Paltiing
Ti paltiing ket pannakisarita ti Dios kadagiti annakna. Umay daytoy a pannarabay babaen dagiti nadumaduma a wagas ti pannakisarita a maibatay kadagiti kasapulan ken kasasaad dagiti indibidual, pamilia ken ti intero a Simbaan.
No ipalgak ti Apo ti pagayatanna iti Simbaan, agsao babaen ti propetana. Aglaon dagiti nasantuan a kasuratan iti adu a kasta a paltiing—ti balikas ti Apo babaen dagiti propeta idi un-unana ken iti ud-udina nga aldaw. Iti agdama itultuloy nga iwanwan ti Apo ti Simbaanna babaen ti panangipalgakna iti pagayatanna kadagiti napili a katulonganna.
Saan laeng a dagiti propeta ti tattao a mabalin nga umawat iti paltiing. Maibatay iti kinapudnom, mabalinmo ti umawat iti paltiing a mangtulong kenka kadagiti naipangpangruna a kasapulam, pagrebbengam, ken saludsodmo ken mangtulong kenka a mangpapigsa iti pammaneknekmo.
Panagsagana nga Umawat iti Paltiing babaen ti Espiritu Santo
Ibaga dagiti nasantuan a kasuratan ti maipapan iti nadumaduma a kita ti paltiing, kas kadagiti parmata, tagainep, ken isasarungkar dagiti anghel. Babaen dagiti kasta a wagas, insubli ti Apo ti ebangheliona kadagiti ud-udina nga aldaw ken impalgakna dagiti kinapudno maipanggep kadagiti kasta a doktrina kas iti biag sakbay ti pannakaitao, ti pannakasubbot dagiti natay, ken ti tallo a pagarian ti gloria. Nupay kasta, dumteng ti kaaduan a paltiing kadagiti lider ken miembro ti Simbaan babaen dagiti arasaas ti Espiritu Santo.
Dagiti naulimek a naespirituan a pannignay ket mabalin a kasla nakaskasdaaw kas kadagiti parmata wenno isasarungkar ti anghel, ngem nabilbileg ken napapautda ken ad-adda a pagbalbaliwenna ti biag. Ti saksi ti Espiritu Santo ti makaawis rikna iti kararua a napatpateg pay ngem iti ania man a banag a makita ken mangngegam. Babaen dagiti kasta a paltiing, awatemto ti napaut a pigsa nga agtalinaed a pudno iti ebanghelio ken tulongam dagiti dadduma a mangaramid met iti kasta.
Tulongannakanto ti sumaganad a balakad nga agsagana nga umawat kadagiti pannignay manipud iti Espiritu Santo:
Agkararag para iti pannarabay.
Kinuna ti Mangisalakan, “Agdawatkayo, ket maikkankayto; agsapulkayo ket makasarakkayto; umawagkayo ket mailukatankayto: ta ti siasino man nga agdawat umawat; ket ti agsapul makasarak; ket ti umawag mailuktanto” (Mateo 7:7–8). Tapno masarakan ken maawat, nasken nga agsapul ken agdawatka. No saanka nga umawag—agkarkararag iti Nailangitan nga Amam para iti pannarabay—saanto a malukatan ti ridaw ti paltiing kenka. Ngem no umasidegka iti Amam iti napakumbaba a kararag, iti kamaudianan “umawatkayo iti paltiing iti kada paltiing, pagsiriban iti kada pagsiriban, tapno maammuanyo dagiti datdatlag ken makapatalingenngen a banag—a mangyeg iti ragsak, a mangyeg iti agnanayon a biag” (DkK 42:61).
Agbalin a managraem.
Ti panagraem ket nalaus a panagdayaw ken panagayat. No managraem ken naulimekka, mangawiska iti paltiing. Uray no nariribuk ti amin a banag iti aglawlawmo, mabalinmo ti maaddaan iti managraem nga ugali ken makapagsagana nga umawat iti pannarabay manipud iti Apo.
Agbalin a napakumbaba.
