1 Áádóó kʼad, aláahdi naatʼáanii Benjamin ałtso diné yichʼįʼ haadzíiʼgo íiniizį́į́ʼ, tʼáá ałtso Diyin bibee hazʼáanii yikʼeh dahółʼį́įnígíí dóó Diyin God yił ahadaʼdeestʼánígíí bízhiʼ ndadeiszoh.

2 Áádóó baa hoolzhiizh tʼáá ałtso, Christ bízhiʼ ákʼideididootʼááłgo ahaʼditʼaah ádayiilaa, tʼáá hazhóʼó áłchíní yázhí tʼéiyá tʼáadoo da.

3 Áádóó, áhoodzaa aláahdi naatʼáanii Benjamin díí ałtso íʼiilaago, dóó biyeʼ Mosiah yiyíísį́į́ʼ bidineʼé yiláahdi naatʼáanii dóó yá nahaʼáii dooleełgo yikʼidiilniiʼ, dóó tʼáá ałtso hazʼą́ yee bólólniihii yee neineeztą́ą́ʼ, áádóó ałdóʼ priest danilínígíí diné ndeidínóotį́įłgo yikʼi dadiilniiʼ, áko Diyin God bibee hazʼáanii deidiiztsʼą́ą́ʼ dóó bił béédahodoozį́į́ł biniyé, dóó yee ahadaʼdeestʼánée ndabiiłnáago yéédaalniih doo biniyé, áádóó diné yeʼníłniiʼ, dóó, tʼááłáʼí nízínígo, yił háájééʼ, dabighangóó yił anídahaaskai.

4 Áádóó Mosiah tádiin binááhaigo, bizhéʼé dah sidáhą́ą góneʼ náás nááhodeezʼą́. éí Jerusalemdę́ę́ʼ Lehi dah diiyáádóó dį́įdi neeznádiin dóó tsostsʼidiin dóó biʼaan hastą́ą́ nááhai.

5 Áádóó aláahdi naatʼáanii Benjamin hináago tááʼ nááhai áádóó dah nídiidzá.

6 Áádóó baa hoolzhiizh aláahdi naatʼáanii Mosiah Diyin Bóhólníihii bidahonítiʼjí yigááł ńtʼę́ę́ʼ, dóó binahwiitʼaah dóó binahazʼą́ii yikééʼ sizį́į́ ńtʼééʼ, dóó tʼáá átʼé bibee hazʼáanii yikʼeh hółʼį́ ńtʼééʼ tʼáá ábíłnínígíí bikʼehgo.

7 Áádóó aláahdi naatʼáanii Mosiah bidineʼé kéyah hashtʼeʼdaahłeeh yidííniid. Áádóó, tʼáá bí ałdóʼ, kéyah hashtʼeyiilaa, áko diné ade átʼéii doo yeidooʼááł da biniyé, áko bizhéʼé átʼínéegi átʼį́į doo. Áádóó diné tʼáá átʼé bitahgóó doo saad yee daʼahigą́ą́góó tááʼ nááhai.