1 Áko baa hoolzhiizh ląʼí da aniid danóóséłí aláahdi naatʼáanii Benjamin bizaad tʼáadoo yikʼidaʼdiitʼą́ą da, íídą́ą́ʼ bidineʼé tʼah áłchíní yázhí danilį́įgo yichʼįʼ haadzííʼ, dóó dabizhéʼéyę́ę bibeʼóʼoolʼįįł doo deiyoodlą́ą da.

2 Anoonééłdę́ę́ʼ náádahidooʼnaał baa haneʼígíí doo deiyoodlą́ą da, áádóó Christ doogáłígíí ałdóʼ doo deiyoodlą́ą da.

3 Ákohgo beʼoodląʼ ádaadinígíí biniinaa Diyin God bizaad doo yikʼidaʼdiitįįh da; dóó bijéí éí daastłʼis.

4 Áádóó tó bee alzį́į́h doo deinízin da; sodizin yididookahígíí ałdóʼ doo deinízin da. Áádóó bedaʼoodląʼ binahjįʼ tʼáá sahdii dah yikah daazlį́į́, dóó tʼáá ákódaatʼé daazlį́į́ʼ, atsʼíseekʼeh dóó bąąhági áhaatʼį́įgo ndi, háálá Bóhólníihii biDiyin God doo yichʼįʼ sodadilzin da.

5 Ákohgo Mosiah nahaʼáhí nilį́įgo doo Diyin God bidineʼé ałnííʼdóó ánééltʼeʼ da; háálá bidineʼí ałtsʼá dahaaskaiígíí biniinaa bí ląʼí silį́į́ʼ.

6 Áádóó baa hoolzhiizh dóó tʼáá ahayóí, sodizin daʼatahígíí, bizaad bił danizhónígíí biniinaa bidaʼdeesdloʼ, dóó tʼóó ahayóí bąąhági ádaatʼéii yaa naakaigo ádayiilaa; éí bąą bąąhági ádáátʼįįdígíí, dóó sodizin daʼatahígíí, éí sodizin bá hooghan daʼatahígíí yee hachʼįʼ hadaasdzííʼ.

7 Áádóó baa hoolzhiizh priest danilínígíí bidááhdóó ndahaasdlóóz, dóó priest danilínígíí dóó nadaʼnitiní bílakʼeenil; dóó priest danilínígíí Alma yidááhdóó nideiyizhʼeezh, éí high priest nilį́į́ ńtʼę́ę́ʼ.

8 Áko aláahdi naatʼáanii Mosiah éí Alma sodizin bá hooghan bee bóhólníihgo áyiilaa.

9 Áádóó baa hoolzhiizh Alma díí diné doo yééhósin da; ákondi ląʼí da daʼooʼíinii bikʼijįʼ daasdzoh, aooʼ diné bąąhági ádáátʼįįd yę́ę deizįʼ dóó tʼáá aaníigo yaa dahoolneʼ.

10 Áko sodizin bá hooghan biyiʼ tʼah doo kónééh da ńtʼééʼ; éí bąąh Alma biiʼ sizíinii yaa yíniʼ silį́į́ʼ, áádóó aláahdi naatʼáanii bidááhdóó neiyiizlóóz.

11 Áádóó aláahdi naatʼáanii ííłníł: Áko shooh, kǫ́ǫ́ʼ ląʼí ndááhdóó ndahisidlóóz, éí bikʼiské bikʼidahazʼą́; aooʼ, dóó díkwíígóó bąąhági ádaatʼį́įgo hadabiʼdoolʼį́į́ʼ. Dóó bąąhági ádáátʼįįdígíí doo yaa ndaʼookąąh da; éí biniinaa naa dahasiidlooz, áko ádáátʼįįdígíí bikʼehgo bá nidahodííʼááł.

12 Ákondi aláahdi naatʼáanii Mosiah Alma ííłní: Áko shooh, shí doo bá nidahwiideeshʼááł da; tʼóó nilákʼeh hidishʼaah áko ni bá nidahodííʼááł.

