1 Áádóó nááná, shikʼiské, náádashíídóołtsʼįįł nisin, háálá łahgo bee nihichʼįʼ hanáádeesdzih; háálá áko shooh, náásgóó ádahodooníłígíí bee nihił hodeeshnih.

2 Áádóó bee nihił hodeeshnihígíí éí Diyin God yá naalʼaʼí shił ííshją́ą́ áyiilaa. Áádóó éí kóshidííniid: Chʼéénídzííd; dóó chʼéénísdzid, jó áko éí shidááhdóó yiizįʼ.

3 Áádóó kóshidííniid: Chʼéénídzííd, dóó saad bee nił hodeeshnihígíí diitsʼį́į́h; háálá áko shooh, ayóó átʼáo haneʼ baa hózhóonii bee nił hodeeshnih biniyé niyá.

4 Háálá, Diyin Bóhólníihii nisodizin yidiiztsʼą́ąʼ, dóó diyinkʼehgo yínáłígíí binahjįʼ náníhodootʼááł, dóó nił hodoozhǫǫł biniyé nichʼįʼ ashííłʼaʼ; dóó áko nidineʼé ałdóʼ bił hodíílnih, áko bí ałdóʼ bił dahodoozhǫǫł.

5 Háálá áko shooh, áajįʼ ahodoolzhish, dóó doo nízaad hadziih da, ádziil bee, Diyin Bóhólníihii Tʼáá Ałtsojįʼ Bidziilii naatʼáanii nilíinii, hináago hoolzhiizh, hoolʼáádę́ę́ʼ dóó iiná doo ninítʼįʼgóó, éí yáʼąąshdę́ę́ʼ adadoogááł nihokááʼ dineʼé baʼáłchíní yitah doogááł, dóó atsʼíís yiiʼ hináa dooleeł, dóó nihokááʼ dineʼé yitaagháago, álílee ádaatʼéii ííłʼį́į dooleeł, díí éí bitah dahoneezgaiyę́ę néidoołdzih, daneeznánígíí dahiiná áńdeidleʼ, bijaad baa dahazʼánée néídiyiiłá, doo daʼooʼínée daooʼį́įgo áńdeidleʼ, dóó bijééhdaakałę́ę daʼdiitsʼaʼ áńdeidleʼ, dóó ląʼída ndaałniihii neíyíłdzííʼ.

6 Áádóó biʼiiníziinii danilíinii éí doodago iiʼsizį́į́ doo yáʼáshóonii, nihokááʼ dineʼé baʼáłchíní bijéí biyiʼdę́ę́ʼ hadeidínóołkał.

7 Áádóó índa, tiʼhwiidoonih, dóó atsʼíís neezgai, dichin, dibááʼ dóó chʼééh adiʼdááh yiiʼ ndoogááł, diné ndi yiláahdi tiʼhwiidoonih, ákondi bitsʼíís doo náádidoolyééł da; háálá áko shooh, bitásiildę́ę́ʼ dił hadahidoonah, bidineʼé bibąąhági ádaatʼíinii dóó doo yáʼátʼéehii biniinaa ayóó atʼéego tiʼhwiidoonih.

8 Áádóó Jesus Christ wolyée dooleeł, Diyin God biYeʼ, yáʼąąsh dóó nahasdzáán yiTaaʼ nilíinii, hodeeyáádą́ą́ʼ Tʼáá Ałtsoní Áyilaií; dóó bimá éí Mary wolyée dooleeł.

9 Áádóó índa, bidineʼé yaa doogááł, áko diné baʼáłchíní yisdáhidookah bízhiʼ dayoodlą́ągo; dóó díí tʼáá ałtso ádzaa ndi tʼahdii diné nilį́ daaníi doo, dóó biʼiiníziinii biiʼ hólǫ́ daaníi dooleeł, dóó atídeidoolííł, dóó tsin ałnáozʼá bikáaʼjįʼ deidiyoołhééł.

10 Áádóó náádiilyá dóó tááʼ yiskąągo náádidoodááł; dóó áko shooh yá nihodooʼáałgo yidoozįįł; áádóó, díí tʼáá ałtso bedaʼdoolnííł áko diné baʼáłchíní diyin yikʼeh deiyíkááhgo bá ndahodootʼááł.

