1 Áádóó baa hoolzhiizh Limhi bidineʼé Nephi kintahgo nákai, dóó kéyah yiyiʼ hodéézyéélgo kéédahatʼį́ dáázlį́į́ʼ.

2 Áádóó baa hoolzhiizh ląʼí yiską́ągo Laman dineʼé éí Nephi dineʼé yichʼįʼ bádahachįʼgo hanáádahonííłchaad, áádóó kéyah hoodzoh biyiʼ góneʼ yaa ádaʼhááskai.

3 Kʼad éí doo ńdeiłdtseed da, háálá biʼaláahdi naatʼáanii éí Limhi yił ahaʼdeestʼánéé biniinaa; ákondi biniiʼ ńdéíníkad, dóó bikʼijįʼ ádídahoosniiʼ, dóó télii biyéél danidáázígíí nahalǫ́ǫ, ndeiniłkaadgo adeiyiilaa—

4 Áooʼ, díí tʼáá átʼé ádaʼhootʼįįd áko Diyin Bóhólníihii bizaad biʼhodoolnííł biniyé.

5 Áádóó kʼad éí Nephi dineʼé yéígo ntsaago tiʼdahoonííh, dóó bilaʼkʼeedóó doo haadeitʼáo da hazhdookah da, háálá Laman dineʼé tʼáá ałtso dééʼ hadaʼhasííd.

6 Áádóó baa hoolzhiizh bichʼįʼ ndahwiinánígíí biniinaa aláahdi naatʼáanii diné yił akʼihjįʼ ayá adaʼniiłtįʼ; dóó bikʼiidiijah daníízį́į́ʼ. Áádóó aláahdi naatʼáanii yéígo yichʼįʼ ndahwiiłʼnáago saad dahółǫ́; éí bąą tʼáá bí ádeinizinígíí ádeiłʼíigo yee yá hoołʼaʼ.

7 Áádóó ałhínááneikai, dóó anaaʼjí béésh ééʼ yee hadadiidzáá, áádóó Laman dineʼé bikéyahdóó baa chʼídadoojahgo biniyéí yikʼijįʼ dadeezbaaʼ.

8 Áádóó baa hoolzhiizh Laman dineʼé bikʼehdadéésdlį́į́ʼ, dóó nátʼą́ą́ʼ anábiʼdinoolkaad, dóó ląʼída ndeistsxeed.

9 Áádóó kʼad Limhi bidineʼé bitahgo ayóó átʼéego yínííł dóó daachah, asdzání bąąh áhásdįįd bahastíín yę́ę yiká yichah, tsíłkéí dóó chʼíkéí bizhéʼé yę́ę yiká daachah; áádóó akʼiské éí bikʼis yę́ę yiká daachah.

10 Kʼad kéyah biyiʼ ląʼída sáanii bąąh adaʼasdį́į́d, dóó tʼáá akwííjį́ ayóó átʼáo daachah, háálá ayóó átʼáo Laman dineʼé bee dajildzidgo hakʼihooleʼ.

11 Áádóó baa hoolzhiizh tʼáá áłahjįʼ dajichahgo biniinaa Limhi bidineʼé chʼéékaiʼígíí Laman dineʼé bichʼįʼ áháchįʼ yee hadaʼhonííłchaad; áádóó náádadeezbaaʼ, ndi nátʼą́ą́ʼ anábiʼdiʼnoolkaad, ląʼígo nináádabiʼdiztseed.

12 Aooʼ, taadi tʼáá ákǫ́ǫ́ʼ nináádaazbaaʼ, dóó tʼáá ákótʼáo tiʼnáádabiʼdiilyaa; áádóó tʼáadoo ndabiʼdiztseedígíí Nephi kin haaláágóó nákai.

13 Áádóó niʼjįʼ ndi hojoobaʼgo adaʼdiilyaa, tʼáá íiyisíí naaltʼeʼ baa adaazhdeestʼą́, atíʼadaʼbidilį́įgo yaa adaʼdeestʼą́, áádóó kǫ́ǫ́ dóó nilééhgo nahoʼdinilkaad, áádóó ndaazgo hąąh ndahasyá, hweʼanaaʼ ádeinizínígíí bikʼehgo.

14 Áádóó hojoobaʼ danilį́įgo ádaʼdiilyaa azhą́ yéego hoyahdi hojoobaʼígíí ndi, dóó Diyin God ayóó átʼéego yichʼįʼ dááchahgo sodadoolzin, aooʼ, ałtso iʼiiʼą́ąjįʼ ndi Diyin God yichʼįʼ ádaanídaʼookąąh tiʼdaʼhoonííhdééʼ yisdádiikah danízingo.

