1 Áádóó kʼad, baa hoolzhiizh aláahdi naatʼáanii Benjamin bidineʼé yichʼįʼ haadzíiʼ, bidineʼé bitahgóó łaʼ ayiisʼaʼ, bidineʼé saad yee yichʼįʼ haadzííʼ yę́ę daatsʼí deiyoosdląąd nízingo.

2 Áádóó tʼáá átʼé biinééʼ tʼááłáʼígo yee hadadeeshghaazh, kódaaníigo: Aooʼ, saad tʼáá ałtso bee nihichʼįʼ héíndzíʼígíí deiniidlą́; dóó ałdóʼ, tʼáá aaníí dóó doo tʼóó átʼéego nihił béédahoozin da, Diyin Bóhólníihii Tʼáá Ałtsojįʼ Bidziilii biʼIiʼ Sizį́ Diyinii biniinaa, éí ayóó átʼáo niheʼiinaʼ łahgo áyiilaa, éí nihijéí biyiʼdi, bąąhági átʼéii baa nínáádiikahgo doo daniidzin da, ndi tʼáá áłahjįʼ yáʼátʼéehii ádeilʼį́įgo tʼéiyá daniidzin.

3 Áádóó nihí, tʼáá nihí, ałdóʼ, Diyin God biyáʼatʼééhii doo ninítʼiʼii binahjįʼ, dóó biʼIiʼ Sizį́ Diyinii nihił ííshją́ą́ áyiilaaígíí bee, Diyin bikʼeh ádahodooníłígíí ayóó ádaatʼéego deitʼį́; dóó danízingo éí, tʼáá ałtsoní Diyin bikʼeh áhodooníłígíí baa dahodiilnih.

4 Áádóó aláahdi nihinaatʼáanii yee haadzíʼígíí deiniidlą́ągo biniinaa díí ayóó átʼáo ééhózinii nihił béédahoozin, éí binahjįʼ tʼáá íiyisíí ayóó átʼáo nihił dahóózhǫǫd.

5 Áádóó nihiDiyin God bił ahaʼdadiʼdiitʼááł daniidzin yinízinígíí bidaʼdiilníiłgo, dóó bibee hazʼáanii bikʼeh dahoniilʼį́įgo tʼáá ałtso yichʼįʼ nihidoołʼaałígíí, ńléí anoonééł biih yiidzáajįʼ, áko tiʼhooʼnííh doo ninítʼiʼii doo ádąąh ńdiilyéeł da, Diyin yá naalʼaʼí yee haadzíʼę́ę bikʼehgo, áko Diyin God biʼáháchįʼ doo biiʼ ńdiidááł da biniyé.

6 Áádóó kʼad, aláahdi naatʼáanii Benjamin éí díigi átʼáo saad yitsʼą́ą́dóó yididootsʼį́įł nízin; dóó éí bąą kóyidííniid: Saad bee hadadoohdzih nisin yę́ę bee hadasoohdzííʼ; dóó ahaʼditʼaah ádaołaahyę́ę éí tʼáá ákogi átʼéego ahaʼditʼaah átʼé.

7 Áádóó kʼad, bee ahaʼditʼaah ádáołaahígíí biniinaa Christ baʼáłchíní bee nihiʼdójíi doo, biyeʼké dóó bitsiʼké; háálá áko shooh, dííjį́ iiʼsizį́kʼehgo danihishchį́; bízhiʼ deiniidlą́ éí binahjįʼ nihijéí łahgo ádeiyiilaa dadohní; éí bąą, danihishchį́ dóó biyeʼké dóó bitsiʼké dasoolį́į́ʼ.

8 Áádóó díí ázhiʼ binahjįʼ tʼáá nííkʼe ndaahkai dasoolį́į́ʼ, dóó doo nááná łaʼ ázhiʼ bee tʼáá nííkʼe naahkai da dooleeł. Doo éí nááná łaʼ ázhiʼ binahjįʼ yisdánáʼiildéeh da; éí bąą, Christ bízhiʼ ákʼidadidoohtʼááł nisin, tʼáá ánółtso niheʼiinaʼ ninítʼiʼjįʼ Diyin God bikʼeh dahoniilʼį́į dooleeł dadohníigo bił ahadaʼdinohtʼánígíí.