Ti panagpakumbaba ket asideg a mainaig iti panagraem. No napakumbabaka, bigbigem ti panagpannuraymo iti Apo. Insuro ni propeta Mormon, “Gapu iti kinadayaw ken kinapakumbaba ti puso umasideg ti Espiritu Santo, a penken ti Mangliwliwa iti namnama ken naan-anay nga ayat” (Moroni 8:26).
Agtungpal kadagiti bilin.
No agtungpalka kadagiti bilin, agsaganaka nga umawat, mangbigbig, ken mangsurot kadagiti pannignay ti Espiritu Santo. Inkari ti Apo, “Kenkuana a mangtungtungpal kadagiti bilinko ti pangtedak kadagiti kinadatdatlag ti pagariak, ken isu met laeng ti yan ti bubon ti nabiag a danum, nga agburayok iti agnanayon a biag” (DkK 63:23).
Maikari a makiranud iti sakramento.
Isuro dagiti kararag ti sakramento no kasano nga awaten ti kanayon a panangkadkadua ti Nasantuan nga Espiritu. No makiranudka iti sakramento, paneknekam iti Dios a natallugodka nga awatem iti bagim ti nagan ti Anakna ken kanayonto a laglagipem Isuna ken tungpalem dagiti bilinna. Ikari ti Nailangitan nga Ama a no tungpalem dagitoy a katulagan, addanto a kanayon kenka ti Espiritu. (Kitaen iti DkK 20:77, 79.)
Agadal kadagiti nasantuan a kasuratan iti inaldaw.
Kabayatan ti sipapasnek a panagadalmo kadagiti nasantuan a kasuratan, makasursuroka manipud kadagiti pagwadan dagiti lallaki ken babbai a ti biagda ket naparaburan bayat ti panangsurotda iti naipalgak a pagayatan ti Apo. Agbalinka pay nga ad-adda a managawat iti Espiritu Santo iti bukodmo a biag. Kabayatan ti panagbasam ken panagutobmo, mabalinmo nga awaten ti paltiing maipapan iti no kasano a mayaplikar kenka ti maysa a masinunuo a binatog ti nasantuan a kasuratan wenno maipapan iti ania man a banag a tarigagayan ti Apo a pannakisarita kenka. Gapu ta makatulong kenka nga umawat iti bukod a paltiing ti panagbasa iti nasantuan a kasuratan, nasken nga agadalka kadagiti nasantuan a kasuratan iti inaldaw.
Maaddaan iti panawen nga agutob.
No addaanka iti panawen nga agutob kadagiti kinapudno ti ebanghelio, luktam ti panunot ken pusom iti pangtarabay nga impluwensia ti Espiritu Santo (kitaen iti 1 Nephi 11:1; DkK 76:19; 138:1–11). Ti panagutob ti mangyadayo kadagiti panunotmo manipud kadagiti awan kaes-eskanna a banag ti lubong ket ad-adda pay a mangyasideg kenka iti Espiritu.
No agkalikagumka iti naipangpangruna a pannarabay, adalem ti banag iti panunotmo.
No dadduma umay laeng ti pannakisarita ti Apo kalpasan a naadalmon ti banag iti bukodmo a panunot. Inlawlawag ti Apo daytoy a proseso ken ni Oliver Cowdery, a nagserbi a para surat ni Joseph Smith iti kaaduan a patarus ti Libro ni Mormon. Babaen ken ni Propeta Joseph Smith, kinasao ti Apo ni Oliver Cowdery, nga inlawlawag no apay a saan a kabaelan ni Oliver nga ipatarus ti Libro ni Mormon uray no naikkan isuna iti sagut nga agipatarus: “Adtoy, dimo naawatan; impapanmo nga intedko kenka, idi dimo pinanunot malaksid ti agsaludsod kaniak. ”’Ngem, adtoy, kunak kenka, a nasken nga adalem iti panunotmo; kalpasanna damagem kaniak no pudno, ket no pudno ipariknakto ti ibabara ti barukongmo; ngarud mariknam a pudno” DkK 9:7–8).
Siaanus a sapulen ti pagayatan ti Dios.
