1 Áádóó baa hoolzhiizh nihił hazʼą́ ánáádeilnééhgo baa nináádiikai dóó áhodiilzééʼ nihee dahólǫ́ǫgo kénáádahwiitʼį́. Áádóó bee daʼahijigánígíí ałʼąą átʼéego ádeilyaa, áko shidineʼé bee daʼahijigánígíí bee dahólǫ́ǫ doo Laman dineʼé nihikʼijįʼ náádadeezbaaʼgo biniyé.

2 Áádóó aa ádahalyáanii kéyah yikʼi dadéezʼį́įʼgo ádeilyaa, áko Laman dineʼé doo shidineʼé tʼáá hoyaní yikʼiidoojah da dóó nidanihidoołtsxił; kótʼáo shidineʼé dóó shilį́į́ʼ baa áháshyą́ą́ ńtʼę́ę́ʼ, áko shidineʼé niheʼanaaʼí doo dabidoosił da.

3 Áádóó baa hoolzhiizh nihizází bikéyah yę́ę deiyíníitʼaʼgo ląʼí da nááhai, aooʼ, naadiin naaki nááhaijįʼ.

4 Áádóó hastóí dáʼákʼeh hashtʼedeiléehgo íishłaa, dóó tłʼoh naadą́ą́ dóó tsin bineestʼąʼ ałʼąą ádaatʼéego deineestʼą́.

5 Áádóó sáanii daʼadiz, dóó tʼáadoo leʼé ádeiłʼį́įgo, nidaalnish, dóó naatʼąʼ ałʼąą ádaatʼéego yee nidaʼaskad, aooʼ, naatʼąʼ ałʼąą ádaatʼéego, doo tʼáá łichíʼígo nidajikai da doo biniyé naatʼą́hí haakʼídaastʼiʼgo adajiilaa; áádóó kéyah bikááʼ náás dadeekai—dóó áhodiilzééʼ kéyah bikááʼ hólǫ́ǫgo naadiin naaki niheenááhai.

6 Áádóó baa hoolzhiizh aláahdi naatʼáanii Laman anáádzá, dóó biyeʼ bitsáskʼeh naaʼtáanii silį́į́ʼ. Áádóó shidineʼé yikʼijįʼ daazlį́įʼgo yił hadahonííłchaad; éí bąą anaaʼ yichʼįʼ hashtʼeʼ ádaʼdiilyaa, dóó shidineʼé yikʼijįʼ nídadiibaaʼ.

7 Ákondi shínaalchiʼí kéyah Shemlongóó ííłʼaʼ, hashtʼeʼádadilnééhígíí baa ákodínéesįįł biniyé, áko bichʼįʼ hashtʼeʼ ádadiníílzin doo biniyé, áko doo shidineʼé tʼáá hooyaní yikʼiidoojah da dóó ndeiʼdoołtsxił da.

8 Áádóó baa hoolzhiizh kéyah Shilomgi náhookǫsdę́ę́ʼ níná, ląʼí dah yikahgo, diné ałtį́į́ʼ bee, dóó kʼaaʼ bee, dóó béésh hał bee, dóó béésh hał nídaazháhí bee, dóó tsé bee, dóó bee adiltłʼį́į́h dahdeiyíjááhgo, dóó bitsiiʼ bikʼídaashzhéeʼgo áko bitsiitsʼiin tʼáá daalchíiʼgo dóó akágí boozhnííʼgónaa bikʼidaastiʼ.

9 Áádóó baa hoolzhiizh shidineʼé bizáanii dóó baʼáłchíní diné doo kééhatʼíní góneʼ nídabidiʼdoolʼį́įłgo íishłaa; dóó shahastóí tʼáá ałtso yídeiyíighahígíí yee ndaʼdoołtsiłii baa hájaaʼ; dóó sheʼashiiké tʼáá átʼé yídeiyíighahígíí ałdóʼ yee ndaʼdoołtsiłii baa hájaaʼ, Laman dineʼé yił daʼahidoogą́ąłgo áłah íishłaa; tʼáá ałtso béédááhaiʼígíí bikʼehgo, dóó bee bikʼidahodiiniiʼígíí yikʼeh naazį́įgo íishłaa.

10 Áádóó baa hoolzhiizh Laman dineʼé bił daʼahidiigą́ąłgo bidááh niikai; dóó shí, shíndí, hasistihgo, Laman dineʼé bił daʼahideeshgą́ąłgo bidááh níyá. Áádóó baa hoolzhiizh Diyin Bóhólníihii bibeʼadziil bee bił daʼahidiigą́ąłgo bidááh niikai.