13 Ákohgo Alma biiʼ sizíinii biʼdiiłʼá náánásdlį́į́ʼ; áádóó Bóhólníihii yichʼįʼ níyá áádóó biʼdiiłʼáhígíí yínaʼídééłkid, háálá Diyin God yidááhdóó adoosihgo yinálzidígíí biniinaa.

14 Áádóó baa hoolzhiizh biiʼ sizíinii tʼáá átʼé Diyin God yichʼįʼ ąąh áyiilaa dóó bikʼijįʼ, Bóhólníihii bineeʼ yidiiztsʼą́ą́ʼ, kóníigo:

15 Alma, nikʼihoojisdliʼ, áádóó Mormon toohdi tó bee dabiʼdoolzį́į́ʼ yę́ę bikʼidahojisdliʼ. Abinadi shinaalʼaʼí bizaad yinídláanígíí biniinaa nikʼihoojisdliʼ.

16 Áádóó bee bichʼįʼ háíndzííʼgo danoosdląądígíí biniinaa bikʼidahojidoodliił.

17 Áádóó díí diné bitahgi sodizin bá hooghan níínʼánígíí biniinaa nikʼihojisdliʼ, éí yáʼátʼéehgo dahináago ádoolnííł, éí shidineʼé dadooleeł.

18 Aooʼ, díí diné shízhiʼ ákʼideidiitʼánígíí bikʼihojidlíi doo; háálá shízhiʼ bee dabiʼdójíi doo; éí shikééʼ naazį́į doo.

19 Áádóó ndaʼiisihígíí binaʼídiłkidígíí biniinaa, nikʼihojidlíi doo.

20 Shá nanilʼaʼí nílį́; áádóó nił ahaʼdinishtʼą́ áko hoolʼáágóó iiná nee hólǫ́ǫ doo; áádóó shá nanilʼaʼ doo dóó shízhiʼ bee nééhoʼdilzin doo, doo shidibé ałhandinííłkał.

21 Áádóó shiinééʼ yidiiztsʼą́ʼígíí shidibé doołeeł; áádóó éí éí sodizin bá hooghan góneʼ bił yah adííʼash, áádóó shí ałdóʼ yah aninááh bidideeshniił.

22 Háálá áko shooh, díí shisodizin átʼé; háida tó bee biʼdiilzį́įhgo éí ádaa náʼooskango tó bee bidiʼdoolzį́į́ł. Áádóó tʼáá háida bił yah ooʼázhígíí shízhiʼ yoodlą́ą doo; éí éí tʼáá jiikʼeh baa nídiʼdeeshʼááł.

23 Háálá shí éí nihokááʼ dineʼé bibąąhági ádaatʼéii ákʼidiishtʼą́; háálá shí éí ádahwiishłaa; áádóó shí nihoníyáajįʼ dashoodlánígíí shilá nishtłaʼjigo hazʼą́ągo baa dideeshʼááł.

24 Háálá áko shooh, shízhiʼ bee bééhoʼdílzin doo; áádóó shéédahósingo anóonééł dę́ęʼ náádahidooʼnaał, áádóó shilá nishʼnáájígo hoolʼáagóó bił hazʼą́ągo baa dideeshʼááł.

25 Áádóó baa hodoolzhish naaki góneʼ dilní diistsʼą́ą́ʼgo áadi índa doo shéédahósinígíí chʼídookah dóó shidááhgi deidoozįįł.

26 Áádóó tʼáá bí bił béédahodoozįįł Bóhólníihii Diyin God nishłį́, báNináʼnídláii nishłį́; ákondi doo náábidiʼyoonih da.

27 Áádóó bee bił hódeeshnih tʼáadoo niheehosísįįd da; áádóó hoolʼáágóó hodookʼą́ą́lgo ahídookah éí biʼiiníziinii dóó bá nidaalʼaʼí bá hashtʼeelyaa.

28 Éí bąą ándishní, tʼáá háiida shiinééʼ doo yidiitsʼaʼígíí, éí shisodizin báhoogan góneʼ doo bił yah adoohʼash da, éí nohoniyá bijį́įdi doo shił yah adoogáał da.