15 Áádóó kʼad bibąąhíʼgi ádaatʼehígíí biniinaa Diyin Bóhólníihii éí bisodizin doo tsxį́į́łgo yidiiztsʼą́ą́ʼ da; ákondi Diyin Bóhólníihii bisodizin bá yidiiztsʼą́ą́, dóó Laman dineʼé bijéí bił dahojoobaʼgo áyílaa biyéél yę́ę aszoolí ayiilaa, ákondi Diyin Bóhólníihii ąąh shijééʼdééʼ chʼííʼbidooʼishígíí bił nááhodeeshzhéézh.

16 Áádóó baa hoolzhiizh ałkééʼ hoolzhiizhgo kéyah yee náásdeeskai, kʼeelyéí ałʼą́ą́ átʼéego łą́ągo kʼideidíílá, dóó naaldlooshii, dóó dabilį́į́ʼ ląʼí daazlį́į́ʼ, áko tʼáadoo dichin daazlį́į́ʼ da.

17 Kʼad ląʼída sáanii chʼéékai, hastóígíí éí tʼáá ałchį́dí; áko aláahdi naatʼáanii Limhi sáanii bąąh ádaʼasdįįdígíí dóó áłchíní hastóí bikáʼánádaajahgo áyiilaa, áko dichin doo ndabidooltsił da biniyé; áádóó díí ádahoodzaa háálá ląʼída ndabiʼdistseedígíí biniinaa.

18 Kʼad Limhi bidineʼé tʼáá łaʼ dahyíkahgo ádaʼdiilyaa bohoneeʼánígiʼ átʼáo, dóó binaadą́ą́ʼ dóó binaadloosh tʼáá íiyisíí yikʼi dadeezį́į́góó ádeiyiilaa.

19 Áádóó aláahdi naatʼáanii kin haalʼá binástłʼin tłʼóóʼdí naagháago ádaa yah hooliih, baaʼádahalyáanii yił naakaigo tʼéiyá, Laman dineʼé hadayitʼéego da dabidoołnááłgo yináldzidígíí biniinaa.

20 Áádóó bidineʼe bikéyah binaagóó hadeisíídgo áyiilaa, áko haadayitʼéego da priest danilínígíí diné doo kééhatʼíniijigo chʼídahineezhchą́ʼą́ą́ yił dadidoodił, éí Laman dineʼé bichʼeekęʼ deiniizʼį́į́ʼ, dóó éí biniinaa yéego tiʼdahoozniiʼ dóó ląʼí ndabiʼdistseed.

21 Háálá yił dadidoodił dóó ninádaʼdoodlééłgo deinízin; háálá tłʼééʼgo Kéyah Nephidi nidantʼį́į́, dóó hakʼelyei dóó ląʼída daʼílinii hweedeiníʼį́į́ʼ; éí biniinaa yiibaʼ hashtʼeʼ adadoolzingo hadaʼasííd.

22 Áádóó baa hoolzhiizh Laman dineʼé dóó Limhi bidineʼé doo atíʼdahwiłį́į da daazlį́į́ʼ, Ammon dóó bikʼiské yił kéyah yikaijįʼ.

23 Áádóó aláahdi naatʼáanii baaʼádahalyánígíí yił kin haalʼá danídíhtį́hdi tłʼóódę́ę́ʼ naaldeehgo, Ammon dóó bikʼiské yikʼíkai; Noah bipriest ádaatʼį́ nizingo deisił, dóó yedaʼaztłʼǫ́, dóó awaalyah góneʼ yah adahaastʼeʼ. Áádóó Noah bikééʼ naazíinii ádaatʼį́įgo éí ndeidoołtsxił ńtʼééʼ.

24 Ákondi doo bí adaatʼį́į́go bikʼihdaníítʼą́ą́ʼ, ndi bikʼiské adaatʼį́į́ lá, áádóó kéyah Zarahemla dę́ę́ʼ yíkai lá, éí bąą tʼáá íiyisíí ayóó átʼáo nihił dahóózhǫǫd.

25 Kʼad, Ammon tʼah doo yíghááhyę́ędą́ą́ʼ, aláahdi naatʼáanii Limhi diné tʼáá dikwíhígo kéyah Zarahemla hadeidínóotaałgo ayííłʼaʼ; ákondi chʼééh hadeineeztʼą́ą́ʼ, áádóó diné doo kééhatʼinídi yóóʼeekai.

