1 Áádóó baa hoolzhiizh aláahdi naatʼáanii Limhi bidineʼé ałtso yichʼįʼ haadzíiʼgo, ląʼígo yee yichʼįʼ yááłtiʼ dóó áłchʼį́į́dígo tʼéiyá díí naaltsoos biiʼ náházoh, bidineʼé tʼáá ałtso kéyah Zarahemladi bikʼéí bídéétʼiʼígíí yee yił hoolneʼ.

2 Áádóó Ammon diné bidááhdóó yidíízį́į́ł yidííniid, dóó bikʼéí tʼáá ałtso bił ádahoodzaa yę́ę Zeniff kéyahdóó dah diiyá dóó tʼáá bí kéyahdóó dah diiyáajįʼ yaa hoolneʼ.

3 Áádóó aláahdi naatʼáanii Benjamin akéeʼdi saad yee naʼneeztą́ą́ʼyę́ę yee yił hoolneʼ, dóó aláahdi naatʼáanii Limhi bidineʼé yił chʼííníʼą́, áko tʼáá ałtso saad yee hadoodzihígíí yikʼi daʼdidootį́į́ł biniyé.

4 Áádóó baa hoolzhiizh díí ałtso áyiilaago, aláahdi naatʼáanii Limhi diné yeʼníłniiʼ, dóó tʼáá ałtso dabighangóó nídookahgo yeʼníłniiʼ.

5 Áádóó baa hoolzhiizh béésh tʼą́hí bidineʼé kéyah Zarahemladóó dah diikai yę́ę biiʼ náháásdzohígíí, Ammon bidááhdóó nidooʼnił, áko yidóółtah biniyé.

6 Kʼad, Ammon naʼhasdzoh tsʼídá ałtso yiyííłtaʼgo, aláahdi naatʼáanii nááná łaʼ saadjíísh ataʼhodoolnih yiłníígo neidééłkid, dóó Ammon ndagaʼ yidííniid.

7 Áádóó aláahdi naatʼáanii ábidííniid: Shidineʼé tiʼdahooníhígíí baa yínííł nízingo biniinaa, dízdiin dóó biʼaan táaʼgo shidineʼé diné doo kééhootʼínígóó doohkah bidííniid, kéyah Zarahemla hadeidínóotaał biniyé, nihikʼiské naalteʼ daniidlínídę́ę́ʼ chʼídanihidooʼishgo ndeidííkąął biniyé.

8 Áádóó doo kééhojitʼínígi yóóʼeekaigo ląʼí yiską́, ákondi yéego ádáátʼįįd, dóó kéyah Zarahemla tʼáadoo hadeineeztą́ą́ʼ da dóó tʼóó nákai, kéyah bikááʼ tʼóó ahayóí tó naazyį́įgo yiiʼ chʼékai, kéyahdi diné, dóó naaldlooshii daʼałchinígíí bitsʼin ndadeeztąąd, dóó ałdóʼ kin ałʼąą ádaatʼé dááchxǫʼgo, áko kéyah diné tʼóó ahayóí Israel dineʼé dahdeinééh yę́ęgi átʼéego yikʼídaneeztą́ą́ʼ.

9 Áádóó tʼáá aaníigo ádaanínée tʼáá aaníí naadin-dį́įʼgo béésh tʼą́hí deiníjaaʼ éí biniʼdaʼaztséél, dóó béésh óola hadaałtʼéego bee hadadilyaa.

10 Áádóó shooh, ałdóʼ, béésh ééʼ hajéítsʼiingi dah sitánígíí, éí danitsaa, dóó béésh łitsoii dóó béésh łichíiʼii danizhónígo bee ádaalyaago deiníjaaʼ.

11 Áádóó ałdóʼ, béésh hał deiníjaaʼ, bee dah yitį́į́ł éí ádaadin, dóó hááhaashchiiʼjigo éí deichiiʼ; dóó kéyahdi háiida saadígíí doo yá ataʼhodoolnih da éí doodago béésh tʼą́hí bikʼi ndaʼazdzooígíí. Díí bąą ándishní: Daʼ ataʼ haneʼ nił bééhózin?

12 Áádóó ánáánidishní: Saad nááná łaʼ saadjí ídooliłígíísh níl bééhózin? Díí ndaʼasdzoh nihizaadjí ádoolnííł nízin; hááłá, éí daatsʼí, diné dah yikah ńtʼééʼgo nidaaztseedígíí nihił béédahodoozįįł, bitsʼą́ą́dę́ę́ʼ díí ndaʼasdzoh; doodaii, éí daatsʼí, díí diné daneeznánígíí baa áko hwiidínóódzįįł; dóó biniinaa náádabiʼdiilyáhígíí baa áko dínéesįįł.

