1 Áádóó baa hoolzhiizh aláahdi naatʼáanii bisiláó nákáí, Diyin Bóhólníihii bidineʼé chʼééh hadeineeztʼą́ą́ʼ.

2 Áádóó kʼad shooh, aláahdi naatʼáanii bisiláó áłchʼį́į́diyeeʼ, tʼáádíkwíhí ályaago, áádóó diné yidziihígíí éí ałtsákai.

3 Áádóó hózhǫ́ áłchʼį́dígíí aláahdi naatʼáanii yikʼijįʼ hadahazííʼ daazlį́į́ʼ, áádóó bitahgóó yéego saad ałchʼįʼ adeiyinííł daazlį́į́ʼ.

4 Áádóó kʼad łaʼ diné bitahdóó Gideon wolyé, éí diné bitsxeʼ dóó aláahdi naatʼáanii yitsʼą́ą́jí nilį́, áko bibééshał hayíítʼą́, áádóó baʼhachʼįʼgo aláahdi naatʼáanii díyiishééł níigo yee nahoníʼą́.

5 Áádóó baa hoolzhiizh aláahdi naatʼáanii yił ahooghą́ą́ʼ; áádóó aláahdi naatʼáanii bikʼeh hodidleehgo yaa ákoniizį́į́go, dah diilwod dóó diyin bighan bitsʼíígiʼ yaʼdiitłʼin yikááʼ haaswod.

6 Áádóó Gideon aláahdi naatʼáanii yidiyoołhééłgo yikééʼ nídiilwod áádóó kʼadę́ę́ yaʼditłʼin yikááʼ haalyeedgo, aláahdi naatʼáanii kéyah Shemlonjigo deiʼį́į́ʼ, ńtʼę́ę́ʼ áko shooh, Laman dineʼé bisiláo kéyah yiiyiʼ dahyikah lá.

7 Áádóó kʼad aláahdi naatʼáanii biiʼ sizíinii tsʼídá yéego tiʼhoonííhgo hadoolghaazh, kóníigo: Gideon, shiyóółhééł lágo, háálá áádę́ę́ʼ Laman dineʼé nihikʼihjįʼ yíkah, dóó ndanihidoołtsxił; aooʼ, shidineʼé nideidoołtsxił.

8 Áádóó kʼad aláahdi naatʼáanii éí bidineʼé doo ayóó yąąh bíneʼ da ndi tʼáábí beʼiiná tʼéiyá yaa nitsékees; ákótʼée ndi, Gideon tʼáadoo biisxée da.

9 Áádóó aláahdi naatʼáanii éí bidineʼé Laman dineʼé bitsʼą́ą́ʼjįʼ dahdadínoohchééh yidííniid, áádóó tʼáá bí ałdóʼ álą́ą́ʼjįʼ dahdínííchąąh, diné doo kééhatʼinígóó, bizáanii dóó baʼáłchíní yił dahdiijééʼ.

10 Áádóó baa hoolzhiizh Laman dineʼé dahdabidinííłchą́ą́h, dóó yíínjééʼ, áádóó ndaʼbidiʼniiłtsééd.

11 Kʼad baa hoolzhiizh aláahdi naatʼáanii hastóí bichʼooní dóó baʼáłchíní biniʼ tʼáá ákǫ́ǫgo bitsʼą́ą́ʼ dahdoohjeeh, dóó Laman dineʼé bilą́ą́jįʼ adadinoohchééł yidííniid.

12 Ákondi ląʼída tʼáadoo dadinéézchąąh da, ndi tʼáá ákǫ́ǫ́ bił honiidlǫ́ dóó bił dadíniiʼnééł dadííniid. Áádóó łahʼjįʼígíí éiyá bichʼooní dóó baʼáłchíní tʼáá ákǫ́ǫ́go yikʼi dahinéézchąąh.

13 Áádóó baa hoolzhiizh tʼáá kǫ́ǫ́ bichʼooní dóó baʼáłchíní yił naakaiʼígíí bitsʼiʼké danizhónígi yidaah deizį́ dóó Laman dineʼé yichʼįʼ ndaʼookąąhgo adeilyiilaa áko doo ndabidoołtsił da biniyé.

14 Áádóó baa hoolzhiizh Laman dineʼé baa aʼááh daniizį́į́ʼ, háálá bizáanii danizhónígíí yídanéésdlįįd.

15 Éí bąą Laman dineʼé beʼiiná yaa dajoozbaʼ, áádóó dabisnah dóó kéyah Nephigóó adeiyizhjaaʼ, áádóó kéyah daa bí dooleełgo yaa deiyiznil, aláahdi naatʼáanii Noah Laman dineʼé yaa deidoołtʼeełgo tʼéiyá yee ndahazʼą́, áádóó binaadeełii yaa deiyizhjaaʼ, bee dahólónígíí tʼáá átʼé áłníídóó, bibéésh óola, dóó bibéésh łigaii, dóó tʼáá áłtso daʼílíinii ałnííʼdóó, Laman dineʼé aláahdii binaatʼáanii yichʼįʼ nidaʼiilée doo tʼáá anahahai bikʼeh.

