1 Áko Alma, Diyin Bóhólníihii hoł hoolneʼ aláahdi naatʼáanii Noah bisilaó hadááh dookahgo, dóó hodineʼé bił hojoolneʼ, éí bąą dahalį́į́ʼ ahandazhneeskaad, dóó hatłʼoh naadą́ą́ʼ dah dazhdiiyį́, dóó diné doo kééhatʼíní góneʼ dashdiikai aláahdi naatʼáanii bisilao bilą́ąjįʼ.

2 Áádóó Diyin Bóhólníihii bidziilgo ádabiilaa, áko aláahdi naatʼáanii Noah bidineʼé doo bikʼídoojahgo ndabidoołtsxił da.

3 Áádóó diné doo kééhatʼíní góneʼ dazhnoochééłgo tseebíí yiską́.

4 Áádóó kéyah leiʼgi yíkai, aooʼ, kéyah tsʼídá nizhóní dóó yáʼátʼééh léiʼgi, kéyah tó niłtólí leiʼgi.

5 Áádóó nibaal nideiznil, dóó ndahwiisdláád, dóó kin nideiznil, aooʼ, naanish yídaneedlį́, dóó yéego nidaalnish.

6 Áádóó diné ádeiniizį́į́ʼ Alma nihiʼaláahdi naatʼáanii dooleeł, háálá bidineʼé ayóó ádabóʼní.

7 Ákondi ayídiiniid: Shóóh, aláahdi naatʼáanii hodooleełgo doo nidzin da; háálá Diyin Bóhólníihii kóníineʼ: Doo háídá nááná łaʼ diné yiláahgo yaa nitsídookos da, éí doodago doo nááná łaʼ diné yitxisgo ádaatsídookos da; éí bąą nihił chʼíhonishʼaah aláahdi naatʼáanii doo nihee hodooleeł da nisin.

8 Ákótʼée ndi, diné tʼáá ákwee átʼéii áłahjįʼ nihiʼaláahdi naatʼáanii nilį́įgo ákohgo éí aláahdi naatʼáanii nihee hólǫ́ǫ nizhóní doo ńtʼę́ę́ʼ.

9 Ákondi aláahdi naatʼáanii Noah dóó bipriest bąąhági ádáátʼįįdyę́ę béédaałniih; dóó shí ndi shiʼdisził ńtʼę́ę́ʼ, dóó ląʼígo doo yáʼáshóonii Diyin Bóhólníihii binááł baa niséyá, éí bąą tʼáá íiyisíí tiʼhweeshníihgo náʼooshkąąhgo áshiilaa.

10 Ákótʼée ndi, ląʼígo tiʼhwiiséniiʼdóó, Diyin Bóhólníihii náʼooshkąąhgo shídiiztsʼą́ą́ʼ, dóó shisodizin yeʼiilaa, áádóó bílákʼeedóó bee naʼanishí nishłį́įgo tʼóó ahonohyóí bitʼáá aaníí átʼéii nihił béédahoozin.

11 Ákótʼée ndi, díí doo baa hashniih da, háálá tʼáá shí ádaa hashniihgo doo bą́ą́h nishłį́į́góó áshósin.

12 Áádóó kʼad nihił chʼíhonishʼaah, aláahdi naatʼáanii Noah atínihiłʼį́į́ ńtʼę́ę́ʼ, dóó bí dóó bipriest binaalteʼ danohłį́į́ ńtʼę́ę́ʼ, áádóó bąąhági ádaahtʼį́į́go ánihiilaa; éí bąą bąąhági átʼéii danihótąʼ ńtʼę́ę́ʼ.

