1 Áádóó baa hoolzhiizh Mosiah bizhéʼé ádíílííł bidííniidę́ę yeʼiilaa, áádóó adahwiisʼáágóó saad ílíinii yee hahaasdzííʼ, diné tʼáá ałtsodę́ę́ʼ áłah silį́į́ʼ, áko diyin bighangóó dookah áadi aláahdi naatʼáanii Benjamin saad yee hadoodzihígíí deididootsʼį́į́ł.

2 Áádóó diné tʼóó ahayóí áłah silį́į́ʼ, áko tʼóó ahayóiígíí biniinaa tʼáadoo dayííltaʼ da; háálá ląʼígo ałʼąą nootʼį́į́ł dóó kéédahatʼį́įgóó ayóó átʼé daazlį́į́ʼ lá.

3 Áádóó bilį́į́ʼ áłtsé nidahaazhchínígíí ałdóʼ nidayiizhjaaʼ, Moses bibee hazʼáanii bikʼehgo nááhániihii dóó didlidgo nááhániihii yee náádaʼiisniiʼ;

4 Áádóó ałdóʼ Bóhólníihii ahéheeʼ deididooniił éí biDiyin God, Jerusalemdę́ę́ʼ chʼíbiníʼeezh, dóó beʼanaaʼ danilínígíí yitsʼą́ą́dóó yisdábííʼeezh, dóó diné tʼáá ákogi átʼéii nabinitin dooleełígíí yikʼi dadiilniiʼ, dóó diné tʼáá ákogi átʼéii aláahdi binaatʼáanii nilį́įgo ałdóʼ yikʼi dadiilniiʼ, éí éiyá Zarahemla hazʼą́ągi áhodiilzééh ninéinídlá, dóó Diyin God bibee hazʼáanii yikʼeh dahółʼį́įgo neineeztą́ą́ʼ, áko bił dahózhǫ́ǫgo Diyin God dóó diné tʼáá ałtso ayóó ádayóníi doo.

5 Áádóó baa hoolzhiizh diyin bighandi neheeskai, éí binaagóó biníbaal nideiznil; diné tʼáá ałtso baʼáłchíní yił, díí éí beʼasdzą́ą́, dóó beʼashiiké, dóó beʼátʼééké, dóó bitsóóké dóó bináliké, alą́ąjįʼ naagháhígíí dóó akéeʼdi biʼdizhchį́įjįʼ, ałʼąą baʼáłchíní yił dah deíkáahgo.

6 Áádóó tʼáá ałtso diné diyin bighan binaagóó biníbaal nideiznil, chʼéʼétiinígíí sodizin bahooghan ntsaaígíí bichʼįʼjigo naaznil, áko biníbaal tʼáá yiiʼ naháaztą́ągo aláahdi naatʼáanii Benjamin saad yee yichʼįʼ hadoodzihígíí deididootsʼį́į́ł;

7 Háálá diné tʼóó ahayóiígíí biniinaa aláahdi naatʼáanii Benjamin diyin bighan tsé binázʼáhígíí biyiʼ tʼáá átʼé neidínóotįįłgo doo bíighah da, éí bąą wódahdi dah azką́ągo bá ályaa, áko áádóó diné saad yee yichʼįʼ hadoodzihígíí deididootsʼį́į́ł.

8 Áádóó baa hoolzhiizh dah azkánígíí yikááʼdóó bidineʼé yichʼįʼ yáʼniiłtiʼ; dóó diné tʼóó ahayóiígíí biniinaa doo tʼáá átʼé dabidiiztsʼą́ąʼ da; éí bąą saad yee yáłtiʼígíí nááhádzóohgo ályaa áádóó diné tʼáadoo biinééʼ deidiiztsʼą́ʼígíí nááháasdzooígíí yaa deiyiistsooz, áko éí ałdóʼ bizaad bił béédahodoozįįł biniyé.

