1 Áádóó baa hoolzhiizh aláahdi naatʼáanii bisiláó nákáí, Diyin Bóhólníihii bidineʼé chʼééh hadeineeztą́ą́ʼ.

2 Áádóó kʼad shooh, aláahdi naatʼáanii bisiláó áłchʼį́į́diyeeʼ, tʼáádíkwíhí ályaago, áádóó diné yidziihígíí éí ałtsʼákai.

3 Áádóó hózhǫ́ áłchʼį́dígíí aláahdi naatʼáanii yikʼijįʼ hadahazííʼ daazlį́į́ʼ, áádóó bitahgóó yéego saad ałchʼįʼ adeiyínííł daazlį́į́ʼ.

4 Áádóó kʼad łaʼ diné bitahdóó Gideon wolyé, éí diné bitsxeʼ dóó aláahdi naatʼáanii yitsʼą́ą́jí nilį́, áko bibéésh hał hayíítʼą́, áádóó báháchįʼgo aláahdi naatʼáanii diyeeshééł níigo yee nahoníʼą́.

5 Áádóó baa hoolzhiizh aláahdi naatʼáanii yił ahoogą́ą́ʼ; áádóó aláahdi naatʼáanii bikʼeh hodidleehgo yaa ákoniizį́į́go, dah diilwod dóó diyin bighan bitsį́įgi yaʼdiitłʼin yikááʼ haaswod.

6 Áádóó Gideon aláahdi naatʼáanii yidiyoołhéełgo yikééʼ nídiilwod áádóó kʼadę́ę yaʼditłʼin yikááʼ haalyeedgo, aláahdi naatʼáanii kéyah Shemlonjigo deiʼį́į́ʼ, ńtʼę́ę́ʼ áko shooh, Laman dineʼé bisiláo kéyah yiiyiʼ dah yikah lá.

7 Áádóó kʼad aláahdi naatʼáanii biiʼ sizíinii tsʼídá yéego tiʼhooníihgo hadoolghaazh, kóníigo: Gideon, shiyóółhééł lágo, háálá áádę́ę́ʼ Laman dineʼé nihikʼijįʼ yíkah, dóó ndanihidoołtsxił; aooʼ, shidineʼé nideidoołtsxił.

8 Áádóó kʼad aláahdi naatʼáanii éí bidineʼé doo ayóó yąąh bíniʼ da ndi tʼáábí beʼiinaʼ tʼéiyá yaa nitsékees; ákótʼée ndi, Gideon tʼáadoo biisxį́į da.

9 Áádóó aláahdi naatʼáanii éí bidineʼé Laman dineʼé bitsʼą́ą́ʼjįʼ dahdadínoohchééh yidííniid, áádóó tʼáá bí ałdóʼ álą́ą́ʼjįʼ dah díníichą́ą́ʼ, diné doo kééhatʼínígóó, bizáanii dóó baʼáłchíní yił dahdiijééʼ.

10 Áádóó baa hoolzhiizh Laman dineʼé dah dabidíníiłchą́ą́ʼ, dóó yíníjééʼ, áádóó ndabidiʼniiłtseed.

11 Kʼad baa hoolzhiizh aláahdi naatʼáanii hastóí bichʼooní dóó baʼáłchíní bíniʼ tʼáá ákǫ́ǫgo bitsʼą́ą́ʼ dahdoohjeeh, dóó Laman dineʼé bilą́ą́jįʼ adadínóohchééł yidííniid.

12 Ákondi ląʼí da tʼáadoo dadínéezhchą́ą́ʼ da, ndi tʼáá ákǫ́ǫ́ bił honiidlǫ́ dóó bił dadíniiʼnééł dadííniid. Áádóó łahjįʼígíí éiyá bichʼooní dóó baʼáłchíní tʼáá ákǫ́ǫgo yikʼi dahineezhchą́ą́ʼ.

13 Áádóó baa hoolzhiizh tʼáá kǫ́ǫ́ bichʼooní dóó baʼáłchíní yił naakaiʼígíí bitsiʼké danizhónígi yidááh deizįʼ dóó Laman dineʼé yichʼįʼ ndaʼookąąhgo adeilyiilaa áko doo ndabidoołtsił da biniyé.

14 Áádóó baa hoolzhiizh Laman dineʼé baa aʼááh daniizį́į́ʼ, háálá bizáanii danizhónígíí yídanéésdlįįd.

15 Éí bąą Laman dineʼé beʼiinaʼ yaa dajoozbaʼ, áádóó dabisnah dóó kéyah Nephigóó adeiyiizhjaaʼ, áádóó kéyah daa bí dooleełgo yaa deiyiiznil, aláahdi naatʼáanii Noah Laman dineʼé yaa deidoołtʼeełgo tʼéiyá yee nidahazʼą́, áádóó binaadeełii yaa deiyiizhjaaʼ, bee dahólónígíí tʼáá átʼé ałnííʼdóó, bibéésh óola, dóó bibéésh łigaii, dóó tʼáá áłtso daʼílíinii ałnííʼdóó, Laman dineʼé aláahdii binaatʼáanii yichʼįʼ nidaʼiilée doo tʼáá anahahai bikʼeh.

