1 Áádóó baa hoolzhiizh nanitʼingo naaki nááhai dóó bikʼijįʼ Abinadi łahgi átʼáo iʼdiilyaago diné yitah naaghá, áko doo bééhoʼdílzin da, áádóó bitah Diyin bikʼeh áhodooníłígíí yaa ahoʼniilneʼ, kóníigo; Diyin Bóhólníihii kóshiłní—Abinadi, dahdiinááh dóó Diyin bikʼeh áhodooníłígíí díí shidineʼé bee bił hodíílnih, háálá shizaad yikʼijįʼ bijéí deistłʼis díí bąą; doo yáʼáshóonii yaa naakaiígíí tʼáadoo yaa ńdaʼooskan da; éí bąą, sháháchį́ʼ bee bitah deeshááł, aooʼ, tsʼídá yéego sháháchįʼgo doo yáʼáshóonii dóó aláahgo woolchʼį́į́d yaa naakaigo baa deeshááł.

2 Aooʼ, díí oochíłígíí biyiʼ yíiyá! Áádóó Bóhólníihii kóshiłní: Nighaan ąą ánílééh dóó Diyin bikʼeh áhodooníłígíí baa hólneʼ, kódíníigo, Diyin Bóhólníihii ání, áádóó baa hodoolzhish díí oochíłígíí biyiʼ, doo yáʼáshóonii yaa naakaiʼígíí biniinaa, naalteʼ dadooleeł, biniitsįʼgi átídadoolnííł; aooʼ, áádóó diné dabinoołkał dooleeł, dóó ndabidoołtsʼį́į́ł, dóó jeeshóóʼ yádi nidaatʼaʼígíí, dóó łeechąąʼí, aooʼ, dóó naaldlooshii daʼałchinígíí, ałtso dabidoolghał.

3 Áádóó baa hodoolzhish aláahdi naatʼáanii Noah beʼiinaʼ éí ééʼ kǫʼ biiʼ dookʼą́ą́ł nahalingo ílį́į doo; háálá Diyin Bóhólníihii nishłį́įgo bił bééhodoozįįł.

4 Áádóó baa hodoolzhish shidineʼé tʼáá íiyisíí achʼįʼ nahwiiʼná bee atídeeshłííł, aooʼ, dichin bił dóó naałniih bee; dóó dadilwoshgo daachágo iʼiiʼaah doo.

5 Aooʼ, áádóó bineʼdę́ę́ʼ nidaazgo bąąh naazláago ádeeshłííł; áádóó doo yádaałtiʼgóó dabidiʼnóolkał dooleeł.

6 Áádóó baa hodoolzhish lóʼ bee nahałtingo bitah kódeeshłį́į́ł, áádóó atídabidoolííł, áádóó haʼaʼaahdę́ę́ʼ níyol ałdóʼ atídabidoolííł, áádóó chʼosh nidaatʼaʼígíí ałdóʼ bikéyah yaa tiih dookah, dóó beʼálástsiiʼ deidooyį́į́ł.

7 Áádóó naałniih ayóó átʼéego átídabidooleeł—doo yáʼáshóonii dóó aláahgo woolchʼį́į́d yaa naakaigo biniinaa díí kodeeshlííł.

8 Áádóó baa hodoolzhish doo ádaa ńdaʼookąąhgóó díí nahasdzáán bikááʼdóó nahodeestsxił; ákondi haneʼ naasdzohígíí tʼáá ákǫ́ǫ́ ndeidooʼááł, áádóó nááná łaʼ diné díí kéyah baa deetʼánígíí baa hashtʼeʼ ndeishʼááł; aooʼ, díí ádeeshłííł áko díí diné aláahdi woolchʼį́į́d ádeiłʼínígíí naana łáʼ diné dah deíkááhígíí bichʼįʼ ąą ádeeshłííł. Áádóó ląʼí da Diyin bikʼeh áhodooníłígíí Abinadi díí diné yee yikʼijįʼ yááłtiʼ.

9 Áádóó baa hoolzhiizh bichʼįʼ bádahóóchįįd; áádóó deisił dóó yedaʼaztłʼǫ́ǫgo aláahdi naatʼáanii yidááh nideistį́, dóó aláahdi naatʼáanii kódeidííniid: Áko shooh, diné łaʼ nidááh nidasiiltį́ éí nidineʼé doo yáʼáshóonii bidéétʼiʼgo yaa hoolneʼ, dóó Diyin God ábidoołdįįł ní.