9 Áádóó díí saad éí yee yááłtiʼ dóó náháasdzo, kóníigo: Shikʼéí danohłíinii, tʼáá ánółtso áłah dasoolį́ʼígíí, díí jį́ shizaad bee nihichʼįʼ hadeesdzihgo dadidoohtsʼį́łígíí; háálá saad bee hadeesdzihígíí doo tʼáá ádzaagóó baa ntsídoohkos da biniyé wóshdę́ę́ʼ nihidííniid, ndi hazhóʼó dashíídóołtsʼįįł, dóó nihijaaʼ ąą ádaahłééh áko daʼdidoohtsʼį́į́ł, dóó nihijéí ałdóʼ áko akʼidadiʼdoohtį́į́ł, dóó nihíniʼ ałdóʼ áko Diyin God bitsʼą́ą́dóó tʼáá aaníinii tʼahdoo ííshją́ą́ ádaalnéehii nihichʼįʼ ąą ádadoolnííł.

10 Doo éí shéédaałdzid biniyé kojįʼ nihohkááh nihidííniid da, éí doodago tʼáadoo nihokááʼ dineʼé biláahdi áníshtʼéego shaa nitsídaahkeesí.

11 Ákondi tʼáá nihígi áníshtʼé, ląʼí da shitsʼíís dóó shintsékees doo yee bichʼįʼ bidziil da; ákondi díí dineʼé shikʼi dadiilniiʼ, dóó shizhéʼé shíísį́į́ʼ, dóó Diyin Bóhólníihii áníigo díí diné binantʼaʼí dóó aláahdi binaatʼáanii sélį́į́ʼ; dóó beʼadziilii doo yíneelʼáanii yee shaa áhályą́ dóó bee sézį́į ńtʼę́ę́ʼ, binahjįʼ adziilii, dóó ániʼ dóó atsxeʼ tʼáá átʼé Diyin Bóhólníihii sheiníláhígíí bee nihíká anáshwoʼ.

12 Ánihidishní nihíká anáshwoʼgo shiyóółkáałgo shąąh niilyá, kʼad ndi, áádóó béésh óola índa béésh łigaii doo bíká áshtʼį́į da índa daʼílíinii doo nihííníshkeed da;

13 Nááná doo éí awáalyah anihiishníił da, índa naałteʼí ádaʼahołʼį́įgo doo bee hoséłʼą́ą da, índa nidaʼołtseed, índa ałheedaʼnohʼįįh, índa danohʼįįh, índa aadaʼdohłé doo bee nihá hoséłʼą́ą da ńtʼę́ę́ʼ; éí doodaiiʼ bąąhági ádaahtʼį́ nihidishníí da, áko Diyin Bóhólníihii bibee hazʼáanii bikʼeh dahonołʼį́ dishníigo bee nanihinétą́ą́ʼ, tʼáá ałtso ádadoohłííł nihidííniidígíí bee—

14 Áádóó shí ndi, tʼáá shí, shílaʼ bee naashnishgo bee nihíká eeshwod, dóó doo éí ínáóltąʼí bee nihishjizh da ńtʼę́ę́ʼ, dóó ádin tʼáadoo ndaazgo nihichʼįʼ ndahwiiłnágo nihikʼi silá íishłaa da—dóó díí tʼáá ałtso baa yááłtiʼii, díí jį́ tʼáá nihí nihił béédahoozingo daałtsą́ dóó dasidootsʼą́ą́ʼ.

15 Ákondi, shikʼiské, díí baa niséyáhígíí doo bee ádaahashʼniih biniyé íísdzaa da, índa díí bee nihił hashneʼígíí doo bee nihikʼíhodeeshʼááł biniyé áshtʼį́į da; ákondi díí nihił béédahodoozįįł biniyé nihił hashneʼ díí jį́ Diyin God bidááhdóó doo haitʼáo da shíniʼ biʼdiiʼáágóó bichʼįʼ hadeesdzih.

16 Áko shooh, ánihidishní éí háálá nihíká anáshwoʼgo hinishná dííniidígíí, doo bee ádaahashniihgo ádíshníi da, háálá Diyin God tʼéiyá bá naashnish ńtʼę́ę́ʼ.

17 Áádóó áko shooh, díí bee nihił hashneʼ áko ił ééhózin bídahwiidoołʼááł; áko bídaʼááł bił kéédahonohtʼíinii bíká anáhjahgo éí nihiDiyin God bíká anáhjahgi átʼée doo.

