1 Áko kʼad Shemlon hazʼą́ągi Laman dineʼé bitsiʼké ahínéíkahgo dahataał, dóó daʼalzhish dóó bił dahózhǫ́.

2 Áádóó baa hoolzhiizh łaʼ áajįʼ tʼáá díkwíhígo dahataał dóó daʼdoolzhish biniyé ahíikai.

3 Áádóó kʼad aláahdi naatʼáanii Noah bipriest danilínígíí, kin haalʼá Nephigóó nídookahgo yaa yádanízin, aooʼ, dóó ałdóʼ diné ndabidoołtsxíłgo yéédaaldzid éí bąą bichʼooní dóó baʼáłchíní doo yíchʼįʼ ndadikááh da.

4 Áádóó doo kééhatʼínídi kééhatʼį́įgo, dóó Laman dineʼé bitsiʼké yikʼideineeztą́ą́ʼ, éí nahonitʼindę́ę́ʼ hadeisííd;

5 Áádóó tʼáá díkwíhí ahíikai daʼdoolzhish biniyé, ndaʼnitin yę́ę háájééʼ dóó chʼikéí deisná dóó diné doo kééhatʼínígóó adeiyiizhʼeezh; aooʼ, naadin dį́įʼgo Laman dineʼé bitsiʼké diné doo kééhatʼínígóó adeiyiizhʼeezh.

6 Áádóó baa hoolzhiizh Laman dineʼé bichʼikę́ę́ yídahoosaʼ, dóó bádahachįʼgo Limhi bidineʼé yikʼídahazʼah, háálá Limhi bidineʼé daatsʼí ádaatʼį́ daniizį́į́ʼ.

7 Éí bąą bisiláó adeisʼaʼ; aooʼ, aláahdi naatʼáanii ndi bidineʼé yilą́ąjįʼ dah diiyá; kéyah Nephigóó yíkai Limhi bidineʼé deidoosíł biniyé.

8 Áádóó kʼad Limhi yaʼdiiltłʼǫ́ yikááʼdóó hahodeesʼį́į́ʼ, tʼáá ałtso anaaʼ yichʼįʼ hashtʼeʼádaʼdiilyáago yiyiiłtsą́; áko bidineʼé ałhąʼ áyiilaa, áádóó hodíłchʼil dóó tsintahdi yibaʼ nidanitʼin.

9 Áádóó baa hoolzhiizh Laman dineʼé hachʼįʼ dahdiijééʼ, Limhi bidineʼé nidanitʼindę́ę́ʼ hahajeehgo, ndeiʼniiłtseed.

10 Áádóó baa hoolzhiizh tʼáá íiyisíí yéego adaʼahiʼniigą́ą́ʼ, náshdóítsoh iʼniiłhinígíí nahalingo.

11 Áádóó baa hoolzhiizh Limhi bidineʼé éí Laman dineʼé biláajįʼ dah dadíníichą́ą́ʼ, ákondi doo Laman dineʼé ałníigo áneeltʼeʼ da. Ákondi beʼiinaʼ yíká daʼahoogą́ą́ʼ, dóó bedaʼasdzáán, dóó báʼáłchíní yíká; éí bąą yéego adáátʼį́į́d tłʼiishtsoh nahalingo.

12 Áádóó baa hoolzhiizh Laman dineʼé biʼaláahdi naatʼáanii daneeznánígíí yitah sitį́įgo yikʼídeinééztʼą́ą́ʼ, ákondi tʼáá hináá lá, atíbidiilyaago łeeshtahgóó atʼáh sitį́į lá, hodineʼé tsxį́įłgo hokʼééjééh.

13 Áádóó dahdeidiiłtį́įgo atíbiʼdiilyaaígíí yikʼídaʼdeesdiz, áádóó Limhi yidááh nideizlóóz, áádóó ádeidííniid: Shooh, kǫ́ǫ́ Laman dineʼé biʼaláahdi naatʼáanii, atíbidiilyaa dóó daneeznánígíí yitah nítłiz, dóó yaa dáádiikai; áko shooh, nidááh nidaníídlóóz; dóó kʼad deidiyiilyééł.

14 Ákondi Limhi ábidííniid: Doo deiyidoołhééł da, ndi shidááh nidanohłóós áko yideestsééł. Áádóó yidááh nideizlóóz. Áádóó Limhi áyidííniid: Haʼátʼíí biniinaa anaaʼ shidineʼé bikʼijįʼ ádaałaa? Áko shooh, shidineʼé bee ahaʼdeetʼą́ nił íishłaayę́ę tʼáadoo kʼídeiztiʼ da; éí bąą, haʼátʼíí biniyé ahaʼdeetʼą́ shidineʼé bichʼįʼ ádaałaayę́ę kʼídanohtiʼ?

