1 Áádóó kʼad baa hoolzhiizh Ammon dóó aláahdi naatʼáanii Limhi diné yił haitʼáo ąąh shijééʼdę́ę́ʼ yisdádookahgo yindahaʼá; áádóó diné tʼáá átʼé ahíídookahgo áyiilaa; áádóó díí binahatʼá deididootsʼį́įłgo ádeiyiilaa.

2 Áádóó baa hoolzhiizh haitʼáo ąąh shijééʼdę́ę́ʼ yisdádookah yindahaʼáago chʼééh ádeiyííłʼįįd, tʼáá hazhóʼó bichʼooní dóó baʼáłchíní, dóó dabilį́į́ʼ, ndeiniłkaadígíí, dóó biníbaal, yił diné doo kééhatʼínígóó dah diikaigo tʼéiyá; háálá Laman dineʼé tʼóó ahayóiígíí biniinaa, Limhi bidineʼé Laman dineʼé yił ałkʼiidoojahgo doo yídeiyíighah da, baa ntsidajikeesgo ąąh shijééʼdę́ę́ʼ béésh hał bee yisdázhdookah.

3 Kʼad baa hoolzhiizh Gideon aláahdi naatʼáanii yaa níyá dóó yidááhdóó yiizįʼ, áádóó ííłní: Kʼad O aláahdii naatʼáanii, ńléídę́ę́ʼ ląʼí da shizaad bikʼehgo áhwiinilaa, nihikʼiské Laman dineʼé bił ałkʼinéijahgo.

4 Áádóó kʼad O aláahdii naatʼáanii, naalteʼé doo ílínígíí nishłį́ shííníʼní, éí doodago shizaad daatsʼí łahdóó nił nilį́įgóó shidińtsʼą́ą́ʼ, áádóó éí tʼáá ákónéehii, áko kʼad hoolzhishdi shizaad yíísiniłtsʼą́ą́ dooleeł nisin, áádóó ná naalteʼé nishłį́į doo dóó díí diné yisnááhdę́ę́ʼ yisdádeeshʼish.

5 Áádóó aláahdi naatʼáanii hadoodzihgo lą́ bidííniid. Áádóó Gideon ábiłní:

6 Áko shooh bineʼdę́ęʼgo yah ahóótʼįʼ, kin bináʼáztłʼin bineʼdę́ę́ʼ, kin haalʼá bineʼdę́ę́ʼ. Laman dineʼé, éí doodago Laman dineʼé hadabisidígíí, tłʼéeʼgo bił nidahoneedoh; áko shooh díí tʼáá ałtso diné bitah hane ílíinii bichʼįʼ kódoolnííł áko bilį́į́ʼ dóó binaaldlóoshii ałhąʼádeidooleeł, áko tłʼéeʼgo diné doo kééhatʼíní góneʼ chʼídeidinóołkał.

7 Áádóó nizaad bikʼehgo akǫ́ǫ deeshaał dóó Laman dineʼé tó diłhił ndahiilyé yę́ę ákéédi ałtso bee bichʼįʼ niʼdeeshlééł; áádóó daʼoodlą́ą́ʼ dóó bił dahoniidoigo náádaʼiishaazhgo nahonitʼin chʼíhonítʼiʼ dahinéełgi nishtłʼajígo chʼídoohnééł.

8 Ákohgo nihizáanii dóó nihaʼáłchíní, nihilį́į́ʼ, nidaniilkaadígíí diné doo kééhatʼínígóó bił chʼídiiʼnééł; áádóó kéyah Shilom binídiikah.

9 Áádóó baa hoolzhiizh aláahdi naatʼáanii Gideon bizaad yikʼeh hoolaa.

10 Áádóó aláahdi naatʼáanii Limhi bidineʼé nihilį́į́ʼ áhąą ádáohłééh yidííniid; áádóó Laman dineʼé tó tsiʼnaʼiiłáhí ndoolyéłígíí yichʼįʼ ayiizhjááʼ; áádóó tó tsiʼnaʼiiłáhí łaʼ yichʼįʼ náánéiníjaaʼ, éí tʼóó yichʼįʼ ííléego yeiníjaaʼ; áádóó tó tsiʼnaʼiiłáhí aláahdi naatʼáanii Limhi bichʼįʼ kóyiilaaʼígíí doo tʼą́ą́ kódeilééhgo ádedeiyoodlą́ą́ʼ.

11 Áádóó baa hoolzhiizh aláahdi naatʼáanii Limhi bidineʼé tłʼéeʼgo bilį́į́ʼ ndeiniłkadígíí diné doo kééhatʼíní góneʼ yił dahdiiná, áádóó diné doo kééhatʼínídi kéyah Shilom yináskai, áádóó kéyah Zarahemlajigo yichʼįʼ dah náádiiná, Ammon dóó bikʼiské booʼishgo.

12 Áádóó tʼáá ałtso bibéésh óola, dóó bibéésh łigai, dóó bidaʼílíinii dah deidiijaaʼ, tʼáá yídaneelʼánígo, áádóó biyéél ałdóʼ, diné doo kééhatʼíní góneʼ adeiyiizhjaaʼ, áádóó ákótʼáo danínah.

13 Áádóó ląʼí da yiską́ dóó diné doo kééhatʼínídi nijikaigo kéyah Zarahemladi jíkai, áádóó Mosiah dineʼé bił ałhíjiikai, áádóó éí yiyaa eekai.

14 Áádóó baa hoolzhiizh Mosiah baa jikaigo bił hóózhǫǫd; áádóó adahoonííł nídaháasdzooígíí ałdóʼ beiyítʼą́, áádóó Limhi bidineʼé náʼhásdzoh yikʼídaneeztą́ą́ʼígíí ałdóʼ.

15 Áádóó kʼad baa hoolzhiizh Laman dineʼé Limhi bidineʼé kéyahdóó tłʼéeʼgo dahdiináigo yaa ákodaniizį́į́ʼ, áko bisiláo diné doo kééhatʼíní góneʼ yikééʼ dahdadiibaaʼ.

16 Áádóó hadeinitáago naaki yiską́, nínánígóó bikékʼeh yóóʼadeiskááʼ; éí bąą diné doo kééhatʼínídi yóóʼajookai.