1 Áádóó áko baa hoolzhiizh sodizin daʼatahígíí doo daʼoodláanii atídabiʼdilʼį́ doo atsóhodééʼįįdgóó akʼijįʼ yádaałtiʼgo yaa nídiikai, dóó ádabiʼdilʼínígíí bilą́ąjįʼ naazínígíí yichʼįʼ saad dahółǫ́; dóó Alma yichʼįʼ saad dahółǫ́. Dóó Alma aláahdi naatʼáanii Mosiah yiyaa niiníʼą́. Dóó Mosiah dabipriest yił nidahazʼą́.

2 Áádóó baa hoolzhiizh aláahdi naatʼáanii Mosiah saad ílíinii kéyahgóó áyiilaa éí éí doo daʼoodláanii sodizin daʼatahígíí doo atídeiłʼíi da dooleeł.

3 Áádóó bee hazʼáanii deeníinii tʼáá ałtso sodizin naaznilgóó doo atíʼádaʼalʼį́ bitah hólǫ́ǫ da doo, áko diné ahihoołtʼéego iiná bitah hólǫ́ǫ doo.

4 Áko ádaa hodzódlí dóó ádaa haʼniih doo hodéezyéél yaa nídóotʼįįł da; tʼáá ałtso diné binaagóó dabighanígíí bił danilį́į doo tʼáá bí ádaa nitsékeesígi átʼáo, tʼáá bí bílaʼ yee ákʼindaaldzil doo.

5 Aooʼ, tʼáá átʼé bipriest danilínígíí dóó bindaʼnitiní tʼáá bí bílaʼ yee ákʼindaaldzil doo, tʼáá ałtsojįʼ tʼáá hazhóʼó bitah dahoneezgaigo, éí doodago yéego bichʼįʼ anídahaztʼiʼgo tʼéiyá; dóó díí kódaatʼį́įgo, Diyin God bibee ajoobaʼ bił dahólǫ́.

6 Áádóó kéyahgóó kʼé ląʼígo náhasdlį́į́ʼ; dóó diné ląʼí silį́į́ʼ, dóó nahasdzáán bikááʼgóó daʼníłtsʼą́ąjigo ałtsʼádabídiʼnóolkał, aooʼ, náhookǫsjigo dóó shádiʼáahjigo, haʼaʼaahjigo dóó eʼeʼaahjigo, kintah ntsaago ádeiyiilaa dóó daʼníłtsʼą́ą́jigo kin hadaasʼáago ádeiyiilaa.

7 Áádóó Bóhólníihii bikʼihoosdliʼ dóó daʼatʼį́įgo ádabiilaa, áádóó diné ląʼí dóó daʼastʼįįd.

8 Áko Mosiah biyeʼké doo daʼoodlánígíí atah bił óltaʼ; dóó ałdóʼ Alma biyeʼké łaʼ bitah daóltaʼ, éí Alma wolyé, bizhéʼé tʼáá yeelyé; ákótʼée ndi, diné tsʼídá doo yáʼáshóonii dóó béédaʼalyaii yichʼįʼ sodadilzin. Áádóó nihokááʼ dineʼé bizaad łikanii nilį́, áádóó saad ayoochʼídígíí diné yee yichʼįʼ yáłtiʼ; éí bąą diné ląʼí da bąąhági átʼáo éʼéłʼínígíí yikééʼ niikai.

9 Áádóó ayóó átʼáo Diyin God bisodizin dínóosééł yichʼą́ą́h sizį́; diné bijéí yiniʼįįh; diné ląʼígo saad yee daʼahigą́, Diyin God beʼanaaʼ akʼi dabidziil ádaʼałʼį́.