18 Áko shooh, aláahdi nihinaatʼáanii dashiinóhní; dóó shí, aláahdi nihinaatʼáanii dashidohnínígíí, nihíká anáshwoʼgo naashnish, ákogoósh nihídóʼ ahíłká anáhjahʼgo ndaahłnish doo?

19 Áko shooh áádóó ałdóʼ, shí, aláahdi nihinaatʼáanii dashidohnínígíí, nihíkáʼanáshwoʼgo shiiníłką́, ákondi Diyin God bá nishíshnish, áko, ahéheeʼ dashididoohniiłgo bee shaa dahodoohnih, ndi Dooládóʼ aláahdi yáʼąąshdi nihiNaatʼáanii ahéheeʼ dabidoohniił ńtʼę́ę́ʼ!

20 Shidineʼé, ánihidishní, nihiiʼ sizíinii bibeʼadziil tʼáá átʼé bee Diyin God ánihiilaaígíí bichʼįʼ, ahééh danohsingo dóó baadahohniihgo, dóó nihaa áhályą́ dóó nihikʼidéezʼį́į́ʼ, dóó nihił dahózhǫ́, dóó ahodéelzéeʼgo ahił kéédahohtʼį́įgo ánihiilaa—

21 Ánihidishní hodeeyáádą́ą́ʼ ánihiilaaígíí bíká anáłwoʼgo, dóó tʼáá ákwíí jį́ nihaa áhályą́, áko tʼáá nihí íinohsingo hinohná dóó nahohná dóó ádaʼołʼį́, dóó áłahjįʼ nihíká análwoʼgo—ádíshní, nihiiʼ sizíinii tʼáá soozį́į́ ńtʼę́ę́ʼ bee bíká anáłwoʼ ndi tʼah á nidaalʼaʼí doo ílíinii danohłį́į da doołeeł.

22 Áádóó áko shooh, íiyisíí nihitsʼą́ą́dóó yinízinígíí éiyá bibee hazʼáanii bikʼeh honołʼį́į dooleeł; dóó bibee hazʼáanii bikʼeh honołʼíigo éí kéyah bitsʼą́ą́dóó daʼohtʼį́įgo náásdohkah nihiłní; dóó yee haadzíʼígíí tsʼídá doo łahgo ánáyoodlííł da; díí bąą, bibee hazʼáanii bikʼeh dahonołʼį́įgo nihikʼihojídlíi dooleeł dóó binahjįʼ náásgóó daʼohtʼį́į doo.

23 Áádóó kʼad, áłtsé éí, ánihiilaa, dóó niheʼiinaʼ nihainílá, áko éí biniinaa bichʼįʼ nihąąh hááʼá.

24 Áádóó naaki góneʼ, díí ádoołííł nihiłnínígíí beʼdoołííł yee nihoníʼ; áko éí beʼoohłaago, tʼáadoo hodíínaʼí nihikʼihozhdoodlííł; dóó díí bąą nihichʼįʼ naʼníláa doo. Áádóó tʼahdii bichʼįʼ nihąąh hááʼáa doo, dóó tʼáá ákótʼé, dóó tʼáá ákónóhtʼée dooleeł, ahoolʼá dóó ahoyoolʼáágóó; díí bąą, haʼátʼíísh éí bee ádaa hohniih dooleeł?

25 Áádóó kʼad nanihídíshkid, daʼ ádá hadoohdzih? Nihichʼįʼ haasdziihigo éí, Ndagaʼ. Nahasdzáán bikáaʼgi łeezhígi áníshtʼé didoohniił ndi doo bíighah da; ákondi nahasdzáán bikááʼ łeezhígíí bitsʼą́ą́dóó ánihiʼdiilyaa; ákondi shooh, ánihiilaaígíí éí díí tʼáá bí.

26 Áádóó shí, azhą́ shí, aláahdi nihinaatʼáanii dashidohníi ndi, doo nihilááh áníshtʼée da; háálá shí ałdóʼ łeezh bitsʼą́ą́dóó hosélį́į́ʼ. Áádóó dashinółʼį́ są́ biih yíyá, dóó kʼadę́ę díí shitsʼíís bimá nahasdzáán bichʼįʼ kónáshdlééh.