13 Áádóó kʼad Diyin God bibeʼadziilii yisdánihííʼeezh díí nihiʼdoʼtą́ʼdóó; aooʼ, aláahdi naatʼáanii Noah dóó bidineʼé bílákʼeedóó, áádóó bąąhági ádaatʼéii bee nihiʼdoʼtą́ʼdóó ałdóʼ, áádóó díí nihiʼdoochidóó bee nisoozį́į doo nisin tʼáá nííkʼeh ánihiʼdiilyaaígíí bee, dóó diné tʼáadoo łaʼ nihikʼi aláahdi naatʼáanii nilį́įgo badaʼíínółį́hí.

14 Áádóó ałdóʼ diné tʼáadoo łaʼ nanihinitiní éí doodago sodizin yá sizíní nilį́įgo badaʼíínółį́hí, tʼáá hazhóʼó Diyin God yá sizį́įgo tʼéiyá, yikʼehgo yiigááł dóó bibee hazʼáanii yikʼeh hółʼį́įgo.

15 Ákótʼáo Alma bidineʼé neineeztą́ą́ʼ, tʼáá ałtso diné binaagóó dabighanígíí ayóó ádeiyóʼníi doo tʼáá bígi átʼáo, áko doo daʼahoolchʼíid da doo.

16 Áádóó áko, Alma high priest yá nilį́į́ ńtʼę́ę́ʼ, éí bisodizin yá haidiilaa.

17 Áádóó baa hoolzhiizh háiida doo halneʼ da doo éí doodago doo naʼdínóotʼį́įł da Diyin bibee adziilii bee biʼdoolzį́įʼgo tʼéiyá. Éí bąą tʼáá átʼé priest dóó tʼáá átʼé nidaʼdínóotʼį́łígíí deiyíísį́į́ʼ; dóó doo łaʼ bidiʼdoolzį́įł da tʼáá hazhóʼó hastóí dahodisinígíí tʼéiyá.

18 Éí bąą bidineʼé yikʼidadeezʼį́į́ʼ ńtʼę́ę́ʼ, dóó diyingo oodááłjí bee baa áhóyą́ą́ ńtʼę́ę́ʼ.

19 Áádóó baa hoolzhiizh kéyah bikááʼgóó tʼáá íiyisíí náás deeskai; dóó kéyah Helam wolyéego deiyíízhiʼ.

20 Áádóó baa hoolzhiizh kéyah Helam bikááʼgóó ałʼąą dínéestʼą́ dóó náás deeskai; dóó kin haalʼá ádeiyiilaa, éí Helam kin haalʼá wolyéego deiyíízhiʼ.

21 Ákondi Diyin Bóhólníihii bidineʼé yichʼahashkéego yee hasʼą́; aooʼ, bihadaʼoolíinii dóó beʼoodląʼ yínítaah.

22 Ákótʼée ndi—háídá yáʼoolíígóó nihóníyáadi yisdádoogááł. Aooʼ jó áko díí diné ákódaadzaa.

23 Háálá áko shooh, nihił ííshją́ą́ ashłééh naalteʼ daazlį́įgʼo, dóó doo łaʼ yisdábidooʼish da tʼáá hazhóʼó Bóhólníihii biDiyin God tʼéiyá, aooʼ, Abraham biDiyin God ndi, dóó Isaac, dóó Jacob.

24 Áádóó baa hoolzhiizh yisdábiiʼeezh dóó beʼadziil ayóó átʼéego yił ííshją́ą́ áyiilaa, dóó ayóó átʼáo bił dahóózhǫǫd.

25 Háálá áko shooh, baa hoolzhiizh kéyah Helamdi nijikaigo, aooʼ, Helam kintahgi, dáʼákʼehgi hashtʼeʼdahojilééhgo, áko shooh Laman dineʼé bá ndaabaahí hákéyah yiih yiikai.

26 Kʼad baa hoolzhiizh Alma bikʼiské dáʼákʼehdóó dah dadíníichą́ą́ʼ, dóó Helam kin haalʼáadi ahíikai; háálá Laman dineʼé deiyiiłtsą́ągo tʼáá íiyisíí yéédaasdzííd.