29 Éí bąą andishní, Yiwohjįʼ: dóó tʼáá háí shį́į́ asihígíí, éí bąąhági ádáátʼįįdígíí bikʼehgo bá nahodiyootʼááł, áádóó nihidááhdóó bibąąhági ádaatʼéíi yaa ndaʼooskango, dóó tʼáá aaníí áníigo bijéí biyiʼdóó ádaa náʼooskango, éí baa ńdiʼdííʼááł, áádóó shí ałdóʼ baa ńdiʼdeeshʼááł.

30 Aooʼ, áádóó shidineʼé tʼáá áłahjįʼ ádaa ńdaʼookąąhgo bąąhági átʼéii bee baa naadiyeeshʼááł.

31 Áádóó nihí ałdóʼ doo ákǫ́ǫ́ ádaʼahoołʼįįdígíí bee ahąąnídaʼahidoohtʼaah; háálá tʼáá aaníigo Shí ánihidishní, hanáago bighanígíí shandiʼníʼaah níigo doo bibąąhági átʼéii bee baanízhdiʼaahgóó, tʼáá hwí adizhdiiltʼiʼ doo.

32 Áko ánihidishní; Yíwohjįʼ; tʼáá háí shį́į́ bibąąhági átʼéii doo yaa náʼookąąhgóó éí shidineʼé doo bitah yíídóoltah da; áádóó díí bikʼeh hólʼį́į doo kodoo dóó náásjįʼ.

33 Áádóó baa hoolzhiizh Alma díí saad yidiiztsʼą́ąʼgo bee hólǫ́ǫ dooleeł biniyé neiyíízoh, áádóó Bóhólníihii bibee nahazʼáanii bikʼehgo diné sodizon bá hooghan daʼatahígíí yá nahwiiʼaah doo.

34 Áádóó baa hoolzhiizh Alma bąąhági ádaatʼį́įgo hadabiʼdoolʼį́ʼígíí yánahoníʼą́, Bóhólníihii bizaad bikʼehgo.

35 Áádóó tʼáá háí shį́į́ bibąąhági ádaatʼéii yaa náʼooskango dóó yaa hoolneʼgo, éí diné sodizon bá hooghan daʼatahígíí bił yíídooltah;

36 Áádóó bibąąhági ádaatʼéii doo yaa dahalneʼ dóó yaa ndaʼookąąhgo, éí diné sodizon bá hooghan daʼatahígíí doo bił yíídooltah da, áádóó bízhiʼ nahjįʼ kʼééʼdoolchxǫǫł.

37 Áádóó baa hoolzhiizh Alma sodizin bá hooghan biyiʼ ádahooníłígíí tʼáá átʼé bee bééhólniih silį́į́ʼ; áádóó hodéezyéel bee nídahasdlį́į́ʼ dóó sodizin bá hooghan ádahooníłígíí yee tʼáá íiyisíí náás deeskai, Diyin God yidááhdóó daastiʼgo deiyikaah, ląʼí da yił yah ahikááh, áádóó ląʼí da tó yee deiyíísį́į́ʼ.

38 Ákohgo díí tʼáá ałtso Alma dóó yił nidaalnishígíí ádeiyiilaa éí sodizin bá hooghan yikʼidadéezʼį́į́ʼ, tʼáá ałtsojįʼ akʼeh dahółʼį́įgo deíkááh, tʼáá ałtsojįʼ Diyin God bizaad yee ndaʼnitin, tʼáá ałtsojįʼ achʼįʼnahwiiná yee tiʼdahooníihgo, Diyin God bisodizin doo atah danilínígíí tʼáá ałtso bichʼįʼ nidahwiiłná.

39 Áádóó bidineʼé doo yáʼátʼéehii yee yichʼįʼ hadahaasdzííʼ; áádóó bí ałdóʼ bee bichʼįʼ hadaʼiisdzííʼ, tʼáá ałtsoní Diyin God bizaad bikʼehgo, bąąhági ádaʼiilaaígíí bikʼehgo, éí doodago bąąhági ádáátʼįįdígíí, Diyin God áłahjįʼ bichʼįʼ sodadołzin, áádóó tʼáá ałtsojįʼ ahééh danohsin dabiʼdooʼniid.