10 Áádóó baa hoolzhiizh Diyin God bisodizin neiyiłchxǫǫhgo naaghá, áko Mosiah biyeʼké yił ndaʼnitingo sodizin nideiyiiłchxǫǫ, dóó Bóhólníihii bidineʼé yooʼadeiyiiʼéésh, éí Diyin God bibee hazʼáanii bitsʼą́ą́jí átʼé, éí doodago aláahdi naatʼáanii bitsʼą́ą́jí—

11 Áádóó ánihidííniid neʼ, Diyin God yikʼijįʼ nidaalnishgo deíkááh, áko shooh, Diyin Bóhólníihii bá naalʼaʼí bichʼįʼ ííshjání íʼdiilyaa; áádóó kʼos yiyiiʼ sizį́ nahalingo adááyá; áádóó iinééʼ adiʼní nahalingo haadzííʼ, éí nahasdzáán yikááʼ naazínígíí yídiisnááʼ.

12 Áádóó ayóó átʼáo hayaadahodeesxiz, nahasdzáán bikáaʼjįʼ naaʼahizhneezdeeʼ, áádóó saad yee hachʼįʼ haadzíʼígíí tʼáadoo bikʼidazhdiitą́ą da.

13 Ákótʼée ndi hachʼįʼ hanáádoolghaazh, kóníigo: Alma, nídiidááh dóó yiiʼzįįh, haʼátʼíí biniinaa Diyin God bisodizin atíníłʼį́? Háálá Bóhólníihii ádííniid: Díí shisodizin átʼé, áádóó hadideeshlííł; áádóó doo éí łaʼ yidoołchxǫǫł da, tʼáá hazhóʼó shidineʼé niʼiilzííh yiih yíkaigo tʼéiyá.

14 Áádóó nááná; Diyin yá naalʼaʼí ání: Shooh, Bóhólníihii bidineʼé bisdodizin yidiiztsʼą́ą́ʼ, áádóó ałdóʼ Alma, azhéʼé, dóó anaalʼaʼí nilíinii bisodizin yidiiztsʼą́ą́ʼ, háálá beʼoodląʼ ląʼígo yee ná sodoolzin áko tʼáá aaníinii nił bééhodoozįįł biniyé, éí bąą, díí éí biniyé níyá Diyin God bibeʼadziil dóó bibee óhólníihii baa ákodíníízį́į́ł, áko bá nidaalʼaʼí bisodizin bidahodoolnííł bedaʼoodląʼ binahjįʼ.

15 Ákohgo shooh, daʼ Diyin God bibeʼadziil doo yidíídląął da? Háálá áko shooh, daʼ shiinééʼ nahasdzáán neiyiisnááʼ? Áádóó nidááhdóó sézį́įgoísh shiiniłtsą́? Dóó Diyin God ashííłʼaʼ.

16 Áko ándishní: Níwohjįʼ, Helam dóó Nephi kéyahdi nihizhéʼé dabiʼdisnahę́ę béédaałniih, dóó ayóó átʼáo bíká eelwod yę́ę béédaałniih; háálá dabiʼdisnah ńtʼę́ę́ʼ, áádę́ę́ʼ yisdábííʼeezh. Áádóó kʼad nihił chʼíhonishʼaah, Alma, kʼad yínááł, tʼáadoo sodizin daʼatahígíí nihíłchxǫǫhí, bisodizin bohodíílííł, áádóó nił yóóʼályaa ndi díí kótʼáo ádoolnííł.

17 Áádóó baa hoolzhiizh Diyin yá naalʼaʼí díí saad akéeʼdi Alma yee yichʼįʼ haadzííʼ, áádóó dah nídiidzá.

18 Ákohgo Alma dóó bił naaldeehígíí nahasdzáán bikáajįʼ naa anááníídeeʼ, háálá ayóó átʼáo biyaa dahodeesxiz; háálá tʼáá bí binááʼ bee Diyin Bóhólníihii bá naalʼaʼí deiyiiłtsą́; áádóó biinééʼ adiʼní nahalingo diistsʼą́ą́ʼ, éí nahasdzáán yídiisnááʼ, áádóó Diyin God bibeʼadziilii tʼéiyá nahasdzáán neidiyoołnaał áádóó ditsxizgo ałtsʼéí doołtǫǫłgo bił béédahózin.

