1 Áádóó áko aláahdi naatʼáanii Mosiah tʼáá ałtso diné ahíyííʼeezh.

2 Áko Nephi baʼáłchíní éí doo ląʼí da, éí doodago Nephi bitsʼáádę́ę́ʼ dahazliʼígíí tʼáá díkwíhí, Zarahemla bidineʼé éí ląʼí yiltʼé, éí Mulek bitsʼáádę́ę́ʼ dahazliʼígíí ádaatʼį́, éí diné doo kééhatʼínídi yił níná.

3 Áádóó Nephi dóó Zarahemla bidineʼé éí doo ląʼí da Laman dineʼé éí atxis ánéelą́ą́ʼ; aooʼ, éí doo ndi ałnííʼ ánéiltʼeʼ da.

4 Ákohgo tʼáá ałtso Nephi bidineʼé áłah silį́į́ʼ, tʼáá ałtso Zarahemla bidineʼé ałdóʼ, áko naakigo dahjookah.

5 Áádóó baa hoolzhiizh Mosiah nídaháasdzooígíí yiyiiłtaʼ, dóó yííltaʼ, Zeniff baa haneʼ bidineʼé bichʼįʼ, aooʼ, éí Zeniff bidineʼé baa haneʼ yiyííłtaʼ, Zarahemla kéyahdę́ę́ʼ dahdiiná yę́ędą́ą́ʼ dóó náʼnáajįʼ.

6 Áádóó Alma dóó bidineʼé baa haneʼ ałdóʼ yiyííłtaʼ, dóó tʼáá átʼé bichʼįʼ ndahwiisnaʼígíí, Zarahemla kéyahdę́ę́ʼ dahdiiná yę́ędą́ą́ʼ dóó náʼnáajįʼ.

7 Ákohgo, Mosiah haneʼ ałtso yiyííłtaʼgo, diné tʼáá ákǫǫ kéédahatʼínée yikʼeedadeesyiz dóó tʼóó bił daʼhóóyói.

8 Háálá chʼééh yaa ntsídaakees; háálá dabiʼdootʼą́ yą́ą́ chʼééhbiʼdeitʼeezhígíí deiyiiłtsą́ągo tʼáá íiyisíí ayóó átʼáo bił dahóózhǫǫd.

9 Áádóó nááná, bidineʼé Laman dineʼé nidabistseedgo yaa ntsidadeezkeezgo yínííł yiih hiikai, dóó yínííł biniinaa honékʼesh tóʼ daaląąd.

10 Áádóó nááná, Diyin God biʼajoobáʼii honeetehee yaa ntsidadeezkeezgo, Diyin God bibeʼadziil yee Alma dóó bidineʼé éí Laman dineʼé bilákʼeedóó dóó dabiʼdótąʼdę́ę́ʼ chʼééníʼeezh, Bóhólníihii Diyin God yichʼįʼ sodadoolzin dóó ahéheeʼ deidííniid.

11 Áádóó nááná, Laman dineʼé yaa ntsídadeezkeez, éí bikʼéí ádaatʼé, éí doo yáʼádaashǫ́ǫ da dóó tʼóó baaʼihii dabííłchxǫʼ, áko éí bá hájéí daneezgai dóó bá tídahíjoonííh éí biiʼ sizíinii bikáʼadaʼdoowoł biniyé.

12 Áádóó baa hoolzhiizh Amulon baʼáłchíní dóó bidineʼé, éí Laman dineʼé bitsiʼké bichʼooní ádeiyiilaayę́ę, éí bizhéʼé ádaatʼínígíí doo bił danilį́į da, éí kʼad bízhiʼ doo choodeiyoołʼįį da, áko Nephi bízhiʼ akʼideidiitʼą́, áko Nephi baʼáłchíní daolyée doo dóó Nephi dineʼé daolyéeʼhígíí bitah biʼdooltaʼ doo.

13 Ákohgo tʼáá ałtso Zarahemla bidineʼé éí Nephi dineʼé bił biʼdooltaʼ; háálá Nephi baʼáłchíní tʼéiyá oʼhoolnihgo hazʼą́ bee bikʼidahoodiiniiʼ biniinaa.