26 Ákótʼée ndi, kéyah łaʼ yikʼíhkai éí ákweʼé diné dahináá ńtʼę́ę́ʼgóó dabikʼeh, aooʼ, kéyah tsʼin ndeiztʼąądgo bikááʼ haalʼá; aooʼ, kéyah diné bikááʼ hólǫ́ǫ ńtʼę́ę́ʼgo dahóóchxǫʼ, áádóó éí, kéyah Zarahemla átʼé danizingo, kéyah Nephi bee hoodzohdi nákai, Nephi hoodzohdí yíkai tʼah doo díkwíída yiłkaahgóó Ammon yighááhjįʼ.

27 Áádóó haneʼ naasdzogo deiníʼą́, éí diné éí bitsʼin ndadeeztąąd bah haneʼgo deiníʼą́; áádóó tsé béésh tʼą́hí bee ályaaígíí bikááʼ naʼasdzo.

28 Áádóó kʼad Limhi Ammon yitsʼą́ą́dóó yihoołą́ą́ígíí yéego yaa bił nááhóózhǫǫd éí éí aláahdi naatʼáanii Mosiah Diyin God bee niláhígíí, bikʼehgo naʼadzohígíí yaa hoolneʼ; aooʼ, áádóó Ammon ałdóʼ bił hóózhǫǫd.

29 Ákondi Ammon dóó bikʼiské yéígo yinííł yiiʼ yíkai háálá ląʼída bikʼiské ndabiʼdistseedígíí biniinaa.

30 Áádóó ałdóʼ aláahdi naatʼáanii Noah dóó bipriest danilínígíí ląʼída bąąhági ádaatʼéii dóó Diyin God yikʼijįʼ doo yáʼádaashóonii ádeiyiilaa; áádóó ałdóʼ Abinadi seisyį́į́nígíí yaa daacháh; áádóó ałdóʼ Alma dóó dineʼ yił dahdiikaiʼígíí biniinaa, éí Diyin God bisodizin hadeidiilaa Diyin God bibeʼadziilii dóó yee dabitsxeʼígíí, áádóó Abinadi yee haadzíʼígíí deiyoosdlaadígíí biniinaa.

31 Áooʼ, doo dahdeikaiʼígíí biniinaa daajííchah, háálá háajigo dahdiikaiʼígíí doo bił béédahózin da. Áko kʼad bił dahózhǫ́ǫgo yił dahdiikah doo ńtʼę́ę́ʼ, háálá bí ałdo Diyin God yił ahadaʼdeestʼą́ bibee hazʼáanii yikʼi dahółį́ dóó yiká andaajahgo.

32 Áádóó kʼad Ammon niyáádóó hóshdę́ę́ʼ, aláahdi naatʼáanii Limhi ałdóʼ Diyin God yił ahaʼdinítʼą́, dóó ląʼída bidineʼé, éí yiká anádaalwoʼ dóó bibee hazʼáanii yikʼeh dahółʼį́ doo.

33 Áádóó baa hoolzhiizh aláahdi naatʼáanii Limhi dóó ląʼída bidineʼé tó bee nihidiʼdoolzį́į́ł danizį́į́ʼ; ndi Diyin God bibeeʼóhólnįįh dahyooléłígíí kéyah bikááʼgóó doo łaʼ hólǫ́ǫ́ da. Áádóó Ammon díí íídoolííłgo dooda dííniid, yiʼoh neilą́ą́góó adanitsékéésígíí biniinaa.

34 Éí bąą ákweʼé hoolzhishgo tʼáadoo sodizin atah danilíigo ádaʼdiilyaa, Diyin Bóhólníihii biʼIiʼ Sizį́ Diyinii nideiyólíigo. Áádóó Alma dóó bikʼiské danilínígiʼ átʼáo deiníízį́į́ʼ, éí diné doo kééhatʼiní góneʼ adaʼhineezchʼą́ą́h.

35 Tó bee danihidiʼdoolzį́į́ł danízin áko beeʼééhózin dóó bee tʼáá aaníí átʼéʼ bijéí tʼáá átʼé Diyin God bee biká andeijah doo danízin; ákondi bił hoolzhishígíí náás ádeiyiilaa; áádóó tó bee dabidiʼdoolzį́łígíí náásdí bee nihił hodoonih.

36 Áádóó kʼad Ammon dóó bidineʼé, dóó aláahdi naatʼáanii Limhi dóó bidineʼé baa ntsáházkéézʼígíí baa hooneʼígíí átʼé, éí Laman dineʼé bilákʼeedóó hwiʼdisnah bitsʼą́ą́dóó yisdázhdookah.