1 Áádóó kʼad, baa hoolzhiizh aláahdi naatʼáanii Benjamin Diyin Bóhólníihii bá naalʼaʼí saad bił ííshją́ą́ áyiilaaígíí ałtso yee yááłtiʼgo, tʼáá ałtso diné yitaazghal, dóó áko shooh Diyin Bóhólníihii tʼáá íiyisíí deidísingo biniinaa, niʼjįʼ naaʼaheezhtłizh.

2 Áádóó ndaʼiisíiʼgo bił hazʼánígíí yaa ákodaniizį́į́ʼ, nahasdzáán bikááʼ łeezh ndi tʼáá biʼohgo ádaa ntsídadeezkééz. Áádóó tʼáá átʼé biinééʼ tʼááłáʼígo yéego daacha, kódaaníigo: Christ bidił bee nihibąąhági átʼéii bikʼé nináʼílyáhígíí, Yáa bee nihaa jiiníbaʼgo, nihidééłníigo ánílééh, áko nihibąąhági ádaatʼéii bee nihaandiʼdootʼááł, dóó nihijéí hadaałtʼé dooleeł; háálá Jesus Christ, Diyin God biYeʼ, yáʼąąsh dóó nahasdzáán, índa tʼáá ałtsoní áyiilaaígíí deiniidlą́; éí éiyá nihokááʼ dineʼé baʼáłchíní yaa doogááł.

3 Áádóó baa hoolzhiizh díí saad yee hadaasdzíiʼgo Diyin Bóhólníihii biʼIiʼ Sizį́ Diyinii bikʼidahooleʼ, dóó ił hózhóonii biiʼ hadadéébįįd, háálá bibąąhági ádaatʼéii bee baa nídaʼdeestʼą́, dóó bíniʼ bił hodéezyééł, háálá Jesus Christ doogáłígíí tʼáá íiyisíí dayoodlánígíí biniinaa, aláahdi naatʼáanii Benjamin bizaad yee yichʼįʼ haadzíʼígíí binahjįʼ.

4 Áádóó aláahdi naatʼáanii Benjamin éí bizééʼ ąą ánááyiidlaa dóó yichʼįʼ hanáánáádzííʼ, kóníigo: Shikʼiské, shikʼéí dóó shidineʼé danohłíinii, náádashíídóołtsʼįįł nisin, áko shizaad tʼáá yidziihígíí ałtso bee nihichʼįʼ hadeesdzih binahjįʼ dadidoohtsʼį́į́ł dóó bikʼidadiʼdoohtį́į́ł.

5 Háálá áko shooh, Diyin God biyáʼátʼéehii baa ákodanoozį́įʼgo kʼad doo nihee hólónígíí, dóó doo danohłíní da, dóó doo daʼnohłį́į da dóó asoosihgo nihił hazʼą́ą́dę́ę́ʼ chʼéénihinísid—

6 Ánihidishní, Diyin God biyáʼátʼéehii baa ákodanoozį́į́ʼgo, dóó beʼadziil aláahdi átʼéii, dóó bee ééhóziní, dóó bihaʼólníinii, dóó nihokááʼ dineʼé baʼáłchíní hazhóʼó áłtsé yił naalnishígíí baa ákodanoozį́į́ʼgo; dóó ałdóʼ hodeeyáádą́ą́ʼ nahasdzáán ályaadą́ą́ʼ bąąhági átʼéii bikʼé nináʼdoolyéełgo bee nihootʼánígíí, áko tʼáá háiida Diyin Bóhólníihii yaʼólíhígíí éí yinahjįʼ yisdáńdoodááł, dóó áłahjįʼ bibee hazʼáanii yikʼeh hółʼinígíí, dóó beʼiinaʼ ninítʼiʼjįʼ ndi náásgóó oodlą́ągo, tʼáá bitsʼíís yee hináajįʼ éí ááhdishní—

7 Ádíshní, díí diné éí yisdánaʼiildééh beílyá, bąąhági átʼéii bikʼé nináʼílyáhígíí bee hodeeyáádą́ą́ʼ nahasdzáán bikááʼ tʼáá ałtso nihokááʼ dineʼé bá hashtʼeelyaa, Adam asiihyę́ędą́ą́ʼ dóó wóshdę́ę́ʼ, éí doodago kʼad, éí doodago nihoníyáajįʼndi, dahináa dooleełígíí bá niilyá.