27 Éí bąą, nihíká eeshwod nihidííniid, doo haitʼáo da shíniʼ biʼdiiʼáágóó Diyin God bidááhdóó yisháał da, azhą́ ákótʼée ndi áłah wohłeeh nihidííniid, áko doo shikʼíhodootʼah da, nihibąąhági átʼéii doo shikʼijįʼ siláa da dooleeł, Diyin God beʼánihwiitʼaahdi sézį́įgo bee bindíílnish shiłnínée yaa yáłtiʼgo.

28 Áłah wohłeeh nihidishní áko nihibąąhági ádaatʼéii doo shąąh siláa da dooleeł biniyé, kʼadę́ę shitsʼíís náádiilyéego, áko kʼé hólǫ́ǫgo nááshidiʼdoolyééł, dóó shiiʼ sizíinii doo daatsaahii wódahdi dahataałii bił Diyin God tʼáá ákogo aʼiiléí bichʼįʼ dahwiitaał dooleeł.

29 Áádóó ałdóʼ nááná, áłah wohłeeh nihidííniid, nihinaʼnítiní, dóó aláahdi nihinaatʼáanii doo nishłį́į da dooleeł, nihidideeshniił biniyé;

30 Háálá azhą́ kʼad ndi, tʼáá íiyisíí shitah hoditłidgo chʼééh nihichʼįʼ haasdziih; ndi Bóhólníihii Diyin God shíká eelwod; dóó nihichʼįʼ hadeesdzihgo shá áyiilaa, díí jį́ díí bee haadíídzih shidííniid, éí shiyeʼ Mosiah, aláahdi nihinaatʼáanii dóó nihikʼi nahaʼáanii nilį́.

31 Áádóó kʼad, shikʼéí, nigáídę́ę́ʼ dóó kojįʼ ádaʼołʼínée tʼahdii tʼáá ádaołʼį́. Shibee hazʼáanii bikʼeh dahonołʼį́į́ ńtʼę́ę́ʼ, dóó shizhéʼé bibee hazʼáanii ałdóʼ, dóó bee náásnoohkai, dóó éí bee tʼahdoo niheʼanáʼí danihisił da, áko shiyeʼ bibee hazʼáanii, éí doodago Diyin God bibee hazʼáanii, tʼáá bí nihaidooléełígíí bikʼeh dahonołʼį́įgo, kéyah bikááʼgóó náásdoohkah, dóó niheʼanáʼí doo nihikʼeh dadidoodleeł da.

32 Ákondi, O shidineʼé danohłíinii, baa ádahołchįįh tʼáadoo ałchʼįʼ nihá nídahachįįhí dooleeł, dóó iiʼ sizį́ doo yáʼáshóonii bikʼeh honishʼį́ doo dadínóosįįł da; éí shizhéʼé Mosiah yaa yááłtiʼ.

33 Háálá áko shooh, tʼáá háiida éí iiʼ sizíinii yikʼeh hółʼį́į́ shį́į atíbidiʼdoolnííł; háálá éí yikʼeh hółʼį́įgo, dóó tʼáá ákótʼéego dóó bibąąhági ádaatʼéii tʼáadoo nahjįʼ áyiilaago bizééʼ hazlį́įʼgo, tʼáá bí biiʼ sizíinii atíyiilaa dooleeł; háálá yaa naayáhígíí biniinaa hoolʼáágóó tiʼhooʼnííh baa doolyééł, Diyin God bibee hazʼáanii kʼíinítiʼ, azhą́ bił bééhózin ndi.

34 Ánihidishní, doo éí łaʼ nihitah da, tʼáadoo díí bee nabidiʼneestą́ą́ʼ da, tʼáá hazhóʼó nihaʼáłchíní yázhí tʼéiyá tʼáadoo nabidiʼneestą́ą́ʼ da, ndi nihiTaaʼ yáʼąąshdi hólóonii éí hoolʼáágóó nihąąh hayííłʼá, tʼááʼałtso bee hadinohtʼéhígíí dóó nihee hólóonii bichʼįʼ kóohłaa; dóó ndaʼasdzo Diyin yá yádaałtiʼii dadiyinii náásgó áhodooníłígíí yaa dahalneʼ éí ałdóʼ bee ndanihidiʼneestą́ą́ʼ, tʼáá ńléí nihizhéʼé, Lehi, Jerusalem dah diiyáádę́ę́ʼ ndi.