15 Áádóó kʼad aláahdi naatʼáanii ání: Bee ahaʼdeetʼą́ kʼinítiʼ háálá shidineʼé bitsiʼ dahsinooʼį́į́; éí bąą, sháhachʼįʼgo shidineʼé anaaʼ bee nidineʼé yikʼiijééʼ.

16 Áádóó kʼad Limhi díí tʼah doo yidiitsʼį́įh da; éí bąą ání: Shidineʼé bitah dídéeshʼįįł áádóó háiida díí átʼínígíí hodiyeeshhééł. Éí bąą hodineʼé bitahgoóó hadeinitáago áyiilaa.

17 Áádóó kʼad díí Gideon yidiiztsʼą́ąʼgo, éí aláahdi naatʼáanii bisiláó yilą́ąjįʼ sizį́ nilį́, aláahdi naatʼáanii yichʼįʼ niilwod dóó ííłní: Tʼáá shǫǫdí tʼáadoo áníléhé, áádóó díí diné tʼáadoo bitah diníʼį́ʼí, áádóó díí tʼáadoo bąąh siláago áníléhé.

18 Háálá dooísh nizhéʼé bipriest danilínée doo béénílniih da, éí díí diné nideidoołtsxiłgo hadeinitáá ńtʼę́ę́ʼ? Áádóó daʼ dooísh diné doo kééhatʼínídi naaldeh da? Áádóó daʼ bí éí Laman dineʼé bitsiʼké deineezį́į́ʼyę́ę ádaatʼį́?

19 Áádóó kʼad, shooh, áádóó díí aláahdi naatʼáanii bee bił hodíílnih, áko bidineʼé yił dahodoolnih áko doo nihichʼįʼ bádahidoochįįł da; háálá áko shooh nihił daʼahidoogą́ąłgo tʼáá íídą́ą́ʼ yichʼįʼ hashtʼeʼadadiilnééh; áádóó áko shooh ałdóʼ nihí éí tʼáá díkwíhí daniiltʼé.

20 Áádóó áko shooh, bí éí ląʼígo nihichʼįʼ deínééh; áádóó áko aláahdii naatʼáanii doo nihichʼįʼ baa daháchįʼ íílééhgóó nihí éí dadíníiʼnééł.

21 Háálá daʼ Abinadi bizaadísh bohoolyaa, éí nihikʼijįʼ áhodooníiłgo yee haadzííʼ—áádóó díí tʼáá átʼé Diyin Bóhólníihii bizaad doo deisinííltsʼą́ʼígíí biniinaa, dóó doo bąąhági átʼéii bitsʼá niikááhgóó?

22 Áádóó kʼad aláahdi naatʼáanii áhodéeszéeʼgo ádadiilnííł, áádóó nihí bił ahadaʼdeetʼánée bidaʼdiilnííł; háálá ąąh shiijééʼjígo nihá yáʼátʼtééh áko náásgóó dahiniiʼnáa dooleeł, éí bąą, ndaʼíhiiltseedígíí nahjįʼ kódadiilnííł.

23 Áádóó kʼad Limhi éí aláahdi naatʼáanii tʼáá ałtso bizhéʼé bídadéétʼiʼígíí yee yił hoolneʼ, áádóó priest danilínígíí diné doo kééhatʼínígóó adahineezchą́ą́ʼ yę́ę, dóó bitsiʼké deineezʼį́į́ʼ yę́ę yee hakʼídahazʼah.

24 Áádóó baa hoolzhiizh aláahdi naatʼáanii hodineʼé yichʼįʼ bá hóózhǫ́ǫ́d; dóó ábiłní: Tįʼ shidineʼé bił áhiidiikah, bee naʼabaahí tʼáágééd; áádóó bee ahaʼdeetʼaah bee tʼáá aaníí ádíshní shidineʼé doo nidineʼé nideidoołtsxił da.

25 Áádóó baa hoolzhiizh aláahdi naatʼáanii yikééʼ dah diikai, dóó bee naʼabaahí tʼáágééd Laman dineʼé yaa yíkai. Áádóó baa hoolzhiizh Laman dineʼé yaa yíkai; áádóó Laman dineʼé aláahdi binaatʼáanii bichʼįʼ yaa kódzaa, dóó Limhi bidineʼé yá náʼooskan.

26 Áádóó Laman dineʼé éí Limhi bidineʼé deiyiiłtsą́ągo, dóó bee naʼabaahí tʼáágééd, yaa aʼááh daniizį́į́ʼ dóó yichʼįʼ bił dahóózhǫǫd, áádóó biʼaláahdii naatʼáanii tʼáá bí bikéyahdi áhodiilzéeʼgo yił nátʼą́ą́ʼ nákai.