Panangngaasi
Ti asi ket “ti nadalus nga ayat ni Cristo,” wenno “agnanayon nga ayat” (Moroni 7:47; 8:17). Insuro ni propeta Mormon: “Naandur ti asi, ken naanus, ken saan a naapal, ken saan a managpannakkel, saanna a sapulen ti bukodna, saan a nalaka a makapungtot, saan nga agpanunot iti dakes, ken saan nga agragsak iti kinadakes ngem agragsak iti pudno, baklayenna amin a banag, mangnamnama iti amin a banag, ibturanna ti amin a banag” (Moroni 7:45; kitaen met iti 1 Taga Corinto 13:4–7).
Ni Jesucristo ti naan-anay a pagwadan ti asi. Iti panagministrona iti daga, kanayon a “napan nagar-aramid iti kinaimbag,” nangisursuro iti ebanghelio ken nangipakpakita iti nadungngo a pannakipagrikna kadagiti napanglaw, adda an-anayenna, ken agladladingit (kitaen iti Mateo 4:23; Marcos 6:6; Dagiti Aramid 10:38). Ti kangatuan a panangyebkas iti asi ket ti awan inggana a Pannubbotna. Kinunana, “Awan ti addaan iti dakdakel nga ayat ngem daytoy, ti mangted ti biagna gapu kadagiti gagayyemna” (Juan 15:13). Daytoy ti kaindaklanan nga aramid ti naunday a panagitured, kinasayaat, ken kinamanangipaay a maammuantayonto. Addaan iti pannakaawat iti naandur nga ayat ti Mangisalakan, mausarmo ti pammatim ken makapagbabawika kadagiti basbasolmo, makapagtalekka a pakawanennakanto ken papigsaennakanto kadagiti panagkagumaanam nga agbiag iti ebanghelio.
Kayat ti Mangisalakan nga awatem ti ayatna, ken kayatna pay nga iburaymo daytoy kadagiti dadduma. Impakdaarna kadagiti disipulona: “Maysa a bilin a baro ti itdek kadakayo, Tapno aggiinnayatkayo iti maysa ken maysa; kas iti panagayatko kadakayo, kasta met aggiinnayatkay koma iti maysa ken maysa. “Gapu itoy mailasindanto a dakayo ti adalak, no adda ayatyo iti maysa ken maysa” (Juan 13:34–35). Kadagiti relasionmo kadagiti miembro ti pamilia ken dadduma pay, kumitaka iti Mangisalakan kas pagwadam. Ikagumaanam ti agayat kas iti panagayatna, nga addaanka iti awan sardayna a pannakipagrikna, kinaanus, ken kinaasi.
Bayat ti panangitultuloymo a mangawat iti naan-anay nga ayat ti Mangisalakan ken bayat ti panangipakitam iti ayat a kas ken ni Cristo kadagiti dadduma, matakuatamto a dumakdakkel ti panagayatmo. Mapadasamto ti rag-o ti kaaddam iti serbisio ti Apo. Ti Espiritu Santo ti agbalinto a kanayon a kadkaduam, a tartarabayennaka iti panagserbisiom ken kadagiti pannakilangenmo kadagiti dadduma. Maisaganakanto a mangsabat iti Apo iti Panangukom, inton gunggonaannaka a mayannurot iti kinaganetgetmo iti aramidna. Insuro ni Mormon:
“No awan ti asi kadakayo, awan ti pategyo, ta ti asi awan pagkamtudanna. Gapuna, agtalekkayo iti panangngaasi, ta daytoy ti kapatgan iti amin, ta adda pagkamtudan ti amin a banag—
“Ngem ti asi nadalus nga ayat ni Cristo, ket agibtur nga agnanayon; ket siasino man a maaddaan iti daytoy iti maudi nga aldaw, agpaayto a pagsayaatanna.
“Gapuna, ay-ayatek a kakabsatko, agkararagkayo iti Ama iti amin a kabaelan ti pusoyo, tapno maaddaankayo iti daytoy nga ayat, nga impaayna iti amin a napudno a pasurot ti Anakna, ni Jesucristo; tapno agbalinkayo nga annak ti Dios; tapno inton agparang, agbalintayonto a kas kenkuana, ta makitatayonto met laeng a kas isu; tapno maaddaantayo itoy a namnama; tapno mapatarnawtayo a kas iti kinatarnawna” (Moroni 7:46–48).