16 Áádóó kʼad aláahdii naatʼáanii biyeʼké łaʼ átah biʼdisnah, éí Limhi wolyé.

17 Áádóó kʼad Limhi bizhéʼé doo diyoolyééł da nizin; ákótʼée ndi, Limhi bizhéʼé bibąąhági átʼéii yaa bił bééhózin, bí éí diné tʼáá ákogiʼ átʼéii nilį́.

18 Áádóó baa hoolzhiizh Gideon hastóí diné doo kééhatʼiní góneʼ ndanitingo ayiisʼą́, aláahdi naatʼáanii dóó yił naaldééhyę́ę hadeinitah. Áádóó baa hoolzhiizh diné doo kééhatʼiní góneʼ eekaiyę́ę yikʼiʼkai, tʼáá átʼé yíkʼíkai tʼáá hózhóʼí aláahdi naatʼáanii dóó priest danilínígíí éí doo yikʼíkai da.

19 Áádóó kʼad bijéí biyiʼdi kéyah Nephigóó nídiikah daaníigo nidahazʼą́, bichʼooní dóó baʼáłchíní ndaaztseedgo, áádóó ałdóʼ bił nidaaldeehii, áko natʼą́ą́ʼ yikʼijįʼ ndadoodlééł, dóó ałdóʼ yił dínóonééł.

20 Áádóó aláahdi naatʼáanii doo nátʼą́ą́ʼ nidookah da yidííniid; áádóó aláahdi naatʼáanii yichʼįʼ bá dahoochʼį́į́d, dóó tiʼhwiidoonih dadííniid, azhą́ kǫʼ bee biʼdiyoolyééł ndi.

21 Áádóó ałdóʼ kʼádę́ę́ priest danilínígíí yił dadideełgo ndeidoołtsxił ńtʼę́ę́ʼ, dóó baa diijééʼ.

22 Áádóó baa hoolzhiizh kéyah Nephigóó dah nídiikááh ńtʼę́ę́ʼ, Gideon bahastóí yee yíkai. Áádóó Gideon bahastóí bichʼooní dóó baʼáłchíní tʼáá ałtso ádaazaahígíi yee yił hoolneʼ; áádóó Laman dineʼé kéyah yikááʼ kéédahatʼį́į dooleełgo yá adeiyiilaa áko Laman dineʼé tʼáá átʼé bee dahólónígíí áłníídóó yichʼįʼ nideiyílé.

23 Áádóó diné aláahdi naatʼáanii deyishíigo Gideon bahastóí yee yił dahoolneʼ, áádóó bipriest danilínígíí diné doo kééhatʼiní góneʼ tʼóó yiwoh yiyiʼ hatsʼą́ą́ʼ dahdiijééh.

24 Áádóó baa hoolzhiizh ałtso óʼoolʼįįł ádaʼyilaago, kéyah Nephijįʼ, bił dahózhǫ́ǫgo nákai, háálá bichʼóoní dóó baʼáłchíní tʼáadoo ndaaztsʼeed da; dóó aláahdi naatʼáanii haa deiyiláahígíí Gideon yee yił dahoolneʼ.

25 Áádóó baa hoolzhiizh Laman dineʼé aláahdi binaatʼáanii bił ahaaʼdeetʼą́, bidineʼé doo ndadootsxił da.

26 Áádóó ałdóʼ Limhi aláahdi naatʼáanii yiyéʼ nilį́įgo, bee bóhólníihgo hazʼą́ éí diné yee yikʼidadiilniiʼ, Laman dineʼé biʼaláahdi naatʼáanii yił ahaaʼdaʼdeestʼą́ áko bidineʼé yichʼįʼ ndaʼiilée doo, tʼáá átʼé bee dahólóonígíí ałnííh doo.

27 Áádóó baa hoolzhiizh Limhi bee bóhólníihgo hazʼą́ąnigi kin haaláágóó hashtʼeʼyiilaa dóó diné bitahgóó hodéezyéelgo áyiilaa.

28 Áádóó Laman dineʼé bialáahdi naatʼáanii aa ádahályáanii kéyah dabináagóó hólǫ́ǫgo áyiilaa, áko Limhi bidineʼé kéya tʼáá yiyiʼ kéédahatʼį́į doogo áyiilaa, áko doo kééhojitʼíní góneʼ áhídookah da, áádóó baa ádahalyánígíí Nephi dineʼé bichʼįʼ nideiyiiléehígíí yee yaa áhilyą́.

29 Áádóó kʼad aláahdi naatʼáanii Limhi bee bóhólníih hazʼą́ą góneʼ kʼé nahoodleełgo naaki nááhai, áko Laman dineʼé éí doo baa nídaatʼį́į da doodaiiʼ ndabidoołtsxíłgo yiká ádaatʼį́į da.