19 Ákohgo Alma biyaa hodeesxisígíí tsʼídá ayóó átʼé silį́įʼgo doo yáłtiʼgóó ábiʼdiilyaa, dóó chʼééh bizééʼ ąą íílééh; aooʼ, dóó doo bidziil da silį́į́ʼ, azhą́ bílaʼ ndi chʼééh yidiiłnááh; éí bąą bił nidaakaiígíí dah dabidiiłtį́, dóó doo bitah hwiinéehgo biʼdooltééł, bizhéʼé bidááh niiltį́įjįʼ.

20 Áádóó bizhéʼé ádahóótʼįįdígíí tʼáá átʼé yee yił dahoolneʼ; áádóó bizhéʼé bił hóózhǫǫd, háálá Diyin God bibeʼadziilii átʼéego bił bééhózin.

21 Áádóó diné ałhíídookahgo áyiilaa áko Bóhólníihii biyeʼ yíká aalwodígíí deidínóołʼįįł biniyé, áádóó bił naaldeeh yę́ę ałdóʼ.

22 Áádóó priest danilínígíí ahíídoohkah yidííniid; áádóó chʼiyáán dóó tó doo choideiyołʼíígo, Bóhólníihii Diyin God yichʼįʼ sodadilzin, áko Alma bizééʼ ąą íidoolííł, áko hadoodzih, áádóó ałdóʼ bigaan dóó bijáád bidziil nídadoodleeł—áko diné binááʼ ąą ádadoonííł dóó Diyin God biʼyáʼátʼéehii dóó ayóó átʼéii deidoołtsééł dóó bił béédahodoozįįł.

23 Áádóó baa hoolzhiizh tʼáadoo daʼayaní dóó sodadilzingo naaki jį́ dóó naaki tłʼééʼ azlį́į́ʼ, Alma bigáán dóó bijáád bidziil násdlį́į́ʼ, áádóó yiizįʼ dóó hachʼįʼ haadzííʼ, nihił hózhǫ́ǫgo hadaʼíínółní yidííniid:

24 Háálá, ání, Shibąąhági átʼéii baa náʼiisíkan, dóó Bóhólníihii shá nináʼnídlá; áko shooh Iiʼ Sizį́ Diyinii bee nááshiʼdeezhchį́.

25 Áádóó Bóhólníihii áshidííniid: Nihokááʼ dineʼé tʼáadoo baa áyóí danohsiní, aooʼ, hastóí dóó sáanii, tʼáá ałtso nihokááʼ dineʼé dah deíkááhgóó, ahidaʼdiilchíín, bizaad ałʼąą ádaatʼéii dóó nihokááʼ dineʼé, aooʼ, diyingo náádabidiʼdoochííł, aooʼ, Diyin Godkʼehjí náádabiʼdidoochííł, atsʼíís dóó asdzihdę́ę́ʼ, Diyinkʼehgo oodááłjįʼ łahgo ádadooʼnííł, Diyin God bá nináʼdoodlééł, áádóó biyeʼké dóó bitsiʼké dadooleeł.

26 Áádóó ániid hináanii ndaazlį́į́ʼ; dóó díí ádaadzaago tʼéiyá, Diyin God bił hazʼą́ baa doolyééł.

27 Ándishní, díí kótʼéego tʼéiyá, yóóʼ abidiʼdootʼááł; díí éí shił bééhózin, háálá yóóʼ ashiʼditʼaah nahalin ńtʼééʼ.

28 Ákótʼée ndi, achʼįʼ nahwiiʼná biiʼ chʼíníyáago, náʼooshkąąhgo kʼasdą́ą́ʼ dahsétsą́, Bóhólníihii joobaʼgo hoolʼáágóó hodookʼą́ą́łdę́ę́ʼ hashííłtį́, dóó Diyin God náshíshchį́.

29 Shiiʼ sizíinii hodíchʼííʼ hazʼą́ą́dę́ę́ʼ dóó bąąhági átʼéii shótąʼdę́ę́ʼ shá nináʼílyá. Tsʼídá chahałheeł hazʼą́ądi honishłį́į́ ńtʼééʼ; ákondi kʼad éí Diyin God bibeeʼadinídíín ayóó átʼéii yishʼį́. Shiiʼ sizíinii hoolʼáágóó tiʼhooʼnííh shikʼi hooleʼ; ákondi tsxį́įłgo yisdáshííłtį́, dóó shiiʼ sizíinii doo bichʼįʼ nahwiiʼnáa da silį́į́ʼ.

