1 Ákohgo baa hoolzhiizh Mosiah biyeʼké díí tʼáá ałtso ádeiyiilaago, tʼáá díkwíhígo bizhéʼé, aláahdi naatʼáanii yił yaa nákai, áádóó deinízinígíí yee ląʼ adoohłeeł, díí bitsátʼeezhígíí bił, Nephi bikéyahgóde dookah áko deideeztsʼą́ą́ʼígíí yee ndeiʼdinóotʼį́į́ł, dóó Diyin God bizaad bikʼiské, Laman dineʼé, yee yił dahidoolnih—

2 Áko Bóhólníihii biDiyin God yeedahídooʼsįįł hwiindzingo, dóó dabizází bąąhágiʼ ádaatʼįįdyę́ę bił béédahódoozįįł; dóó Nephi dineʼé tʼáá íyiisí deijoołaahą́ą́ hozhoʼí yaa ntsindadookos, áko Bóhólníihii biDiyin God yaa bił dahózhǫ́ǫ doo, áko ahidiniłnáo ałkʼis danidlį́į́ doo, áádóó Bóhólníihii biDiyin God tʼáá ałtsogóó kéyah yaahodiníʼą́ągóó doo daa ahijoodlaa da doo.

3 Áko yisdáʼiildééh tʼáá ałtso hiináanii bee bił hodoonih danízin, háálá doo łaʼ nihookʼááʼ dineʼé biiʼ sizíinii doo bił yooʼáhodoolzhizh da; aooʼ, iiʼ sizíinii ahoolʼáágóó tiʼhoonihgo tʼóó yaa ntsídadookoos ndi doo yídaneláa da tʼóó ndabiiłná dóó yikʼee daditsxiz.

4 Áádóó kotʼáó Diyin Bóhólníihii biʼIiʼ Sizį́ Diyinii ndabiiłná, háálá tsʼídá alaah bąąhági ádaatʼínii danilį́į́ ńtʼę́ę́ʼ. Dóó Diyin Bóhólníihii bee ajoobá doo ninítʼiʼii yee baa joozbaʼ, ákótʼée ndi biiʼ sizíinii yéego tiʼdahoozniiʼ bąąhági ádaatʼéii yaa naakaiʼígíí biniinaa, hooláago chʼíbiʼdiʼdoolkał yéédaasdzíídgo tʼáá íiyisíí yikʼee tiʼdahoozniiʼ.

5 Áádóó baa hoolzhiizh Nephi bikéyahgóó diikah daaníigo bizhéʼé ndayookąąhgo ląʼí yiską́.

6 Áádóó aláahdi naatʼáanii Mosiah Bóhólníihii yichʼįʼ haadzííʼ dóó biyeʼké Laman dineʼé haneʼ yáʼátʼéehii ndeidinótʼį́į́łgo daatsí bił tʼáá áko.

7 Áádóó Bóhólníihii Mosiah íídííniid: Biniʼdii dahdiikááh, ląʼída bizaad deidoodląął, dóó hoolʼáágóó iiná baadahidoolyééł; dóó niyeʼké Laman dineʼé bitsʼą́ą́dóó yisdádeeshʼish.

8 Áádóó baa hoolzhiizh Mosiah bá lą́ azlį́į́ʼ áko deiyikeed yę́ę yeʼdaʼdoolííł.

9 Áádóó diné doo kééhatʼiní góneʼ dahdiiná Laman dineʼé ndéídinóótʼįįł biniyé; dóó ádeidoołiłígíí kodóó baa hashneʼ doo.

10 Áko aláahdi naatʼáanii Mosiah aláahdi bóhólníh doolééłígíí doo łaʼ hólóo da, háálá biyeʼké bitseskeh ádoogááłgo doo ádeinizin da.

11 Éí bąą béésh łitsoii tʼą́hí bikʼááʼ naʼiisdzoyę́ę neidiinil, dóó Nephi bibéésh tʼą́hí ałdo, dóó tʼáá átʼé Diyin God bibee hazʼáanii bikʼehgo hashtʼeʼneinínil dóó yaa ahalyánę́ę́, Limhi bidineʼé béésh óola tʼąhí yikʼíkai éí bikááʼdę́ę́ saad átʼaʼ nááhaneʼ ndeiyíízoh, éí Limhi bilákʼeiyínil.

12 Áádóó bidineʼé yąąhdabineʼgo biniinaa díí áyiilaa, háálá diné ndabiʼdiztseed yę́ę tʼáá íyiisí yaa ákodadinóozį́į́łgo.

13 Áádóó tsé naaki bináʼázáago bee adéestʼį́į́ʼ choiyoosį́į́dgo yee atah hoolneʼ.

14 Áko díí hodeeyáádą́ą́ʼ hashtʼeʼdaalyaa, dóó ałkééʼ náʼoochííł dę́ę́ʼ ałtah deidiiznil, saad ałʼąą yádaatiʼ bee atah haneʼ dóó akʼé diitʼį́į́h doo biniyé;

15 Áádóó Bóhólníihii yaa áhályą́ dóó hashtʼeʼniinínil, éí binahjįʼ tʼáá ałtso nihookʼááʼ dineʼé kéédahatʼíi dooleełígíí bidineʼé bąąhági ádaatʼį́į́d dóó aláahgo woolchʼį́į́d yaa naasʼkai yę́ę yił ííshjání íídoolííł.

16 Áádóó tʼáá háíshį́į́ʼ díí neijaa dooleełígíí éí diyingo ooʼíinii wolyée doo, tʼáá ałkʼidą́ą́yę́ę bikʼehgo.

17 Áko Mosiah díí naháasdzo ataʼ haneʼ ałtso áyiiláago, áko shooh, éí diné ndabidistseedgo yaa halneʼ, ndabidistseed dóó nátʼą́ą́ʼ ayóó átʼáo yaʼdiitłʼin ályaayę́ędą́ą́ʼ, Diyin Bóhólníihii diné bizaad ałʼąą ádaatʼéego áyiilaayę́ędą́ą́ʼʼ dóó tʼáá ałtso nahasdzáán bikááʼgóó daʼníłtsʼą́ąjigo ałtsʼádabidiʼneeskaadyę́ędą́ą́ʼ, aooʼ, dóó éí áádóó nátʼą́ą́ʼ Adam abiʼdiilyaayę́ęjįʼ.

18 Áko díí naʼasdzoh Mosiah bidineʼé íiyisíí yínííł ádabiilaa, aooʼ, yéígo yinííł yiih yíkai, ndi ląʼígo bił éédahoozin, éí yaa bił dahoozhǫǫd.

19 Áádóó díí adahodoonííłígíí ndáhíídoodzoh; háálá áko shooh, díí nidaháásdzooʼígíí diné tʼáá ałtso hazhóʼó bił béédahodoozįįł.

20 Ákohgo, nihił chʼíhonishʼaah, aláahdi naatʼáanii Mosiah díí ałtso áyilaago, béésh łitsoii tʼąhí néidiinil, dóó tʼáá ałtso neidiinil, Alma yeinínil, éí Alma yiyeʼ nilį́; aooʼ, Tʼáá átʼé ńdaháásdzooʼígíí, dóó bee ataʼ dahaneʼígíí, beinínil, dóó hazhóʼó baa áhályą́ dóó hashtʼeʼ nidínííł yidííniid, dóó diné baa haneʼ ałdóʼ nahidíízoh, ałkééʼ daʼachííh bitʼah yinił doo, Lehi Jerusalemdę́ę́ʼ dahdiiyáago bee yiʼnił yę́ęgiʼ átʼáo.