Mosiah Binaaltsoos

1 Áádóó kʼad kéyah Zarahemladi tʼáá ałtsogóó saad doo ałchʼįʼ adeiyiiníił da daazlį́į́ʼ, tʼáá ałtso aláahdi naatʼáanii Benjamin bidineʼé bitahgóó, áko aláahdi naatʼáanii Benjamin áhodéezyéél áhósingo abíyííłką́.

2 Áádóó baa hoolzhiizh tááʼ biyeʼké; Mosiah, dóó Helorum, dóó Helaman daolyé. Áádóó bizází bizaadyę́ę yee neineeztą́ą́ʼ, áko diné akʼidaʼdiitįįhnii danilį́į doo biniyé; bizází diyinigo bił ííshją́ą́ ádaʼalyaii yee hadahaasdzííʼyę́ę yaa ádahonízin doo biniyé, éí Diyin Bóhólníihii baa deiyiizlá yę́ę átʼé.

3 Áádóó ałdóʼ diné baa haneʼ bídadéétʼiʼígíí yee neineeztą́ą́ʼ éí béésh łitsoii tʼą́hí bikááʼ nídaháasdzoh, kwíidííniid: Shiyeʼ danohłíinii, díí béédaałniih béésh tʼą́hí doo nihee hólǫ́ǫgo, éí ádahoodzaa yę́ę baa haneʼ dóó Diyin bibee hazʼáanii biiʼ náhásdzooígíí, doo nihił béédahózingóó tiʼdahwiiʼnííh doo ńtʼę́ę́ʼ, azhą́ kʼad hoolzhishdi ndi, doo Diyin God bitsʼą́ą́dóó tʼáá aaníinii tʼahdoo ííshją́ą́ ádaalnéehii doo nihił béédahózin da doo ńtʼę́ę́ʼ.

4 Díí doo áhóótʼįįdgo éí nihizhéʼé, Lehi, díí tʼáá átʼé doo yénáálniiʼ da doo ńtʼę́ę́ʼ, doo baʼáłchíní yee neineeztą́ą́ʼ da doo ńtʼę́ę́ʼ, tʼáá hazhóʼó díí béésh tʼą́hí bíká aalwodgo tʼéiyá; Egypt dineʼé bizaad bee nabidiʼneestą́ʼígíí biniinaa díí nídaháasdzooígíí yółtaʼgo yikʼidiitįįh, dóó bibaʼáłchíní yee nideineeztą́ą́ʼ, éí áádóó bibaʼáłchíní yee nináádeineeztą́ą́ʼ, kótʼáo Diyin bibee hazʼáanii haidiilaa, díí yoołkáałjįʼ.

5 Shiyeʼké, ánihidishní, díí doo bohoolyaagóó, jó éí Diyin God yaa áhályánée átʼé, éí da deídííltah dóó bitʼáá aaníinii tʼah doo nihił béédahozįįhígíé bikʼidaʼdidiitį́į́ł, dóó bibee hazʼáanii áłahjįʼ deitʼį́į doo, nihizází yę́ę ndi beʼoodląʼ ádaadingo yóóʼadahaaskai doo ńtʼę́ę́ʼ, dóó nihikʼiské, Laman dineʼé ádaaniitʼée doo ńtʼę́ę́ʼ, bidaniiltʼée doo ńtʼę́ę́ʼ, éí díí áhootʼéhígíí doo bił béédahózin da ńtʼę́ę́ʼ, éí doodago díí bee ndabidiʼneestą́ą́ʼ ndi tʼáadoo deiyoosdląąd da, bizázíyę́ę bidaʼoodląʼ dóó beʼádaʼoolʼįįł biniinaa, éí doo ákódaatʼée da.

6 Shiyeʼké danohłíinii, díí béédaałniih saad bee hadaʼíísdzííʼyę́ę éí tʼáá aaníí ádaatʼé, dóó díí haneʼ nídaháasdzooígíí ałdóʼ tʼáá aaníí ádaatʼé. Dóó áko shooh, Nephi bibéésh tʼą́hí ałdóʼ, éí nihizází Jerusalemdę́ę́ʼ dah diikai dóó kojįʼ yee nidaʼneeztą́ą́ʼ dóó baa haneʼyę́ę biiʼ silá, éí tʼáá aaníí ádaatʼé; éí tʼáá aaníigo nihił bééhodoozįįł háálá éí deitʼį́įgo nihidaahdóó siʼą́.

7 Áádóó kʼad, shiyeʼké danohłíinii, tsʼídá yéego áłahjįʼ nidaałkaahgo nihá nisin, bitsʼą́ą́dóó da nidiʼdoohłééł; dóó Diyin God bibee hazʼáanii bikʼehgo dahinohnáa doo nihííníshní, áko kéyah bikááʼ yáʼátʼéehgo náás dookah nihizází Diyin Bóhólníihii yił ahadaʼdeestʼánée bikʼehgo.