11 Kʼad, Laman dineʼé Diyin Bóhólníihii doo bił béédahózin da, Diyin Bóhólníihii bibeʼadziilii ałdóʼ, áko tʼáá bí bibeʼadziilii yadaʼólí. Ákondi diné dabidziilii danilį́, nihokááʼ dineʼé dabidziilígi átʼáo.

12 Bidineʼé daʼałchin, dóó tʼóó báádahadzid, dóó nidaʼałtseed, dóó dabizází yę́ę beʼoʼoolʼįįł dayoodlą́, éí éiyá—Danihizází yę́ę nidaʼiisiihʼgo biniinaa kéyah Jerusalemdę́ę́ʼ chinihiʼdiʼnoolkaad daaníigo deiyoodlą́, áádóó diné doo kééhatʼínídi bikʼiské doo ákótʼéego nihá nidahazʼą́, áádóó Tónteel bikááʼ yikahgo ałdóʼ doo ákotʼeego nihá nidahazʼą́;

13 Áádóó náána, kéyah áłtsé baa deetʼánée doo ákótʼéego nihootʼą́, tónteel tsiʼnaa yíkaigo, háálá Nephi Diyin Bóhólníihii bibee hazʼáanii yoodlą́ągo yikʼeh hółʼínígíí biniinaa—éí bąą Bóhólníihii bichʼijí nilį́, háálá Diyin Bóhólníihii bisodizin yidiiztsʼą́ą́ʼ dóó bił hoolneʼ, dóó diné doo kééhatʼínídi yiikahgo naatʼáanii nilį́įgo yiníʼeezh.

14 Áádóó bikʼiské hachʼįʼ bádahachįʼ Diyin Bóhólníihii áátʼįįłígíí doo yikʼidaʼdiitįįhígíí biniinaa; áádóó ałdóʼ tónteel yikááʼ bił daʼíʼéełgo hachʼįʼ bádahachįʼ háálá Diyin Bóhólníihii yikʼijįʼ bijéí deistłʼisígíí biniinaa.

15 Áádóó nááná, kéyah aa deetʼą́ądi jíkaigo hachʼįʼ bádahachįʼ, háálá ádaaníigo éí diné bándahajiʼá yę́ę haghaiinídlá, dóó dahwiidiyoołhéełgo há nidahaʼáá ńtʼę́ę́ʼ.

16 Áádóó nááná, bikʼiské bichʼįʼ bádahchįʼ háálá Diyin Bóhólníihii ábíłníigo diné doo kééhatʼínígóó dahdiinánígíí biniinaa, dóó béésh łitsoii tʼą́hí bikʼinaʼasdzo yę́ę dahyídiiʼjaaʼ, háálá éí nihaineezʼį́į́ʼ ní.

17 Áádóó baʼáłchíní deijoołáa dooleełgo nideineeztą́ą́ʼ, dóó nideiłtseed doo; dóó yeidaʼniʼįįh dóó yighadaʼiinííł doo, dóó nideiłtseedgo yéego yíká ádaatʼį́į doo, éí bąą Nephi baʼáłchíní hoolʼáágóó deijoołá.

18 Háálá díí biniinaa aláahdi naatʼáanii Laman, beʼayoochʼííd bee, dóó beʼ anótʼááh bee, dóó beʼahaʼditʼaah nidzinígíí, yee shinaʼazloʼ, díí shidineʼé kéyahjįʼ níʼeezh, áko nideidoołtsxił biniyé; aooʼ, tiʼdahwiiʼníihgo ląʼí nihéédááhai.

19 Áádóó kʼad shí, Zeniff, díí tʼáá áłtso Laman dineʼé bídéétʼiʼígíí shidineʼé bee bił hweeshneʼgo; dóó anaaʼ yichʼįʼ yee dabidziilgo íishłaa, Diyin Bóhólníihii yadaʼólíigo, éí bee, bił daʼahiigą́ą́ʼ.

20 Áádóó baa hoolzhiizh nihikéyah doo chʼínáádaniidzood; áádóó tʼáá awołí bee ląʼígo ndasiiltseed, tʼóó ahayóiígíí biniinaa tʼáadoo dayííltaʼ da.

21 Áádóó baa hoolzhiizh nihikéyahgo nináániikai, dóó shidineʼé nináádaʼniłkaad daazlį́į́ʼ, dóó bidáʼákʼeh hashtʼeʼnáádeiyiidlaa.

22 Áádóó kʼad shí, hasistih, shiyeʼké łaʼ nihił hazʼą́ bee bóhólníihgo bikʼidiishniiʼ; éí bąą, doo łaʼ náádideeshniił da. Áádóó Diyin Bóhólníihii shidineʼé yikʼi hojidoodliił. Amen.