Relief Society

Binuangay ni Propeta Joseph Smith ti Relief Society idi Marso 17, 1842, idiay Nauvoo, Illinois. Kadagidi nga aldaw a pannakabuangayna, addaan ti Relief Society iti dua a kangrunaan a panggep: mangipaay iti tulong kadagiti napanglaw ken agkasapulan ken mangisalakan kadagiti kararua. Agtultuloy ti organisasion iti agdama, nga agtalinaed a napudno kadagiti sigud a pangiwanwan a pagbatayan. Iti intero a lubong, agtitinnulong dagiti kakabsat iti Relief Society ken dagiti addaan iti priesthood a mangipatungpal iti mision ti Simbaan. Tulonganda ti tunggal maysa bayat ti:

Panangpapigsada kadagiti pammaneknekda maipapan ken ni Jesucristo babaen ti panagkararag ken panagadal iti nasantuan a kasuratan.
Panangsapulda iti naespirituan a pigsa babaen ti panangsurot kadagiti pannignay ti Espiritu Santo.
Panangidatonda iti bagbagida iti panangpapigsa kadagiti kallaysa, pamilia, ken pagtaengan.
Panangsarakda iti kinaindaklan iti kinaina ken rag-o iti kinababai.
Panagragsakda iti panagserbi ken nasayaat nga ar-aramid.
Panagayatda iti biag ken panagsursuro.
Panangitakderda iti kinapudno ken kinalinteg.
Panangkanunongda iti priesthood kas turay ti Dios iti rabaw ti daga.
Panagrag-oda kadagiti bendision ti templo.
Pannakaawatda iti nadiosan a pagtungpalanda ken panagkagumaanda para iti pannakaitan-ok.

No addaka iti Relief Society, maysa a wagas a pakatulongam iti mision ti organisasion ket ti panagawatmo iti naituding nga aramiden nga agserbi kas maysa a visiting teacher. No sarungkaram ken pagserbiam dagiti naidutok kenka a kakabsat a babbai, alaem ti gundaway a mangisuro iti ebanghelio ken mangpatanor iti panaggagayyem. Mainayon iti panagserbi kadagiti indibidual, mabalinmo ti mangakem iti napateg a papel iti panangpapigsa kadagiti pamilia.

Penken dagiti lider kadagiti ward ken branch a maidutok dagiti visiting teacher iti tunggal kabsat a babai nga agtawen iti 18 wenno natataengan. Agsurnad dagiti lider ti priesthood ken Relief Society babaen dagiti visiting teacher tapno tumulongda a mangipaay kadagiti naespirituan ken temporal a kasapulan ti tunggal kabsat a babai.

Kas maysa a kabsat iti Relief Society, maysaka a miembro ti sangalubongan a panagkikinnabsatan dagiti babbai, nga agkaykaysa iti debosion ken ni Jesucristo. Kumappengka kadagiti dadduma pay nga annak a babbai ti Dios kas maysa a babai ti pammati, saguday, pannirigan, ken panangngaasi, nga addaan iti awan duadua a pannakaammo nga addaan ti biagmo iti kaipapanan, panggep, ken turongen. Babaen ti pannakiramanmo iti Relief Society, addaanka kadagiti gundaway nga agragsak iti panagkikinnabsatan ken panagkakadua, mangted iti napnuan kaipapanan a serbisio, mangiburay iti pammaneknekmo ken talentom, ken rumang-ay a naespirituan.