Ipalgak ti Dios ti Bagina “iti naituding a panawenna, iti bukodna a wagas, ken maibatay iti pagayatanna” (kitaen iti DkK 88:63–68). Nalabit nga umayto kenka ti paltiing “nga ibinsabinsa, bilin iti bilin, sangkabassit ditoy ken sangkabassit idiay” (2 Nephi 28:30; kitaen met iti Isaias 28:10; DkK 98:12). Saanmo a padasen a piliten dagiti naespirituan a banag. Saan nga umay ti paltiing iti kasta a wagas. Aganus ken agtalekka iti panawen ti Apo.
Panangbigbig kadagiti Pannignay ti Espiritu Santo
Iti baet dagiti ariwawa ken mensahero iti lubong iti agdama, nasken a sursuruem ti mangbigbig kadagiti arasaas ti Espiritu Santo. Sumaganad ti sumagmamano kadagiti kangrunaan a wagas a pannakisao ti Espiritu Santo kadatayo:
Makisao iti panunot ken puso iti naalumamay, bassit a timek.
Insuro ti Apo: “Ibagak kenka iti panunotmo ken iti pusom, babaen ti Espiritu Santo, ti dumteng kenka ken agnaed iti pusom. Ita, adtoy, daytoy ti espiritu ti pammaltiing” (DkK 8:2–3). No dadduma tulongannakanto ti Espiritu Santo a mangipaawat iti kinapudno ti ebanghelio wenno mangted kenka iti pannignay a “[kasla] mangkumikom iti panunot[mo], ket ad-adda a sumekseksek iti rikna[m]” (DkK 128:1). Nupay mabalin a maaddaan ti kasta a paltiing iti nabileg a pangaring kenka, dumani kanayon nga umay daytoy a siuulimek, kas maysa a “naalumamay a bassit a timek” (kitaen met iti 1 Ar-ari 19:9–12; Helaman 5:30; DkK 85:6).
Tignayennatayo babaen kadagiti riknatayo.
Nupay masansan nga iladawantayo ti pannakisao manipud iti Espiritu a kas maysa a timek, dayta a timek ket maysa nga ad-adda a mariknatayo ngem iti mangngegantayo. Ket idinto nga agsaotayo maipapan iti “panangdengngeg” kadagiti arasaas ti Espiritu Santo, masansan nga iladawantayo ti naespirituan nga arasaas babaen ti panagkuna, “Adda riknak …” Ti balakad ti Apo ken ni Oliver Cowdery iti benneg 9 ti Doktrina ken Katulagan, a nailawlawag iti panid 100, ti mangisuro iti daytoy a kinapudno. Nupay kasta, masansan a di maawatan daytoy a balakad. Apaman a nabasada dayta a binatog, natikaw ti sumagmamano a miembro ti Simbaan, a nagamak a saanda a pulos naawat ti pannignay manipud iti Espiritu Santo gapu ta saanda a pulos narikna ti ibabara ti barukongda. Kitaen dagiti maudi a balikas ti Apo iti Doktrina ken Katulagan 9:8: “Ngarud, mariknam a pudno.” Ti ibabara a nailadawan iti daytoy a binatog ti nasantuan a kasuratan ket mangipapan iti maysa a rikna ti liwliwa ken kinatalinaay, saan a kasapulan ti panangrikna iti pudot. Bayat ti panangituloymo nga agsapul ken sumurot iti pagayatan ti Apo iti biagmo, mabigbigmonto no kasano nga aringannaka ti Espiritu Santo a bukodmo.
Mangisangbay daytoy iti talna.
Masansan a maawagan ti Espiritu Santo iti Mangliwliwa (kitaen iti Juan 14:26; DkK 39:6). No ipalgakna ti pagayatan ti Apo kenka, Isu “ibaga[nanto] ti kappia iti panunotmo” (DkK 6:23). Ti kappia nga itedna ket saan a matulad dagiti nailubongan nga impluwensia wenno palso a pannursuro. Daytoy ti kappia wenno talna nga inkari ti Mangisalakan idi impanamnamana kadagiti disipulona nga ibaonnanto ti Mangliwliwa: “Ti talna ibatik kadakayo, ti talna itdek kadakayo: saan a kas iti panangited ti lubong ti panangitedko kadakayo. Saan koma nga agpulkok ti pusoyo, ken di agbuteng” (Juan 14:27).