1 Áádóó kʼad, aláahdi naatʼáanii Benjamin ałtso diné yichʼįʼ haadzííʼgo íniizį́į́ʼ, tʼáá ałtso Diyin bibee hazʼáanii yikʼeh dahółʼį́įnígíí dóó Diyin God yił ahadaʼdeestʼánígíí bízhiʼ ndadeiszoh.

2 Áádóó baa hoolzhiizh tʼáá ałtso, Christ bízhiʼ ákʼideididootʼááłgo ahaʼditʼaah ádayiilaa, tʼáá hazhoʼó áłchíní yázhí tʼéiyá tʼáadoo da.

3 Áádóó, áhoodzaa aláahdi naatʼáanii Benjamin díí ałtso íʼiilaago, dóó biyeʼ Mosiah yiyíísį́į́ʼ bidineʼé yiláahdi naatʼáanii dóó yánahaʼáí dooleełgo yikʼidiilniiʼ, dóó tʼáá ałtso hazʼą́ yee bólólniihii yee neineeztʼą́ą́ʼ, áádóó ałdóʼ priest danilínígíí diné ndeidínóotį́įłgo yikʼidadiilniiʼ, áko Diyin God bibee hazʼáanii deiyiitsʼą́ą́ʼ dóó bił béédahodoozį́į́ł biniyé, dóó yee ahaadaʼdeestʼánée ndabiiłnáago yéédaalniih doo biniyé, áádóó diné yeʼníłniiʼ, dóó, tʼááłaʼí nizį́įgo, yił háájééʼ, dabighangóó yił andahaaskai.

4 Áádóó Mosiah táádiin binááhaigo, bizhéʼé dasidáhą́ą góneʼ náás nááhodeezʼą́. éí Jerusalemdę́ę́ʼ Lehi dahdiiyáádóó dį́į́ʼdi neeznádiin dóó tsostsʼidiin dóó biʼaan hastą́ą́ nááhai.

5 Áádóó aláahdi naatʼáanii Benjamin hiináago tááʼ nááhai áádóó dahnídiidzá.

6 Áádóó baa hoolzhiizh aláahdi naatʼáanii Mosiah Diyin Bóhólníihii bidahonítiʼjí yigááł ńtʼę́ę́ʼ, dóó binahwiitʼaah dóó binahazʼą́ii yikééʼ sizį́į́ ńtʼééʼ, dóó tʼáá átʼé bibee hazʼáanii yikʼeh hółʼį́ ńtʼééʼ tʼáá ábíłnínígíí bikʼehgo.

7 Áádóó aláahdi naatʼáanii Mosiah bidineʼé kéyah hashtʼeʼdaahłeeh yidííniid. Áádóó, tʼáá bí ałdóʼ, kéyah hashtʼeʼyiilaa, áko diné adeʼátʼéii doo yee didooʼááł da biniyé, áko bizhéʼé átʼį́ néegiʼ átʼį́į doo. Áádóó diné tʼáá átʼé bitahgóó doo saad yee daʼahighą́ą́góó tááʼ nááhai.