1 Áádóó kʼad Mosiah adahwiisʼáágóó díí haneʼ ndahasdzoʼígíí ałtso Alma yeiníjaaʼgo, diné tʼáá ałtso bitahgo, háishąʼ biʼaláahdi naatʼáanii dooleełgo bił beedahodoozį́į́lgo yaa ntsédakees.

2 Áádóó baa hoolzhiizh diné deidiiztsʼą́ą́go, kódaaní: Niyeʼ Aaron nihialáahdi naatʼáanii dooleeł dóó niháhooʼáałgo daniidzin.

3 Áko Aaron Nephi bikéyah gódei ííyá, éí bąą aláahdi naatʼáanii tʼáadoo óhólnííh bił hazʼą́ yeidiníʼą́ą da; Aaron ndi óhólnííh bił hazʼą́ doo yinízin da; Mosiah biyeʼké ndi doo óhólníihgo bił hazʼą́ deinízin da.

4 Éí bąą aláahdi naatʼáanii Mosiah bidineʼé yitahgóó haneʼ ánááyiidlaa; aooʼ, haneʼ nahaasdzohgo diné yitahgóó áyiilaa. Áádóó saad náháásdzohígíí, kóní:

5 Áko shooh, O shidineʼé, éí doodago shikʼéí, háálá díigi átʼáo nihaa nitséskees, áłah doołeełgo díí baa nídadóohtʼįįł—háálá aláahdi naatʼáanii nihee hodooleełgo danohsin.

6 Áko nihił hashneʼ díí óʼhóólniihgo bił hazʼą́ hooʼáałgo baa deetʼánée doo yinízin da, dóó óʼhóólniihgo bił hazʼą́ doo yinízin da.

7 Ákohgo háiida łaʼ bitsáskʼeh góneʼ ííyáago bee bikʼihodiiniiʼgo, áko shooh nihitahgóó saad hadooleełgo binásdzid. Áádóó háísh da bił bééhózin shiyeʼ daatsʼí, éí óhólníihgo bił hazʼą́ bee bóhólnííh, éí báhóóchʼįįdgo dóó díí diné bikééʼ naazį́įgo íidoolííł, éí nihitahgóó anaaʼ dóó saad ałchʼįʼ adahohníiłgo ánihidoolííł, éí biniinaa ląʼígo diné nidabidiʼdootsił dóó Bóhólníihii bohogááł nidahoołchxǫǫh, aooʼ, áádóó ląʼígo diné biiʼ sizíinii nidadootsxił.

8 Áko ánihidishní dahónohsą́ dóó díí baa ntsidaahkees, háálá shiyeʼ deidiilyéłígíí doo bee ná hazʼą́ą da, ákohgo tʼáá háiida łaʼ bitsískʼeh góneʼ ííyáago bikʼihodiiniiʼgo éí ałdóʼ deidiyiilyéełgo doo bee nihá hazʼą́ą da.

9 Áádóó shiyeʼ ádaadzódlí dóó tʼáadoo bee choidooʼįįłígíí shónáyoostʼeʼgo éí yee haadzííʼ yę́ę tʼóó nahjįʼ kóyiilaago, áádóó óhólníihgo bił hazʼą́ ákʼiidiitʼą́ągo, bí dóó díí diné ałdóʼ ląʼígo bąąhági átʼéii yaa naakai dadooleeł.

10 Ákohgo dahónohsą́ dóó díí bichʼįʼ dadínóhʼį́į́ʼ, dóó díí diné yee hodéezyéél dooígíí ádaołééh.

11 Áko nihiʼaláahdi naatʼáanii nishłį́įgo ałtso ashidoołkááł; áko, ándahwiiʼaahii bikʼidadidiilnihgo nídadidiiʼnił, bee hazʼáanii bikʼehgo diné bá nidahwiitʼaah doo, háálá hastóí dahóyáanii nidahwiiʼaahígíí bikʼidadidiilnih, éí Diyin God bibee hazʼáanii bikʼehgo díí diné yá nidahwiiʼaah doo.

12 Áko Diyin God diné yá nahwiiʼaahgo éí yáʼátʼééh nááná diné bá nahwiiʼaahgo éí doo yáʼátʼééh da, háálá Diyin God nahwiiʼaahgo éí áłahjįʼ tʼáá ákogi átʼé, ákondi diné nahwiiʼaahgo éí doo áłahjįʼ tʼáá ákogi átʼée da.

13 Áko, diné tʼáá ákogi ádaatʼéii nihiʼaláahdi naatʼáanii danilį́įgo, éí Diyin God bibee hazʼáanii nideiyiilée dooleeł, dóó bibee nahazʼáanii bikʼehgo díí diné yá nidahwiiʼaahgo, aooʼ, diné aláahdi naatʼáanii yá danilį́į doogo, éí shizhéʼé Benjamin díí diné yá áátʼįįdgi átʼáo—ánihidishní, díí áłahjįʼ kótʼéego éí aláahdi naatʼáanii nihikʼi bídahólnííh doo.

