Talna
Adu a tao ti mangipagarup a ti talna ket kaawan ti gubat. Ngem makariknatayo iti talna uray iti panawen ti gubat, ken mabalin nga awan ti talna kadatayo uray no awan ti mapaspasamak a gubat. Ti kaawan laeng ti riri ket saan nga umdas a mangisangbay iti talna iti puspusotayo. Sumangbay ti talna babaen ti ebanghelio—babaen ti Pannubbot ni Jesucristo, ti panagserbi ti Espiritu Santo, ken ti bukodtayo a kinalinteg, napudno a panagbabawi, ken napasnek a panagserbi.
Uray no nariribuk ti lubong iti aglawlawmo, maawatmo ti bendision ti akin-uneg a talna. Daytoy a bendision ket agtultuloyto kenka bayat ti panagtalinaedmo a napudno iti pammaneknekmo maipapan iti ebanghelio ken bayat ti pananglaglagipmo nga ay-ayaten ken bambantayandaka ti Nailangitan nga Ama ken ni Jesucristo.
Mainayon pay iti pannakariknam a mismo iti talna, makapagbalinka nga impluwensia ti talna iti pamiliam, iti komunidadmo, ken iti lubong. Agtrabahoka para iti talna no agtungpalka kadagiti bilin, mangted iti serbisio, ipateg dagiti miembro ti pamilia ken kaarruba, ken ibinglay ti ebanghelio. Agtrabahoka para iti talna no tumulongka a mangpagin-awa iti panagsagaba ti sabali.
Dagiti sumaganad a balikas ti Mangisalakan ket mangisuro kadatayo no kasano a mapasarantayo ti talna nga isangbay ti ebanghelio:
“Ti Mangliwliwa, ti Espiritu Santo, nga ibaonto ni Ama iti naganko, isu isuronanto kadakayo dagiti amin a banag, ket ipalagipnanto kadakayo dagiti isu amin nga imbagak kadakayo.
“Ti talna ibatik kadakayo, ti talnak itdek kadakayo: saan a kas iti panangited ti lubong, ti panangitedko kadakayo. Saan koma nga agpulkok ti pusoyo, ken di agbuteng.” (Juan 14:26–27).
“Dikayo agbuteng nga agaramid iti nasayaat, annakko, ta ania man nga imulayo, kastanto met ti apitenyo; ngarud no agmulakayo iti nasayaat agapitkayonto met iti nasayaat a gunggona.
“Ngarud dikayo agbuteng, bassit a pangen; agaramidkayo iti nasayaat; bay-anyo nga agtipon ti daga ken ti impierno a mangbusor kadakayo; ta no nabangonkayo iti batok, saanda nga agballigi.
“Adtoy, saankayo a kedngan; mapankayon ket saankayon nga agbasol pay; aramidenyo a sipaparbeng ti aramid nga imbilinko kadakayo.
“Kitaendak iti tunggal panunot; saankayo nga agduadua, saankayo nga agbuteng.
“Imutektekanyo dagiti sugat a naipalay iti bakrangko, ken kasta met ti nagnaan dagiti lansa kadagiti dakulap ken dapanko; agbalinkayo a napudno, tungpalenyo dagiti bilinko, ket tawidenyonto ti pagarian ti langit” (DkK 6:33–37).
“Dagitoy insaok idi kadakayo, tapno adda koma talnayo kaniak. Ditoy lubong addanto rigatyo: ngem mananginanamakayo; siak pinarmekko ti lubong” (Juan 16:33).
No laglagipem ti Mangisalakan ken sumurotka Kenkuana, sipupudno a makainanamaka. Makapadaska iti pudno, manayon a talna iti amin a panawen. Makasarakka iti namnama kadagiti umuna a balikas ti Mangisalakan kadagiti disipulona kalpasan ti Panagungarna: “Talna koma kadakayo” (Juan 20:19).