11 Háálá áko shooh, dóó ałdóʼ Adam asiihgo binahjįʼ bąąhági ádaatʼéii daazlį́ʼígíí biniinaa bidił yee yá nináʼnídlá, éí éí Diyin God íinízinígíí doo bił béédahózingóó daneezná, éí doodago doo bił béédahózingo ndaʼiisííh.

12 Ákondi yíi, yííyá bił hólǫ́ǫ doo tʼáá háída Diyin God yikʼijįʼ silį́įgo bił bééhózinígíí! Háálá éí doo yisdádoogááł da tʼáá hazhóʼó ádaanáʼooskango dóó Diyin Bóhólníihii Jesus Christ yoodlą́ągo tʼéiyá.

13 Áádóó Bóhólníihii Diyin bá yádaałtiʼii dadiyinii tʼáá ałtso diné baʼáłchíní yitahgóó ayiisʼaʼ, ałʼąą dineʼé, dóó bílaʼáshdlaʼii dah déíkááh, dóó bizaad ałʼąą ádaatʼéii tʼáá ałtso bił hodoonih, áko tʼáá ałtso Christ doogáałgo dayoosdląądígíí, bibąąhági ádaatʼéii bee baa ńdaʼdiyootʼááł, dóó tʼáá íiyisíí bił dahodoozhǫǫł, tʼáá íídą́ą́ʼ bitah naayá nahalingo.

14 Ákondi Bóhólníihii Diyin God éí bidineʼé doo nibídabiʼdidzilgóó yiyiiłtsą́ dóó bee hazʼáanii yeinílá, éí éí Moses bibee hazʼáanii.

15 Áádóó doogáłígíí, bee daatʼíinii, dóó álílee, dóó ádaatʼéii, dóó ádahodoonííł tʼóó ahayóí yił ííshją áyiilaa; dóó Diyin yá yádaałtiʼii dadiyinii doogáłígíí ałdóʼ yee hachʼįʼ hadahasdzííʼ; ákondi bijéí deistłʼis, dóó Moses bibee hazʼáanii tʼáadoo yikʼi daʼdiitą́ą da éí tʼáadoo biniyéhé da tʼáá hazhóʼó bidił bee bąąhági átʼéii bikʼé nináʼílyáhígíí biníkááʼ góneʼ tʼéiyá.

16 Áádóó áłchíní bąąhágiʼ áátʼįįł yiighahgo dah doo yisdánáhidookah da; ákondi nihichʼįʼ haasdziih éí bikʼidahojisdliʼ; háálá áko shooh, Adam biniinaa, éí doodago tʼáá áko daanéehgo, éí ńdaʼiisííh ndi, Christ bidił éí bibąąhágiʼ ádaatʼéii yá nináʼnídlá.

17 Áádóó ałdóʼ, ánáánihidishní, doo nááná łaʼ ázhiʼ binahjįʼ doodago doo łahgi ánáánátʼáo doodago łahgo atʼéego nihokááʼ dineʼé baʼáłchíní yisdánáhidookah da, tʼáá hazhóʼó Christ, Diyin Bóhólníihii Tʼáá Ałtsojįʼ Bidziilii bízhiʼ biyiʼ dóó biníkáá góneʼ tʼéiyá.

18 Háálá áko shooh ánihwiiʼaah, dóó beʼánihwiitʼaah tʼáá ákogi átʼé; dóó awééʼ tʼahdii awééchíʼí nilį́įgo dah nídiidahgo diyinkʼehjígo doo tʼáá ádzaagóó yileeh da; ndi, nihokááʼ dineʼé doo yáʼátʼéehii biiʼ sizíinii yiih deíyizlá tʼáá hazhoʼó ajoobaʼ ádaʼdilyaago dóó áłchínígiʼ atʼé daazlį́į́ʼgo tʼéiyá, dóó yisdáʼiildééh hólǫ́ǫ́ ńtʼę́ęʼgo, dóó kʼad hólǫ́ǫgo, dóó náásgóó hólǫ́ǫgo, Diyin Bóhólníihii Tʼáá Ałtsojįʼ Bidziilii, Christ bidił yee nináʼnídláhígíí biníkááʼ góneʼ yoodláago tʼéiyá.

