1 Aooʼ, daʼ Isaiah ádííniid: Háíyeeʼ baa nidahwiilneʼígíí dayoosdląąd, índa háíyeeʼ bichʼįʼ Diyin Bóhólníihii bibee adziilii yitʼíní ályaa?

2 Háálá, chʼil ditʼódí haníísánígiʼ átʼéego áádóó tʼáá hóółtseiidóó behétłʼóól dínéesánígiʼ átʼéego binááł jidínéesą́. Doo diné biyisígíí jílį́į da, doodaiiʼ doo haadzólníi da; áko dahoníilʼį́įgo ayóó ázhnóolninígíí ádin áko doo dahodíníidzįįł da.

3 Diné daahójoołáago hatsʼą́ąjįʼ nídaazyiz; diné yínííł yiiʼ naaghai jílį́, áádóó yínííł hoł bééhózin; áádóó bitsʼą́ąjįʼ dadíníitʼį́įgo ńdadiitʼį́į́ʼ; bijiʼdoodłá, áádóó doo nihił ajílį́į da.

4 Tʼáá aaníí yínííł nihide átʼéii, áádóó yínííł nihá nízhdiiyį́, ndi Diyin God atíhóolago hachʼįʼ nahwiisnááʼ dóó kánizhdoogaał daniidzį́į́ʼ.

5 Ákondi ádił nidaʼiisíʼígíí yá tiʼhoozniiʼ; doo ákwii ádeiitʼįįdii yá átídzaa; achʼįʼ hózhǫ́ nihee hodooleełgo nihá atíhoʼdiilyaa, índa hakʼi naʼastxas yę́ę bee nídeidzííʼ.

6 Tʼáá áníiltso, dibé nahalingo, yóóʼadahiikááh; tʼááłáʼí niitínígo tʼáá nihí daniidzingóó ahiikááh, índa doo ákwii ádeiitʼįįdii tʼáá átʼé Diyin Bóhólníihii hakʼiidiiʼą́.

7 Yínííł hadeʼátʼéego, índa hachʼįʼ hodiiznáaʼgo, tʼáadoo hadzoodzíiʼ da; dibé yázhí bidiʼyoolyéełjįʼ eedlóóz nahalingo, índa dibé tádígéeshgo tʼáadoo áníní nahalingo tʼáadoo hadzoodzíiʼ da.

8 Yínííł hadeʼádzaago ánihwiitʼaahdóó dahoʼdiidlóóz; áádóó háishąʼ oochíiłii biiʼ jiinánígíí hazhóʼó yaa hodoolnih? Háálá, dahináanii bitahdóó hoʼdiisyį́; shidineʼé ádił nidaʼiisíʼígíí biniinaa atíhoʼdiilyaa.

9 Áádóó diné doo yáʼádaashóonii yitʼah náábiʼdiilyá, áádóó diné atʼíinii bił yóóʼáhoʼdiilyaa; háálá bąąhágiʼ átʼéii tʼáádóó yaa nááyáa da, doondinaʼadloʼ saad hazééʼ hólǫ́ǫ da.

10 Azhą́ ákótʼée ndi Diyin Bóhólníihii íinízinígíí bikʼehgo atíbiʼdiilyaa; yínííł hadeʼ átʼéego áhoolaa, áádóó biiʼ sizíinii bąąhági átʼéii yee nááʼázdiisniiʼgo haʼáłchíní yizhdoołtsééł, áádóó nízaadgóó jiináa doo, índa Diyin Bóhólníihii íinízinígíí yáʼátʼéehgo ájoolíił doo.

11 Hwiiʼ sizíinii nitseedzáago jiiłtsą́ągo, hoł yáʼátʼéeh doo; shinaalʼaʼí tʼáá ákogi átʼéii béédahodzísingo diné tʼóó ahojíyóí tʼáá ákogi ádajítʼéego há hahadziih doo, háálá bidoo ákwii ádaatʼéii bá ákizhdíítʼą́ą doo.

12 Éí bąą hó índa ayóó átʼéii bił há ałtsʼádeeshʼnił, áádóó hó dabidziilii bił dajiizhjaaʼii ałtsʼádazdooʼnił, háálá bee ájítʼéhígíí hoʼdiyoolyééłjįʼ biih yíná, áádóó bąąhági ádaaníiłii bił hoʼdééltaʼ, áko tʼóó ahayóí bibąąhági ádaatʼéii bá ákʼizhdiitʼą́, dóó bee hazʼáanii dayiiztiʼii bá níʼdzooskan.