1 Áádóó baa hoolzhiizh Amulon Laman dineʼé biʼaláahdi naatʼáanii bąąh ááh niizį́į́ʼ; éí bąą, Laman dineʼé biʼaláahdi naatʼáanii éí bí dóó bikʼiské bidineʼé nideidínóotįįłgo yikʼidiilniiʼ, aooʼ, diné Shemlondi kéédahatʼínígíí ałdóʼ, áádóó Shilomdi kéédahatʼínígíí, dóó Amulondi diné kéédahatʼínígíí ałdóʼ.

2 Háálá Laman dineʼé díí kéyah tʼáá átʼé yee ádadahoosniiʼ; éí bąą, Laman dineʼé biʼaláahdi naatʼáanii kéyahgóó tʼáá átʼé aláahdi naatʼáanii yee bídahólníigo áyiilaa.

3 Áko kʼad Laman dineʼé biʼaláahdi naatʼáanii éí Laman wolyé, bizhéʼéyę́ę bizhí bikʼeh; éí bąą aláahdi naatʼáanii Laman wolyé. Áádóó tʼóó ahayóí diné yinaatʼáanii nilį́.

4 Áádóó Amulon bikʼiské bitahdóó ndaʼnitíní yikʼidiilniiʼ éí kéyah tʼáá átʼé bidineʼé yee adédahoosníʼígíí bikááʼgóó; áádóó Nephi bizaad éí Laman bidineʼé tʼáá ałtso yee nideinitingo hahoolzhiizh.

5 Áádóó ahidiníłnáó diné baa adahwiinitʼíinii danilį́; ákótʼée ndi Diyin God doo yéédahósin da; Amulon bikʼiské ndi Bóhólníihii biDiyin God binaʼnitin tʼáadoo yee nideineeztą́ąʼ da, Moses bibee hazʼáanii ndi, Abinadi bizaadyę́ę ndi tʼáadoo da;

6 Ákondi nákééʼ náháneʼ tʼáá ndayíízóóh doo, áádóó ahidiníłnáó ałchʼįʼ ádaʼiłʼį́į doogo yee ndeineeztą́ą́ʼ.

7 Ákohgo Laman dineʼé daʼatʼį́įgo deeskai, dóó ałhaa nidaʼiiłniih dóó ayóó daʼastʼįįd, áádóó bindaʼadloʼ dóó ayóó bił éédahózin, doo yáʼátʼéehgo nahasdzáán bikáaʼgi ntsáhákeesígíí nahalǫǫ, aooʼ, diné ayóó bindaʼadloʼ, doo yáʼáshóonii dóó daʼniʼįįh yaa bił dahóniiʼnih, ákondi bikʼiské éí doo ákódeiłʼį́į da.

8 Áádóó kʼad baa hoolzhiizh Amulon éí Alma dóó bikʼiské yikʼi bóhólniihgo áʼdiilyaa, dóó atííłʼíígóó yaa nídiidzá, áádóó báʼáłchíní éí áájí baʼáłchíní atídaałʼįį yidííniid.

9 Háálá Amulon éí Alma yééhósin, éí łaʼ aláahdi naatʼáanii bipriest danilį́į́ ńtʼę́ę́ʼ, éí Abinadi bizaad yoosdląąd dóó aláahdi naatʼáanii chʼíbinííłchą́ą́ʼ, éí bąą bichʼįʼ báhóóchįįd; éí aláahdi naatʼáanii Laman yiyaadóó sizį́į́ ńtʼééʼ, áko éí bikʼi bóhólnííh ńtʼééʼ, áádóó naanish yaa yiizlá, áádóó naanish-binanitʼaʼí bikʼi dadéezʼį́įʼgo áyiilaa.

10 Áádóó baa hoolzhiizh tʼóó báhádzidgo bichʼįʼ nidahwiiʼná silį́į́ʼ bilááh ádzáaago Diyin God ndeiyookąąhgo yichʼįʼ sodadoolzin.

11 Áádóó Amulon tʼáadoo sodadoołziní yidííniid; áádóó bikʼidadeezʼį́į́ʼii hadabisíídgo áyiilaa, tʼáá háí shį́į́ Diyin God yichʼįʼ sodadilzingo habiʼdoolʼį́įʼgo bidiʼyoolyééł.

12 Áádóó Alma dóó bidineʼé biinééʼ tʼáágééd Bóhólníihii Diyin God yichʼįʼ sodadoolzin, ákondi bijéí yee hojoobaʼ ádadííniid; áádóó bijéí ádeinízinígíí bił bééhózin.

