1 Áádóó kʼad Abinadi íidííniid: Bikʼidaʼdidoohtį́į́ł Diyin God tʼáá bí nihokááʼ dineʼé baʼáłchíní yitah doogááł, dóó bidineʼé yá nináʼdoodlééłgo yisdéidoonił.

2 Áádóó háálá atsʼíís yiiʼ hináago Diyin God biYeʼ wolyée doo, dóó atsʼíís nihiTaaʼ nilíinii íinízinjí bee bóhólníihgo, nihiTaaʼ dóó aYeʼ nilį́—

3 NihiTaaʼ nilį́, háálá Diyin God bibeʼadziil yee yiltsą́; dóó aYeʼ nilį́, háálá atsʼíís bishchį́; áko nihiTaaʼ dóó aYeʼ silį́į́ʼ—

4 Áádóó áko naaki ndi tʼááłáʼí Diyin God nilį́, aooʼ, yáʼąąsh dóó nahasdzáán tʼáá aaníí Hoolʼáágóó yiTaaʼ nilį́.

5 Áádóó áko Iiʼ Sizį́ Diyinii atsʼíís bee bóhólnííh silį́į́ʼ, éí doodago nihiTaaʼ nilíinii aYeʼ bee bóhólnííh, tʼááłáʼí Diyin God nílį́įgo, ndahontaahii yee tiʼhoozniiʼ, dóó ndahotaahii tʼáadoo yá ádeetʼą́ą da, ákondi baa oodloh, dóó náníltsxis, dóó chʼíneelchą́ą́ʼgo yee tiʼhoozniiʼ, dóó bidineʼé doo dabiniizį́į da.

6 Áádóó díí tʼáá ałtso ádahoodzaago, nihokááʼ dineʼé baʼáłchíní bitahgóó tsʼídá ląʼí ayóó átʼáo álílee bikʼeh naanishgo, niʼdoodlóós dooleeł, aooʼ, Isaiah ádííniid yę́ęgi átʼáo, índa dibé tádígéeshgo tʼáadoo áníní nahalingo, tʼáadoo hadzoodzíiʼ da.

7 Aooʼ, áko bidiʼdoodlóós, tsin ałnáozʼá bikáaʼjįʼ bił íʼdoolkał, dóó bidiʼyoolyééł, anoonééł atsʼíís yee bóhólníih dooleéł, Azhéʼé yinízinígíí aYeʼ yinízinígíí hózhǫ́ bidziil sílį́įʼgo áyiilaa dooleeł.

8 Áádóó áko Diyin God anoonééł bitłʼóól kʼíídiyoołdláł, anoonééł yikʼeh deesdlį́į́ʼ; aYeʼ adziilii bee hólǫ́ǫgo nihokááʼ dineʼé baʼáłchíní yá náʼookąąh dooleeł—

9 Yáʼąąsh góde ííyá, aa joobaʼ biiʼ hólǫ́ǫgo; nihokááʼ dineʼé baʼáłchíní yichʼįʼ aa ááh nízingo; diné dóó bee bá nidahodootʼáłígíí yitaʼ sizį́; anoonééł bitłʼóól kʼíyiisdláád anoonééł wótąʼ yę́ę yikʼeh didoodleeł, bibąąhági átʼéii dóó ádił nidaʼiisíʼígíí yá ákʼíididootʼááł, yá nináʼnídláago, dóó ánahwiitʼaah yee hasʼánée yikʼeh nináʼnídlá.

10 Áádóó kʼad nihił chʼíhonishʼaah, áádóó háishąʼ oochíiłii biiʼ jiinánígíí hazhóʼó yaa hodoolnih? Áko shooh, áníhidishní, biiʼ sizíinii bąąhági átʼéii bichʼįʼ nááhaazniigo bílástsiiʼ yidoołtsééł. Áádóó kʼad haʼátʼíí dádoohní? Áádóó háísh éí bílástsiiʼ dadooleeł?