14 Áádóó tʼáá shí sheʼadziil dóó bee ánishtʼéhígíí bee nishishnishgo, Diyin God bibee hazʼáanii bee nanihinétą́ąʼgo, dóó kéyahgóó hodéezyéél hashtʼeishłaago, áko doo anaaʼ dóó atiʼalį́, éí doodago hólǫ́ǫ́góó, doo antʼįįh, éí doodago antʼįįh, éí doodago naʼatseed, éí doodago bíighahí ádaʼatʼínígíí;

15 Áádóó háiida bąąhági ádáátʼįįdígíí, éí asihígíí bikʼehgo bá nahoníʼą́, bee hazʼanii nihizází nihaa dayiizláhigií bikʼehgo.

16 Áko ánhidishni, nihokááʼ dineʼé doo tʼáá ałtso aheełtʼée da éí biniinaa doo aláhdi naatʼáanii éí doodago naatʼáanii danilínígíí nihikʼi bóhólnííh da doo.

17 Háálá áko shooh, haanéelą́ą́ʼ bąąhági átʼéii tʼáałaʼí aláahdi naatʼáanii doo yáʼáshóonii íidoolííł, aooʼ, dooládóʼ ayóó dahóóchxǫ da!

18 Aooʼ, aláahdi naatʼáanii Noah bee daołniih, bibąąhági átʼínée dóó tsʼídá aláahdi oolchʼį́į́d ííłʼínée, áádóó bidineʼé bibąąhági ádaatʼínée dóó tsʼídá aláahdi woolchʼį́į́d ádeiłʼíinéé. Áko shooh ayóó átʼáo bitahgóó dahóóchxǫ; dóó ałdóʼ bąąhági ádáátʼįįdígíí biniinaa dabiʼdisnáh.

19 Áádóó Tʼáá Ałtsoní-Áyiilaii hóyáanii doo bitaʼ ííyáagóó, éí tʼáá aaníigo ádaa ńdaʼooskanígíí biniinaa, éí tʼáá biʼdisnahgo kojįʼ ahoolzhiizh doo ńtʼę́ę́ʼ.

20 Ákondi shooh, bidááhdóó hojoobaʼ ídaʼdiilyaaígíí biniinaa yisdáyííʼeezh, dóó nihokááʼ dineʼé baʼáłchíní; háálá yéego ádaa ndáʼooskanígíí biniinaa dabiʼdisnahdę́ę́ʼ yisdáyííʼeezh; díigi átʼáo tʼáá ałtso nihokááʼ dineʼé bitahgóó Diyin Bóhólníihii bibeʼadziilii yee naalnish, badaʼólíhígíí bigaan joobaʼii yichʼįʼ ąą áyósin.

21 Áádóó áko shooh, nihił chʼíhonishʼaah, aláahdi naatʼáanii bąąhági átʼínígíí doo nahjįʼ adazhdoołtʼeeł da tʼáá hazhóʼó tʼáá íiyisíí saad dahojíłǫ́ǫgo, dóó ląʼígo diné nidabiʼdistseedgo tʼéiyá.

22 Háálá áko shooh, bikʼiské yił bąąhági yaa naakai, dóó baa ádahalyánígíí binaagóó bikʼi dadéezʼį́į́ʼ; áádóó bee hazʼánii Diyin yikʼehgo dahináanii nidahaʼáyę́ędą́ą́ʼ ádaalyaa yę́ę neiyiizǫ́ǫ́s; dóó Diyin God bibee hazʼáanii yikʼinaayá.

23 Áádóó bee hazʼáanii neiyiizlá, dóó bidineʼé yitahgóó yeʼiisniiʼ, aooʼ, bee hazʼáanii bąąhági átʼínígíí bikʼehgo neiyiizlá; áádóó háiida bibee hazʼáanii doo yikʼeh hołʼínígíí neistseed; dóó tʼáá hái shį́į́ bikʼijįʼ haadzíʼígíí éí bisilaołtsoʼí yichʼįʼ yidoołʼaał, dóó anaaʼ íidoolííł; dóó aláahdi naatáanii doo yáʼátʼéhígíí tʼáá átʼé diyin bikʼehgo oodáłígíí łahgo áyiiłʼįįh.

24 Ákohgo shooh ánihidishní, díí aláahgo oolchʼídígíí doo nihikʼijįʼ kódoonííł da.

25 Éí bąą, diné ádaanínígíí bikʼehgo ándahwiiʼaahii ńdahołááh, áko danihizhéʼé yę́ę bibee hazʼáanii nidahaasyáhígíí bikʼehgo nihándahwiitʼaah doo, éí tʼáá áko daatʼé, dóó Bóhólníinii bílákʼee deiyiizlá.

