Kinaemma
Ti kinaemma ket maysa nga ugali ti kinapakumbaba ken kinadisente iti panagkawes, panangurnos iti bagi, panagsasao, ken panagtignay. No naemmaka, saanka a mangyawis iti saan a maitutop iti bagim. Ngem ketdi, kalikagumam ti “pagdayawyo ti bagiyo iti Dios, [ken iti espirituyo]” (1 Taga Corinto 6:20; kitaen met iti 1 Taga Corinto 6:19).
No agduaduaka no disente met laeng ti kawes wenno urnos ti bagim, saludsodem ti bagim, “Komportableak ngata iti langak no addaak iti sidong ti Apo?” Mabalin a damagem iti bagim ti isu met la a saludsod maipapan iti panagsasaom ken panagtignaymo? “Isaok kadi dagitoy a balikas wenno makiramanak kadi kadagitoy nga aramid no adda ditoy ti Apo?” Dagiti napudno a sungbatmo kadagitoy a saludsod ket mabalin a mangiturong kenka nga agaramid kadagiti napateg a panagbalbaliw iti biagmo. Makatulongto kenka ti sumaganad nga impormasion kadagiti panagkagumaam nga agbalin a disente wenno naemma.
Panagkawes ken Urnos ti Bagi
Kanayon a balakadandatayo dagiti propeta nga agkawes a sididisente. Nabuangay daytoy a balakad iti kinapudno a ti bagi ti tao ket sagrado a parsua ti Dios. Dayawem ti bagim a kas maysa a sagut manipud iti Dios. Babaen ti panagkawesmo ken kalalangam, maipakitam iti Apo nga ammom no kasano ti kapateg ti bagim.
Ipeksa ti panagkawesmo no asinoka. Daytoy ti mangted iti mensahe maipapan kenka, ken daytoy ti mangimpluwensia iti wagas a panagtignaymo ken dagiti dadduma. No naurnos a nasayaat ti bagim ken disente ti panagkawesmo, maawismo ti panangkadkadua ti Espiritu ken makaimpluwensiaka iti nasayaat kadagiti adda iti aglawlawmo.
Kangrunaan iti bilin nga agbalin a naemma wenno disente ket ti pannakaawat iti sagrado a bileg ti panaganak, ti kabaelan a mangyeg kadagiti annak iti lubong. Nasken a maaramat laeng daytoy a bileg iti nagbaetan dagiti agassawa. Dagiti naalas ken panagkawes a manggargari iti seks, a pakairamanan ti nakiting unay a shorts ken palda, nakipet a bado, dagiti blusa a makita ti boksit, ket makaparugso kadagiti tarigagay ken aramid a manglabsing iti linteg ti Apo iti kinadalus ti dayaw.
Mainayon pay iti panangliklik iti naalas a panagkawes, nasken a liklikam dagiti aglablabes a panagkawes, panaglanglanga, ken estilo ti buok. Kanayon nga agbalin a naurnos ken nadalus, ken liklikan ti saan a naannad ken saan nga umisu a panagkawkawes, panagur-urnos, ken panagtigtignay. Saanmo a palaaden ti bagim iti panagpatato wenno panagpalussok iti nadumaduma a paset ti bagim. No maysaka a babai ket tarigagayam ti agpatebbeng iti lapayag, agusarka iti maysa a paris laeng ti nasayaat nga aritos.
Pagtalinaedem dagiti nangato a pagrukodan ti kinaemma ken kinadisente iti amin a gundaway. Saanmo nga ibaba dagiti pagrukodam tapno mangipabuya iti bagim ken tapno agkiddaw iti pananganamong dagiti dadduma. Pagtalinaeden dagiti pudno a disipulo ni Jesucristo ti pagrukodan ti Apo malaksid kadagiti agdama a moda wenno pammilit manipud kadagiti dadduma.
Panagsasao ken Panagtignay
Kas iti panagkawes ken panangurnos iti bagim, ti panagsasaom ken panagtignaymo ket mangipeksa iti kinataom. Dagiti balikas ken tignaymo ket mabalin nga addaan iti nauneg nga impluwensia kenka ken iti dadduma. Yebkasmo ti bagim babaen ti nasayaat, positibo, makaitag-ay a panagsasao ken panagtignay a makaisangbay iti ragsak kadagiti adda iti aglawlawmo. Dagiti panagkagumaam nga agbalin a naemma wenno disente iti sao ken aramid ket mangiturong iti dakdakkel a pannarabay ken liwliwa manipud iti Espiritu Santo.
Liklikam ti naalas a panagsasao ken ti gagangay, saan a naraem a panangusar iti nagan iti Apo a gagangay unayen iti lubong. Sarkedam ti ania man a pannulisog tapno makiramanka iti aglablabes wenno saan a maitutop a tignay. Ti saan a naraem a kadawyan ti kasta a panagsasao ken ugali ket mangdadael iti kabaelam nga umawat kadagiti naalumamay a pannignay ti Espiritu Santo.