Pannakapakawan
Ibasar dagiti nasantuan a kasuratan ti pannakapakawan iti dua a wagas. Bilinennatayo ti Apo nga agbabawi kadagiti basbasoltayo ket dawatentayo ti pammakawanna. Bilinennatayo pay a mamakawan kadagiti nangpasakit wenno nangdangran kadatayo. Iti kararag ti Apo, balakadannatayo ni Jesus nga idawattayo iti Nailangitan nga Ama a “pakawanennakami kadagiti ut-utangmi a kas met panamakawanmi kadagiti nakautang kadakami” (Mateo 6:12).
Panagkalikagum iti Pammakawan manipud iti Apo
Ti basol ket nadagsen a bakbaklayen. Daytoy ti mangisangbay iti kinakaro ti basol ken ti gura ti pannakaammo a nagaramidtayo a maibusor iti pagayatan ti Ama iti Langit. Daytoy ti mangyeg iti agtultuloy a panakakumikom wenno panagladingittayo bayat ti pannakaamiristayo a gapu kadagiti aramidtayo, mabalin a napasakitantayo dagiti dadduma ken nalapdantayo dagiti bagitayo iti yaawat kadagiti bendision nga insaganan ti Ama nga ited kadatayo.
Gapu iti Pannubbot ni Jesucristo, maawattayo ti pannakapakawan dagiti basbasoltayo babaen ti napudno ken naan-anay a panagbabawi. Ti kinamanagbasol ket mangisangbay iti panagsagaba ken saem, ngem ti pammakawan ti Apo ket mangisangbay iti gin-awa, liwliwa, ken rag-o. Inkari ti Apo:
“Isu a nangibabawi iti basbasolna, isu ti mapakawan, ket siak, ti Apo, diakto idan malagip” (DkK 58:42).
“Uray no dagiti basbasolyo kasda la eskarlata, mapapudawdanto a kasla niebe; nupay no nalabbasitda a kasla carmesi, agbalindanto a kasla napudaw a de lana” (Isaias 1:18).
Mapadasam daytoy a milagro, kasapulam man ti agbabawi kadagiti nadagsen a basbasolmo wenno dagiti inaldaw a pagkapsutan. Kas iti panagpakaasi ti Mangisalakan kadagiti tao idi punganay, agpakpakaasi kenka ita:
“Umaykayo kaniak dakayo amin nga agrigrigat ken madagdagsenan, ta paginanaenkayto.
“Alaenyo ti sangolko kadakayo, ket agsursurokayo kaniak; ta siak naemmaak ken napakumbabaak iti panagpuspusok: ket makasarakkayto iti inana a maipaay kadagiti kararuayo.
“Ta ti sangolko nalaka ken nalag-an ti awitko” (Mateo 11:28–30).
“Saankayo kadi nga agsubli ita kaniak, ket ibabawiyo dagiti basolyo, ket mapasurotkayo tapno agasankayo?
“Wen, pudno kunak kadakayo, no umaykayo kaniak maaddaankayo iti agnanayon a biag. Adtoy, nakatanggaya kadakayo ti manangngaasi nga imak, ket asino man nga umasideg, awatek; ket mabendisionan dagitoy umay kaniak” (3 Nephi 9:13–14).
Para iti pannakailawlawag ti panagbabawi, kitaen iti “Panagbabawi,” dagiti panid 114–119.
Panangpakawan kadagiti Dadduma
Kas pangnayon iti panagkalikagum iti pannakapakawan dagiti basbasoltayo, nasken a natallugodtayo a mangpakawan kadagiti dadduma. Kinuna ti Apo: “Nasken nga agpipinnakawankayo iti tunggal maysa; ta asino man a di mamakawan iti nagbiddutan ti kabsatna agtakderto a makedngan iti imatang ti Apo; ta agtalinaed kenkuana ti nadagdagsen a basol. Siak, ti Apo, pakawanekto ti pakawanek, ngem kadakayo nasken a pakawanenyo ti amin a tao” (DkK 64:9–10).
Kadagiti aginaldaw a kasasaad ti biag, awan duadua a pagbiddutandakanto dagiti dadduma a tao—no dadduma awan nagbasolan ken no dadduma naigagara. Nalaka ti panagbalin a managsakit iti nakem wenno makagura wenno managibales kadagiti kasta a kasasaad, ngem saan a daytoy ti wagas ti Apo. Imbalakad ti Mangisalakan, “Ayatenyo dagiti kabusoryo, [bendisionanyo ida a mangilunod kadakayo, ken agaramidkayo iti naimbag kadagiti manggurgura kadakayo] ket ikarkararaganyo dagiti mangidadanes kadakayo” (Mateo 5:44). Impakitana ti naan-anay a pagwadan ti pammakawan idi adda Isuna iti krus. Iti panangdakamatna kadagiti soldado a Romano a nangilansa Kenkuana, inkararagna, “Ama, pakawanem ida; ta dida ammo ti aramidenda” (Lucas 23:34; kitaen iti Patarus ni Joseph Smith, Lucas 23: 35).
Agkararag para iti pigsa a mangpakawan kadagiti nagbiddut kadakayo. Liklikam dagiti rikna ti gura, sakit ti nakem, wenno panagibales. Kitaem ti nasayaat kadagiti dadduma imbes nga ipamaysam dagiti biddutda ken padakkelem dagiti pagkapsutanda. Bay-am ti Dios a mangkedngan kadagiti makadangran nga aramid dagiti dadduma. Mabalin a narigat a bay-an dagiti nadangran a rikna, ngem maaramidmo daytoy babaen ti tulong ti Apo. Maammuamto a ti pammakawan ti makapaimbag kadagiti nakaro a sugat, a mangsukat iti sabidong ti sinnuppiat ken gura iti talna ken ayat a ti Dios laeng ti makaited.