1 Áko kʼad Shemlon hazʼą́ągi Laman dineʼé bitsiʼké ahínéíkahgo dahataał, dóó daʼalzhish dóó bíł dahózhǫ́.

2 Áádóó baa hoolzhiizh łaʼ áajįʼ tʼáá díkwíhígo dahataał dóó daʼdoolzhish biniyé ahííkaigo.

3 Áádóó kʼad aláahdi naatʼáanii Noah bipriest danilínígíí, kin haalʼá Nephigóó nídookahgo yaa yádanízin, aooʼ, dóó ałdó diné ndabidoołtsxíłgo yéédaaldzid éí bąą bichʼooní dóó baʼáłchíní doo yíchʼįʼ ndadikááh da.

4 Áádóó doo kééhatʼínídi kééhatʼį́įgo, dóó Laman dineʼé bitsiʼké yikʼideineeztʼą́ą́ʼ, éí nahonitindę́ę́ʼ hadeisííd;

5 Áádóó tʼáá díkwíhí ahiikai daʼdoolzhish biniyé, ndanitʼinyę́ę háájééʼ dóó chʼikéí deisná dóó diné doo kééhatʼínígóó adeiyizheezh; aooʼ, naadin dį́į́ʼgo Laman dineʼé bitsiʼké diné doo kééhatʼínígóó adeiyizheezh.

6 Áádóó baa hoolzhiizh Laman dineʼé bichʼikę́ę́ yídahoosaʼ, dóó bádahachʼį́go Limhi bidineʼé yikʼídahazʼah, háálá Limhi bidineʼé daatsʼí ádaatʼį́ daniizį́į́ʼ.

7 Éí bąą bisiláó adeisʼaʼ; aooʼ, aláahdi naatʼáanii ndi bidineʼé yilą́ąjįʼ dah diiyá; kéyah Nephigóó yíkai Limhi bidineʼé deidoosíł biniyé.

8 Áádóó kʼad Limhi yaʼdiiltłʼǫ́ yikááʼdóó hahodeesʼį́į́ʼ, tʼáá ałtso anaaʼ yichʼįʼ hashtʼeʼádaʼdiilyáago yiyiłtsʼą́; áko bidineʼé ałhąʼ áyiilaa, áádóó hodíłchʼil dóó tsintahdi yibá nidanitin.

9 Áádóó baa hoolzhiizh Laman dineʼé hachʼįʼ dahdiijééh, Limhi bidineʼé ndanitinídéé haajééhgo, ndeiʼniiłtseed.

10 Áádóó baa hoolzhiizh tʼáá íyisí yéígo adaʼahiʼniighą́ą́ʼ, nashdoitsoh iʼniiłhinígíí nahalingo.

11 Áádóó baa hoolzhiizh Limhi bidineʼé éí Laman dineʼé biláajįʼ dahdadínííchą́ą́h, ákondi doo Laman dineʼé ałníigo áneeltʼeʼ da. Ákondi beʼiiná yíká daʼahooghą́ą́ʼ, dóó beʼdaʼasdzáán, dóó báʼáłchíní yíká; éí bąą yéego adáátʼį́į́d tłʼiishtsoh nahalingo.

12 Áádóó baa hoolzhiizh Laman dineʼé biʼaláahdi naatʼáanii daneeznánígíí yitah sitiʼį́į́góó yikʼídeinééztʼą́ą́ʼ, ákondi tʼáá hiináá lá, atíbidiilyaago łeeshtahgóó atʼáh sitį́į lá, hodineʼé tsxį́į́łgo hokʼééjééh.

13 Áádóó dahdeidiiłtʼį́įgóó atiʼbidiilyáhígíí yikʼí daʼdeesdiz, áádóó Limhi yidaah nideeslóóz, áádóó ádeidííniid: Shooh, kǫ́ǫ́ Laman dineʼé bialáahdi naatʼáanii, atíbidiilyaa dóó daneeznanígíí yitah nítłʼiz, dóó yaa dáádiikai; áko shooh, nidááh nidaníídlóóz; dóó kʼad deidiyilyééł.

14 Ákondi Limhi ábidííniid: Doo deiyidoołhééł da, ndi shidááh nidanóhłóós áko yídeestsééł. Áádóó yidááh nideizlóóz. Áádóó Limhi áyidííniid: Háʼátíí biiniinaa anaaʼ shidineʼé bikʼihjįʼ ádaałaa? Áko shooh, shidineʼé bee ahaʼdeetʼą́ nił ííshłaayę́ę tʼáadoo kʼideeztiʼ da; éí bąą, háʼátʼíí biniyé ahaaʼdeetʼą́ shidineʼé bichʼįʼ ádaałaayę́ę kʼidanóhtiʼ?

