1 Áko baa hoolzhiizh ląʼída aniid danóóséłí aláahdi naatʼáanii Benjamin bizaad tʼáadoo yikʼidadiitʼą́ą́ da, íídą́ą́ʼ bidineʼé tʼah áłchíní yázhí danilį́įgo yichʼįʼ haadzííʼ, dóó dabizhéʼéyę́ę bibeʼóʼoolʼįįł doo deiyoodlą́ą da.

2 Anoonééłdę́ę́ʼ náádahiidooʼnaał baa haneʼígíí doo deiyoodlą́ą da, áádóó Christ doogáłígíí ałdóʼ doo deiyoodlą́ą da.

3 Ákohgo beʼoodląʼ adaadinígíí biniinaa Diyin God bizaad doo yikʼidaʼdiitįįh da; dóó bijéí éí daastłʼis.

4 Áádóó tó bee alzį́į́h doo deinízin da; sodizin yididookahígíí ałdóʼ doo deinízin da. Áádóó bedaʼoodląʼ binahjįʼ tʼáá sahdii dahyikah daazlį́į́, dóó tʼáá áko daatʼé daazlį́į́ʼ, atsʼíseekʼeh dóó bąąhági áhaatʼį́įgo ndi, háálá Bóhólníihii biDiyin God doo yichʼįʼ sodadilzin da.

5 Ákohgo Mosiah nahaʼáhí nilį́įgo Doo Diyin God bidineʼé ałníidóó ánééltʼeʼ da; háálá bidineʼí ałtsá daháskáhígíí biniinaa bí ląʼí silį́į́ʼ

6 Áádóó baa hoolzhiizh dóó tʼáá ahayóí, sodizin daʼatahígíí, bizaad bił danizhónígíí biniinaa bidaʼdeesdloʼ, dóó tʼóó ahayóí bąąhági ádaatʼéii yaa naakaigo ádayiilaa; éí bąą bąąhiági ádaatʼįįdígíí, dóó sodizin daʼatahígíí, éí sodizin báhooghan daʼatahígíí yee hachʼįʼ hadaasdzííʼ.

7 Áádóó baa hoolzhiizh priest danilínígíí bidááhdóó ndahaasdlóóz, dóó priest danilínígíí dóó nadaʼnitiní bílakʼeenil; dóó priest danilínígíí Alma yidááhdóó nideiyizhʼeezh, éí high priest nilį́į́ ńtʼę́ę́ʼ.

8 Áko aláahdi naatʼáanii Mosiah éí Alma sodizin báhooghan bee bóhónííhgo áyiilaa.

9 Áádóó baa hoolzhiizh Alma díí diné doo yééhósin da; ákondi ląʼída daʼooʼíinii bikʼijįʼ daasdzoh, aooʼ diné bąąhí ádáátʼįįd yee deizįʼ dóó tʼáá aníigo yaadahoolneʼ.

10 Áko sodizin báhooghan biyiʼ tʼah doo kónééh da ńtʼééʼ; éí bąąh Alma biiʼ sizíinii yaa yíniʼ silį́į́ʼ, áádóó aláahdi naatʼáanii bidáádóó neiyizlóóz.

11 Áádóó aláahdi naatʼáanii ííłníł: Áko shooh, kǫ́ǫ́ʼ ląʼí ndááhdóó ndahisidlóóz, éí bikʼiské bikʼidahazʼą́; aooʼ, dóó díkwíígóó bąąhí ádaatʼį́į́go hadabiʼdoolʼį́į́ʼ. Dóó bąąhí ádaatʼįįdígíí doo yaa ndaʼookąąh da; éí biniinaa naa dahasiidlooz, áko adaatʼįįdígíí bikʼehgo bándahodííʼááł.

12 Ákondi aláahdi naatʼáanii Mosiah Alma ííłní: Áko shooh, shí doo bá nadahwideeshʼááł da; tʼóó nilákʼeh hidishʼaah áko nih bádahwidííʼááł.