8 Áádóó díí bee yisdáńdaʼdiyooldah. Áádóó doo éí nááná łaʼ bee yisdánáádaʼiildéeh da tʼáá hazhóʼó díí baa yaʼíítiʼígíí tʼéiyá; dóó ałdóʼ doo éí nááná łaʼ biʼdoolníłígíí bikʼehgo diné yisdáńdoodáał da tʼáá hazhóʼó bidaʼdoolnííł bee nihił hweeshneʼígíí bikʼehgo tʼéiyá.

9 Diyin God deinohdlą; tʼáá aaníí hólǫ́, dóó tʼáá aaníí yáʼąąsh dóó nahasdzáán biyiʼ dóó bikáaʼgi hólónígíí, tʼáá ałtso áyiilaa; yáʼąąsh dóó nahasdzáán biyiʼ tʼáá ałtsojįʼ hóyą́, dóó tʼáá ałtsojįʼ bidziil; díí deinohdlą́ Diyin Bóhólníihii bił bééhózinígíí diné doo tʼáá ałtso bił bééhózin da.

10 Áádóó nááná, ádaa ńdaʼoohkąąhgo nihibąąhági ádaatʼéii yóóʼadahidohʼaah dóó tsʼídá doo baa nínáádoohkahgo deinohdlą́, dóó Diyin God bidááhdóó nihaa hojoobaʼígo ídaʼdółnééh; dóó tʼáá íiyisíí shaa ndiníʼaah bidohní; dóó kʼad, díí tʼááałtso deinohdlą́ągo bidaʼohłééh.

11 Áádóó nááná ánihidííniidgo ánáánihidishní, éí Diyin God beʼAyóó Átʼéii baa ákodanoozį́į́ʼgo, éí doodago biyáʼátʼéehii baa ákonoozį́į́ʼgo dóó beʼayóóʼóʼóʼníinii nihił ádzaago, dóó nihibąąhági ádaatʼéii bee nihaa nídaʼdeestʼą́ągo, binahjįʼ tʼáá íiyisíí ił hózhóonii nihitsʼíís dóó nihiiʼ sizíinii biyiʼ silį́į́ʼ, ákótʼée ndi díí éí béédaałniih dooleeł nisin, dóó tʼáá áłahjįʼ éí béédaałniih dooleeł, Diyin God éí beʼaláahdi átʼéii, dóó nihí éí doo ndi danohłíní da, dóó biyáʼátʼéehii dóó nízaadgóó nihąąh tiʼhooʼníhígíí, doo danohłíinii, dóó tʼáá íiyisíí nihaa dahojoobaʼígo ádaʼdoołnééh, tʼáá ákwíí jį́ Diyin Bóhólníihii bichʼįʼ sodadołzingo, dóó áhodooníłígíí deinohdlą́ągo bee ndasoozį́įgo, éí Diyin yá naalʼaʼí yee haadzíʼę́ę átʼé.

12 Áádóó áko shooh, ánihidishní díí bidaʼołʼį́įgo tʼáá áłahjįʼ nihił dahózhǫ́ǫ doo, dóó Diyin God beʼayóóʼóʼóʼníinii nihiyiʼ hadeezbin doo, dóó áłahjįʼ nihibąąhági ádaatʼéii bee nihaa nídiitʼaah doo; dóó ánihiilaaígíí beʼayóó átʼéii bééhózinígíí bee dínóosééł, éí doodago tʼáá aaníinii dóó tʼáá ákogi átʼéii bééhózinígíí bee.

13 Áádóó doo atídaʼahidoołíiłgo ntsídaahkees da doo, ndi kʼékʼehgo kéédahohtʼį́į́ doo, dóó diné tʼáá ałtso daabíhígíí baa dahidohʼaah.

14 Áádóó nihaʼáłchíní dichin dóó biʼééʼ ádaadingo doo tʼóó danółʼį́į da doo; dóó doo tʼáá bíniʼ Diyin God bibee hazʼáanii kʼideiyiitiih da doo, dóó tʼáadoo daʼahigání dóó saad ałchʼįʼ adeiyiiníłí, dóó tʼáadoo biʼiiníziinii yá nidaalteʼé, éí éiyá bąąhági átʼéii yá sizį́, éí doodago éí éiyá íiʼsizį́ doo yáʼáshóonii nihizhéʼé yaa yádaałtiʼę́ę átʼį́, tʼáá ałtso diyin biyáʼátʼéehii yikʼijįʼ nilį́.