11 Áko shooh nihił chʼíhonishʼaah, tʼáá háí shį́į́ Diyin yá yáłtiʼii bizaad yidiiztsʼą́ąʼgo, aooʼ, tʼáá ałtso Diyin yá yádaałtiʼii dadiyinii Diyin Bóhólníihii doogáałgo bídadéétʼiʼ yee hadahaasdzííʼ yę́ę—Nihił chʼíhonishʼaah, tʼáá háí shį́į́ bizaad yidiiztsʼą́ʼígíí, áádóó Diyin Bóhólníihii bidineʼé yisdéidooʼishgo deiyoodlánígíí, dóó bibąąhágí ádaatʼéii nahjįʼ kodoolníiłgo éí bijį́ yichʼįʼ náásgóó dadéezʼį́į́ʼ, Nihił chʼíhonishʼaah, díí éí bílástsiiʼ ádaatʼį́, éí doodago Diyin God bił hazʼą́ądi yił kéédahatʼį́į dooleełígíí.

12 Díí éí bibąąhági ádaatʼéii yá ákʼiidiitʼą́; díí éí yá náábiʼdiilyá, ádił nidaʼiisíʼígíí yá nináʼdoodlééł. Áádóó kʼad, eiísh doo bílástsiiʼ ádaatʼį́į da?

13 Aooʼ, daʼ Diyin yá yádaałtiʼii danilį́, tʼáá háiida bizééʼ ąą áyiilaii Diyin bikʼeh áhodooníiłgo yaa dahalneʼii, tʼáadoo ádił nidaʼiisíʼígíí, tʼáá átʼé Diyin yá yádaałtiʼii dadiyinii hodeeyáádę́ę́ʼyę́ę ááhdishní? Áko bee nihił hashneʼ éí bílástsiiʼ ádaatʼį́.

14 Áádóó díí éí haneʼ baa hózhóonii yaa dahoolneʼ, haneʼ yáʼátʼéehii nihaa deiyiizlá, áádóó yisdáʼiildééh yaa dahoolneʼ; éí Zion ííłní: NiDiyin God aláahdi bee óhólníihii yee hooʼááł!

15 Áádóó O dziłghą́ąʼdi baa hózhóonii yee nidaakaii!

16 Áádóó nááná, dziłghą́ąʼdi baa hózhóonii yee nidaakaii tʼahdii haneʼ yáʼátʼéehii yaa dahalneʼ!

17 Áádóó nááná, dziłghą́ąʼdi baa hózhóonii yee nidaakaii éí haneʼ yáʼátʼéehii ałtso ádahootį́įdgo dahalneʼ doo, aooʼ, kʼad díí hoolzhish dóó ahoolʼáágóó.

18 Áádóó áko shooh, Nihił chʼíhonishʼaah, dóó tʼáá díí tʼéiyá da. Háálá O dziłghą́ąʼdi baa hózhóonii yee nidaakaii haneʼ yáʼátʼéehii nihaa deiyiizlá, éí baa hózhóonii hadeidiilaa, aooʼ, Diyin Bóhólníihii ndi, éí bidineʼé yá nináʼnídlá, aooʼ, éí bidineʼé yisdaʼiildeeh yeidiníʼą́;

19 Háálá bidineʼé tʼáadoo yá nináʼníldláágóó doo yá áyiilaago, éí hodeeyáádą́ą́ʼ hashtʼeelyaa, nihił chʼíhonishʼaah, díí doo ákótʼéego, tʼáá ałtso nihokááʼ dineʼé ádoodįįł.

20 Ákondi shooh, anoonééł bitłʼóól kʼíhidooldlał, áádóó aYeʼ hooʼááł, dóó daneeznánígíí yikʼi bidziil; éí bąą, daneeznánígíí nááhiidoołnaał.

21 Áádóó nááʼiiná baa hodoolzhish, éí áłtsé nááʼiináhígíí; aooʼ, andahaaskaaígíí ndi náádahidooʼnaał, dóó kʼad dahinánígíí, dóó dahináa dadooleełígíí, Christ nááhiinaʼjįʼ ndi—háálá díí bee wójíi doo.

