1 Áádóó kʼad, baa hoolzhiizh Alma, aláahdi naatʼáanii Noah bá ndaalteʼé yílákʼee haalwodę́ę, bąąhági ádaatʼéii dóó tʼóó baaʼihii yaa naʼooskango baanʼdeetʼą́, dóó nanitingo diné yitaaghá, dóó Abinadi yee haadzíʼę́ę yee naʼdíʼníítą́ą́ʼ—

2 Aooʼ, náásgóó ádahodooníiłii, dóó daneeznáanii náádahidooʼnááłígíí, dóó diné bá nináʼílyáhígíí yee naʼneeztą́ą́ʼ, éí Christ bibee adziilii, dóó tiʼhoozniiʼę́ę, dóó biʼdiisxínée binahjįʼ, dóó nááhinaʼ dóó yáʼąąshgóódei anáádzá.

3 Áádóó tʼáá háíshį́į́ bizaad yidiiztsʼą́ʼígíí éí neineeztą́ą́ʼ. Dóó éí éí nanitʼingo neineeztą́ą́ʼ, aláahdi naatʼáanii doo bił bééhodoozįįł da biniyé. Áko ląʼída bizaad dayoosdląąd.

4 Áádóó baa hoolzhiizh ląʼída bizaad dayoosdląądígíí Mormon hoolyéedi náhaaskai, aláahdi naatʼáanii hóózhiʼígi, naaldlooshii daʼałchinii, náhadleeh, hazʼą́ bitsį́įgi.

5 Kʼad, Mormongi tó tsʼídá niłtólígo siyį́, dóó Alma áadi níyá, tó bitsį́įgi tsin ádaałtsʼísígíí adaazʼá, ákweʼé aláahdi naatʼáanii habinitáago jį́įgo nináditʼį́į́h.

6 Áádóó baa hoolzhiizh daboosdląądígíí bizaad deididootsʼį́į́ł biniyé áadi náhaaskai.

7 Áádóó baa hoolzhiizh ląʼí yiską́ągo ląʼída Mormon hoolyéegi áłah silį́į́ʼ, Alma bizaad deididootsʼį́į́ł biniyé. Aooʼ, tʼáá ałtso bizaad dayoosdląądígíí áłah silį́į́ʼ, deididootsʼį́į́ł biniyé. Dóó neineeztą́ą́ʼ, dóó ádaanaʼookąąh, dóó nináʼílyá, dóó Diyin Bóhólníihii woodlą́ yee neineeztą́ą́ʼ.

8 Áádóó baa hoolzhiizh kwíídííniid: Áko shooh, kǫ́ǫ́ Mormon toohdi (ákótʼáo dawójí) dóó kʼad, Diyin God bisodizin bididiikah danohsinígíí, dóó bidineʼé nihidiʼníi dooígíí, dóó tʼáá nihí íiniidzingo nihichʼįʼ ndahwiiʼnánígíí bee ahíłká ańdeiijah dooleeł, áko bee ádaniilzólí doo;

9 Aooʼ, dóó yínííł danilíinii bił yínííł danohsingo bíká adoohjah; aooʼ, dóó doo bił dahatsʼíidii bee bił hatsʼííd bee bíká oohjeeh, dóó tʼáá áłahjįʼ dóó tʼáá ałtsoní biiʼ, dóó tʼáá ałtsogóó naháago biiʼ, Diyin God tʼáá aaníi dadohníigo bá ndasoozį́, azhą́ ádin dasoolį́įʼjįʼ ndi, áko Diyin God nihá nináʼnídláa dooleeł, dóó tsʼídá áłtsé nááʼdahiiʼnaʼígíí daʼnohtah dooleeł, áko hoolʼáágóó hinohnáa dooleeł—

10 Kʼad nihił chʼíhonishʼaah, díí tʼáá íiyisíí danohsingo, haʼátʼíísh éí biniyé doo Diyin Bóhólníihii bízhiʼ binahjįʼ tó bee danihiʼdiilzį́į́h da, bidááhdóó bił ahadaʼdinohtʼánígíí bee bééhózin doo, bá ndaałnish dóó bibee hazʼáanii bikʼeh dahonołʼį́į dooleeł, áko biʼIiʼ Sizį́ Diyinii hózhǫ́ yee nihikʼijidoodliił?

11 Áádóó kʼad diné díí deideeztsʼą́ąʼgo, bił dahózhǫ́ǫgo ahídaazkad, dóó hadadoolghaaz: Díí tʼáá íiyisíí nihijéí bitłʼááhdóó daniidzin.