9 Áádóó baa hodoolzhish tʼáá háiida díí yeʼiilaaígíí Diyin God bílaʼ binishʼnáájígo sizį́įgo bikʼídíʼnóotaał, háálá ázhiʼ binahjįʼ bee biʼdójíhígíí bił bééhózin dooleeł; háálá Christ bízhiʼ bee biʼdójíi dooleeł.

10 Áádóó kʼad áhodoonííł, tʼáá háiida Christ bízhiʼ doo ákʼiiditʼaahígíí éiyá nááná łaʼ ázhiʼ bee biʼdójíi dooleeł; éí bąą, Diyin God bílaʼ binishtłʼajígo bá hazʼą́ą dooleeł.

11 Áádóó díí ałdóʼ béédaołniih dooleeł, áko díí ázhiʼ bee nihíídéeshiił dishnínée tsʼídá doo kʼééʼdoolchxǫǫł da, tʼáá hazhóʼó bee hazʼáanii kʼízhnítiʼgo tʼéiyá; éí bąą, ádaa ádahołyą́ bee hazʼáanii łaʼ kʼídanohtííh lágo; áko ázhiʼ nihijéí biyiʼ dóó doo kʼééʼdoolchxǫǫł da.

12 Nihichʼįʼ haasdziih, éí ázhiʼígíí tʼáá áłahjįʼ nihijéí biyiʼdi bee bikʼidaʼashchį́įgo béédaohłniih, áko Diyin God bílaʼ nishtłʼají doo nihikʼidinóotááł da, ndi iinééʼ bee danihidíʼdóojiiłígíí dadidoohtsʼį́į́ł dóó nihił béédahódoozįįł, dóó ázhiʼ yee nihíídóozhiiłígíí ałdóʼ.

13 Háálá haash yitʼáo diné bilą́ąjįʼ sizíinii tʼah doo yá naalnishígíí yééhósin dooleeł, dóó diné doo bééhoʼdílzinii nilį́įgo, dóó bintsékees dóó bijéí yinízinígíí tsʼídá nízaadę́ę́ʼ hólǫ́ǫgo?

14 Áádóó nááná, daʼ ákooísh diné łaʼ bikʼéí bitélii néididoołtééł, dóó tʼáá neilóoz dooleeł? Nihichʼįʼ haasdziihigo éí, Ndagaʼ; doo ndi bíniʼdii bí bilį́į́ʼ bitah naʼałchozh da dooleeł, ákondi yíwohjįʼ íidínóołchxééł, dóó doo atah naagháágóó íidoolííł. Nihichʼįʼ haasdziihigo nihídóʼ tʼáá ákódoohnííł ázhiʼ bee nihiʼdójíhígíí doo nihił bééhózingóó.

15 Éí bąą, tʼáá íiyisíí danihidziil dóó doo nahjįʼ kódaahʼnééhgóó nisoozį́, dóó tʼáá áłahjįʼ naanish yáʼátʼéehii bindaałnish, áko Christ, Bóhólníihii Diyin God Tʼáá Ałtsojįʼ Bidziilii, hoolʼáágóó bígo ánihiidoolííł, áko yáʼąąshdi nihidiʼdoodlóós, áko hoolʼáágóó yisdáʼiildééh nihee dahólǫ́ǫ dooleeł dóó hoolʼáágóó hiinohnáa doo, bibee ééhózinii, dóó bibee adziilii, dóó tʼáá ákogi átʼáo bibee ánihwiitʼaahii dóó tʼáá ałtsoní áyiilaaí bibee ajoobaʼ biníkááʼ góneʼ éʼélʼį́, yáʼąąsh dóó nahasdzáán biyiʼ, éí tʼáá ałtsoní yiláahdi biDiyin God nilį́. Amen.