14 Áádóó baa hoolzhiizh Mosiah ałtso diné yichʼįʼ haadzííʼ dóó ííltaʼgo, Alma ałdóʼ diné yichʼįʼ hadoodzih yiniizį́į́ʼ.

15 Áádóó Alma diné yichʼįʼ haadzííʼ, ląʼigo dah deíkáhígíí áłah daazlį́įʼgo, éí dah deíkáhígíí yitah hadiiyá, Bóhólníihii oodląʼ dóó ádaa náʼookąąh diné yee neineeztą́ą́ʼ.

16 Áádóó Limhi bidineʼé dóó bikʼiské yichʼįʼ haadzííʼ, tʼáá átʼé biʼdótąʼdę́ę́ʼ chʼehtʼeezhígíí, Bóhólníihii yisdábííʼeezh yę́ę béédaalniih dooleeł yidííniid.

17 Áádóó baa hoolzhiizh Alma diné Diyinkʼehgo oodááł ląʼígo yee neineeztą́ą́ʼ, áádóó ałtso yichʼįʼ haadzííʼ, áádóó aláahdi naatʼáanii Limhi tó bee shidiʼdoolzį́į́ł niizį́į́ʼ, áádóó diné tʼáá átʼé ałdóʼ tó bee danihidiʼdoolzį́į́ł daniizį́į́ʼ.

18 Éí bąą, Alma taah yíyá dóó tó yee yiyíísį́į́ʼ; aooʼ, Mormon toohdi bikʼiské toʼ yee yiyíísį́į́ʼyę́ęgi átʼáo, aooʼ, ląʼí da toʼ yee yiyísį́ʼígíí sodizin báhoghan yiih hidiikai, Alma bizaad deiyoosdląądígíí biniinaa.

19 Áádóó baa hoolzhiizh aláahdi naatʼáanii Mosiah éí Alma Zarahemla kédaayahgi sodizin bá hooghan neidooniłgo yá hoołʼaʼ; áádóó adziilii yeinílá tʼáá átʼé sodizin yiiʼ priest danilínígíí dóó nadaʼnitiní yidoosį́į́ł biniyé.

20 Ákohgo díí kodaalyaa háálá naʼnitiní tʼááłáʼígo diné tʼóó ahayóí yikʼidéezʼį́į́ʼgo éí doo bíighahígíí biniinaa, áádóó ałdóʼ tʼáá ájítʼé áłah jizlį́į́ʼgo Diyin God bizaad łaʼ doo deidiidootsʼį́į́ł da.

21 Éí bąą ałʼąą dah deíkáahgo áłah daazlį́į́ʼ, sodizin daolyéego; sodizin tʼáá átʼé priest danilínígíí dóó nidaʼnitiní bee dahólǫ́ǫgo, dóó tʼáá átʼé priest danilínígíí Alma yitsʼą́ą́dóó deidiiztsʼą́ʼę́ę yikʼehgo ndaʼnitin.

22 Áádóó áko, azhą́ tʼóó ahayóí sodizin bá dahooghan ndi, tʼáá átʼé tʼááłáʼí sodizin daazlį́į́ʼ, aooʼ, Diyin God bisodizin báhoghan ndi; háálá tʼáadoo leʼé doo bee naʼnitin da tʼáá hazhóʼó ádaa náʼookąąh dóó Diyin God woohdlą́ągo tʼéiyá.

23 Ákohgo Zarahemla kéyahdi tsostsʼid sodizin bá dahooghan daazlį́į́ʼ. Áádóó baa hoolzhiizh háiida íinízingo Christ, éí doodago Diyin God, bízhiʼ ádąąh neinídláago, éí Diyin God bisodizin atah nilį́į doo.

24 Áádóó Diyin God bidineʼé daosyeʼ. Áádóó Bóhólníihii biʼIiʼ Sizį́ Diyinii bichʼįʼ ąą ádoolnííł, dóó bikʼidahojisdliʼ, dóó kéyah bikááʼ daʼatʼį́ daazlį́į́ʼ.