Sabbath
Ti Sabbath ket ti aldaw ti Apo, a nailatang iti tunggal lawas para iti panaginana ken panagrukbab. Kadagiti panawen ti Daan a Tulag, nginilin dagiti naitulag a tattao ti Dios ti Sabbath iti maikapito nga aldaw ti lawas gapu ta naginana ti Dios iti maikapito nga aldaw idi pinarsuanati daga. Inyunay-unay ti Apo ti kinapateg ti panangngilin iti Sabbath iti Sangapulo a Bilin:
“Laglagipem ti aldaw a panaginana, tapno santificarem.
“Kadagiti innem nga aldaw agtrabahokanto, ket aramidem amin nga aramidmo:
“Ngem ti maikapito nga aldaw isu ti maysa a panaginana ken ni Jehova a Diosmo: iti dayta nga aldaw dika agtrabaho iti uray ania, sika wenno ti anakmo a lalaki, wenno ti anakmo a babai, wenno ti adipenmo a lalaki, wenno ti adipenmo a babai, wenno dagiti animalmo, wenno ti ganggannaetmo nga adda iti uneg dagiti ruanganmo:
“Ta kadagiti innem nga aldaw ni Jehova inaramidna ti langit ken ti daga, ti taaw, ken amin nga adda kadakuada, ket naginana iti maikapito nga aldaw: isu ti gapuna a ni Jehova binendisionanna ti aldaw a panaginana, ken sinantificarna” (Exodo 20:8–11).
Kalpasan ti Panagungar ni Jesucristo, a napasamak iti umuna nga aldaw ti lawas, nangrugi dagiti disipulo ti Apo iti panangngilinda iti Sabbath iti umuna nga aldaw ti lawas, Domingo (kitaen iti Dagiti Aramid 20:7).
Kadagiti ud-udina nga aldaw, binilinnatayo ti Apo a mangituloy iti panangngilin iti Sabbath. Inkarina a no agtungpaltayo iti daytoy a bilin, awatentayonto ti “pakabuklan ti daga” (kitaen iti DkK 59:16–20).
Gapu ta nasantuan nga aldaw ti Sabbath, nasken a mailatang daytoy para kadagiti maikari ken nasantuan nga aramiden. Saan nga umdas ti panangisardeng nga agtrabaho ken agaliwaksay. Kinapudnona, no agtalinaedtayo lattan nga awan ti ar-aramidentayo iti Sabbath, mapaaytayo a mangngilin a nasantuan iti aldaw. Iti maysa a paltiing a naited ken ni Joseph Smith idi 1831, imbilin ti Apo: “Tapno ad-adda a mapagtalinaedyo ti bagiyo nga awanan mulit iti lubong, mapankayo iti balay a pagkararagan ket mangidatonkayo iti sakramento iti nasantuan nga aldawko; ta pudno a daytoy ti aldaw a naituding a panaginanayo kadagiti trabahoyo, ken ti panagdaydayawyo iti Kangatuan” (DkK 59:9–10). Iti pannakitunos iti daytoy a paltiing, dumar-aytayo iti miting ti sakramento iti tunggal lawas. Mabalin nga iraman ti dadduma pay nga aramiden iti aldaw ti Sabbath ti panagkararag, panagutob, panagadal kadagiti nasantuan a kasuratan ken pannursuro dagiti propeta iti ud-udina nga aldaw, panangsurat kadagiti miembro ti pamilia ken gagayyem, panagbasa iti makaay-ayo a babasaen, isasarungkar kadagiti masakit ken agsagsagaba, ken idadar-ay kadagiti miting iti Simbaan.