13 Áádóó kʼad Ammon áyidííniid: Tʼáá aaníigo nił hodeeshnih, O aláahdi naatʼáanii, diné łaʼ díí ndaʼasdzoh nááná łaʼ saad yółtaʼgo shił bééhózin; yee yiiʼ dídóoʼįįłígíí bee hólǫ́, dóó tʼáá ałtso ndaʼíísdzoh ałkʼidą́ą́ʼyę́ę nááná łaʼ saadkʼeh yídóółtah; dóó éí Diyin God bitsʼą́ą́dę́ę́ʼ akʼihojídlí átʼé. Dóó beeʼádoolniłígíí éí bee ataʼ haneʼii wolyé, dóó doo łaʼ diné yiiʼdídóóʼįįł da, Diyin ábiłníigo tʼéiyá, áko doo nélʼínígíí da yee yiiʼ dééʼį́įʼgo bidiyoołhééł. Áádóó háiida biiʼ dídííʼįįł biʼdooʼniidgo, éí diyingo ooʼíinii wolyé.

14 Áádóó áko shooh, kéyah Zarahemladi aláahdi naatʼáanii éí hastiin díí áníłʼį́į doo biʼdooʼniid, dóó díí hódahdę́ę́ʼ aʼílyé Diyin God beinílá.

15 Áádóó aláahdi naatʼáanii diyingo ooʼíinii éí Diyin yá yáłtiʼii yilááh átʼé ní.

16 Áádóó Ammon ání diyingo ooʼíinii éí ił ííshją́ą́ éʼélyaa yaa halneʼii dóó Diyin yá yáłtiʼii ałdóʼ nilį́; áádóó aʼílyé aláahgooígíí doo diné dahyoolééł da, Diyin God bibeʼadziil dahyoolééłgo tʼéiyá, éí diné doo bá bíighah da; ákondi diné ałáágo adziil Diyin God bitsʼą́ą́dę́ę́ʼ baa doolyééł.

17 Ákondi diyingo ooʼíinii ałkʼidą́ą́ʼígíí bił bééhodoozįįłgo yíighah, dóó náásgooígíí ałdóʼ, dóó binahjįʼ tʼáá ałtsoní béédahodoozįįł, doodaii, nízingo, diyingo daʼílíiniísh ííshjání ádoolnííł, dóó ndaʼnilʼinyę́ę adinídíínjįʼ chʼídoolyééł, dóó doo béédahózinyę́ę bééhózingo ádeidoolííł, dóó ałdóʼ tʼáadoo leʼé ííshjání ádeidoolííłígíí éí doo haitʼáo da ííshjání ádoolníił da ńtʼééʼ.

18 Áko Diyin God diné yá hashtʼeʼiilaa, oodlą́ągo, ayóó átʼáo álílee naanish íidoolííł; ákohgo bikʼéí yéego yíká eelwod doo.

19 Áádóó kʼad, Ammon saad ałtso yee haadzíiʼgo Aláahdi naatʼáanii tʼáá íiyisíí bił hóózhǫǫd, dóó Diyin God ahéheeʼ yidííniid, kóní; tʼáá aaníigo, ayóó átʼáo bikʼeʼdidootį́į́łii díí béésh tʼą́hí biiʼ silá, dóó díí bee ataʼ haneʼii tʼáá aaníí nihokááʼ dineʼé baʼáłchíní tʼáá ałtso bikʼeʼdidootį́į́łii biniyéí hólǫ́ǫgo yá hashtʼeyiilaa.

20 O Diyin Bóhólníhii binaanish tsʼídá nizhóníyeeʼ, dóó haanízáádgóó shąʼ bidineʼé yił tiʼhoonííh doo; aooʼ, haitʼáó lá nihokááʼ dineʼé baʼáłchíní doo daʼooʼį́į da doo dóó bibéédahózinii doo bikʼizhdiʼdootį́į́ł átʼée da; háálá bee ééhózinii doo yíká ádaatʼį́į da, dóó bikʼi bóhólníihgo doo deinízin da!

21 Aooʼ, dibé daʼałchinígíí naʼniłkaadii yitsʼą́ąjįʼ dah dadíníichą́ą́ʼ, dóó daʼníłtsʼą́ąjigo ałtsʼáníjééʼ, dóó bidiʼnoolkał, tsiyiʼdi naaldlooshii daʼałchinígíí daboolghal ndahalin.