8 Áádóó nááná łą́ągo aláahdi naatʼáanii Benjamin biyeʼké yee nináánéineeztą́ą́ʼ, éí díí béésh tʼą́hí doo biyiʼ nídaháasdzo da.

9 Áádóó baa hoolzhiizh aláahdi naatʼáanii Benjamin biyeʼké ałtso neineeztą́ą́ʼ dóó bikʼijįʼ, haastih, tʼáá hodíínaʼí nahasdzáán biyiʼjįʼ kódabidiʼdoolníiłgo yaa ákoniizį́į́ʼ; éí bąą, łaʼ biyeʼ aláahdi naatʼáanii bee bikʼihodidoonihgo yaa ákoniizį́į́ʼ.

10 Éí bąą, Mosiah bidááhdóó niidlóóz; saad kótʼáo yee yichʼįʼ haadzííʼ, kwííłníigo: Shiyeʼ, tʼáá áłtso diné bitah dóó adahwiisʼáágóó saad ílíinii bee hadíídzih, éí doodago Zarahemla dóó Mosiah bidineʼé kǫ́ǫ́ kéédahatʼínígíí, áko ałhíidookah; háálá yiską́ągóó shizaad ílíinii shidineʼé bee bichʼįʼ hadeesdzih ni aláahdi naatʼáanii dóó díí diné bá sinizíínii nilį́ bidideeshniił, éí Bóhólníihii nihiDiyin God nihikʼidéezʼį́įʼgo áyiilaa.

11 Áádóó ałdóʼ, díí diné bizhįʼ bá ádeeshłííł, díí diné tʼáá ałtso Jerusalem kéyahdę́ę́ʼ Bóhólníihii Diyin God chʼiiníʼeezhígíí biláahdi bee bééhóʼdilzin doo; hááłá éí Diyin Bóhólníihii bibee hazʼáanii yéego yikʼeh dahółʼínígíí biniinaa ákwíishłaa.

12 Áádóó ázhiʼ baa níláhígíí tsʼídá doo kʼééʼdoolchxǫǫł da, ndaʼiisííh yiih yíkaigo tʼéiyá.

13 Aooʼ, dóó ałdóʼ ánihidishní, díí Diyin Bóhólníihii bidineʼé ayóó ádaatʼéii niʼiilzííh yiih yíkaigo, dóó diné bąąhági ádaatʼį́ dóó aadaʼdilé daazlį́įʼgo, Diyin Bóhólníihii yididoochił, dóó bikʼiské nidahalingo doo dabidziil da doo; áádóó adziil doo bináłtʼéii dóó tsʼídá baa haʼniihii doo yee yichʼą́ą́h naagháa da doo, nihizází yee yichʼą́ą́h naagháyę́ęgi átʼáo.

14 Háálá ánihidishní, Diyin bibeʼadziilii danihizhéʼé yę́ę doo yee yaa áhályą́ą́góó Laman dineʼé dabisnáa doo ńtʼę́ę́ʼ, dabijoołáago atídabiłʼį́į doo ńtʼę́ę́ʼ.

15 Áádóó baa hoolzhiizh aláahdi naatʼáanii Benjamin ałtso biyeʼ yichʼįʼ haadzíiʼgo, tʼáá ałtso aláahdi naatʼáanii binaanish áyósinígíí bee bóhólnííh doogo yeidiníʼą́.

16 Áádóó ałdóʼ, béésh łitsoii tʼą́hí bikááʼ nídaháasdzoyę́ę ałdóʼ yilákʼee yííʼą́, dóó ałdóʼ Nephi bibéésh tʼą́hí, dóó ałdóʼ, Laban bibéésh hał, dóó jooł éí doodago dahatsihí, éí danihizhéʼé diné doo kééhootʼíní goné yee chʼíbiníʼeezh, éí Diyin Bóhólníihii hashtʼeyiilaa áko éí yee chʼíbiʼníʼeezh, tʼáá ałtso yikʼeh dahółʼį́ dóó yichʼįʼ hadaʼólnóóí.

17 Éí bąą, doo daʼoodlą́ą́góó tʼáadoo náás deeskai da éí doodago tʼáadoo náás náádeeskai da, ákondi tʼóó nátʼą́ą́ʼ ńdeeskai, dóó Diyin God doo bił yáʼátʼéehii ákʼidazhdiitʼą́; dóó éí biniinaa dichin dóó achʼįʼ nahwiiʼná bee atíhoʼdiilyaa, honaanish béédazhdoolnih biniyé.

18 Áádóó kʼad, baa hoolzhiizh, Mosiah hazhéʼé ádiilííł hałnínée ájiilaa, dóó saad ílíinii tʼáá ałtso diné Zarahemladi kéédahatʼínígíí yee yichʼįʼ haadzííʼ áłah dooleeł biniyé, áádóó diyin bighandi jidookah áadi hazhéʼé saad yee hachʼįʼ hadoodzihgo dajididootsʼį́į́ł.