1 Áádóó kʼad, bikʼihoolzhiizh aláahdi naatʼáanii Mosiah bił áhodiilzéeʼgo tááʼ nááhai, diné Lehi-Nephi kéyahgóó iinánígíí baa shił bééhodoozį́į́ł niizį́į́ʼ, éí doodago Lehi-Nephi kin haalʼáágóó eekai; áko Zarahemladóó dah diikaigo tʼahdoo yaa ndahodiitsʼį́įh da; Áko, hodineʼé áłahjįʼ yindahódíłkidgo hoʼdiiłʼá.

2 Áádóó baa hoolzhiizh aláahdi naatʼáanii Mosiah hastą́ą́tsʼáadahgo hastóí dabitsxeʼígíí kéyah Lehi-Nephigóó dookahgo yeʼníłniiʼ, bikʼiské yíndaʼídídoołkił biniyé.

3 Áádóó baa hoolzhiizh biiskání dadiikai, Ammon hoł dah diikai, éí diné bisxeʼ dóó ayóó átʼáo bidziil, dóó Zarahemla ałkééʼ daʼázhchį́į́dę́ę́ʼ nilį́; dóó ałdóʼ binaatʼáanii nilį́.

4 Áádóó áko, doo kéédahojitʼínidi háajigo kéyah Lehi-Nephi bikʼizhdookahgo doo hwił béédahózin da; áko ląʼí yiską́ doo kéédahojitʼínidi naanáákahgo, dízdiin yiską́ naaníjookahgo.

5 Áádóó naanáákahgo dízdiin yiską́ dah yiskʼidgi yíkai, éí kéyah Shilomdóó náhookǫsjigo siʼą́, ákweʼé biníbaal nideiznil.

6 Áádóó Ammon bikʼiské táaʼgo, kéyah Nephigóó yił yíkai, éí éí Amaleki, Helem, dóó Hem daolyé.

7 Áádóó áko shooh, kéyah Nephidi diné binaatʼáanii yaa yíkai, dóó kéyah Shilomdi aláahdi naatʼáanii baa ádahalyáanii bináztʼiʼ, dóó dabisił, dóó bedaʼaztłʼǫ́, dóó awáalyah abiʼdooʼnil.

8 Áádóó baa hoolzhiizh awáalyahdi nahíjíízhtʼą́ągo naaki yiską́ dóó aláahdi naatʼáanii bidááh nááhoʼdootʼeezh, dóó bee bedaʼastłʼónée kʼidaʼoostʼah; dóó aláahdi naatʼáanii yidááhdóó deizįʼ, dóó hadadoodzih, éí doodago hadaodzííh biʼdooʼniid, nabídíkidígíí yaa dahodoolnih biniyé.

9 Áádóó kóbíłní: Shooh, Limhi áshtʼį́, Noah biyeʼ nishłį́, éí Zeniff yiyeʼ nilį́į́ ńtʼééʼ, éí kéyah Zarahemladę́ę́ʼ chʼíníná díí kweʼé kéyah bídoogo, éí dabizází bikéyah ńtʼééʼ, éí bidineʼé biinééʼ yee aláahdi naatʼáanii ádabiilaa.

10 Áádóó kʼad, haʼátʼíí biniyé doo nídaałdzidgóó kin haalʼá binaʼáztłʼingi noohkai, shí dóó shaa ádahalyáanii danidítį́į́hdóó tłʼóoʼgi neildeehgo?

11 Áádóó kʼad, díí biniinaa yisdánihííʼeezh, áko nanihídídéeshkił biniyé, éí doodago éí shaa ádahalyáanii ndanihidoołtsxił ńtʼééʼ. Kʼad hadaohdziih.

12 Áádóó kʼad, Ammon hadíídzih biʼdooʼniidgo, aláahdi naatʼáanii yichʼįʼ niníyá dóó yichʼįʼ yaa kódzaa; dóó néídzįįhgo kódííniid: O aláahdi naatʼáanii, díí jį́ Diyin God bidááhdóó ahééh nisin tʼahdii hinishnánígíí biniinaa, dóó haʼadziih bee shá hooʼaʼígíí; áádóó doo násdzidgóó hadeezdzih;

13 Háálá shééhonísingo éí doo sheʼsínítłʼǫ́ǫ da doo ńtʼééʼ. Háálá Ammon áshtʼį́, Zarahemladi ałkééʼ daʼazhchíiniidę́ę́ʼ áshtʼį́, áko kéyah Zarahemladę́ę́ʼ níyá shikʼiské bínaʼádídéeshkił biniyé, éí Zeniff kéyahdę́ę́ʼ chʼíbiníʼeezh.

14 Áádóó kʼad, baa hoolzhiizh Limhi Ammon bizaad yidiiztsʼą́ąʼgo, ayóó átʼáo bił hóózhǫǫd, dóó ání: kʼad, tʼáá aaníigo shił bééhoozin kéyah Zarahemladi shikʼéí kéédahatʼínée tʼah dahiná. Dóó kʼad, Shił hóózhǫǫd; dóó yiską́ągo shidineʼé ałdóʼ bił dahózhǫ́ǫgo ádeeshłííł.