26 Áko diné biinééʼ yáʼátʼééhjígo oodááł łahgo ádoolníiłgo doo deinízin da; ákondi diné łahdóó ałchʼį́įdigo doo ákogi átʼéii deinízin łeh; éí bąą díí ádaałʼį́į́ doo dóó nihibee hazʼáanii tʼáá nihigo ádadoołííł-diné bizaad bikʼehgo ádaʼołʼį́į doo.

27 Áádóó diné bizaad yee bąąhági átʼéii ndeidíiláago, ákohgo índa Diyin God binahwiitʼaah nihikʼi silá baa hodoolzhish; aooʼ, áko índa ayóó átʼáo nihitah hodoołchxǫǫł díí kéyah yaa niyáhę́ęgi átʼáo.

28 Ákohgo ándahwiiʼaahii nihee dahólǫ́ǫgo, doo bee hazʼáanii ndaheesdláhígíí bikʼehgo nihándahwiiʼaahgo, hódahgo ándahwiiʼaahii ndahwiiʼaahgo ádadoołííł.

29 Hódahgo nidahwiiʼaahii doo ákótʼáo nidahwiiʼaahgóó, dikwíígóó da hóyahgo nidahwiiʼaahígíí ahíídoohʼish, dóó éí hódahgo ndahwiiʼaahii yá nidahodooʼááł, dinéhígíí biinééʼ bikʼehgo.

30 Áádóó ánihidishní díí Bóhólníihii bá dadínóhsingo ádaołʼį́, dóó ánihidishní díí ádaołʼį́, dóó aláahdi naatʼáanii doo nihee hólǫ́ǫ da doo; áko díí diné ndaʼiisíihgo dóó bąąhági ádaatʼéii yaa naakaigo tʼáá bí bikʼijįʼ kóndadoonííł.

31 Háálá áko shooh nihił chʼíhonishʼaah, tʼóó ahayóí diné bąąhági ádaatʼinígíí éí aláahdi binaatʼáanii bąąhági ádaatʼínígíí biniinaa ádaatʼį́; éí bąą bibąąhági átʼéii aláahdi binaatʼáanii yá ninádootłish.

32 Ákohgo díí éí nisin doo aheeníłtsogo hoolzhishígíí doo kéyah bikááʼ hólǫ́ǫ da dooleeł, shidineʼé bitahgóó íiyisíí; ákondi díí éí nisin díí kéyah tʼáá jííkʼeh siʼą́ą doo, dóó diné tʼáá áłtso yee átʼéhígíí dóó yee sizínígíí yaa bił hózhǫ́ǫ doo, Bóhólníihii díí kéyah tʼáá bikááʼ dahiniiʼná dóó nihí doo nízingo, aooʼ, nihiyázhí náásgo tʼah kéyah yikááʼ keédahatʼį́į́ doogo.

33 Áádóó ląʼígo aláahdi naatʼáanii Mosiah bidineʼé yichʼįʼ néíyíízo, aláahdi naatʼáanii yáʼátʼéehgo bidineʼé yikʼi deezʼį́į́ʼ bichʼįʼ nidahwiisnááʼ dóó tiʼdahoozniiʼ yił ííshjání áyiilaa, aooʼ, bidineʼé iiʼ sizíiniikʼehgo nitsihoodzá tʼáá átʼé yiiʼ tádookaiʼígíí, áádóó ałdóʼ diné aláahdi binaatʼáanii yichʼįʼ saad dahółónée; éí tʼáá átʼé yee yił hoolneʼ.

34 Áádóó díí doo bedaʼdoołíił da yiłníigo yee yichʼįʼ haadzííʼ; ákondi diné tʼáá átʼé bichʼįʼ nidahwiiʼnánée tʼáá bí ákʼideididootʼááł, áko diné tʼáá átʼé ákʼindaaldzil doo.

35 Áádóó tʼáá ałtso hachʼįʼ nidahwiiʼnáago ndajishnishyę́ę hwił ííshjání áyiilaa, jó éí aláahdi naatʼáanii doo yáʼátʼéehii hakʼi hooʼááł ńtʼę́ę́ʼ;

36 Aooʼ, doo yáʼáshóonii dóó aláahgo oolchʼį́į́d yaa naayáhą́ą, dóó tʼáá ałtso anaaʼ, dóó saad hólǫ́, dóó atídaʼalʼį́, dóó daʼniʼįįh, éí doodago daʼniʼįįh, dóó ałjiłii ádaatʼínígíí, dóó tʼáá ałtso bąąhági ádaatʼínígíí doo yídóoltah da—díí doo ádaalʼį́į da yiłníigo yee yił hoolneʼ, éí tʼáá ííshjání Diyin God bibee hazʼáanii doo yił ahídadínéelnáa da.