13 Ákohgo Alma biiʼ sizíinii biʼdiiłʼá náánásdlį́į́ʼ; áádóó Bóhólníihii yichʼįʼ niyá áádóó biʼdiiłʼáhígíí yinaʼidééłkid, háálá Diyin God yidááhdóó adoosihgo yinálzidígíí biniinaa.

14 Áádóó baa hoolzhiizh biiʼ sizíinii tʼáá átʼé Diyin God yichʼįʼ ąąh áyiilaa dóó bikʼihjįʼ, Bóhólníihii bineeʼ yidiiztsʼą́ą́ʼ, kóníigo:

15 Alma, nikʼihoojisdliʼ, áádóó Mormon toohdi tó bee dabiʼdoolzį́į́ʼyę́ę bikʼihdahoojisdliʼ. Abinadi shinaalʼaʼí bizaad yinídláanígíí biniinaa nikʼihoojisdliʼ.

16 Áádóó bee bichʼįʼ háíndzííʼgo danoosdląądígíí biniinaa bikʼihdahoojídoodliił.

17 Áádóó díí diné bitahgii sodizin báhooghan níínánígíí biniinaa nikʼihojisdliʼ, éí yáʼátʼéehgo dahiináago adoolnííł, éí shidineʼé dadoolééł.

18 Aooʼ, díí diné bikʼihoojidlíí doo shizhiʼ bee bééhoʼdóólzingo; háálá shizhiʼ bee dabiʼdóójíí doo; éí shikʼéé naazį́.

19 Áádóó ndaʼiisihígíí binaʼídiłkidígíí biniinaa, nikʼihojidlíi doo.

20 Shá nanilʼaʼí nilį; áádóó nił ahaʼdinishtʼą́ áko hoolʼáágóó iiná neihólǫ́ǫ doo; áádóó shá nanilʼaʼ doo dóó shizhiʼ bee nééhoʼdilzin doo, doo shilįį ałhandinííłkał.

21 Áádóó shinééʼ deidiiztsʼą́ʼígíí shilį́į́ʼ dadoohlééł; áádóó éí éí sodizin báhooghan góneʼ bił yahidoohash, áádóó shí ałdóʼ yahaninááh bidideeshniił.

22 Háálá áko shooh, díí shisodizin átʼé; háídá tó bee biʼdiilzį́į́ʼgo éí adaanáʼooskango tó bee bidiʼdoolzį́į́ł. Áádóó tʼáá háidá bił yahʼooʼázhígíí shizhiʼ deiyoodlą́ą doo; éí éí tʼáá jiikʼeh bándiʼdeeshʼááł.

23 Háálá shí éí nihokááʼ dineʼé bibąąhági ádaatʼéii ákʼihdiishtʼą́; háálá shí éí ádahwiishłaa; áádóó shí nihoniyáajįʼ dashoodlʼáanígíí shilá nishtłaʼjigo hazʼą́ągo baa dideeshʼááł.

24 Háálá áko shooh, shizhiʼ bee bééhoʼdílzin doo; áádóó shéédahósingo anóonééł dę́ęʼ náádahiidooʼnaał, áádóó shilá nishʼnáájígo hooláagóó bił hazʼą́ągo baa dideeshʼááł.

25 Áádóó baa hodoolzhish naaki góneʼ dilní diistsʼą́ą́ʼgo áadi índa doo shéédahósinígíí chʼíhdookah dóó shidááhgi deidoozįįł.

26 Áádóó tʼáá bí bił béédahodoozįįł Bóhólníihii Diyin God nishłʼį́, báNináʼnídláii nishłʼį́; ákondi doo náábiʼdiyoonih da.

27 Áádóó bee bił hódeeshnih tʼáadoo niheehosísįįd da; áádóó hoolʼáágóó hodookʼą́ą́lgo ahídookah éí biʼiiníziinii dóó bá ndaalʼaʼí bá hashtʼeelyaa.

28 Éí bąą andishní, tʼáá háida shinééʼ doo yidiitsʼaʼígíí, éí shisodizin báhoogan góneʼ doo bił yahʼadoohʼash da, éí nohoniyá bijį́į́di doo shił yahadooghááł da.