16 Áádóó kʼad aláahdii naatʼáanii biyeʼké łaʼ atah biʼdisnah, éí Limhi wolyé.

17 Áádóó kʼad Limhi bizhéʼé doo diyoolyééł da nízin; ákótʼée ndi, Limhi bizhéʼé bibąąhági átʼéii yaa naayáhígíí bił bééhózin, bí éí diné tʼáá ákogi átʼéii nilį́.

18 Áádóó baa hoolzhiizh Gideon hastóí diné doo kééhatʼíní góneʼ ndanitʼingo ayiisʼaʼ, aláahdi naatʼáanii dóó yił naaldééhyę́ę hadeinitah. Áádóó baa hoolzhiizh diné doo kééhatʼíní góneʼ eekaiyę́ę yikʼékai, tʼáá átʼé yíkʼékai tʼáá hazhóʼó aláahdi naatʼáanii dóó priest danilínígíí éí doo yikʼíkai da.

19 Áádóó kʼad bijéí biyiʼdi kéyah Nephigóó nídiikah daaníigo nidahazʼą́, bichʼooní dóó baʼáłchíní nidaaztseedgo, áádóó ałdóʼ bił nidaaldeehii, áko nátʼą́ą́ʼ yikʼijįʼ ndadoodlééł, dóó ałdóʼ yił dínóonééł.

20 Áádóó aláahdi naatʼáanii doo nátʼą́ą́ʼ nidookah da yidííniid; áádóó aláahdi naatʼáanii yichʼįʼ bádahóóchįįd, dóó tiʼhwiidoonih dadííniid, azhą́ kǫʼ bee biʼdiyoolyééł ndi.

21 Áádóó ałdóʼ kʼádę́ę priest danilínígíí yił dadideełgo nideidoołtsxił ńtʼę́ę́ʼ, dóó baa diijééʼ.

22 Áádóó baa hoolzhiizh kéyah Nephigóó dah nídiikááh ńtʼę́ę́ʼ, Gideon bahastóí yee yíkai. Áádóó Gideon bahastóí bichʼooní dóó baʼáłchíní tʼáá ałtso ádaadzaaígíí yee yił hoolneʼ; áádóó Laman dineʼé kéyah yikááʼ kéédahatʼį́į dooleełgo yá ádeiyiilaa áko Laman dineʼé tʼáá átʼé bee dahólónígíí ałnííʼdóó yichʼįʼ nideiyiilé.

23 Áádóó diné aláahdi naatʼáanii deiyiisxį́įgo Gideon bahastóí yee yił dahoolneʼ, áádóó bipriest danilínígíí diné doo kééhatʼíní góneʼ tʼóó yiwoh yiyiʼ hatsʼą́ą́ʼ dahdiijééʼ.

24 Áádóó baa hoolzhiizh ałtso óʼoolʼįįł ádayiilaago, kéyah Nephijįʼ, bił dahózhǫ́ǫgo nákai, háálá bichʼóoní dóó baʼáłchíní tʼáadoo nidaaztseed da; dóó aláahdi naatʼáanii haa deiyiilaaígíí Gideon yee yił dahoolneʼ.

25 Áádóó baa hoolzhiizh Laman dineʼé aláahdi binaatʼáanii bił ahaʼdeetʼą́, bidineʼé doo ndadootsxił da.

26 Áádóó ałdóʼ Limhi aláahdi naatʼáanii yiyéʼ nilį́įgo, bee bóhólníihgo hazʼą́ éí diné yee yikʼi dadiilniiʼ, Laman dineʼé biʼaláahdi naatʼáanii yił ahadaʼdeestʼą́ áko bidineʼé yichʼįʼ ndaʼiilée doo, tʼáá átʼé bee dahólónígíí ałnííʼdóó.

27 Áádóó baa hoolzhiizh Limhi bee bóhólníihgo hazʼą́ąnigi kin haalʼáágóó hashtʼeyiilaa dóó diné bitahgóó hodéezyéelgo áyiilaa.

28 Áádóó Laman dineʼé biʼaláahdi naatʼáanii aa ádahályáanii kéyah dabinaagóó hólǫ́ǫgo áyiilaa, áko Limhi bidineʼé kéya tʼáá yiyiʼ kéédahatʼį́į doogo áyiilaa, áko doo kééhojitʼíní góneʼ ahidookah da, áádóó baa ádahalyánígíí Nephi dineʼé bichʼįʼ nideiyiiléehígíí yee yaa áhályą́.

29 Áádóó kʼad aláahdi naatʼáanii Limhi bee bóhólnííh hazʼą́ą́ góneʼ kʼé nahoodleełgo naaki nááhai, áko Laman dineʼé éí doo baa nídaatʼį́į da éí doodaiiʼ nidabidoołtsxiłgo doo yíká ádaatʼį́į da.