12 Áádóó kʼad baa hoolzhiizh Alma Helam bílaʼ yiyiłtsood, bí atah áłtsé Alma yoosdląąd, dóó táyiʼ yiizįʼ, dóó naʼooskan, kóníigo: O Diyin Bóhólníihii, niiʼ Sizíinii nánaalnishii bił hólǫ́ǫgo ánílééh, áko bijéí biyiʼdóó díí naanish hodísingo íidoolííł.

13 Áádóó díí saad yee haadzíiʼgo, Diyin Bóhólníihii biʼIiʼ Sizį́ Diyinii bił hooleʼ, dóó ádííniid: Helam, Diyin God Ayóóʼábóodziilii bibee óhólníihii bee, tó bee niisį́į́h, díí náánʼdiilyáajįʼ bá nanilnishgo tʼáá aaníigo bee bił ahaʼdinítʼą́; dóó Diyin Bóhólníihii biʼIiʼ Sizíinii tʼáá íiyisíí nił hólǫ́ǫ leʼ; dóó hoolʼáágóó iiná neidoolééł leʼ, Christ nináʼnídláhígíí binahjįʼ, éí éí nahasdzáán hadilnééhyę́ędą́ą́ʼ hashtʼeyiilaa.

14 Áádóó Alma díí saad ałtso yee haadzíiʼgo, Alma dóó Helam tó bił diilkǫʼ; dóó neidzįʼ dóó bił hózhǫ́ǫgo táyiʼdę́ę́ʼ hááʼáázh, Iiʼ Sizį́ Diyinii bił hólǫ́ǫgo:

15 Áádóó nááná, Alma łaʼ yił nináádiitʼáázh, dóó taah náánáátʼáázhgo naakidi azlį́į́ʼ, dóó áłtséédą́ą́ʼyę́ęgi átʼáo tó yee yiyíísį́į́ʼ, tʼáá hazhóʼó bí éí tʼáadoo yaa kódzaago tó bił diilkǫʼ da.

16 Áádóó ákótʼéego tʼáá háíshį́į́ Mormongi níyáhígíí tó yee yiyíísį́į́ʼ; áko naakidi neeznádiin dóó baʼaan dį́į́ʼ diné lá; aooʼ, Mormon toohdi biiʼ tó bee dabiʼdiilzį́į́ʼ, dóó Diyin God bibee ajoobaʼ biiʼ hadadéébįįd.

17 Áádóó Diyin God bisodizin daosyeʼ, éí doodago Christ bisodizin, áádóó wóshdę́ę́ʼ. Áádóó baa hoolzhiizh tʼáá háiida Diyin God bibee adziilii dóó bibee óhólníihii bee tó biʼdoolzį́į́ʼgo éí sodizin yidiiyá silį́į́ʼ.

18 Áádóó baa hoolzhiizh Alma, Diyin God bibee óhólníihii beiníláhígíí biniinaa, priest dadooleełígíí yikʼidadiilniiʼ; ashdladiin diné dah yikahgo tʼááłáʼí yilą́ąjįʼ naazį́įgo nadaʼnitingo yikʼidiilniiʼ, dóó Diyin God bił hazʼą́ądi bídadéétʼiʼígíí yee ndaʼnitin.

19 Áádóó ádin tʼáadoo bee ndaʼnohtiní tʼáá hazhóʼó bee haasdzíʼígíí beego tʼéiyá yidííniid, áádóó éí Diyin yá yádaałtiʼii dadiyinii yee hadahasdzííʼ.

20 Aooʼ, dóó ádin tʼáadoo ndaʼnohtiní tʼáá hazhóʼó ádaanaʼookąąh dóó Diyin Bóhólníihii, bidineʼé yá nináʼnídláhígíí, yoodlánígíí tʼéiyá.

21 Áádóó tʼáadoo saad ałhídaatʼááhí yidííniid, ndi łáʼí danohłį́įgo tʼáadoo leʼé danółʼį́, dóó tʼáá łáʼígi átʼáo oodląʼ dóó tó bee alzį́į́h ádaołʼį́, nihijéí bee łáʼí danohłį́įgo dóó ayóo daʼahíínóhʼní.

22 Áádóó ákótʼáo ndaʼnohtin yidííniid. Áádóó ákótʼáo Diyin God baʼáłchíní daazlį́į́ʼ.

23 Áádóó Diyin God bihááʼáyį́į́h bijį́į́ góneʼ bee hazʼáanii bikʼeh dahonołʼį́ yidííniid, dóó diyingo ádeínóhsin, dóó tʼáá ákwíí jį́ Bóhólníihii biDiyin God ahéheeʼ dabidohní yidííniid.