10 Áádóó ni ałdóʼ neʼiinaʼ doo yáʼáshǫ́ǫ́góó yaa hoolneʼ, áádóó ání neʼiiná ééʼ nahalingo kǫʼ biiʼ dookʼą́ą́ł dooleeł.

11 Áádóó nááná, chʼil bitsiin nahonílin ní, chʼil bitsiin dáʼákʼehdi sigan nahalingo, jó éí naaldlooshii daʼałchinígíí yikʼi chʼíníjééʼ dóó yikʼi naaskai.

12 Áádóó nááná, ni éí hosh ąą ádzaaígíí nilį́į doo ní, jó éí, áltso neestʼą́ąhgo, níyol deiyáago, kéyah bikááʼgóó bił didooyoł. Áádóó Diyin Bóhólníihii ání níigo yeelʼį́. Díí tʼáá átʼé nikʼijįʼ kódoolnííł tʼáá hazhóʼó ádaanáʼiisíníkango tʼéiyá, díí éí bąąhági ánítʼínígíí biniinaa ní.

13 Áádóó kʼad, O aláahdi naatʼáanii, haʼátʼíísh tsʼídá doo yáʼáshóonii baa nisíníyá, éí doodago bąąhági ádaatʼéii haadaatʼéhígíí shąʼ tʼáá íiyisíí nidineʼé ádeiyiilaa, áko Diyin God bá nahodooʼááł éí doodago díí hastiin bá nahodooʼááł?

14 Áádóó kʼad, O aláahdi naatʼáanii, áko shooh, nihí éí doo nihikʼijįʼ siʼání da, O aláahdi naatʼáanii; bąąhági átʼéii tʼáadoo íinilaa da, éí bąą, díí hastiin biyoochʼíídgo naahalneʼ, dóó áhodooníłígíí tʼáadoo biniyéhígóó yaa nahasneʼ.

15 Áádóó áko shooh, danihidziil, doo naalteʼí dadiidleeł da, éí doodago niheʼanaaʼí doo danihidoosił da; aooʼ, dóó kéyah bikááʼgóó náás díníyá, áádóó náás náádíídááł.

16 Áko shooh, díí hastiin, nilákʼee daniidlóós; tʼáá ni nił yáʼátʼéhígi átʼáo ánílééh.

17 Áádóó baa hoolzhiizh aláahdi naatʼáanii Noah éí Abinadi awáalyah góneʼ ayiisghan; áádóó priest danilínígíí áłah wohłeeh yidííniid dóó haidoolíłígíí yindahaʼáa doołeeł biniyé áłah silį́į́ʼ.

18 Áádóó baa hoolzhiizh aláahdi naatʼáanii adeidííniid: Hóshdę́ę́ʼ nihaa nílóós áko ndabiʼdidiilkił; áádóó aláahdi naatʼáanii nihidaah ninohłóós yidííniid.

19 Áádóó nideidíłkidgo yaa nídiikai, áko adił adoohsih biniyé, áko bizaadígíí yee yikʼijįʼ ninádeidooʼááł, ákondi doo náldzidgóó hachʼįʼ hanáádzííʼ, tʼáá áltso nabidiʼkidígíí yikʼijįʼ yiizįʼ, aooʼ, yikʼee dadeesyiz, háálá tʼáá áltso nabidiʼkidígíí yaa náhoolneʼ, áádóó tʼáadoo łaʼ hachʼįʼ hanáánáádziʼí da.

20 Áádóó baa hoolzhiizh łaʼ ábidííniid: Saad nídaháasdzooígíí haitʼáó áłdiní, dóó danihizází yę́ę yee ndaʼneiztʼą́ą́ʼ, kódaaníigo:

21 Dziłghą́ąʼdi haneʼ yáʼátʼéehii bee hózhǫ́ náhoodleełii, éí haneʼ baa hózhóonii bitsʼą́ą́dóó yáʼádaatʼéehii áádóó yisdáʼiildééh yaa halneʼii dooládóʼ bikeeʼ ayóó ánóolnin da; éí Zion ííłní, NiDiyin God tsʼídá aláahdi bee óhólníihii yee hooʼááł;

22 Ná hadaʼasíidii yéego biinééʼ dadidiitsʼį́į́ł, áádóó tʼááłáʼí bízhiʼ yee hadadiʼdooʼááł, háálá Diyin Bóhólníihii éí Zion hastʼéiiyiidlaago dóó ninéinidlaago deizdoołtsééł.