22 Áádóó kʼad, tʼáá ałtso Diyin yá yádaałtiʼii náádahidooʼnaał, dóó tʼáá ałtso bizaad deiyoosdląądígíí, éí doodago tʼáá átʼé Diyin God bibee hazʼáanii yikʼehgo dahinánée, éí tsʼídá áłtsé nááʼiináadi hahidookah, éí bąą, éí tsʼídá áłtsé náádahiʼnaʼ danilį́į doo.

23 Diyin God bił kéédahojitʼį́į doogo náázhdiijééʼ éí há nináʼnídlá; áko éí hoolʼáágóó iiná Christ binahjįʼ baa dahideestʼą́, éí anoonééł bitłʼóól kʼíyiisdláád.

24 Áádóó díí éí áłtsé nááʼiiná atah ádeidoolííł, áádóó éí éiyá tʼah doo Christ yíghááhgóó daneezná, doo bił éédahózingo, yisdáʼdoodááł tʼáadoo bił dahóóneʼgo. Áádóó áko Diyin Bóhólníihii yitsʼíís náádahidoołnaałgo yá áyiilaa, áádóó díí éí áłtsé nááʼiiná atah ádeidoolííł, éí doodago hoolʼáágóó iiná baa dahidoolyééł, éí Diyin Bóhólníihii bá nináʼnídlá.

25 Áádóó áłchíní yázhí ałdóʼ hoolʼáágóó iiná baa dahídoolyééł.

26 Ákondi shooh, Diyin God bidááhdóó nídaałdzid, dóó dadinohtsxiz, áko daninohtsxiz doo, háálá Diyin Bóhólníihii doo łaʼ yá nináʼnídláa da doo bikʼeh dah hółʼínígíí dóó bąąhági ádaatʼį́įgo daneeznánígíí, aooʼ, hodeeyáádę́ę́ʼ tʼáá ałtso bąąhági ádáátʼįįdgo daneeznánígíí ndi, Diyin God tʼáá ákódaanéehgo yikʼijįʼ danilínígíí, Diyin God bibee hazʼáanii bił béédahózin, ndi doo deiyótąʼ da; díí éí tsʼídá áłtsé nááʼiináadi doo atah ádaʼdoolííł da.

27 Éí bąą daʼ dadinohtsxiz dooísh ńtʼę́ę́ʼ? Háálá yisdáʼiildééh łaʼ doo baa doolyééł da; háálá Diyin Bóhólníihii doo łaʼ yá nináʼnídláa da, aooʼ, Diyin Bóhólníihii doo łaʼ yá nináʼdoodlééł da, hááłá doo tʼáá bí akʼijįʼ nanídlíi da; háálá ánahwiitʼąąh doo yikʼijįʼ nilíi da tʼáá íídą́ą́ʼ nahootʼą́ągo.

28 Áádóó kʼad nihił chʼíhonishʼaah áajįʼ ahodoolzhish Diyin Bóhólníihii biʼyisdáʼiildééh tʼáá áłtso diné dah deíkááh dóó bikʼéí dah deíkááh dóó saad ałʼąą dah deíkááh, dóó dineʼé bee bił hodoonih.

29 Aooʼ, Diyin Bóhólníihii, hadaʼasíidii biinééʼ yéego yee ádaaníi doo, áádóó tʼááłáʼí bízhiʼ yee hadadiʼdooʼááł, háálá Diyin Bóhólníihii éí Zion ninéinidlaago ałheełtʼéego deidiiltsééł.

30 Jerusalem dahóóchxǫʼgo nahazʼánígíí dahohtaał, ił hózhǫ́ nááhodoodleełgo tʼááłáʼí ázhiʼgo dahohtaał, háálá Diyin Bóhólníihii éí bidineʼé hadaʼólníigo yíká adoolwoł, Jerusalem yá nináʼídlá.

31 Diyin Bóhólníihii bigaan bitsxeʼii ałtso ałʼąą dineʼé deidoołtséełgo áyiilaa; dóó nahasdzáán nidahoneesʼą́ą́dę́ę́ʼ nihiDiyin God bibee yisdáʼiildéehii deizdoołtsééł.