30 Shá Nináʼnídláii nahjįʼ kwíishłaa, dóó nihizází yee hadahaasdzííʼ yę́ę doo tʼáá aaníí ádaatʼée da dííniid; Áko kʼad éí doogáałgo deiyiiłtsą́ dóó tʼáá áłtsoní áyiilaii yénálniih, tʼáá ałtso yichʼįʼ ííshjání ádiʼdoolnííł.

31 Aooʼ, tʼáá ałtso ntsidadidoogoh, dóó tʼáá ałtso ádaa dahodoolnih. Aooʼ, nihoniyá bijį́įdi ndi, nihokááʼ dineʼé tʼáá ałtso deidoozįįłgo bá nahoodootʼááł, áko áadi índa Diyin God yił dahodoolnih; áadi ádaa dahodoolnih, éí nihokááʼdi tʼáadoo Diyin God yéédahóósįįd da, éí nihootʼánígíí hoolʼáágóó tiʼhooʼnííh tʼáá ákótʼéhígíí bikʼi siláa doo; dóó bitah dahíditłid doo, dóó bitah dahoditsxiz doo, áádóó binááʼ tsʼídá tʼáá ałtsoní yee haisíídii doo yichʼįʼ bíniʼgóó yee dabidínóołʼįįł.

32 Ákohgo baa hoolzhiizh Alma kodóó dóó náásgóó diné neidíʼníitʼą́ą́ʼ, dóó Alma yił naaldeeh Diyin yá naalʼaʼí bichʼįʼ ííshjání aʼdiilyaayę́ędą́ą́ʼ, kéyah tʼáá ałtsogóó táhdinééhgo, diné tʼáá ałtsogo deidiiztsʼą́ą́ʼ dóó deiyiiłtsánée yee yił dahoolneʼ, áádóó Diyin God bizaad nídeinítingo ląʼígo bichʼįʼ nidahwiisʼnááʼ, doo daʼoodlánígíí yéego atídabiilaa, dóó yéego bichʼįʼ ndahwiisnááʼ.

33 Azhą́ díí tʼáá átʼé ákótʼée ndi, sodizin hadaʼólníigo ádeiyiilaa, bidaʼoodląʼ niłdzilgo ádeiyósin, dóó nízaadgóó hadaʼíínółní dóó yéego nitsihoodzá biiʼ Diyin God bibee hazʼáanii bikʼeh dahonółʼį́ deiłʼní.

34 Áádóó dį́įʼgo éí Mosiah biyeʼké ádaatʼį́; Ammon, dóó Aaron, dóó Omner, dóó Himni dabízhiʼ; éí éii Mosiah biyeʼké ádaolyé.

35 Áádóó éí Zarahemla tʼáá ałtso kédaayahgóó tádadííná, áádóó aláahdi naatʼáanii Mosiah diné yikʼi bóhólníihígíí tʼáá átʼé bitahgóó, yídaneedlį́įgo sodizin daʼatahígíí yiiʼ atídaʼiilaa yę́ę tʼáá átʼé hashtʼenídeidlééh, bibąąhági ádaatʼéii tʼáá átʼé yaa dahalneʼ, áádóó tʼáá deiyiiłtsánígíí yee hadahadziih, dóó ádaahodooniłígíí dóó Diyin bizaad bee akʼedaʼashchínígíí dadidiitsʼį́į́ł danízinígíí yił ííshją́ą́ ádeiyiilaa.

36 Áádóó Diyin God bibee naʼanishí danilį́įgo ląʼí da tʼáá aaníí átʼéii yikʼidaʼdiitą́ągo ádeiyiilaa, aooʼ, báNináʼnídláii yikʼi daʼdiitą́ąjįʼ.

37 Áádóó dooládó bikʼi dahoojoosdliʼ da! Háálá hodéezyéél ndeiizlá, baa hózhóonii ndeiizlá, áádóó Bóhólníihii éí hooʼáłígíí diné yee yił dahoolneʼ.