23 Jerusalem kin haalʼáagi dahóóchxǫʼgo nahazʼánígíí dahohtaał, ił hózhǫ́ nááhodoodleełgo tʼááłáʼí ázhiʼgo bee dahohtaał, háálá Diyin Bóhólníihii éí bidineʼé hadaʼólníigo yee yíká adoolwoł, Jerusalem yikʼé nináʼídlá.

24 Diyin Bóhólníihii bigaan bitsxeʼii ałtso ałʼąą dineʼé deidoołtséełgo áyoolííł, áko nahasdzáán nidahoneesʼą́ą́dę́ę́ʼ diné tʼáá ałtso nihiDiyin God bibee yisdáʼiildéehii deizdoołtsééł.

25 Áádóó kʼad Abinadi áyidííniid: Daʼ priest danohłį́, dóó díí diné ndaniitin danohsin, dóó diyingo áhodooníłígíí bikʼidaʼdiitą́ danohsin, ákondi díí haʼátʼíí óolyé dadohníigo ndashídółkid?

26 Ánihidiishní; nihichʼįʼ yíiyá jó Diyin Bóhólníihii bohogááł nidahoołchxǫǫh! Háálá díí bikʼidaʼdootʼą́ągo tʼahdoo bee ndanohtin da; éí bąą, Diyin Bóhólníihii bohogááł nidahoołchxǫǫh.

27 Nihijéí bee akʼeʼdiitįįh tʼah doo yéego biih dasooláa da; éí bąą, doo nihił éédahózin da. Áko, díí diné haʼátʼíísh bee ndanohtin?

28 Áádóó ádaaní: Moses bibee hazʼáanii bee ndaʼniitin.

29 Áádóó ánáánéidooʼniid: Moses bibee hazʼáanii bee ndanohtingo haʼátʼíí biniinaa doo bikʼeh dahonołʼį́į da? Haʼátʼíí biniinaa bee daʼatʼíinii nihijéí biih dahołé? Haʼátʼíí biniinaa aadaʼdohłé dóó kin yąąh sizįní bił dahonohłǫ́, aooʼ, dóó díí diné bąąhági átʼéii ádeiłʼį́įgo adaołeʼ, áko éí bąą Diyin Bóhólníihii díí diné Diyin bikʼeh áhodooníłígíí bee bikʼijįʼ hadeesdzihgo ashííłʼaʼ, aooʼ, tsʼídá doo yáʼáshóonii díí diné bikʼijįʼ kódoolnííł?

30 Dooʼísh nihił béédahózin da tʼáá ániinii baa yáshtįʼ? Aooʼ, nihił béédahózin tʼáá aaníinii baa yáshtiʼ, dóó Diyin God bidááhdóó dadoohtxiz doo neʼ.

31 Áádóó baa hodoolzhish nihibąąhági átʼéii atídanihidoolííł, háálá Moses bibee hazʼáanii bee ndaniitin dadohní. Áko Moses bibee hazʼáanii haʼátʼáo nihił béédahózin? Moses bibee hazʼáaniiʼísh bee yisdáʼiildééh? Haʼátʼíí éí dadohní?

32 Áádóó ádaaní Moses bibee hazʼáanii bee yisdáʼiildééh.

33 Ákondi kʼad Abinadi ííłní: Shił bééhózin Diyin God bibee hazʼáanii bikʼeh dahonołʼį́įgo yisdádoohááł; aooʼ, bee hazʼáanii bikʼeh dahonołʼį́įgo éí Diyin Bóhólníihii éí Sinai dził siʼą́ądi Moses yee nínil, éí ání:

34 NihiDiyin God Bóhólníihii nishłį́, Egypt kéyahdę́ę́ʼ chʼínihiníʼeezh, naalteʼ bahooghandę́ę́ʼ.

35 Tʼááká nááná ła Diyin God nihee hólǫ́ǫ leʼ.

36 Haʼátʼíí da bidaʼalyaii doo ádá ádíílíił da; éí doodago haʼátʼíí da yáʼąąsh biyiʼdi dahólóonii, éí doodaiiʼ nahasdzáán bikáaʼgi dahólóonii.

37 Áádóó kʼad Abinadi ííłní, Daʼ díísh tʼáá áłtso bedaʼoohłaa? Ánihidishní, Ndagaʼ, tʼah doo adáohłééh da. Áádóó dííʼísh tʼáá áltso diné ádeidoolíiłgo bee ndanoohtą́ą́ʼ? Ánihidishní, Ndagaʼ, tʼah doo adáohłééh da.