15 Ákondi tʼáá aaníinii dóó hojoobaʼ áhwiinidzinjígo oodááł bee ndanohtin dooleeł; ayóó ádaʼahóʼníigo, dóó ahíłká ańdaajahgo bee ndanohtin dooleeł.

16 Áádóó ałdóʼ, tʼáá háiida shíká adoowoł danízinígíí bikáʼadadoołwoł; tʼáá háiida bichʼįʼ anáhóótʼiʼígíí nihinaalyéhé bee bikáʼadoołwoł; dóó iʼdókeedii tʼáadoo tʼóó chʼééh áníigo ádaohłeʼé, dóó tʼáadoo ádin dooleełgo tʼóó yíwohjįʼ kódaohłeʼé.

17 Kódidoohniił daatsʼí: Diné éí tʼáá bí átʼį́įgo tiʼhoonííh; éí bąąh doo bíká adeeshwoł da, dóó doo baʼdeestsoł da, éí doodago doo shinaalyéhé łaʼ baa deeshłéeł da áko doo tiʼhoonííh da dooleeł, háálá atídilʼínígíí éí tʼáá ákogi ádaatʼé—

18 Ákondi nihichʼįʼ haasdziih, O nihokááʼ dineʼé, tʼáá háiida kódzaaígíí éí tʼáá íiyisíí ádaa ńdaʼdookąął; dóó tʼáá hazhóʼó beʼiinaʼ łahgo ándáyiidlaago iiʼ sizíiniikʼeh hoolʼáágóó ájídin dooleeł, dóó Diyin God bił hazʼą́ądi doo bá hazʼą́ą da.

19 Háálá áko shooh, nihíísh doo iʼdókeedii daniidlį́į da? Dooísh tʼáá aníiltso tʼáá éí Diyin nilíinii bichʼįʼ chodaʼiilʼį́į da, Diyin God ndi, nihinaalyehé tʼáá ałtsoní bee, chʼiyáán dóó ééʼ, dóó béésh óola, dóó béésh łigaii, dóó tʼáá ałtso ałʼąą átʼéii bee daʼatʼíinii bee?

20 Áádóó áko shooh, kʼad ndi, bichʼįʼ sodadołzin, dóó nihibąąhági ádaatʼéii nihaa ndiníʼaah dadohníigo ńdaohkąąh. Dóó dooísh tʼáadoo biniyéhígóó tiʼdahoonííh ńtʼę́ę́ʼ? Ndagaʼ; biʼIiʼ Sizį́ Diyinii tʼáá íiyisíí yee nihikʼihojisdliʼ, dóó nihijéí yił dahóóshǫǫd, dóó tsʼídá doo hanáádoohzihgóó ánihiilaa, tsʼídá tʼáá íiyisíí nihił dahóózhǫǫdígíí biniinaa.

21 Áádóó kʼad, Diyin God, ánihiilaaígíí, niheʼiinaʼ bee badaʼíínóhłíhígíí dóó tʼáá ałtso nihee dahólǫ́ dóó bee hadinohtʼéhígíí bee badaʼíínóhłí, tʼáá ałtsoní tʼáá ákogi átʼéii yínóhkeedígíí nihainílá, niheʼoodląʼ binahjįʼ, ńdaʼoohkąąhgo, dóó éí niheʼoodląʼ bee, tʼáá aaníí shaʼdoolyéél nohsingo, áko lą́ą nihinaalyéhé bee ahíłkáʼadoohjah.

22 Áádóó íʼdókeedii nihinaalyéhé łaʼ yókeedgo bá nihonooʼą́ągo bitsʼą́ą́dóó doo ádin silį́į́ʼgóó, dóó tʼóó yíwohdi naniná biʼdooʼniidgo, tʼáá íiyisíí tʼáá áko naʼiilyé nihikʼijįʼ siláa doo háálá doo aʼnohłéégóó, éí doo ndi nihí da ndi Diyin God éí bí, éí éí niheʼiinaʼ ałdóʼ bí; dóó ákondi doo yínóhkeed da, dóó baa nisooyáhígíí doo baa náʼoohkąąh da.