13 Áádóó baa hoolzhiizh tiʼdahooníihgo Bóhólníihii biinééʼ deidiiztsʼą́ą́ʼ, kóníigo; Deʼádaohnééh dóó nihił dahózhǫ́, háálá shidineʼé bił ahaʼdinishtʼánée bénáshnih; áádóó shidineʼé bił ahaʼdideeshtʼááł dóó biʼdisnááhdę́ę́ʼ chʼídeeshʼish.

14 Áádóó achʼįʼ nahwiiʼná nihiwos bikááʼ nidahaasyáhą́ą yiszólígo nihá ádeeshłííł, áko biyaa hóyééʼ doo nihííshgháán yídíłniih da doo, azhą́ tʼah nihiʼdóótąʼ ndi, díí nihá ákwíishłaago shá ooʼíinii danohłį́į doo, áádóó tʼáá áníí nihił bééhózin doo shí, Bóhólníihii nihiDiyin God, shidineʼé bichʼįʼ nidahwiiʼnáago bił honishʼłǫ́ǫ́ doo.

15 Áádóó baa hoolzhiizh Alma dóó bidineʼé achʼįʼ nahwiiʼná baa dahaasyáhą́ąʼ yiszólígo ályaa, aooʼ, Bóhólníihii bidziilgo ádabiilaa áko áyaa hóyééʼ yídeiyíighah daazlį́į́ʼ, áádóó bił dahózhǫ́ǫgo dóó hadaʼóolníigo Diyin Bóhólníihii tʼáá ałtsojįʼ yaa ádadeestʼą́.

16 Áádóó baa hoolzhiizh ayóó bedaʼoodląʼ dóó hadaʼóolníigo Bóhólníihii biinééʼ náádeidiiztsʼą́ą́ʼ, kóníigo; Nihił dahózhǫ, háála yiską́ągo nihiʼdótąʼdę́ę́ʼ chʼínihideeshʼish.

17 Áádóó Alma íidííniid: Díí diné dahdidííʼish; áádóó nił honishłǫ́ǫ doo dóó díí diné dabiʼdótąʼdę́ę́ʼ chʼídeeshʼish.

18 Áko baa hoolzhiizh Alma dóó bidineʼé tłʼéeʼgo binaaldlooshii ahídeiniiyood, áádóó bitłʼoh naadą́ą́ʼ ahídeiyiizhjaaʼ, aooʼ, azhą́ tłʼééʼ-bíighah ndi bilį́į́ʼ ahídeiniiyood.

19 Áádóó abínígo Bóhólníihii Laman dineʼé tʼáá íiyisíí yidaʼiiłhaazh, aooʼ, dóó naanish-binanitʼaʼí ałdóʼ tʼáá átʼé hadaʼdínééeshghaazhgo áyiilaa.

20 Áádóó Alma dóó bidineʼé diné doo kééhatʼíní góneʼ dahdiiná; yinéełgo iʼííʼą́ áádóó binibaał hootso léiʼgi nideiznil, áádóó éí hootso Alma yee deiyíízhiʼ, háálá bí éí diné doo kééhatʼíní góneʼ yiníʼeezh.

21 Aooʼ, Alma chʼíhootsodi biDiyin God tʼáá íiyisíí ahéheeʼ deidííniid háálá baa joozbaʼígíí biniinaa, áádóó bichʼįʼ nahwiiʼnánée ászólí áyiilaa, áádóó biʼdótąʼdę́ę́ʼ chʼíbiníʼeezh; háálá dabiʼdótąʼ ńtʼę́ę́ʼ, áádóó doo nááńa łaʼ chʼíbidooʼish da tʼáá hazhóʼó Bóhólníihii Diyin God tʼéiyá.

22 Áádóó Diyin God ahéheeʼ deidííniid, aooʼ, tʼáá ałtso bahastóí dóó bizáanii dóó baʼáłchíní yádaałtiʼígíí biDiyin God yaa dah haniihgo yáʼąąsh góde binéíʼ dadiistsʼą́ą́ʼ.

23 Áádóó áko Bóhólníihii Alma ííłní: Tsxį́įłgo ní dóó díí diné díí kéyahdóó dahdoohnééh, háálá Laman dineʼé chʼéédaasdzid dóó nihikééʼdeíbááh; éí bąą díí kéyahdóó dahdohnééh, áádóó Laman dineʼé díí hootsodi nihá niʼkodeeshłííł áko díí diné doo yikééʼ deíbááh da doo.

24 Áádóó baa hoolzhiizh hootsodóó chʼíníná; áádóó diné doo kééhatʼíní góneʼ dahdiiná.

25 Áádóó diné doo kééhatʼínídi jookahgo naakitsʼáadah yiską́ Zarahemla kéyahdi jíkai; áádóó ałdóʼ aláahdi naatʼáanii Mosiah baa jíkaigo bił hóózhǫǫd.