1 I awor, mira, mi ta bisa na boso, ku boso mester skrudiñá e kosnan aki. Sí, un mandamentu mi ta duna na boso pa boso skrudiñá e kosnan aki diligentemente; pasobra grandi ta e palabranan di Isaías.

2 Pues di bèrdat el a papia konserniente tur e kosnan tokante mi pueblo kual ta di e kas di Israel; pues e ta nesesario pa e papia tambe na e gentilnan.

3 I tur kos ku el a papia a kumpli i lo wòrdu kumplí, asta di akuerdo ku e palabranan kual el a papia.

4 Duna oido na mi palabranan; skirbi e kosnan kual mi a bisa boso; i segun e tempu i e boluntat di e Tata nan lo bai na e gentilnan.

5 I kualke ku lo skucha na mi palabranan i arepentí i batisá, e lo wòrdu salbá. Skrudiñá e palabranan di e profetanan, pasobra hopi ta esnan ku ta testifiká di e kosnan aki.

6 I awor a sosodé ku ora Hesus a bisa e palabranan aki el a bisa na nan atrobe, despues ku el a splika tur e Skrituranan na nan kual nan a risibí, el a bisa na nan: Mira, otro Skrituranan lo mi kièr pa boso skirbi, ku boso no tin.

7 I a sosodé ku el a bisa na Nefi: Trese e registro kual boso a hiba.

8 I ora Nefi a trese e registronan, i pone nan dilanti di dje, el a fiha su bista riba nan i bisa:

9 Di bèrdat mi ta bisa na boso, mi a manda mi siervo Samuel, e lamanita, pa e testifiká na e pueblo aki, ku riba e dia ku e Tata lo glorifiká su nòmber den mi ku tabatin hopi santu ku lo lanta for di e morto, i lo aparesé na hopi, i lo ministrá na nan. I el a bisa na nan: E no tabata asina?

10 I su disipelnan a kontest’é i bisa: Sí, Señor, Samuel a profetisá di akuerdo ku bo palabranan, i nan tur a wòrdu kumplí.

11 I Hesus a bisa na nan: Kon por ta ku boso no a skirbi esaki, ku hopi santu a lanta i aparesé na hopi i a ministrá na nan?

12 I a sosodé ku Nefi a kòrda ku esaki no a wòrdu skirbí.

13 I a sosodé ku Hesus a manda pa e wòrdu skirbí; pues el a wòrdu skirbí di segun e manera ku el a manda.

14 I awor a sosodé ku ora Hesus a splika tur e Skrituranan den unu, kual nan a skirbi, el a manda nan pa nan siña e kosnan kual el a splika na nan.