23 Nihichʼįʼ haasdziihigo, yíi éí bikʼijįʼ siláa doo, háálá binaalyéhé yił ádoodįįł; dóó kʼad, díí éí diné tʼáadoo leʼé daʼílíinii nahasdzáánkʼehgo bee dahólónígíí ááhdishní.

24 Áádóó nááná, nihaa dahojoobáʼígíí ánihidishní, naadeełii nihee ádin ndi tʼáá bíighah nihee hólǫ́ǫgo, tʼáá ákwíí jį́ dahinohná; tʼáá ánółtso ídaʼdókeed doo baʼnohłéhígíí ánihidishní; doo nihee hólónígíí biniinaa, díí nihijéí biyiʼdi kódadidoohniił: Shee adinígíí biniinaa doo aʼiishłée da, ákondi naadeełii shee hólǫ́ǫgo éí bee áká aashwod doo ńtʼę́ę́ʼ.

25 Áádóó kʼad, díí nihijéí biyiʼdi kódadohníigo éí doo baa danihíniʼí da doo, éí doodago éí nihá nihodootʼááł; dóó nihá nihootʼaah éí tʼáá ákogi átʼé háálá doo nihee hólóonii bídin danohłį́.

26 Áádóó kʼad, díí bee nihichʼįʼ yááłtiʼígíí biniinaa—éí éí, áko nihibąąhági ádaatʼéii haańdítʼaahgo tʼáá ákwíí jį́, áko Diyin God bidááhdóó doo niʼayosííh da dooleeł—áko nihá íínísin diné baa dahojoobáʼí nihinaalyéhé łaʼ baa dahohnííł doo, tʼáá ałtso diné bee dahólónígíí bikʼehgo, kótʼáo ááhdishní dichin danilínígíí bidaʼiyohsą́, biʼééʼ ádaadinígíí ééhdaołteʼ, bitah dahoneezgaiígíí baa ńdaahkah dóó bíká anídaahjah, iiʼ sizíiniikʼeh dóó atsʼíseekʼeh, deinízinígíí bikʼehgo.

27 Áádóó díí éí tʼáá ałtsoní bee ééhózinii dóó hashtʼehodítʼéego bee óʼółʼįįł; háálá diné bibeʼadziil yilááhgóó yilwołgo doo bóhónéedzą́ą da. Áádóó ałdóʼ, tʼáá áłahjįʼ yidiilkaalgo daniidzin, áko tʼáá íiyisíí yíká átʼínígíí yidoołbįįł; éí bąą, tʼáá ałtsoní hashtʼehodítʼéego ádadoolnííł.

28 Áádóó díí éí béédaałniih dooleeł nisin, nihinaagóó kéédahahtʼíinii tʼáadoo leʼé nihaʼníláago éí tʼáá átʼéhę́ęgi átʼáo baa ńdoohdłééł, tʼáá bee lą́ asoohłįʼę́ęgi átʼáo, éí doodago bąąhági ádoohnííł; dóó ałdóʼ nihinaagóó kééhatʼínígíí da bąąhági áátʼįįłgo ádadoohłííł.

29 Áádóó akéeʼdi, haitʼáo ałʼąą átʼáo bąąhági átʼéii bezhdoolíłígíí tsʼídá doo ałtso baa hojoolneʼ átʼée da; háálá tsʼídá tʼóó ahayóí ałʼąą ádaatʼé dóó ałʼąą ádadoolnííł, tʼóó ahayóí léiʼ yídéeshtahígíí ndi doo bííníshghah da.

30 Ákondi kóníłtsogo bee nihił hodeeshnih, doo ádaa ádahołyąągóó, dóó nihintsékees, dóó nihizaad, dóó adaohtʼínígíí, dóó Diyin God bibee hazʼáanii doo bikʼeh dahonołʼį́į́góó, dóó Diyin Bóhólníihii doogááł baa dahosidootsʼą́ą́ʼ doo tʼah deinohdlą́ągo, ńléí náádanihiʼdiilyáajįʼ kónóhtʼéego, iiʼsizííjí tiʼhodíínih. Dóó kʼad, O diné, béédaałniih, doo dadínóonééł da.