15 Háálá áko shooh, Laman dineʼé binaalteʼ daniidlį́, dóó ínaaltąʼ tʼóó bahádzidgo nihideʼátʼéego nihąąh silá. Dóó kʼad, shooh, nihikʼis nideilteʼdóó yisdánihidooʼish, éí doodago Laman dineʼé bilákʼeedóó, dóó binaalteʼ dadiildleeł; háálá Nephi dineʼé binaalteʼ daniidlį́įgo nihá yáʼátʼééh Laman dineʼé biʼaláahdi naatʼáanii bichʼįʼ ndaʼiilyéego éí doo daniidzin da.

16 Áádóó kʼad, aláahdi naatʼáanii Limhi baa ádahalyánígíí Ammon dóó bikʼiské tʼáadoo binídaʼohʼtłʼohí yídiiniid, ndi Shilomdí náhookʼǫsjigo dah yiskʼidgi dookahgo áyiilaa, áádóó bikʼiské kintah góneʼ yahʼídeezhʼeezh, áko daʼdooyį́į́ł, dóó daʼdoodlį́į́ł, dóó nízaad nahaaskaidę́ę́ʼ yitsʼą́ą́dóó háádadoolyįh; háálá ląʼí da yikʼee tiʼdahoozniiʼ; dichin, dibááʼ, dóó chʼééh adeesdzá yee tiʼdahoozniiʼ.

17 Áádóó kʼad, baa hoolzhiizh biiskání aláahdi naatʼáanii Limhi tʼáá ałtso bidineʼé bitahgo haneʼ áyiilaa, áko diyin bighangi áłah dooleeł, bizaad yee yichʼįʼ hadoodzihígíí deididootsʼį́į́ł biniyé.

18 Áádóó baa hoolzhiizh áłah silį́įʼgo kótʼéego yichʼįʼ haadzííʼ: O, shidineʼé, deʼádaohnééh dóó hadaʼíínółní, háálá áko shooh, áajįʼ ahoolzhiizh, dóó doo nízaad hadziih da, niheʼanaaʼí doo bándeilteʼ da dooleeł, łą́ągo tiʼdahwiiʼnííh ndi, éí tʼáadoo biniyéhígóó, ákondi achʼįʼ nahwiiʼná nihikaʼadoolwołígíí tʼah biyiʼ nídííkah nisin.

19 Éí bąą, deʼadaonééh, dóó nihił dahoozhǫǫh, Diyin God badaʼíínóhłí, éí Diyin God éí Abraham biDiyin God, dóó Isaac, dóó Jacob, dóó ałdóʼ, éí Diyin God Israel baʼáłchíní kéyah Egyptdę́ę́ʼ chʼííníʼeezh, dóó Tónteel Łichíiʼii niʼhóółtseidę́ę́ʼ chʼídookahgo áyiilaa, dóó manna yee yaʼniłtsoodgo deiyííyą́ą́ʼ áko doo kééhojitʼínídi doo dazhdínóonééł da biniyé; dóó ląʼígo hákáʼaalwod.

20 Áádóó náána, tʼáá éí Diyin God nihizází kéyah Jerusalemdę́ę́ʼ chʼííníʼeezh, dóó bidineʼé kʼad ndi yaa áhályą́ą́dóó yikʼi dadéezʼį́į́ʼ; áádóó áko shooh, dóó tʼáá nihí nihibąąhági ádaatʼéii dóó bąąhági ádeitʼį́įgo biniinaa naalteʼ dasiidlį́į́ʼ.

21 Áádóó tʼáá anołtso dį́į́ jį́ daʼooʼíinii dasoolį́į́ʼ, éí Zeniff, díí diné bikʼi aláahdi naatʼáanii ályaa yę́ę, tʼáá tsxį́į́ł bizází bikéyah shí dooleeł nízin, éí bąą aláahdi naatʼáanii Laman ayoochʼííd dóó anótʼááh yee binaʼazloʼ, dóó aláahdi naatʼáanii Zeniff yił ahaʼdeetʼą́, dóó bikéyah łahdóó yilákʼeh yíílá, éí doodago kin haalʼá Lehi-Nephi ndi, áádóó kintah Shilom; dóó kéyah binaaʼgooʼígíí—

22 Áádóó díí tʼáá ałtso áyiilaa, díí diné ąąh shijééʼ éí doodago nidaalteʼ doo biniyé. Áádóó áko shooh, kʼad Laman dineʼé aláahdi binaatʼáanii bichʼįʼ ndaʼiilyé, nihinaadą́ą́ʼ, nihitłʼoh naadą́ą́ʼ adeeʼé, dóó tʼáá ałtso naadą́ą́ʼgi ádaatʼé bą́ą́h ílínígíí ałníiʼgo ndahiilyé, dóó nihinaaldlooshii dóó nihilį́į́ʼ ałnííʼdóó náhoodleełii; áádóó Laman dineʼé aláahdi binaatʼáanii tʼáá áłtso nihinaadeeł éí doodago nihee dahółóonii yókeed, éí doodago niheʼiinaʼ bee ndaʼdiilyééł.

