiiłjoołgo, dóó kéyah ndahwiiłdlaadgo, Laman dineʼé ląʼígo hakʼííkai dóó ndahałtseedgo yaa nídiikai, dóó halį́į́ʼ hatsʼą́ą́ʼ adeiyiiskaad, dóó honaadą́ą́ʼ dáʼákʼehdóó adayiizhjaaʼ.
15 Aooʼ, áádóó baa hoolzhiizh bitsʼą́ą́ʼ dashdiijééʼ, tʼáadoo dahoʼdisziłígíí, kintah Nephidi jíkai, dóó nihichʼą́ą́h naniná dajiníigo shídajííkeed.
16 Áádóó baa hoolzhiizh ałtį́į́ʼ, dóó kʼaaʼ, béésh hał, dóó béésh hał nídaazhahí, dóó tsihał, dóó bee adiltłʼį́į́h, dóó bee daʼahijigą́ ałʼąą́ átʼéego ádeilyaaígíí baa hájaaʼ, dóó shí dóó shidineʼé Laman dineʼé bił daʼahidiigą́ą́łgóó dah diikai.
17 Aooʼ, Diyin Bóhólníihii bee danihidziilgo Laman dineʼé bił daʼahidiigą́ą́łgóó dah diikai; háálá shí dóó shidineʼé Diyin Bóhólníilii yéego bichʼįʼ sodadiilzin áko nihianaaʼí bilákʼeedóó yisdánihidooʼish, nihizází yisdábiʼdooʼnil yę́ę béédeilnihgo chʼéénihinísid.
18 Áádóó Diyin God nihisodizin yidiiztsʼą́ą́ʼ dóó nihinaaídíkid yę́ę yaa hoolneʼ; áádóó beʼadziil bee náás diikai, aooʼ, Laman dineʼé bichʼįʼ dah diikai, dóó tʼááłáʼí yiską́ąjįʼ tááʼ dimííl yázhí dóó baʼaan dízdiin dóó baʼaan tááʼ nidasiiltseed; nideiltseedgo nihikéyahdóó chʼídaniilkaad.
19 Áádóó shí, tʼáá shí, shílaʼ bee, ndasiiltseed yę́ę atah łeeh yínil. Áádóó áko shooh, yínííł dóó dooládóʼ daniidzingo naakidi neeznadiin doo baʼaan tsostsʼidiin dóó baʼaan nahaste nihikʼiskʼé daneezná.