19 Háálá nihokááʼ dineʼé atsʼíískʼeh hiinánígíí Adam asiih yę́ędą́ą́ʼ dóó wóshdę́ę́ʼ, Diyin God yitsʼąąjí nilį́ silį́į́ʼ, dóó tʼáá ákótʼéego, ahoolʼáa dooleeł, tʼáá hazhóʼó Iiʼ Sizį́ Diyinii bahaneʼ yiyíistsʼą́ąʼgo tʼéiyá, dóó nihokááʼ dineʼé atsʼíískʼeh hiinánígíí nahjįʼ kóyiilaago dóó Diyin Bóhólníihii Christ bąąhági átʼéii yikʼé nináʼnídláhígíí binahjįʼ yá sizíinii silį́į́ʼgo, dóó áłchínigiʼ átʼé silį́įʼgo, akʼeh hółʼį́, aa joobaʼ, áłtsé bibaʼ ájítʼée doo, haʼólí, ayóó óʼóʼní biiʼ hólǫ́, dóó Diyin Bóhólníihii tʼáá ałtsoní íidoolííł nízinígíí yikʼeh hółʼį́, áłchíni bizhéʼé yikʼeh hółʼinígiʼ átʼéego.

20 Áádóó ałdóʼ nááná, ánihidishní, tʼáá áłtso ałʼąą dineʼé dah deiyíkahii, ałkʼéí danidliinii, bizaad ałʼąą ádaatʼéii, dóó tʼáá áłtso diné, Yisdáʼiiníiłii bił béédahodoozįįłjįʼ ahodoolzhish.

21 Áádóó áko shooh, áajįʼ ahoolzhiizhgo, Diyin God bidááhdóó doo łaʼ bąąhági átʼéii bąąh ádin da dooleeł, tʼáá hazhóʼó áłchíni yázhí tʼéiyá, dóó ałdóʼ Bóhólníihii Diyin God Tʼáá Ałtsojįʼ Bidziilii bízhiʼ yoodlą́ągo dóó ádaanáʼooskango tʼéiyá.

22 Áádóó kʼad ndi, Bóhólníihii niDiyin God ánidííniidígíí nidineʼé bee ndanohtą́ą́ʼhígíí, ákótʼée ndi Diyin God tʼahdii bąąhági átʼéii bąąh ádin nízin doo, tʼáá hazhóʼó saad bee nihichʼįʼ yááłtiʼígíí binahjįʼ tʼéiyá.

23 Áádóó kʼad Bóhólníihii Diyin God saad yee shichʼįʼ haadzíʼígíí, bee nihichʼįʼ yááłtiʼ.

24 Áádóó ákótʼáo Diyin Bóhólníihii kódííniid: Nihodootʼáałdi, éí díí diné tʼáá aaníinii tʼáá bééhózínígo bikʼijįʼ siláa doo; éí éí bee bá ndahwidiyootʼááł, tʼáá ałtso diné binaanish áyiilaaígíí bikʼehgo, yáʼatʼéehgo daatsʼí, éí doodágo nichxǫ́ǫ́ʼígo áyiilaaígíí bikʼehgo.

25 Áádóó doo yáʼáshóonii yedaʼiilaaʼígíí éí bibąąhági ádaatʼéii dóó ndaʼiisííʼyę́ę deidínóołʼįįł, éí biniinaa Diyin Bóhólníihii yitsʼą́ą́jįʼ kódadoonííł tʼáá íyisíí bichʼįʼ ndahwiiʼnáago dóó hoolʼáágóó tiʼdahooʼníihgo, éí áádę́ę́ʼ doo nínáhidookah da; áko doo yáʼátʼéehii bitsʼíís dóó biiʼ sizíinii yiih deiyiizláa doo.

26 Éí bąą, Diyin God bibee ateʼelʼį́ neezgaiígíí ákʼindeisdlá, áko tʼáá ákogiʼ átʼéego ánihwiitʼaah éí doo nahjįʼ bándootʼáał da tʼáá Adam tsin bineestʼąʼ baa hóchįʼę́ę yiyííyą́ągo asiihígiʼ átʼéego; éí bąąh, bee ajoobaʼ yę́ę éí hoolʼáágóó doo biká adoolwoł da silį́įʼ.

27 Áádóó bitiʼdahooʼnííh éí łeetsoii dookʼą́ą́ł dahsikaad nahalin doo, éí bikǫʼ doo ntsées da, dóó bilid éí hoolʼáágóó dóó ahoolʼáágóó yadiitʼiʼ. Áko Diyin Bóhólníihii éí ákótʼáo shichʼįʼ haadzííʼ. Amen.