37 Áádóó baa hoolzhiizh, aláahdi naatʼáanii Mosiah saad néiyiizohyę́ę diné yitahgóó kóyiilaa éí hazaad tʼáá aaníí átʼéego yaa ákodaniizį́į́ʼ.

38 Éí bąą aláahdi naatʼáanii bee hodoolééłyę́ę doo deiniiziiʼ da, dóó tʼáá átʼé diné ahéełtʼéego adahwiisʼáágo deíkáahgo íiyisíí déiniizį́į́ʼ; aooʼ, tʼáá ałtso diné bibąąhági ádaatʼéii tʼáá bí bee bídahólnííh doo.

39 Éí bąą, baa hoolzhiizh adahwiisʼáágóó ałʼąą dah deíkáahgo áłah daazlį́į́ʼ, háí lá bá nidahwiiʼaah dooleełgo yee hadahaasdzį́į́ʼ, éí bee hazʼáanii baa heesyáhígíí yikʼeh bá nidahwiiʼaah dooleeł; dóó tʼáá íiyisíí bił dahóózhǫǫd háálá tʼáá bínííkʼeh ádaʼjiłʼį́įgo haa dahéésyáhígíí biniinaa.

40 Áádóó Mosiah tʼáá íiyisíí ayóó ádeiyóʼní daazlį́į́ʼ; aooʼ, doo nááná łaʼ diné yilááh átʼéégóó yaa nitsídaakees da ńtʼę́ę́ʼ; háálá doo éí diné tʼáá bí daʼatʼį́įgo deiníłʼį́į da, aooʼ, háálá naʼadloʼgo bee béeso álʼį́įgo iiʼ sizį́ neiyiiłchǫǫhii, háálá doo éí daʼílíinii yitsʼą́ą́dóó yókeed da, éí doodaiiʼ naʼatseed doo bił yáʼátʼééh da; ákótʼée ndi adahwiisʼáágóó hodéezyéelgo háidiilaa, áádóó tʼáá átʼé ałʼąą átʼéego dabiʼdisnahdę́ę́ʼ bidiné chʼíyiizhʼeezhgo yee hoołʼaʼ, áko éí bąą tsʼídá aláahdi átʼéego, aooʼ, tsʼídá yéego bił danilį́į́ ńtʼę́ę́ʼ.

41 Áádóó baa hoolzhiizh ándahwiiʼaahii yikʼi dadiilniiʼ, éí doodago bee hazʼáanii bikʼehgo bá nidahwiiʼaah; dóó díí adahwiisʼáágóó naazdáago ádeiyiilaa.

42 Áádóó baa hoolzhiizh Alma éí tsʼídá áłtsé ánahwiiʼaahii naatʼáanii nilį́įgo bikʼihodiiniiʼ, high priest ałdóʼ nilį́, bizhéʼé bikʼi yee bíísį́į́ʼ, áádóó tʼáá átʼé sodizinjí naanish bídadeetʼiʼígíí bee bóhólníihgo bąąh niilyá.

43 Áádóó baa hoolzhiizh éí Alma Bóhólníihii yikééʼ naaghá, dóó bibee hazʼáanii yikʼeh hółʼį́ dóó tʼáá ákogi átʼéego ánahwiiʼaah; áádóó adahwiisʼáágóó ahodéezyéelgo hoolzhish.

44 Áádóó kotʼáó ándahwiiʼaahii kéyah Zarahemla tʼáá ałtsogóó nidahaʼáago hódeeshzhiizh, diné Nephi dineʼé daolyéhígíí tʼáá ałtso bitahgóó; áádóó Alma éí tsʼídá áłtsé ánahwiiʼaahii naatʼáanii silį́į́.

45 Ákohgo baa hoolzhiizh bizhéʼé anáádzá, tseebídiin dóó baʼaan naaki binááhaigo, Diyin God bibee hazʼáanii binahjįʼ beʼiinaʼ áyiilaa.

46 Áádóó baa hoolzhiizh Mosiah ałdóʼ dah nídiidzá, tʼáádíín dóó baʼaan tááʼ nááhai hooʼáałgo, hastą́diin dóó baʼaan tʼááʼ binááhaigo; tʼáá átʼéego éí, Lehi ashdládi neeznádiin baʼaan náhastʼéí nááhaidą́ą́ʼ Jerusalemdóó dah diiná.

47 Áádóó kótʼáo aláahdi naatʼáanii Nephi bidineʼé yá nidahaʼáago nihoolzhiizh; áádóó Alma kojįʼ beʼiinaʼ ninítʼiʼ silį́į́ʼ, éí sodizin haidiilaa.