35 Áádóó danihizází tʼáá ałtso kojįʼ yee hadahasdzíʼígííʼ ałdóʼ. Áádóó áko shooh, Diyin Bóhólníihii ábidííniidígíí ałdóʼ, yee hadahaasdzííʼ; díí bąą, éí éiyá tʼáá aaníí dóó tʼáá ákogi ádaatʼé.

36 Áádóó kʼad, nihichʼįʼ haasdziih, shikʼiské danohłíinii, díí tʼáá ałtso nihił béédahózin dóó bee ndanihidiʼneestą́ą́ʼgo, asoosiih dóó bee haʼoodzíiʼii bitsʼą́ą́jí soolį́įʼgo, Diyin Bóhólníihii biʼIiʼ Sizį́ Diyinii bitsʼą́ąjįʼ kóhdzaa dooleeł, áko ééhózingo nihiʼdoodlósę́ę nihiyiʼ ádin dooleeł áko nihikʼihojídlí, dóó náás doohááł dóó, nihaa áháyąą dooleełę́ę ádin dooleeł—

37 Ánihidishní, tʼáá háiida díí yeʼełʼínígíí, éí tʼáá bahatʼaadí Diyin God yikʼijįʼ nilį́; díí bąą iiʼ sizį́ doo yáʼáshóonii éí yikʼeh hółʼį́, dóó tʼáá ałtsoní tʼáá ákogi ádaatʼéii yeʼanaʼí dooleeł; díí bąą, Diyin Bóhólníihii éí doo biiʼ hólǫ́ǫ da doo, háálá atsʼíís doo biiʼ hodílzinígíí doo yiiʼ hólǫ́ǫ da.

38 Díí bąą diné doo ádaa ńdaʼookąąhgóó, dóó tʼáá Diyin God yeʼenaʼí nilį́įgo naabiʼdiilyáago, tʼáá ákogi átʼéego ánihwiitʼaah ayóó átʼéii biiʼ sizíinii doo daatsaahii asiihígíí yaa ákónízingo chʼéébidoosił, éí Diyin Bóhólníihii doo yichʼįʼ bíniʼgo ábidoolííł, dóó yínííł hwiinidzin, dóó diniih, dóó yéego achʼįʼ nahwiiʼná, kǫʼ doo nitséesii dóó hoolʼáágóó dookʼą́ąłii nahalingo biyiʼ hólǫ́ǫ dooleeł.

39 Áádóó kʼad ánihidishní, éí hastiin yeeʼ doo ajoobaʼ bíká adoolwoł da; díí bąą tiʼhooʼnííh doo ninítʼiʼii bikʼijįʼ siláago akéeʼdi bee bá nihodootʼááł.

40 O, tʼáá ánółtso hastóí dasoolį́įʼii, dóó tsíłkéí ałdóʼ, dóó áłchíní yázhí shizaad bikʼidaʼdootánígíí áko bikʼidadiʼdoohtį́į́ł biniyé doo nanitłʼahgóó nihichʼįʼ haasdzííʼ, diné niʼiilzííh yiih yíkaigo béédadoołnihgo chʼéédadoohdził biniyé sodiszin.

41 Áádóó ałdóʼ nááná, Diyin God bibee hazʼáanii yikʼeh dahółʼį́įgo bikʼidahojisdliʼ dóó bił dahóózhǫǫdígíí baa ntsídaahkees dooleeł. Háálá áko shooh, atsʼíís dóó iiʼ sizíiniikʼehjí, tʼáá ałtsoní bee hootʼááłjí diyingo bikʼihojisdliʼ; dóó ádin daazlį́į́ʼjįʼ tʼah daʼoodlą́ągo yáʼąąshdi yah ahidookah, áko áadi ił hózhǫ́ doo ninítʼiʼii biyiʼ Diyin God yił kéédahatʼį́į dooleeł. O béédaałniih, dóó béédaałniih díí éí tʼáá aaníí ádaatʼé; háálá Bóhólníihii Diyin God éí yee haadzííʼ.