24 Áádóó priest yikʼidadiilniiʼígíí tʼáá nihí nihílaʼ bee ákʼindaałdzil dooleeł yidííniid.

25 Áádóó tʼáá damóo ooleeł biyiʼ łaʼajį́ diné áłah ńdaadleehgo ndaʼnitingo ádayiilaa, dóó Bóhólníihii biDiyin God deidósingo, dóó ałdóʼ, tʼáá yídaniłdzilígíí bikʼehgo, áłah ńdaadleehgo ádayiilaa.

26 Áádóó priest danilínígíí doo diné yadaʼólíigo tʼáá bí akʼindaaldzilgo ndaakai; ákondi ndaalnishgo Diyin God bibee ajoobaʼ bichʼįʼ kółʼį́į doo, áko Iiʼ Sizį́ Diyinii tʼáá íiyisíí yee dadínóosééł, dóó Diyin God beʼééhózin bił béédahózingo, áko Diyin God bibee adziilii dóó bibee óhólníihii yee ndaʼnitin dooleeł.

27 Áádóó nááná Alma sodizin daʼatahígíí nihinaalyéhé bee ahíłká ańdaahjah náánéídooʼniid, tʼáá ałtso bee dahólónígíí bikʼehgo; ląʼígo bee dahólónígíí éí tʼáá yéego áká anájah dooleeł; dóó áłchʼį́į́dígo bee dahólónígíí, ndi tʼáá áłtsʼíísígo áká ańdaajah dooleeł; dóó tʼáadoo leʼé bee ádinii éí bíká adoowoł.

28 Áádóó kótʼáo tʼáá bí bíniʼ dóó Diyin God yichʼįʼ yáʼátʼééh danízinígíí dabikʼehgo binaalyeʼé yee áłká anájah, dóó priest baa dahojoobáʼígíí bichʼįʼ, aooʼ, dóó tʼáá ałtso diné bichʼįʼ ańdahaztʼiʼígíí, dóó beʼééʼ ádaadinii.

29 Áádóó díí yee yichʼįʼ haadzííʼ, Diyin God ábiłníigo; dóó áko Diyin God binááł yáʼátʼéehgo dahiiná, atsʼíís dóó iiʼ sizíiniikʼehgo ahíłká ańdaajah deinízinígíí dóó bee ádaadinígíí bikʼehgo.

30 Áádóó kʼad baa hoolzhiizh díí éí tʼáá ałtso Mormondi ádahoodzaa, aooʼ, Mormondi toohgi, Mormondi tó naazyį́ bíighahgi tsintahgi, aooʼ, Mormon hoolyéédi, Mormondi tó naazyínígíí, Mormon bitsintahdi, áko báNináʼnídláhígíí bił béédahózinii deiniłʼį́įgo tʼáá íiyisíí bił danizhóníyeeʼ; aooʼ, dóó dooládóʼ bikʼihojisdliʼ da, háálá yichʼįʼ dahataał dóó hoolʼáágóó yaa dahaniih dooleeł.

31 Áádóó díí éí kéyah hahoodzoh bitsį́įgi ádahoodzaa, áko aláahdi naatʼáanii doo bił bééhodoozįįł da biniyé.

32 Ákondi shooh, áádóó aláahdi naatʼáanii, éí diné bitahgóó nahaneʼgo bił bééhoozin, bá ndaalnishígíí éí diné hazhóʼó hadeisííd dooleełgo éí ákǫ́ǫ́ yichʼįʼ ayisʼaʼ. Éí bąą Diyin Bóhólníihii bizaad deididootsʼį́įłgo áłah yileehgo aláahdi naatʼáanii habideesʼį́į́ʼ.

33 Áádóó kʼad aláahdi naatʼáanii Alma diné shikʼijįʼ danilį́įgo yichʼįʼ hanádzih dííniid; éí bąą yá ndaabaahii ndeidoołtsił biniyé yichʼįʼ yiyííłʼaad.

34 Áádóó baa hoolzhiizh Alma dóó Diyin Bóhólníihii bidineʼé aláahdi naatʼáanii yá ndaabaahii bichʼįʼ yikahgo bił hóóneʼ; éí bąą bidaníbaal dóó badaʼáłchíní ałghaʼádayiilaa dóó diné doo kééhatʼínígóó dah dadiiná.

35 Áádóó diné ánéelą́ʼígíí éí dį́įʼdi neeznádiin dóó baʼaan ashdladiin daatsʼí.