1 Ákohgo baa hoolzhiizh Mosiah biyeʼké díí tʼáá ałtso ádeiyiilaago, tʼáá díkwíhígo bizhéʼé, aláahdi naatʼáanii yił yaa nákai, áádóó deinízinígíí yee lą́ adoohłeeł, díí bitsʼátʼeezhígíí bił, Nephi bikéyah góde dookah áko deidiiztsʼą́ʼígíí yee ndeidínóotįįł, dóó Diyin God bizaad bikʼiské, Laman dineʼé, yee yił dahidoolnih—

2 Áko Bóhólníihii biDiyin God yéédahodoosįįł hwiindzingo, dóó dabizází bąąhági ádáátʼįįdyę́ę bił béédahodoozįįł; dóó Nephi dineʼé tʼáá íyiisí deijoołáhą́ą hazhóʼí yaa nitsíndadookos, áko Bóhólníihii biDiyin God yaa bił dahózhǫ́ǫ doo, áko ahidiniłnáo ałkʼis danidlį́į doo, áádóó Bóhólníihii biDiyin God tʼáá ałtsogóó kéyah yaa hodiníʼą́ągo doo daʼahijoodláa da doo.

3 Áko yisdáʼiildééh tʼáá ałtso hináanii bee bił hodoonih danízin, háálá doo łaʼ nihokááʼ dineʼé biiʼ sizíinii doo bił yóóʼahodoolzhish da; aooʼ, iiʼ sizíinii ahoolʼáágóó tiʼhoonihgo tʼóó yaa ntsídadookoos ndi doo yídaneelʼą́ą da tʼóó nidabiiłná dóó yikʼee daditsxiz.

4 Áádóó kotʼáó Diyin Bóhólníihii biʼIiʼ Sizį́ Diyinii ndabiiłná, háálá tsʼídá alaah bąąhági ádaatʼínii danilį́į́ ńtʼę́ę́ʼ. Dóó Diyin Bóhólníihii bee ajoobá doo ninítʼiʼii yee baa joozbaʼ, ákótʼée ndi biiʼ sizíinii yéego tiʼdahoozniiʼ bąąhági ádaatʼéii yaa naakaiígíí biniinaa, hoolʼáágóó chʼíbidiʼnóolkał yéédaasdzíidgo tʼáá íiyisíí yikʼee tiʼdahoozniiʼ.

5 Áádóó baa hoolzhiizh Nephi bikéyahgóó diikah daaníigo bizhéʼé ndayookąąhgo ląʼí yiską́.

6 Áádóó aláahdi naatʼáanii Mosiah Bóhólníihii yichʼįʼ haadzííʼ dóó biyeʼké Laman dineʼé haneʼ yáʼátʼéehii nideidínóotįįłgo daatsʼí bił tʼáá áko.

7 Áádóó Bóhólníihii Mosiah íidííniid: Bíniʼdii dahdiikááh, ląʼí da bizaad deidoodląął, dóó hoolʼáágóó iiná baadahidoolyééł; dóó niyeʼké Laman dineʼé bitsʼą́ą́dóó yisdádeeshʼish.

8 Áádóó baa hoolzhiizh Mosiah bá lą́ azlį́į́ʼ áko deiyíkeed yę́ę yedaʼdoolííł.

9 Áádóó diné doo kééhatʼíní góneʼ dahdiiná Laman dineʼé nideidínóotį́į́ł biniyé; dóó ádeidoołiłígíí kodóó baa hashneʼ doo.

10 Áko aláahdi naatʼáanii Mosiah aláahdi bóhólnííh dooleełígíí doo łaʼ hólǫ́ǫ da, háálá biyeʼké bitséskʼeh ádoogáałgo doo ádeinízin da.

11 Éí bąą béésh łitsoii tʼą́hí bikááʼ naʼiisdzoyę́ę néidiinil, dóó Nephi bibéésh tʼą́hí ałdóʼ, dóó tʼáá átʼé Diyin God bibee hazʼáanii bikʼehgo hashtʼeʼneinínil dóó yaa áhályánę́ę, Limhi bidineʼé béésh óola tʼą́hí yikʼíkai éí bikááʼdę́ę́ʼ saad ataʼ nááháneʼ ndeiyíízoh, éí Limhi bílákʼee yíínil.

12 Áádóó bidineʼé yąąh dabíniʼgo biniinaa díí áyiilaa, háálá diné nidabiʼdistseed yę́ę tʼáá íiyisíí yaa ákodadínóozį́į́łgo.

13 Áádóó tsé naaki binázʼáago bee adéestʼį́į́ʼ choiyoosʼįįdgo yee ataʼ hoolneʼ.

14 Áko díí hodeeyáádą́ą́ʼ hashtʼedaalyaa, dóó ałkééʼ náʼoochííłdę́ę́ʼ ałtah deidiiznil, saad ałʼąą yádaatiʼ bee ataʼ haneʼ dóó akʼiʼdiitįįh doo biniyé;

15 Áádóó Bóhólníihii yaa áhályą́ dóó hashtʼeʼniinínil, éí binahjįʼ tʼáá ałtso nihokááʼ dineʼé kéédahatʼíi dooleełígíí bidineʼé bąąhági ádáátʼįįd dóó aláahgo woolchʼį́į́d yaa naaskai yę́ę yił ííshjání íidoolííł.

16 Áádóó tʼáá háí shį́į́ díí neijaah dooleełígíí éí diyingo ooʼíinii wolyée doo, tʼáá ałkʼidą́ą́yę́ę bikʼehgo.

17 Áko Mosiah díí náháasdzo ataʼ haneʼ ałtso áyiilaago, áko shooh, éí diné nabiʼdistseedgo yaa halneʼ, nabiʼdistseed dóó nátʼą́ą́ʼ ayóó átʼáo yaʼdiitłʼin ályaayę́ędą́ą́ʼ, Diyin Bóhólníihii diné bizaad ałʼąą ádaatʼéego áyiilaayę́ędą́ą́ʼ dóó tʼáá ałtso nahasdzáán bikááʼgóó daʼníłtsʼą́ąjigo ałtsʼádabidiʼneeskaadyę́ędą́ą́ʼ, aooʼ, dóó éí áádóó nátʼą́ą́ʼ Adam abiʼdiilyaayę́ęjįʼ.

18 Áko díí naʼasdzoh Mosiah bidineʼé íiyisíí yínííł ádabiilaa, aooʼ, yéego yínííł yiih yíkai, ndi ląʼígo bił éédahoozin, éí yaa bił dahóózhǫǫd.

19 Áádóó díí adahodoonííłígíí ndáhíídoodzoh; háálá áko shooh, díí nidaháásdzooʼígíí diné tʼáá ałtso hazhóʼó bił béédahodoozįįł.

20 Ákohgo, nihił chʼíhonishʼaah, aláahdi naatʼáanii Mosiah díí ałtso áyiilaago, béésh łitsoii tʼą́hí néidiinil, dóó tʼáá ałtso néidiinil, Alma yeinínil, éí Alma yiyeʼ nilį́; aooʼ, Tʼáá átʼé nídaháasdzooígíí, dóó bee ataʼ dahaneʼígíí, beinínil, dóó hazhóʼó baa áhályą́ dóó hashtʼeʼ nidíínił yidííniid, dóó diné baa haneʼ ałdóʼ nahidíízoh, ałkééʼ daʼáchííh bitah yiʼnił doo, Lehi Jerusalemdę́ę́ʼ dah diiyáago bee yíʼnil yę́ęgi átʼáo.