Kapítulo 25
Na e Segunda Binida, esnan orguyoso i malbado lo wòrdu kimá manera yerba seku—Elías lo regresá promé ku e dia grandi i teribel ei—Kompará ku Malakías 4. Aproksimadamente 34 dK.
1 Pasobra mira, e dia ei ta yega ku lo ta manera un fòrnu ta kima; i tur e orguyosonan, sí, i tur esnan ku ta hasi maldat, lo ta yerba seku; i e dia ei ku ta bini lo kima nan, e Señor di Ehérsitonan ta bisa, ku lo laga nan sin rais ni taki.
2 Pero na boso ku ta teme mi nòmber, e Yu di Rektitut lo lanta ku sanashon den su alanan; i boso lo sali i krese manera bisé den e stal.
3 I boso lo trapa e malbadonan; pasobra nan lo ta shinishi bou di e planta di boso pia riba e dia ku ami lo hasi esaki, e Señor di Ehérsitonan ta bisa.
4 Boso kòrda e lei di Moises, mi siervo, kual mi a dekretá na dje na Horeb pa henter Israel, ku e statuto i huisionan.
5 Mira, lo mi manda pa boso Elías e profeta promé ku e binida di e dia grandi i teribel di Señor;
6 I e lo bira e kurason di e tatanan na e yunan, i e kurason di e yunan na e tatanan, pa mi no bini i heridá e tera ku un maldishon.