27 Ákondi Alma yichʼįʼ níyáago yitahdóó yiizįʼ, dóó tʼáadoo nidaalzidí yidííniid, ákondi Bóhólníihii nihiDiyin God béédaałnííh dóó Bí yisdánihidooʼish.

28 Éí bąą yéédaaldzidígíí deidiiłheel, áádóó Diyin Bóhólníihii ńdayoozkan Laman dineʼé bijéí áhodadiiszéeʼgo íidoolííł, áko bí, dóó bizáanii, dóó baʼáłchíní doo atídeidoolíił da.

29 Áádóó baa hoolzhiizh Diyin Bóhólníihii Laman dineʼé bijéí áhodadiiszéeʼgo áyiilaa. Áádóó Alma dóó bikʼiské yaa yíkai dóó yilákʼeejįʼ yaa ádadeestʼą́, dóó Laman dineʼé kéyah Helam yee adédahoosnííʼ.

30 Kʼad Laman dineʼé bindaabaahí, aláahdi naatʼáanii Limhi yikééʼ yíkai yę́ę, éí diné doo kééhatʼíní góneʼ yóóʼéékaigo ląʼí yiską́.

31 Áádóó áko shooh, aláahdi naatʼáanii Noah bipriest danilínígíí yikʼíkai, Amulon hoolyéedi; éí kéyah Amulon yee ádéédahoosnííʼ dóó dáʼákʼeh ádahoolaa.

32 Áko priest danilį́įgo nabiʼeeshígíí éí Amulon wolyé.

33 Áádóó baa hoolzhiizh Amulon éí Laman dineʼé néíyooskąąd; áádóó beʼasdzą́ą́ danilínígíí yichʼįʼ adeisʼąʼ, éí Laman dineʼé bichʼéékęʼ danilį́įgo, bilahké ndeidookąął biniyé, éí bahastiin doo bitsʼą́ą́ʼ nideidoołtsxił da.

34 Áádóó Laman dineʼé éí Amulon dóó bikʼiské yaa aʼááh daniizį́į́ʼ, dóó tʼáadoo nideistseed da, háálá bedaʼasdzáá biniinaa.

35 Áádóó Amulon dóó bikʼiské Laman dineʼé yídiikai, áádóó diné doo kééhatʼį́į́góó kéyah Nephi yíkádanitaahgo deínééh ńtʼééʼ kéyah Helam yikʼékai, éí Alma dóó bikʼiské ákweʼé ńdahodiiʼą́.

36 Áádóó baa hoolzhiizh Laman dineʼé Alma dóó bikʼiské yichʼįʼ ádee hadaasdzííʼ, kéyah Nephi bił ííshją́ą́ ádeidoolííł áko doo dabidooghááł da dóó tʼáá bí ádeinízingo kééʼdahatʼį́į́ʼ doo.

37 Ákondi Alma kéyah Nephi bichʼįʼ Laman dineʼé ííshjání áyiilaa ndi Laman dineʼé yee ádee hadaasdzííʼyę́ę doo yiʼdaʼiilaa da; áko haʼasidí kéyah Helam yináztʼįʼgo ádeiyiilaa, Alma dóó bikʼiské yináago.

38 Áádóó łaʼ éí kéyah Nephigóó dah diikai; áádóó łaʼ éí kéyah Helamdi nákai, áádóó akʼidadéezʼį́į́ʼii bichʼooní dóó badaʼáłchíní baa nídáhashtʼeezh éí kéyahdi baa dááʼdiildeeʼ ńtʼééʼ.

39 Áádóó Laman dineʼé éí Amulon aláahdi naatʼáanii dóó bidineʼé yikʼi bóhólníihgo áyiilaa, éí kéyah Helamdi kéédahatʼį́į́ ńtʼę́ę́ʼ, ákótʼée ndi Laman dineʼé biʼaláahdi naatʼáanii doo yitsʼą́ą́jí nahaʼáa da doo.