15 Áádóó kʼad aláahdi naatʼáanii ání: Bee ahaaʼdeetą́ kʼinítiʼ háálá shidineʼé bitsʼiʼ dahsinooʼį́į́; éí bąą, sháhachʼįʼgo shidineʼé anaaʼ bee nidineʼé yikʼiijééʼ.

16 Áádóó kʼad Limhi díí tʼah doo yidíítsʼį́į́h da; éí bąą ání: Shidineʼé bitah didééshį́į́ł áádóó háída díí átʼínígíí hodiyeeshééł. Éí bąą hodineʼé bitahgo haʼdeestʼį́įgo áyiilaa.

17 Áádóó kʼad díí Gideon yideeztsʼą́ą́góó, éí aláahdi naatʼáanii bisiláó yilą́ąjįʼ sizį́ nilį́, aláahdi naatʼáanii yichʼįʼ niilwod dóó ííłní: Tʼáá shóódí tʼáadoo áníléhé, áádóó díí diné tʼáadoo bitah diníʼį́ʼí, áádóó díí tʼáadoo bąąh siláago áníléhé.

18 Háálá dooísh nizheʼé bipriest danilínée doo béénílniih da, éí díí diné ndeidoołtsxiłgo hadeinitáá ńtʼę́ę́ʼ? Áádóó daʼ doóísh diné doo kééhatʼinídi naaldeh da? Áádóó daʼ bí éí Laman dineʼé bitsiʼké deineezį́į́ʼyę́ę ádaatʼį́?

19 Áádóó kʼad, shooh, áádóó díí aláahdi naatʼáanii bee bił hodíílnih, áko bidineʼé yił dahodoolnih áko doo nihichʼįʼ bádahídoochį́į́ł da; háálá áko shooh nihił daʼahidoogą́ą́łgo tʼáá íídą́ą́ʼ yichʼįʼ hashtʼeʼadadiilnééh; áádóó áko shooh ałdóʼ nihí éí tʼáá díkwíhí daniiltʼé.

20 Áádóó áko shooh, bí éí ląʼígo nihichʼįʼ deiyínééh; áádóó áko aláahdii naatʼáanii doo nihichʼįʼ baa dahachįʼ íílééhgóó nihí éí dadínííʼnééł.

21 Háálá daʼ Abinadi bizaadísh bohoolyaa, éí nihikʼihjįʼ áhodoonííłgo yee haadzííʼ—áádóó díí tʼáá átʼé Diyin Bóhólníihii bizaad doo deisinííltsʼą́ʼígíí biniinaa, dóó doo bąąhágiʼ átʼéii bitsʼá niikááhgóó?

22 Áádóó kʼad aláahdi naatʼʼaanii bá hózhǫ́ǫ ádadiilnííł, áádóó nihí bił ahaaʼdadeetʼánééʼ bidaʼdiilnííł; háálá ąąh shiijééhjigo nihá yáʼátʼtééh áko náásgóó dahiʼniináá dooleeł, éí bąą, ndaʼíhiiltseedígíí nahjįʼ kódadiilnííł.

23 Áádóó kʼad Limhi éí ałáahdi naatʼáanii tʼáá ałtso bizhéʼé bidadéétiʼígíí yee yił hoolneʼ, áádóó priest danilínígíí diné doo kééhatʼinígóó adahineezchʼą́ą́ʼyę́ęʼ, dóó bitsiʼké deineezʼį́į́ʼyę́ę yee hakʼihdahaazʼah.

24 Áádóó baa hoolzhiizh aláahdi naatʼáanii hodineʼé yichʼįʼ bá hóózhǫ́ǫ́d; dóó ábiłní: Tįʼ shidineʼé bił áhiidiikah, bee naʼabaahí tʼáágééd; áádóó bee ahaʼdeetʼaah bee tʼáá aaníí ádishní shidineʼé doo nidineʼé nideidoołtsxił da.

25 Áádóó baa hoolzhiizh aláahdi naatʼáanii yikééʼ dahdiikai, dóó bee naʼabaahí tʼáágééd Laman dineʼé yeiyíkai. Áádóó baa hoolzhiizh Laman dineʼé yeiyíkai; áádóó Laman dineʼé aláahdi binaatʼáanii bichʼįʼ yaa kódzaa, dóó Limhi bidineʼé yá naʼooskan.

26 Áádóó Laman dineʼé éí Limhi bidineʼé deiyiłtsʼą́ą́góó, dóó bee naʼabaahí tʼáágééd, yaa aʼááh daniizį́į́ʼ dóó yichʼįʼ bił dahóózhǫǫd, áádóó biʼaláahdii naatʼáanii tʼáá bí bikéyahdi ahodiilzééʼgóó yił nátʼą́ą́ʼ nákai.