1 Áádóó kʼad, baa hoolzhiizh Abinadi saad ałtso yee haadzíiʼgo bigaan ąąʼ áyiilaa áádóó ádííniid: Baa hodoolzhish tʼáá ałtso Diyin Bóhólníihii biyisdáʼiildéehii deizdoołtsééł, tʼáá áłtso ałʼąą dineʼé dah deíkáahii, ałkʼéí danidlíinii, bizaad ałʼąą ádaatʼéii, dóó tʼáá áłtso diné tʼáá bí binaaʼ yee deidoołtsééł dóó Diyin God biʼánahwíítʼaahii tʼáá aaníí átʼé daaníigo yaa dahodoolnih.

2 Áádóó índa doo yáʼádaashóonii chʼíbidiʼdoolkał, áádóó biniyéii ádaaníi doo, dóó daachá doo, dóó ayóó íitsʼaʼgo dadilwosh doo, dóó biwooʼ ahídeidiłkʼash doo, Diyin Bóhólníihii biinééʼ doo yikʼeh dahółʼínígíí biniinaa; éí bąą Diyin Bóhólníihii doo yá nináʼdoodleeł da.

3 Háálá atsʼísee dóó biʼiiníziinii danilį́, áádóó biʼiiníziinii bikʼi bidziil; aooʼ, éí tłʼiish sání áłtsé nihimá dóó nihizhéʼé yinaʼazloʼ, éí yinahjįʼ ásih, éí binahjįʼ nihokááʼ dineʼé tʼáá ałtso atsʼíískʼeh deíkáahii dóó atsʼíís deinízinii, bidaʼiinízįįd, doo yáʼáshóonii dóó yáʼátʼéehii ałʼąą átʼéego bił béédahózin, dóó biʼiiníziinii nidabiloʼ.

4 Áko nihokááʼ dineʼé tʼáá ałtso yooʼaheeskai; dóó áko shooh, doo hoolʼáágóó yooʼaheeskai dóó ńtʼę́ę́ʼ tʼáá hazhóʼó Diyin God bidineʼé yooʼaheeskai dóó ndaʼiisííʼdę́ę́ʼ yá nináʼnídlá.

5 Ákondi béédaałniih tʼáá háí shį́į́ atsʼíískʼehjí deíkáahgo, áádóó bąąhági átʼéii yikééʼ deíkáahgo dóó Diyin God yikʼijįʼ hadahadziihgo, tʼáá ndaʼiisíihgo bił hazʼą́ą doo dóó biʼiiníziinii tʼáá ałtsojigo bikʼi bidziil doo. Áko bí éí tʼáadoo nináʼílyáa da nahalingo bił hazʼą́ą doo, Diyin God yitsʼą́ąjįʼ nilį́įgo, áádóó ałdóʼ biʼiiníziinii nilį́įgo Diyin God yitsʼą́ąji nilį́į doo.

6 Áádóó kʼad Christ tʼáadoo nahasdzáán yikááʼ níyáago, baa yáʼíítiʼígíí tʼáá íídą́ą́ʼ áhóótʼįįd nahalingo, doo nináʼílyáa da doo ńtʼę́ę́ʼ.

7 Áádóó Christ anoonééłdę́ę́ʼ tʼáadoo náádiidzáágóó, éí doodago anoonééł bitłʼóól tʼáadoo kʼíyiisdláádgóó áko atsʼíís niiltíigi doo hodínóołnééł da, dóó anoonééł doo yishchʼííʼ da doo, dóó anoonééłdę́ę́ʼ nááʼiiná ádin doo ńtʼę́ę́ʼ.

8 Ákondi anoonééłdę́ę́ʼ nááʼiiná hólǫ́, éí bąą atsʼíís niiltíigi doo hodínóołnééł da, áádóó anoonééł yishchʼį́į́yę́ę Christ yikʼi bidziil doo.

9 Bí éí nahasdzáán beʼadinídíín dóó beʼíinaʼ niłį́; aooʼ, adinídíín doo ntséés da, doo bee chahodoołhił da; aooʼ, áádóó ałdóʼ iiná doo bee ninítʼiʼ da, áko anoonééł bąąh ádin doo.

10 Áádóó díí atsʼíís éí anoonééł doo bąąh siláa da doo, áádóó díí nadahachxǫ́ǫhii doo doochxǫǫłgóó ádoolnííł, áádóó Diyin God biʼánahwiitʼaah bidááhdóó nidoodlóós, éí bá nahoodootʼáał yáʼátʼéehii éí doodago doo yáʼáshǫǫnii naanish ádayiilaayę́ę bikʼehgo—

11 Yáʼátʼéehgo dahináago éí, nááʼiiná éí iiná doo ninítʼiʼii dóó ił hózhǫ́ daa bí dooleeł; áádóó doo yáʼádááshǫ́ǫ́góó éí, tiʼhooʼnííh doo ninítʼiʼii nááʼiinánígíí daa bí dooleeł, biʼiiníziinii bichʼįʼ kódoolnííł, éí bikʼi bóhólníih doo, éí bitiʼhoonííh doo—

12 Éí atsʼíís kʼehjí deinízin dóó yikééʼ deíkáahgo; Diyin Bóhólníihii doo yíká ádaaníi da azhą́ hojoobaʼ bichʼįʼ kólʼį́į ndi, háálá hojoobaʼ bichʼįʼ kólʼį́į́ ńtʼę́ę́ʼ, ndi doo deinízin da, bąąhági ádaatʼínígíí bił dahaneʼ ndi doo yikʼidikááh da, áádóó ádaa ńdaʼoohkąąh biʼdooʼniid ndi tʼáadoo ádaa ńdaʼooskan da.

13 Áádóó kʼad, daʼ dadinohtsxizgo nihibąąhági ádaatʼéii baa ńdaʼoohkąąh doo ńtʼę́ę́ʼ, áádóó béédaałniih Christ tʼéiyá binahjįʼ yisdánáhidoohkah?

14 Éí bąą, Moses bibee hazʼáanii bee ndaʼnohtingo; áádóó ałdóʼ náásgóó ádahodooníłígíí bééłtʼéego bee ndaʼnohtin doo—

15 Nináʼílyá éí Diyin Bóhólníihii Christ bitsʼą́ą́dę́ę́ʼ átʼéego bee ndanohtin, éí tʼáá aaníí Hoolʼáágóó nihiTaaʼ nilį́. Amen.