1 Áádóó kʼad baa hoolzhiizh Abinadi díí saad ałtso yee haadzíiʼgo, aláahdi naatʼáanii priest danilínígíí Abinadi dadoohsił dóó dadiyoołhééł yídííniid.

2 Ákondi łaʼ hastiin Alma wolyéego, Nephi yitsʼąądóó hazlį́į́įʼgo bitah naaghá. Dóó díí hastiin ániid naaghá, dóó Abinadi saad yee haadzíʼígíí yoosdląąd, háálá Abinadi yikʼijįʼ haadzíʼígíí tʼáá aaníí bąąhági átʼéii yaa naakaiígíí bił bééhózin ńtʼę́ę́ʼ; éí bąą aláahdi naatʼáanii Abinadi tʼáadoo bichʼįʼ ná háchįʼí, bíniʼ kʼé yinahjįʼ yigááł yił níigo náyooskan.

3 Ákondi aláahdi naatʼáanii tʼóó yíwohdi bá hóóchįįd, dóó Alma bitahdóó chʼídeineeshchą́ą́ʼ, dóó bá ndaalʼaʼí yikééʼ yiyííłʼaad deidiyoołhééł biniyé.

4 Ákondi yitsʼą́ąʼ dah diilwodiiʼ yitsʼą́ąʼ ńdeestʼį́į́ʼgo tʼáadoo bikʼidaneeztą́ą́ʼ da. Dóó nanitʼingo tʼóó ahayóí yiską́ Abinadi tʼáá ałtso saad yee haadzíʼę́ę nááyíizoh.

5 Áádóó baa hoolzhiizh aláahdi naatʼáanii yaa ádahalyáanii Abinadi bináhtʼih dóó daohsił yidííniid; dóó yidaʼaztłʼǫ́ dóó awáalyah góneʼ yah adeistʼeʼ.

6 Áádóó tááʼ yiską́ dóó bikʼijįʼ, bipriest danilínígíí yił ninááhazʼą́ągo, bidááhdóó nináánádlóóz.

7 Áádóó kóyidííniid: Abinadi, nikʼijįʼ siʼánígíí łaʼ bééhoozin, dóó nidiʼyoolyééłgo bééhoozin.

8 Háálá Diyin God tʼáá bí nihokááʼ dineʼé baʼáłchíní yitah doogááł díníniid; dóó kʼad, díí biniinaa nidiʼyoolyééł tʼáá hazhóʼó tʼáá ałtso saad doo yáʼáshóonii shí dóó shidineʼé bikʼijįʼ háínídzíʼígíí nátʼą́ą́ʼ bee háínídzíiʼgo tʼéiyá.

9 Kʼad Abinadi kóyídííniid: Shí nihił chʼíhonishʼaah, saad díí dineʼé bee bikʼijįʼ haasdzíʼígíí doo nátʼą́ą́ʼ bee hadeesdzih da, háálá tʼáá aaníinii ádaatʼé; dóó tʼáá aaníigo nihił béédahodoozįįł biniyé nihílákʼee yítłizhgo tiʼhwiiséniiʼ.

10 Aooʼ, tiʼhooshníihgo dadeestsaał, dóó shizaad doo nátʼą́ą́ʼ bee hadeesdzih da dóó tʼáá aaníinii atʼéego bee nihikʼijįʼ haʼoodzíiʼ dooleeł. Dóó dashisoołhį́įgo diné tʼáadoo ádzaaí bidił dadidoosas, dóó Diyin God nahwiiʼaahjįʼ ayííłką́ągo tʼáá aaníí haneʼ átʼéego bee nihikʼijįʼ yisdzoh dooleeł.

11 Áádóó kʼad aláahdi naatʼáanii Noah Abinidi kʼadę́ę́ yeʼałnííh ńtʼę́ę́ʼ, háálá bizaad yinásdzííd; háálá Diyin God bibee ánihwiitʼaahii shikʼijįʼ dooleeł niizį́įʼgo násdzííd.

12 Ákondi priest danilínígíí yikʼijįʼ yádaʼniiłtiʼ dóó yikʼideidiiʼą́, kódaaníigo: Aláahdi naatʼáanii yiyídzííʼ. Díí bąą aláahdi naatʼáanii bá hóóchįįd, dóó yidiyoolyééł biniyé yiyiiłtsood.

13 Áádóó baa hoolzhiizh deisił dóó yidaʼaztłʼǫ́, dóó tsin tsʼósí ahídahaastłʼǫ́ǫgo bitsʼíís yee ńdeineesxaal, aooʼ, kʼasdą́ą́ʼ deiyisxį́.

14 Áádóó kʼad kǫʼ nidinaadígíí bídíʼnííłidgo, yichʼįʼ hadoolghaazh, kóníigo:

15 Áko shooh, tʼáá shí ádashoohłaaígiʼ átʼáo, áko baa hoolzhiizhgo nihilástsííʼ ląʼída shił nahonigaahgo tiʼhooshníhígíí biniinaa bídóʼ tiʼdahwíídoonih, kǫʼ bee iilyé neezgahígiʼ átʼáo; dóó díí éí Bóhólníihii biDiyin God biyisdáʼiildééh dayoodlánígíí biniinaa.

16 Áádóó baa hodoolzhiizh bąąhági ádaahtʼįnígíí biniinaa ląʼída ałʼąą ndaałniih bikʼee tiʼdahwiidoohnih.

17 Aooʼ, tʼáá ałtsodę́ę́ʼ atídanihiʼdilʼį́į dooleeł, dóó daʼníłtsʼą́ąjigo ałtsʼádanihidiʼnóolkał, naaldlooshii daʼałchinii dóó baʼátʼeʼ dahólónígíí binoolkał nahalingo.

18 Áádóó áadi yoołkáałgo nihíkándaʼazheeh dooleeł, dóó niheʼenaʼí danihidoosił, dóó índa shí tiʼhwiiséniiʼígi átʼáo, kǫʼ bee tiʼdahwiidoohnihgo, dadinóhnééł.

19 Kótʼáo Diyin God bidineʼé neiłtseedii nátʼą́ą́ʼ atínéidoodlííł. O Diyin God, shiiʼ sizíinii nídiilé.

20 Áádóó kʼad, Abinadi díidí saad yee haadzíiʼgo, naaʼíítłizh, tiʼhoozniiʼgo kǫʼ biisxį́; aooʼ, Diyin God bibee hazʼáanii doo nahjįʼ kwííléehgo biniinaa biʼdiisxį́, biʼdiisxínígíí bizaad tʼáá aaníi átʼéego yee ííshjání ayiilaa.