1 Di bèrdat, di bèrdat, mi ta bisa ku ami lo kièr pa boso duna limosna na e pobernan; pero tene kuido pa boso no duna boso limosna dilanti hende pa wòrdu mirá dor di nan; di otro manera boso no tin rekompensa di boso Tata ku ta den shelu.

2 Pues, ora ku boso duna boso limosna no zona e tròmpèt dilanti di boso, manera e hipókritanan ta hasi den e sinagoganan i den e kayanan, pa nan por tin gloria di hende. Di bèrdat mi ta bisa na boso, nan tin nan rekompensa.

3 Pero ora ku boso duna na esnan den nesesidat no laga bo man robes sa kiko bo man drechi ta hasi;

4 Ku boso limosna por ta den sekreto; i boso Tata ku ta wak den sekreto, e mes lo rekompensá boso den públiko.

5 I ora boso ta hasi orashon boso lo no hasié manera e hipókritanan, pasobra nan ta gusta hasi orashon pará den e sinagoganan i den e skinanan di e kayanan, pa nan por wòrdu mirá dor di hende. Di bèrdat mi ta bisa na boso, nan tin nan rekompensa.

6 Pero abo, ora bo hasi orashon, drenta den bo kamber mas aden, i ora bo sera bo porta, hasi orashon na bo Tata ku ta den sekreto; i bo Tata, ku ta wak den sekreto, lo rekompensá bo den públiko.

7 Pero ora bo hasi orashon, no usa ripitishonnan bano, manera e pagánonan, pasobra nan ta pensa ku nan lo wòrdu skuchá pa motibu di nan hopi palabra.

8 No ta manera nan, pasobra bo Tata sa kiko ta e kosnan ku bo mester promé ku bo pidié.

9 Pues hasi orashon di e manera aki: Nos Tata ku ta den shelu, santifiká ta bo nòmber.

10 Bo boluntat wòrdu kumplí na tera manera e ta den shelu.

11 I pordoná nos nos debenan, manera nos ta pordoná nos debedónan.

12 I no laga nos kai den tentashon, ma libra nos di malu.

13 Pasobra di bo e reino ta, i e poder, i e gloria, pa semper. Amèn.

14 Pasobra, si bo pordoná hende nan ofensanan bo Tata selestial lo pordoná bo tambe;

15 Pero si bo no pordoná hende nan ofensanan bo Tata tampoko lo no pordoná bo ofensanan.

16 Ademas, ora bo ayuná no ta manera e hipókritanan, di kara tristu, pasobra nan ta disfigurá nan kara pa nan mustra na hende ku nan ta ayunando. Di bèrdat mi ta bisa n’abo, nan tin nan rekompensa.

17 Pero abo, ora bo ta ayuná, ungi bo kabes, i laba bo kara.

18 Pa bo no mustra ku bo ta ayuná, pero na bo Tata, ku ta den sekreto; i bo Tata, ku ta mira den sekreto, lo rekompensá bo den públiko.

19 No akumulá pa boso mes tesoronan riba tera, kaminda mòt i frus ta kome nan, i ladronnan ta kibra i hòrta;

20 Pero akumulá pa boso mes tesoronan den shelu, kaminda ni e mòt ni e frus ta kome nan, i kaminda ladronnan no ta kibra ni hòrta.

21 Pasobra kaminda boso tesoro ta, einan boso kurason tambe lo ta.

22 E lus di e kurpa ta e wowo; pues, si bo wowo ta puru, henter bo kurpa lo ta yen di lus.

23 Pero si bo wowo ta maligno, henter bo kurpa lo ta yen di skuridat. Pues, si e lus ku ta den bo ta skur, kon grandi e skuridat ei ta!

24 Ningun hende por sirbi dos shon; pasobra òf e lo odia esun i stima e otro, òf e lo tene na esun i despresiá e otro. Bo no por sirbi Dios i Mamòn.

25 I awor a sosodé ku ora Hesus a papia e palabranan aki el a wak na e diesdosnan kende el a skohe, i bisa na nan: Kòrda e palabranan kual mi a papia. Pasobra mira, boso ta esnan kende mi a skohe pa ministrá na e pueblo aki. Pues mi ta bisa na boso, no preokupá pa boso bida, kiko boso lo kome, òf kiko boso lo bebe; ni tampoko pa boso kurpa, kiko boso lo bisti. E bida no ta mas ku e karni, i e kurpa mas ku e bistí?

26 Mira e paranan di shelu, pasobra nan no ta planta, tampoko nan ta kosechá ni rekohé den nan mangasina; tòg bo Tata selestial ta alimentá nan. Boso no ta muchu mas mihó ku nan?

27 Ken di boso dor di preokupá por agregá un kubit na su altura?

28 I dikon boso ta preokupá pa bisti? Konsiderá e lelinan kon nan ta krese, nan no ta obra ni traha hilu;

29 I sinembargo mi ta bisa na boso, ku asta Salomon, den tur su gloria, no tabata bistí manera un di esnan aki.

30 Pues, si Dios ta bisti e yerba di kampo asina, kual awe ta, i mañan ta bentá den e fòrnu, asta asina e lo bisti boso, si boso no ta di poko fe.

31 Pues no preokupá, bisando, Kiko nos lo kome? òf, Kiko nos lo bebe? òf, Ku kiko nos lo bisti?

32 Pasobra boso Tata Selestial sa ku boso tin nesesidat di tur e kosnan aki.

33 Pero buska promé e reino di Dios i su rektitut, i tur e kosnan aki lo wòrdu añadí na boso.

34 Pues no preokupá pa e dia di mañan, pasobra e dia di mañan lo sòru pa su mes. Kada dia tin sufisiente maldat di su mes.