23 Áádóó kʼad, daʼ díísh doo nanitłʼahgo biiʼ tiʼdahwiiʼníih da? Áádóó daʼ díísh, nihiyínííł, doo tsʼíí átʼée da? Kʼad shooh, dooládóʼ ayóó átʼáo biniyéii baa yínííł daniidlį́į da.

24 Aooʼ, bee nihił hashneʼ, ląʼígo biniyé baa yínííł daniidzin; háálá áko ayóó ánéelą́ą́ʼ nihikʼéii nidabiʼdistseed, dóó tʼáadoo biniyéhígóó bidił dadeeznaʼ, tʼáá átʼé bąąhági átʼéii biniinaa.

25 Háálá díí diné tʼáadoo ndaʼiisííhgóó Diyin Bóhólníihii tsʼídá doo yáʼáshóonii doo yee yá hwiidoołʼaał da ńtʼę́ę́ʼ. Ákondi shooh, bizaad ndi doo yikʼeh dahółʼį́į da, áko ałchʼįʼ nidaabaah daazlį́į́ʼ, hónáásdóó nidaʼahiltseed daazlį́į́ʼ.

26 Áádóó Diyin Bóhólníihii bá yáłtiʼii łaʼ deiyiishxį́; aooʼ, éí Diyin God yikʼidiilniiʼ ńtʼę́ę́ʼ, éí tsiʼnidaajikaígíí dóó bąąhági ádaajitʼínígíí yee hoł hoolneʼ, dóó náás ádahodooníłígíí yaa hoolneʼ, aooʼ, Christ doogáłígíí ndi.

27 Áádóó Christ Diyin God nilį́, tʼáá ałtsoní yiTaaʼ nilį́ yidííniid, dóó nihokááʼ dineʼé yináłtʼée doo, dóó hastiin hoodeéyáádą́ą́ʼ alyaayę́ę yinałtʼée doo; éí doodago kótʼáo ááhdishní, nihokááʼ dineʼé Diyin God yináłtʼé dííniid, áádóó Diyin God nihokááʼ dineʼé baʼáłchíní yaa doogááł, dóó atsʼíís dóó dił bee hólǫ́ǫgo bidiʼdoochííł, áádóó kótʼáo nahasdzáán bikááʼgóó naagháa doo—

28 Áádóó kʼad, díí ádííniidígíí biniinaa, deiyiisxį́, dóó ląʼígo bąąhági ádajitʼínígíí biniinaa Diyin God bibee atéʼélʼį́ hachʼįʼ kólyaa. Éí bąą, háí lá naalteʼí yaa ááh dínóozįįł, dóó achʼįʼ nahwiiʼná bee atíhodiʼdoolnííł?

29 Háálá áko shooh, Diyin Bóhólníihii ádííniid: shidineʼé shibee hazʼáanii kʼídeiyiztįʼdi doo bikáʼadeeshwoł da; ákondi ádaatʼínígíí bichʼą́ą́h ndaʼdeeshłééł áko doo náás dookah da; dóó yaa nidaakaiʼígíí yee chą́ą́h dadeezgoʼ nahalin doo.

30 Áádóó nááná, ádííniid: Shidineʼé bąąhági átʼéii kʼideidííláago bizool doo yáʼátʼéehii bił nááyołgo deidoołbįįł doo yáʼáshóonii kʼideidííláago níyol tsoh náátsʼóʼoołdísii biyiʼ azhool yidinoołtʼįįł, dóó daʼagháanii biiʼ hodooleeł.

31 Áádóó ánáádooʼniid: Shidineʼé doo yáʼáshóonii kʼideidííláago haʼaʼaahdę́ę́ʼ níyol deidinóołtʼįįł, éí tʼáá hooshchʼįʼ dah hodoołchxǫǫł.

32 Áádóó kʼad, shooh, Diyin Bóhólníihii bee ahaʼditʼaah bohoolyaa, dóó nihichʼįʼ ndahwidoonaał dóó tiʼdahwiidoohnih.

33 Ákondi nihijéí bitłʼááhdę́ę́ʼ bee ánóhtʼéego Diyin Bóhólníihii bichʼįʼ ninooyáago, dóó badaʼíínóhłíigo, dóó nihíniʼ tʼáá átʼéé ńtʼééʼ bee bá nidaałnishgo, kódaohdzaago, kódoonííł, íinízinígíí dóó bił yáʼátʼéhígíí bikʼehgo, naalteʼ danohłį́į́dę́ę́ʼ chʼínihidooʼish.