29 Éí bąą andishní, Yiwohjįʼ: dóó tʼáá háíshį́į́ asihígíí, éí bąąhági ádáátʼįįdígíí bikʼehgo bánahodiyootʼááł, áádóó nihidááhdóó bibąąhigiʼ adaatʼéíi yaa ndaʼooskango, dóó tʼáá aaníí áníigo bijéí biyiʼdóó ádaańaʼooskango, éí baa ńdaʼdiʼyííʼááł, áádóó shí ałdóʼ bándiʼdeeshʼááł.

30 Aooʼ, áádóó shidineʼé tʼáá áłahjįʼ ádaańdaʼookąąhgo bąąhági átʼéii bee baa naadiyeeshʼááł.

31 Áádóó nihí ałdóʼ doo ákǫ́ǫ́ ádaʼahoołʼįįdígíí bee ahąąnídaʼahidoohtʼaah; háálá tʼáá aaníigo Shí ánihidishní, hanáago bighanígíí shandiʼníʼaah níigo doo bibąąhági átʼéii bee baanízhdiʼaahgóó, tʼáá hwí adizhdiiltʼiʼ doo.

32 Áko anihidishní; Yíwohjįʼ; tʼáá háíshį́į́ bibąąhági átʼéii doo yaa naʼookąąhgóó éí shídineʼé doo bitah yíídooltah da; áádóó díí bikʼeh hólį́į́ doo kodoo dóó náásjįʼ.

33 Áádóó baa hoolzhiizh Alma díí saad yidiiztsʼą́ą́go bee hólǫ́ǫ dooleeł biniyé neiyíízoh, áádóó Bóhólníihii bibee nahazʼáanii bikʼehgo diné sodizon báhooghan daʼatahígíí yá nahwiiʼaah doo.

34 Áádóó baa hoolzhiizh Alma bąąhí ádaatʼįįgo hadabiʼdoolʼįʼígíí yánahoníʼą́, Bóhólníihii bizaad bikʼehgo.

35 Áádóó tʼáá háíshį́į́ bibąąhági ádaatʼéii yaa naʼooskango dóó yaa hoolneʼgo, éí diné sodizon báhooghan daʼatahígíí bił yíídooltah;

36 Áádóó bibąąhági ádaatʼéii doo yaa dahalneʼ dóó yaa ndaʼookąąhgo, éí diné sodizon báhooghan daʼatahígíí doo bił yíídooltah da, áádóó bizhiʼ nahjįʼ kʼéédoolchxǫǫł.

37 Áádóó baa hoolzhiizh Alma sodizin báhooghan biyiʼ adahooniłígíí tʼáá átʼé bee bééhólniih silį́į́ʼ; áádóó hodéézyéél bee ndahaasdlį́į́ʼ dóó sodizin báhooghan adahooniłígíí yee tʼáá íyisíí náás deeskai, Diyin God yidaahdóó daastʼiʼgo deiyikaah, ląʼída yił yaʼahikááh, áádóó ląʼída tó yee deiyíísį́į́ʼ.

38 Ákohgo díí tʼáá ałtsóʼ Alma dóó yił ndaalnishígíí ádeiyiilaa éí sodizin báhooghan yikʼidadéezʼį́į́ʼ, tʼáá ałtsojįʼ akihdahółʼįįgo deiyíkaah, tʼáá ałtsojįʼ Diyin God bizaad yee ndaʼnitin, tʼáá ałtsojįʼ achįʼnahwiinah yee tʼíhdahoonííhgo, Diyin God bisodizin doo atah danilinígíí tʼáá ałtso bichįʼ ndahwiiłʼná.

39 Áádóó bidineʼé doo yáʼátʼéehii yee yichʼįʼ hadahaasdzííʼ; áádóó bí ałdóʼ bee bichʼįʼ hadaʼiisdzííʼ, tʼáá ałtsoní Diyin God bizaad bikʼehgo, bąąhági ádaʼiilaaígíí bikʼehgo, doodago bąąhági ádáátʼįįdígíí, Diyin God áłahjįʼ bichʼįʼ sodadoołzin dabiʼdiʼní, áádóó tʼáá ałtsojįʼ ahééh danohsin.